|
Ҳужжат кучини йўқотган " " 16.09.2022
|
Ўзбекистон Республикаси Молия вазирлиги
Ўзбекистон Республикаси Меҳнат ва аҳолини ижтимоий муҳофаза қилиш вазирлигининг
Ўзбекистон Республикаси Меҳнат ва аҳолини ижтимоий муҳофаза қилиш вазирлигининг
Қарори
ЎЗБЕКИСТОН РЕСПУБЛИКАСИ ИЧКАРИСИДАГИ ХИЗМАТ САФАРЛАРИ ТЎҒРИСИДА ЙЎРИҚНОМАНИ ТАСДИҚЛАШ ҲАҚИДА
[Ўзбекистон Республикаси Адлия вазирлиги томонидан 2003 йил 29 августда 1268-сон билан давлат рўйхатидан ўтказилган]
LexUZ шарҳиМазкур қарор Ўзбекистон Республикаси Молия вазирлиги ва Бандлик ва меҳнат муносабатлари вазирлигининг 2022 йил 8 сентябрдаги 48-сонли ва 29 августдаги 26-2022Q/Q-сонли ««Ўзбекистон Республикаси ичкарисидаги хизмат сафарлари тўғрисида йўриқномани тасдиқлаш ҳақида»ги қарор, шунингдек унга ўзгартириш ва қўшимчаларни ўз кучини йўқотган деб топиш тўғрисида»ги қарорига (рўйхат рақами 1268-3, 16.09.2022 й.) асосан ўз кучини йўқотган.
Ўзбекистон Республикаси Меҳнат кодекси ва Ўзбекистон Республикаси Вазирлар Маҳкамасининг 1993 йил 1 февралдаги 34-ф-сонли ва 1993 йил 16 августдаги 287-ф-сонли фармойишларига мувофиқ Ўзбекистон Республикаси Молия вазирлиги ва Меҳнат ва аҳолини ижтимоий муҳофаза қилиш вазирлиги қарор қиладилар:
1. Илова қилинаётган «Ўзбекистон Республикаси ҳудудидаги хизмат сафарлари тўғрисидаги Йўриқнома» тасдиқлансин.
2. Мазкур қарор Ўзбекистон Республикаси Адлия вазирлигида давлат рўйхатидан ўтган кундан бошлаб ўн кун мобайнида кучга киритилсин.
3. Мазкур қарор кучга кирган кундан бошлаб қуйидагилар ўз кучини йўқотган деб ҳисоблансин:
Ўзбекистон Республикаси Молия вазирлиги ва Ўзбекистон Республикаси Меҳнат вазирлигининг 1993 йилнинг 19 апрелдаги 28-сон ва 497/И-1-01-сон билан тасдиқланган (Ўзбекистон Республикаси Вазирлар Маҳкамасининг 1993 йил 1 февралдаги 34-ф-фармойишига асосан нашр этилган) МДҲ мамлакатлари ҳудудида хизмат сафарлари тўғрисидаги Йўриқнома;
Ўзбекистон Республикаси Молия вазирлиги ва Ўзбекистон Республикаси Меҳнат вазирлигининг 1993 йилнинг 19 апрелдаги 28-сонли ва 497/И-1-01-сонли МДҲ мамлакатлари ҳудудида хизмат сафарлари тўғрисидаги Йўриқномага ўзгартиришлар киритиш тўғрисидаги 1993 йил 29/22 декабрдаги 92-сон ва 1329/11-сонли хати.
Молия вазири М. НУРМУРОДОВ
Тошкент ш.,
2003 йил 24 июль,
83-сон
Меҳнат ва аҳолини ижтимоий муҳофаза қилиш вазири О. ОБИДОВ
Тошкент ш.,
2003 йил 24 июль,
7/12-сон
Ўзбекистон Республикаси Адлия вазирлигида 2003 йил 29 августда 1268-сон билан рўйхатга олинган Ўзбекистон Республикаси Молия вазирлиги ва Меҳнат ва аҳолини ижтимоий муҳофаза қилиш вазирлигининг 2003 йил 24 июлдаги 83-сон ва 7/12-сонли қарори билан
«ТАСДИҚЛАНГАН»
Ўзбекистон Республикаси ҳудудидаги хизмат сафарлари тўғрисида
ЙЎРИҚНОМА
Мазкур Йўриқнома Ўзбекистон Республикаси Меҳнат кодекси Ўзбекистон Республикаси Вазирлар Маҳкамасининг 1993 йил 1 февралдаги 34-ф-сонли ва 1993 йил 16 августдаги 287-ф-сонли фармойишларига асосан ишлаб чиқилган ва мулк шаклидан қатъи назар Ўзбекистон Республикаси ҳудудида жойлашган барча ташкилотларга тааллуқлидир.
