Oʻzbekiston Respublikasi Prezidentining “Oʻzbekiston Qishloq xoʻjaligi fanlari akademiyasini tashkil etish toʻgʻrisida” 1991-yil 11-iyundagi Farmonini bajarish yuzasidan Vazirlar Mahkamasi qaror qiladi:

1. Belgilansinki, Oʻzbekiston Qishloq xoʻjaligi fanlari akademiyasi VASXNIL Oʻrta Osiyo boʻlimining huquqiy vorisi hisoblanadi.

Respublikada joylashgan dehqonchilik ixtisosidagi ilmiy-tadqiqot muassasalari, ularning moddiy va tajriba-ishlab chiqarish bazalari bilan birga, ilovaga muvofiq Oʻzbekiston Qishloq xoʻjaligi fanlari akademiyasi ixtiyoriga berilsin.

2. Oʻzbekiston Qishloq xoʻjaligi fanlari akademiyasining bosh vazifalari etib quyidagilar belgilansin:

respublika dehqonchilik-sanoat kompleksida fan-texnika taraqqiyotini jadallashtirishga qaratilgan fundamental va amaliy tadqiqotlarni rivojlantirish, yer-suv, moddiy-texnika va mehnat resurslaridan oqilona va samarali foydalanish, paxta, meva-sabzavot, chorvachilik va boshqa qishloq xoʻjaligi mahsulotlarini intensiv asosda yetishtirishni koʻpaytirish maqsadida fan va ishlab chiqarishning mustahkam aloqasini taʼminlash;

tabiiy-iqlim sharoitlari, nufus vaziyatining oʻzgarishi, yer va suv resurslari taqchilligining oʻsib borishini hisobga olgan holda Oʻzbekiston dehqonchilik-sanoat kompleksi tarmoqlari rivojlanishi qonuniyatlari va istiqbollarini tadqiq etish;

qishloqda ishlab chiqarish munosabatlarini, qishloq xoʻjaligini yuritish tizimini, dehqonchilik-sanoat kompleksi xoʻjalik mexanizmining iqtisodiy asoslarini, shuningdek, dehqonchilik-sanoat ishlab chiqarishi kooperativlashuvi va integratsiyasining zamonaviy shakllarini, mehnatni tashkil etish va unga haq toʻlashning ilgʻor metodlarini takomillashtirish muammolari boʻyicha tadqiqotlarni kengaytirish va chuqurlashtirish;

qishloq aholisi turmush darajasini oshirish, ularning mehnat va maishiy sharoitlarini, ish bilan samarali band boʻlishini yaxshilash, qishloqni ijtimoiy qayta qurish, atrof-muhit muhofazasi muammolarini tadqiq etish;

jahon fani va amaliyoti yutuqlaridan respublika dehqonchilik-sanoat kompleksini jadal rivojlantirish maqsadida foydalanish uchun ularni oʻrganish va umumlashtirish;

qishloq xoʻjaligi ishlab chiqarishining resurslarni tejovchi, tabiatni muhofaza qiluvchi, xomashyo resurslariga sanoat yoʻli bilan qayta ishlov beruvchi prinsipial yangi texnika va texnologiyalarni yaratish va mavjudlarini takomillashtirish;

gʻoʻza va boshqa qishloq xoʻjaligi ekinlarining dastlabki urugʻchiligini tashkil etish;

jamoa va davlat xoʻjaliklari dehqon (fermer) xoʻjaliklari, dehqonchilik-sanoat kompleksining boshqa korxonalari va tashkilotlari amaliyotida fan, texnika va ilgʻor tajriba yutuqlaridan eng toʻla foydalanishga har tomonlama koʻmaklashish;

Oʻzbekistonning ilmiy muassasalari va oliy oʻquv yurtlarining idoraviy boʻysunishidan qatʼi nazar, ularda olib borilayotgan dehqonchilik-sanoat sohasidagi tadqiqotlarni muvofiqlashtirish va ularga ilmiy-metodik rahbarlikni amalga oshirish;

ilmiy tadqiqotlarni tashkil etishning, tajriba-izlanish ishlarini oʻtkazishning progressiv metodlari va shakllarini egallagan yuqori malakali ilmiy kadrlar (fan doktorlari va nomzodlari) tayyorlash.

3. Oʻzbekiston Qishloq xoʻjaligi fanlari akademiyasining I. H. Joʻrabekov (rais), A. I. Imomaliyev, S. N. Usmonov, T. N. Guskova, V. I. Pleunev, M. Y. Islomov, M. M. Mirzayev, M. R. Nariyans, I. P. Makarov oʻrtoqlardan iborat tarkibdagi tashkiliy qoʻmitasi bir oy muddat ichida Oʻzbekiston Qishloq xoʻjaligi fanlari akademiyasining haqiqiy aʼzolari (akademiklar) va muxbir aʼzolari saylovini oʻtkazish tartibini ishlab chiqsin va tasdiqlash uchun Vazirlar Mahkamasiga taqdim etsin.