1. Хизмат сафари деб ходимни ташкилот, муассаса, бирлашма, корхона раҳбарини фармойишлари бўйича, ўзининг доимий иш жойидан ташқарида хизмат топшириғини бажариш учун бошқа жойга, маълум бир муддатга юборилиши (бориб келиш) тушунилади.
Ташкилотни таркибига кирувчи филиаллар (шахобчалар), участкалар ва бошқа бўлинмалар бошқа ерда жойлашган ҳолларда доимий иш жойи бўлиб меҳнат шартномасида белгиланган ишлаб чиқариш бўлинмаси ҳисобланади.
Доимий иши йўлда ёки кўчиб юриш билан боғлиқ бўлган, ёхуд доимий ҳаракатланувчи тусга эга бўлган ходимларни хизмат юзасидан бориб келишлари хизмат сафари ҳисобланмайди.
2. Ходимларни хизмат сафарларига юбориш ушбу ташкилотларни бошлиқлари томонидан амалга оширилади, буйруқ ва мазкур Йўриқноманинг 1-иловасига мувофиқ шаклдаги хизмат сафари гувоҳномасини бериш билан расмийлаштирилади.
3. Ходимларни юқори ташкилотларга (бўйсуниш тартибида) хизмат сафарларига юбориш ушбу ташкилотларни раҳбарларини чақириғига ёки улар билан келишилган ҳолда амалга оширилади.
4. Ходимларни хизмат сафари муддати ташкилот раҳбари томонидан белгиланади ва ҳар бир ҳолат учун йўлдаги вақтни ҳисобга олмаган ҳолда 40 кундан кўп бўлмаслиги керак.
Ушбу тартиб шунингдек ходимларни тафтиш ва текширишларни ўтказиш учун хизмат сафарига юборишга ҳам тааллуқлидир.
Монтаж, созлаш ва қурилиш ишларини бажариш учун юбориладиган ходимлар, раҳбарлар ва мутахассисларни хизмат сафарлари муддати 12 ойдан кўп бўлиши мумкин эмас.
Хизмат сафари муддатини узайтириш истисно тариқасида фақат хизмат сафарига юборган ташкилот раҳбарининг ёзма рухсатномасига асосан рухсат берилади.
5. Хизмат сафарига юборилган жойда ҳақиқатда ўтказилган вақт хизмат сафари жойига келган ва хизмат сафари жойидан кетган кунларни хизмат сафари гувоҳномасига белги қўйиш орқали аниқланади.
Ташкилотларда хизмат сафарларига кетаётган шахсларни ва ушбу ташкилотга хизмат сафарига келаётган шахсларни рўйхатга олиш мазкур Йўриқномани 2 ва 3-иловаларига биноан шакллардаги махсус журналларда юритилади. Ташкилотни раҳбари хизмат сафарларига юборилаётган, хизмат сафарига кетаётган шахсларни рўйхатга олиш журналини юритиш ва хизмат сафарлари гувоҳномасига белги қўйиш учун жавобгар бўлган шахсни буйруқ чиқариш йўли билан тасдиқлайди.
Бунда махсус журналлар электрон кўринишда юритилиши мумкин.
(5-банд Ўзбекистон Республикаси Молия вазирлиги ҳамда Бандлик ва меҳнат муносабатлари вазирлигининг 2019 йил 12 августдаги 92 ва 34-2019-ҚҚ-сонли қарорига (рўйхат рақами 1268-1, 13.09.2019 й.) асосан хатбоши билан тўлдирилган)
6. Хизмат сафарига чиқиш куни бўлиб транспорт воситасида 24 соат ичидаги вақт, 00 дан ва ундан кечроқ вақт — кейинги сутка ҳисобланади, келиш куни эса — транспорт воситасида доимий иш жойига келиш куни ҳисобланади.
Агар станция, соҳил (пристань), аэропорт аҳоли яшайдиган ҳудуддан ташқарида жойлашган бўлса, станция, соҳил (пристань), аэропортгача етиб олиш учун кетадиган вақтни ҳисобга олиш керак бўлади. Худди шундай тарзда ходимни доимий иш жойига етиб келадиган куни ҳисобланади.
7. Хизмат сафарида бўлган ходимларга улар юборилган корхоналардаги иш вақти режими ва дам олиш вақтлари тааллуқли бўлади. Хизмат сафари вақтида фойдаланилмаган дам олиш кунлари, бошқа дам олиш кунлари хизмат сафаридан қайтганда тикланмайди.
Агар ходим атайдан дам олиш ёки байрам кунларида ишлаш учун хизмат сафарига юборилган бўлса, ушбу кунларда ишлагани учун амалдаги қонунчиликка мувофиқ компенсация тўланади.
Агар ходим маъмуриятни фармойишига биноан хизмат мажбуриятини бажариш учун дам олиш кунида хизмат сафарига кетса, унга хизмат сафаридан қайтгач белгиланган тартибда бошқа дам олиш куни берилади.
Хизмат сафарига кетиш ва хизмат сафаридан қайтиш кунларида ишга чиқиш масаласи маъмурият билан келишилган ҳолда ҳал қилинади.
8. Хизмат сафарига юборилган ходимни хизмат сафарида бўлган муддатида ва йўлда бўлган муддатда иш жойи (лавозими), ишбайлар учун ўртача иш ҳақи ёки лавозим маоши ёки ходимларни бошқа тоифалари учун ставкалари сақланиб қолади.
Хизмат сафарига юборилган ходимнинг иш ҳақи унинг илтимосига кўра у юборилган корхонанинг ҳисобварағига жўнатилади.
Ўриндошлик асосида ишлаётган шахс хизмат сафарига юборилганда унинг ўртача иш ҳақи уни хизмат сафарига юборган ташкилотда сақланади. Агар хизмат сафарига бир вақтни ўзида ҳам асосий ҳам ўриндошлик асосидаги иши бўйича хизмат сафарига юборилганда иш ҳақи ҳар иккала лавозим бўйича сақланади, хизмат сафарига ҳақ тўлаш бўйича харажатлар эса хизмат сафарига юборувчи ташкилотларни ўзаро келишувига биноан тақсимланади.
Ташқи ўриндошлик асосида ишлаётган шахс хизмат сафарига юборилганда унинг ўртача иш ҳақи уни хизмат сафарига юборган ташкилотда сақланади, ички ўриндошлик асосида ишлаётган шахс хизмат сафарига юборилганда эса ўртача иш ҳақи асосий ва ўриндошлик асосидаги лавозим бўйича сақланади.
Ходимнинг хизмат сафари даврида тариф ставкалари, лавозим маошлари миқдорлари ошган ҳолларда, ташкилотнинг иш кунлари меҳнатга ҳақ тўлашнинг янги шартларида ҳақиқатда ишлаган кунларига тўғри келадиган сони учун меҳнатга ҳақ тўловлари қайта ҳисобланади.
(8-банд Ўзбекистон Республикаси Молия вазирлиги ҳамда Бандлик ва меҳнат муносабатлари вазирлигининг 2019 йил 12 августдаги 92 ва 34-2019-ҚҚ-сонли қарорига (рўйхат рақами 1268-1, 13.09.2019 й.) асосан хатбошилар билан тўлдирилган)
9. Хизмат сафарига юборилган ходимга турар жой ижараси, хизмат сафари жойига бориш ва иш жойига қайтиш харажатлари қопланади, шунингдек кундалик харажатлар тўланади.
Хизмат сафари билан боғлиқ бўлган қўшимча харажатлар (телефонда гаплашиш, телеграф харажатлари ва бошқалар) хизмат сафарига юборилган шахсга тасдиқловчи ҳужжатлар мавжуд бўлган тақдирда тўланади.