4. Oʻzbekiston Qishloq xoʻjaligi fanlari akademiyasi uchun haqiqiy aʼzolar (akademiklar)ning 20 ta va muxbir aʼzolarning 30 ta boʻsh oʻrni belgilansin, haqiqiy aʼzolikka (akademiklikka) nomzodlar uchun cheklangan yosh — 65 yoshgacha, muxbir aʼzolikka nomzodlar uchun — 60 yoshgacha qilib belgilansin.

VASXNILning respublikada ishlovchi haqiqiy aʼzolari (akademiklar) va muxbir aʼzolari belgilangan oʻrin doirasida tegishli ravishda Oʻzbekiston Qishloq xoʻjaligi fanlari akademiyasining akademiklari va muxbir aʼzolari deb hisoblansin.

5. VASXNIL rayosatining Oʻzbekiston Qishloq xoʻjaligi fanlari akademiyasining Prezidenti bir vaqtning oʻzida VASXNIL vitse-prezidenti hisoblanishi toʻgʻrisidagi taklifi qabul qilinsin.

6. Oʻzbekiston Respublikasi Fanlar akademiyasi va uning muassasalari xodimlari uchun belgilangan mehnatga haq toʻlash shartlari va amaldagi moddiy imtiyozlar Oʻzbekiston Qishloq xoʻjaligi fanlari akademiyasi rayosati aʼzolariga, rayosat apparati va akademiyaga qarashli ilmiy-tadqiqot muassasalari jamoalari xodimlariga tatbiq etilsin.

7. Oʻzbekiston Respublikasi Iqtisodiyot qoʻmitasi, Moliya vazirligi Oʻzbekiston Qishloq xoʻjaligi fanlari akademiyasi bilan birgalikda bir oy muddat ichida akademiya boshqaruv apparati sonini, ularni saqlashga hamda fundamental ilmiy-tadqiqot va tajriba-konstruktorlik ishlarini mablagʻ bilan taʼminlashga respublika budjetidan mablagʻlarning zarur hajmlarini aniqlasinlar.

8. Oʻzbekiston Qishloq xoʻjaligi fanlari akademiyasiga:

izlanish va amaliy tadqiqotlar oʻtkazish, eksperimental ishlarni keng joriy etish, Qishloq xoʻjaligi vazirligi, boshqa manfaatdor idoralar respublika dehqonchilik sanoat kompleksining korxonalari va tashkilotlari bilan shartnoma tuzish asosida yuqori malakali ilmiy kadrlar tayyorlash;

akademiyaning ilmiy-tadqiqot muassasalari, eksperimental bazalari va davlat xoʻjaliklarini moddiy-texnika resurslari bilan markazlashgan tartibda taʼminlash uchun xoʻjalik hisobidagi “Oʻzagroakademtaʼminot” bazasini tashkil etish tavsiya qilinsin,

9. Mazkur qarorning bajarilishini nazorat qilish Oʻzbekiston Respublikasi Prezidenti huzuridagi Vazirlar Mahkamasi Raisining birinchi oʻrinbosari oʻrtoq I. H. Joʻrabekov zimmasiga yuklatilsin.

Shreder nomidagi ishlab chiqarish-ilmiy birlashmasi

“Soyuzxlopok” ilmiy-ishlab chiqarish birlashmasi

“Gʻoʻza seleksiyasi va urugʻchiligi” ilmiy-ishlab chiqarish birlashmasi

“Don” ilmiy-ishlab chiqarish birlashmasi

“Plemelita” ilmiy-ishlab chiqarish birlashmasi

“Ipak” ilmiy-ishlab chiqarish birlashmasi

“Oʻrtaosiyoqishloqxoʻjalikmexanizatsiyasi ilmiy-ishlab chiqarish birlashmasi

Qoraqalpogʻiston Respublikasidagi “Paxta” ilmiy-ishlab chiqarish birlashmasi

Oʻzbekiston veterinariya ilmiy-tadqiqot instituti

Oʻzbekiston sholikorlik ilmiy-tadqiqot instituti

Oʻrta Osiyo qishloq xoʻjaligini tashkil etish va uning iqtisodiyoti ilmiy-tadqiqot instituti

Oʻzbekiston sabzavot-poliz ekinlari va kartoshkachilik ilmiy-tadqiqot instituti

Oʻrta Osiyo oʻsimliklarni himoya qilish ilmiy-tadqiqot instituti

Samarqand shahridagi qorakoʻlchilik ilmiy-tadqiqot instituti