10. Хизмат сафарига юборилган жойга бориш ва доимий иш жойига қайтиш билан боғлиқ бўлган йўл харажатлари хизмат сафарига юборилган шахсга қуйидаги миқдорларда қопланади:
умумий фойдаланиладиган транспортни барча турларида юриш (таксидан ташқари) қиймати;
транспортда йўловчиларни мажбурий давлат суғурталаш бўйича тўловлар;
йўлда юриш ҳужжатларини олдиндан сотиш, самолёт ва поездларда жойларни бронлаш хизматлари бўйича тўловларни тасдиқловчи ҳужжатлар мавжуд бўлган тақдирда;
умумий фойдаланиладиган транспорт билан (таксидан ташқари) станциягача, соҳилгача (пристангача), аэропортгача етиб олиш харажатлари, агар улар аҳоли яшайдиган ҳудуддан ташқарида жойлашган бўлса. Истисно тариқасида (кечки поезд, умумий фойдаланиладиган транспорт йўқ бўлган тақдирда) ташкилот раҳбарига таксида юрганлик учун ҳақ тўлаш ҳуқуқи берилади.
Йўлда кўрпа-тўшак буюмларидан фойдаланганлик учун харажатлар тасдиқловчи ҳужжатларсиз ҳақ тўлашга қабул қилинади.
Йўл ҳужжатлари мавжуд бўлмаганда, бюджет ташкилотлари ходимлари учун хизмат сафари йўлкирасига ҳақ тўлаш ҳар бир километрга базавий ҳисоблаш миқдорининг 0,08 фоизи миқдорида амалга оширилади.
(10-банднинг еттинчи хатбошиси Ўзбекистон Республикаси Молия вазирлиги ҳамда Бандлик ва меҳнат муносабатлари вазирлигининг 2019 йил 12 августдаги 92 ва 34-2019-ҚҚ-сонли қарори (рўйхат рақами 1268-1, 13.09.2019 й.) таҳририда)
Йўл ҳужжатлари мавжуд бўлмаганда, бошқа ташкилотлар ходимлари учун жамоа келишуви (шартномалари), меҳнат шартномасида кўзда тутилган, бироқ ҳар бир километрга базавий ҳисоблаш миқдорининг 0,08 фоизидан кам бўлмаган миқдорларда тўланади.
Километрлар миқдори 500 метр ва ундан ортиқ бўлган ҳолатларда, кўп томонга яхлитланади.
Километрлар миқдори 500 метрдан кам бўлган ҳолатларда, кам томонга яхлитланади.
(10-банд Ўзбекистон Республикаси Молия вазирлиги ҳамда Бандлик ва меҳнат муносабатлари вазирлигининг 2019 йил 12 августдаги 92 ва 34-2019-ҚҚ-сонли қарорига (рўйхат рақами 1268-1, 13.09.2019 й.) асосан хатбошилар билан тўлдирилган)
11. Хизмат сафарида ва йўлда бўлган вақт учун кундалик харажатлар хизмат сафарига юборилган ишларга жамоа шартномалари, жамоа келишувлари ва меҳнат шартномаларида кўзда тутилган миқдорларда, лекин қуйидаги миқдорлардан кам бўлмаган ҳолда белгиланади (республика бўйича ўрнатилган базавий ҳисоблаш миқдорига нисбатан коэффициентларда):
(11-банднинг биринчи хатбошиси Ўзбекистон Республикаси Молия вазирлиги ҳамда Бандлик ва меҳнат муносабатлари вазирлигининг 2019 йил 12 августдаги 92 ва 34-2019-ҚҚ-сонли қарори (рўйхат рақами 1268-1, 13.09.2019 й.) таҳририда)
Тошкент шаҳрида, шаҳарлар — вилоятлар марказларида — 0,1;
бошқа шаҳарлар ва аҳоли яшайдиган пунктларда — 0,08.
Ушбу кўрсатилган харажатларни қоплаш ҳақиқатда қилинган харажатларни ҳужжатлар билан тасдиқлашсиз амалга оширилади.
12. Хизмат сафари жойидаги турар жойни ижарага олиш бўйича харажатлар хизмат сафарига юборилган ходимни келиш ва кетиш кунлари бўйича ҳақиқатдаги харажатлар, шунингдек тасдиқловчи ҳужжатлар мавжуд бўлган тақдирда меҳмонхоналарда кўрсатиладиган қўшимча хизматлар (жойларни бронлаш, дазмолдан фойдаланиш, сақлаш камерасидан, телевизор, музлатгич, идиш-товоқ, алоқа хизматидан фойдаланиш)га ҳақ тўлаш харажатлари қопланади.
(12-банднинг биринчи хатбошиси Ўзбекистон Республикаси Молия вазирлиги ҳамда Бандлик ва меҳнат муносабатлари вазирлигининг 2019 йил 12 августдаги 92 ва 34-2019-ҚҚ-сонли қарори (рўйхат рақами 1268-1, 13.09.2019 й.) таҳририда)
Меҳмонхоналарни люкс-номерларида яшаганлигини тасдиқловчи ҳужжатлар тақдим этилганда турар жойни олиш бўйича ҳақ тўлаш ушбу турар жой қийматининг 70 фоизигача миқдори бюджет маблағлари ҳисобидан, қолган қисми эса бюджет ташкилотларининг бюджетдан ташқари маблағлари ҳисобидан амалга оширилади.
(12-банднинг иккинчи хатбошиси Ўзбекистон Республикаси Молия вазирлиги ҳамда Бандлик ва меҳнат муносабатлари вазирлигининг 2019 йил 12 августдаги 92 ва 34-2019-ҚҚ-сонли қарори (рўйхат рақами 1268-1, 13.09.2019 й.) таҳририда)
Турар жойни ижарага олганлик бўйича харажатларни тасдиқловчи ҳужжатлар мавжуд бўлмаган ҳолларда, ҳар бир сутка учун белгиланган базавий ҳисоблаш миқдорини 20 фоизи миқдорида қопланади.
(12-банднинг учинчи хатбошиси Ўзбекистон Республикаси Молия вазирлиги ҳамда Бандлик ва меҳнат муносабатлари вазирлигининг 2019 йил 12 августдаги 92 ва 34-2019-ҚҚ-сонли қарори (рўйхат рақами 1268-1, 13.09.2019 й.) таҳририда)
Хизмат сафарига юборилган ходимга шунингдек истисно тариқасида, тасдиқловчи ҳужжатлар мавжуд бўлганда, ташкилот раҳбарининг рухсати билан ҳаво, темир йўл, сув ва умумий фойдаланишдаги автомобил транспортида багажни олиб ўтиш билан боғлиқ харажатлар қопланади.
13. Хизмат сафарига юборилган ходим ўзининг доимий иш жойига ҳар куни қайтиш имкониятига эга бўлса, у ҳолда кундалик харажатлар тўланмайди. Ходимни хизмат сафарига юборилган жойдан ўзининг доимий равишда яшайдиган жойига ҳар куни қайтиши мумкинлиги масаласи хизмат сафарига юборган ташкилотни раҳбари томонидан масофанинг узоқлиги, транспорт алоқаси шароити, бажариладиган топшириқни туси, ходим учун дам олиш шароитларини яратиш кабиларни ҳисобга олган ҳолда рухсат берилади.
14. Хизмат сафари даврида хизмат сафарига юборилган ходим вақтинчалик меҳнат қобилиятини йўқотган ҳолларда, унга умумий асосларда турар жой хонасини ижараси бўйича харажатлар қопланади (хизмат сафарига юборилган ходим стационар даволанишда бўлган ҳоллар бундан мустасно) ва унга соғлиғи ҳолатига кўра зиммасига юклатилган хизмат топшириғини бажариш имкониятига эга бўлмаган барча давр мобайнида ёки ўзининг доимий яшаш жойига қайтгунича, лекин икки ойдан кўп бўлмаган муддатга кундалик харажатлар тўланади.
Хизмат сафарига юборилган ходимни вақтинчалик меҳнат қобилиятини йўқотиши, шунингдек соғлиғи ҳолати бўйича ўзининг доимий яшаш жойига қайтиш имкониятини йўқлиги белгиланган тартибда тасдиқланган бўлиши керак.
Вақтинчалик меҳнат қобилиятини йўқотган давр учун хизмат сафарига юборилган ходимга умумий асосларда вақтинчалик меҳнатга лаёқатсизлик нафақаси тўланади. Вақтинчалик меҳнатга лаёқатсизлик кунлари хизмат сафари муддатига қўшилмайди.
15. Хизмат сафарига юбориладиган ходимга хизмат сафарига кетишдан олдин мазкур Йўриқномани 10 — 12-бандларида кўзда тутилган миқдорларда кундалик, йўл харажатлари, турар жойни ижарага олиш харажатлари чегарасида пул кўринишидаги аванс (бўнак) тўланади. Ходим хизмат сафаридан қайтган кундан эътиборан уч иш куни мобайнида аванс (бўнак) ҳисоботини тақдим қилиши шарт. Ушбу ҳисоботга белгиланган тартибда расмийлаштирилган хизмат сафари гувоҳномаси ва хизмат сафарида ҳақиқатда қилинган харажатларни тасдиқловчи ҳужжатлар илова қилинади.
(15-банд Ўзбекистон Республикаси Молия вазирлиги ҳамда Бандлик ва меҳнат муносабатлари вазирлигининг 2019 йил 12 августдаги 92 ва 34-2019-ҚҚ-сонли қарори (рўйхат рақами 1268-1, 13.09.2019 й.) таҳририда)
16. Монтаж, созлаш ва қурилиш ишларни бажариш учун хизмат сафарига юборилган ходимлар, раҳбарлар ва мутахассисларга мазкур Йўриқноманинг 11-бандида кўзда тутилган меъёрлар бўйича икки ой мобайнида кундалик харажатлар тўланади. Икки ойдан ортиқ муддатда хизмат сафарида бўлган вақт учун кундалик харажатлар ўрнига иш ҳақи ёки лавозим маошига тариф ставкасини 50% миқдорида, лекин сутка учун мазкур Йўриқноманинг 11-бандида белгиланган меъёрдан юқори бўлмаган устама белгиланади.
Қуйидаги ходимлар монтаж, созлаш ва қурилиш ишларини амалга ошириш учун хизмат сафарига юборилган ҳолларда уларга кундалик харажатлар ўрнига тариф ставкасини ёки лавозим маошини юқорида кўрсатилган миқдорларда устамалар тўланмайди:
монтаж, созлаш ва қурилиш ишлари амалга ошириладиган жойда ишга олинган;
амалдаги қонунчиликда кўзда тутилган шартлар асосида бошқа жойга ўтказиш тартибида юборилган;
меҳнат таътилида бўлган вақтда, шунингдек сабабсиз ҳолда ишга чиқмаган кунларда;
улар томонидан монтаж, созлаш ва қурилиш ишлари амалга ошириладиган жойдан ташқарида давлат ёки жамоат ишларини бажариш вақтида;
монтаж, созлаш ва қурилиш ишларини бажарилиши назоратини амалга ошириш учун хизмат сафарига юборилган.
Кундалик харажатлар ўрнига тариф ставкаси ёки лавозим маошидан фоиз миқдорида иш ҳақига устама тўлаш ходимни монтаж, созлаш ва қурилиш ишларида иштирок этган ҳар бир календар кун учун амалга оширилади.
Тўлиқ бўлмаган ой учун кўрсатилган устамани ҳисоблашдан аввал устама тўлиқ ой учун белгиланади, сўнгра ушбу сумма мазкур ойдаги календар кунлар сонига бўлинади ва ходимни монтаж, созлаш ва қурилиш ишларида бўлган кунлари сонига кўпайтирилади.
Монтаж, созлаш ва қурилиш ишларини бажариш учун хизмат сафарига юборилган ходимлар, раҳбарлар ва мутахассислар бепул турар-жой билан таъминланиши мумкин. Бепул турар жой берилмаган ҳолларда, турар жойни ижарага олиш билан боғлиқ харажатлар мазкур Йўриқноманинг 12-бандида кўзда тутилган меъёрлар бўйича қопланади.
17. Агар касал бўлиб қолган ходим монтаж, созлаш ва қурилиш ишлари олиб борилаётган жойдан ташқарида яшаса, у ҳолда иш ҳақи лавозим маоши ёки тариф ставкасига фоиз миқдоридаги устама тўланмайди.
18. Вазирликлар, идоралар, корхоналар, ташкилотлар ва муассасалар хизмат сафарлари тўғрисидаги амалдаги қонунчиликка қатъий амал қилишлари керак ва ушбу мақсадларда сарфланадиган маблағларни тежаш режимига риоя этилишини таъминлашлари лозим.
Ўзбекистон Республикаси Вазирлар Маҳкамасининг 1999 йил 5 февралдаги 54-сон билан тасдиқланган «Маҳсулот (ишлар, хизматлар)ни ишлаб чиқариш ва сотиш харажатлари таркиби ҳамда молиявий натижаларни шакллантириш тартиби тўғрисидаги низом»га мувофиқ, хўжалик субъекти раҳбарини қарорига биноан ишлаб чиқариш ва бошқарув ходимлари учун мазкур Йўриқномада кўзда тутилган нормадан ортиқча хизмат сафарлари харажатлари фойда солиғи бўйича солиқ солинадиган базага ва жисмоний шахсни солиқ солинадиган даромадига қўшилади.
19. Хизмат сафарларига маблағларни сарфлаш устидан назорат молия органлари томонидан амалга оширилади.
20. Мазкур Йўриқнома Ўзбекистон касаба уюшмалари Федерациясининг Кенгаши билан келишилган.
Ўзбекистон касаба уюшмалари Федерациясининг Кенгаши раиси Д.Н. ЖАХОНГИРОВА
Тошкент ш.,
2003 йил 22 июль
Ўзбекистон Республикаси ҳудудидаги хизмат сафарлари тўғрисида Йўриқномага
1-ИЛОВА
1-ИЛОВА
| Берилди _________________________________________________________ | |
|
(фамилияси, исми, отасининг исми) | |
| ________________________________________________________________ | |
|
(хизмат сафари гувоҳномаси берилган орган номи) | |
| _____________________________________________ хизмат сафарига юборилган | |
|
хизмат сафари пункти | |
| Хизмат сафари муддати «____» куни 20___й. «___» ___________дан 20__й. «___» _______________гача. | |
| Асос: 20___й. «____» _____________даги ____-сонли буйруқ | |
| ____________серия __________________рақамлипаспорт тақдим этилган тақдирда ҳақиқий. | |
М.Ў. |
|
| | Орқа томони |
| Белгиланган манзилга етиб бориш ва у ердан қайтиш белгилари: | |
| Жўнади___________________ 20___й. «____» ____________ |
Жўнади ___________________ 20___й. «____» ____________ |
| Муҳир Имзо _______________ Жўнади ___________________ 20___й. «____» ____________ Муҳир Имзо _______________ |
Муҳир Имзо _______________ Жўнади ___________________ 20___й. «____» ____________ Муҳир Имзо _______________ |
| Жўнади ___________________ 20___й. «____» ____________ |
Жўнади ___________________ 20___й. «____» ____________ |
| Муҳир Имзо _______________ | Муҳир Имзо _______________ |
Изоҳ: Бир неча кунларга юборилганда кетиш ва келиш алоҳида белгиланади.
Тадбиркорлик субъектлари учун муҳр билан тасдиқлаш талаб этилмайди.
(изоҳ Ўзбекистон Республикаси молия вазирлиги ва Бандлик ва меҳнат муносабатлари вазирлигининг 2020 йил 19 июндаги 27 ва 23-2020 қ/қ-сонли қарорига (рўйхат рақами 1268-2, 08.07.2020 й.) асосан хатбоши билан тўлдирилган — Қонун ҳужжатлари маълумотлари миллий базаси, 08.07.2020 й., 10/20/1268-2/1042-сон)
Ўзбекистон Республикаси ҳудудидаги хизмат сафарлари тўғрисида Йўриқномага
2-ИЛОВА
2-ИЛОВА
|
_________________________________________________ дан бирлашув, корхона, муассаса, ташкилот номи хизмат сафарига юборилаётган ходимларни ҳисобга олиш ЖУРНАЛИ | |||||||
|
Т/р |
Хизмат сафарига юборилган ходимнинг фамилияси, исми, отасининг исми |
Лавозими |
Хизмат сафари гувоҳномасининг рақами |
Хизмат сафари гувоҳномасини имзолаган ходим лавозими, Ф.И.О. |
Сана |
Хизмат сафари гувоҳномасини олганлиги ҳақида имзо | |
|
Ҳақиқатда кетиш |
Ҳақиқатда келиш | ||||||
|
1 |
2 |
3 |
4 |
5 |
6 |
7 |
8 |
|
|
|||||||
Ўзбекистон Республикаси ҳудудидаги хизмат сафарлари тўғрисида Йўриқномага
3-ИЛОВА
3-ИЛОВА
|
______________________________________________________ номи хизмат сафаридан қайтиб келган ходимларни ҳисобга олиш ЖУРНАЛИ | |||||
|
Т/р |
Хизмат сафарига юборилган ходимнинг Ф.И.О. |
Лавозими |
Хизмат сафари гувоҳномаси берилган бирлашув, корхона, муассаса, ташкилотлар номлари |
Етиб келиш санаси |
Сафарга кетиш санаси |
|
1 |
2 |
3 |
4 |
5 |
6 |
