Ўзбекистон Республикаси соғлиқни сақлаш вазирининг
буйруғи
Гиёҳвандлик воситалари, психотроп моддалар ва прекурсорларни сақлаш, бериш, сотиш, тақсимлаш, ҳисобга олиш шартлари тўғрисидаги низомни тасдиқлаш ҳақида
[Ўзбекистон Республикаси Адлия вазирлиги томонидан 2025 йил 27 январда рўйхатдан ўтказилди, рўйхат рақами 3604]
Ўзбекистон Республикасининг «Гиёҳвандлик воситалари ва психотроп моддалар тўғрисида»ги Қонунига мувофиқ буюраман:
1. Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низом 1-иловага мувофиқ тасдиқлансин.
2. Айрим идоравий норматив-ҳуқуқий ҳужжатлар 2-иловага мувофиқ ўз кучини йўқотган деб топилсин.
3. Мазкур буйруқ Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил, Ўзбекистон Республикаси Президенти Администрацияси ҳузуридаги Наркотикларни назорат қилиш миллий маркази ва Ўзбекистон Савдо-саноат палатаси билан келишилган.
4. Ушбу буйруқ расмий эълон қилинган кундан эътиборан кучга киради.
Вазир А. ХУДАЯРОВ
Тошкент ш.,
2024 йил 25 декабрь,
36-сон
Келишилди:
Наркотикларни назорат қилиш миллий маркази директори Р. МАМАТОВ
2024 йил 5 декабрь
Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил Д. КАСИМОВ
2024 йил 4 декабрь
Савдо-саноат палатаси раиси Д. ВАХАБОВ
2024 йил 26 ноябрь
Ўзбекистон Республикаси соғлиқни сақлаш вазирининг 2024 йил 25 декабрдаги 36-сон буйруғига 1-ИЛОВА
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги
НИЗОМ
Мазкур Низом гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартибини белгилайди.
Ушбу Низом Ўзбекистон Республикаси Соғлиқни сақлаш вазирлиги томонидан берилган лицензия асосида (Ўзбекистон Республикаси Президентининг ёки Вазирлар Маҳкамасининг қарорлари билан ташкил этилган давлат муассасалари, башарти Ўзбекистон Республикаси Президентининг ёки Вазирлар Маҳкамасининг қарорларида фаолиятнинг лицензияланадиган турларини амалга ошириш назарда тутилган ҳоллар бундан мустасно) гиёҳвандлик воситалари, психотроп моддалар ва прекурсорлар муомаласи билан боғлиқ фаолият билан шуғулланувчи юридик шахсларга (бундан буён матнда юридик шахслар деб юритилади) нисбатан татбиқ этилади.
1-боб. Умумий қоидалар
1. Ушбу Низомда қуйидаги асосий тушунчалар қўлланилади:
гиёҳвандлик воситалари — гиёҳвандлик воситалари рўйхатига киритилган ва Ўзбекистон Республикасида назоратга олинадиган, келиб чиқиши синтетик ёки табиий моддалар, таркибида гиёҳвандлик моддаси бўлган препаратлар ва ўсимликлар;
психотроп моддалар — психотроп моддалар рўйхатига киритилган ва Ўзбекистон Республикасида назоратга олинадиган, келиб чиқиши синтетик ёки табиий моддалар;
прекурсорлар — прекурсорлар рўйхатига киритилган ва Ўзбекистон Республикасида назоратга олинадиган, гиёҳвандлик воситаларини, уларнинг аналогларини ва психотроп моддаларни тайёрлаш учун фойдаланиладиган моддалар.
2. Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш Вазирлар Маҳкамасининг 2003 йил 29 октябрдаги 472-сон «Ўзбекистон Республикасида гиёҳвандлик воситалари, психотроп моддалар ва прекурсорларнинг муомалада бўлиш тартибини белгилаб берувчи низомларни тасдиқлаш тўғрисида»ги қарорига асосан белгиланадиган юридик шахсларнинг эҳтиёжи доирасида амалга оширилади.
Бунда, гиёҳвандлик воситалари, психотроп моддалар ва прекурсорларга белгиланган юридик шахсларнинг эҳтиёжи асосида Соғлиқни сақлаш вазирлиги томонидан гиёҳвандлик воситалари, психотроп моддалар ва прекурсорлар юридик шахсларга тақсимланади.
3. Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олишга масъул шахс (бундан буён матнда масъул шахс деб юритилади) гиёҳвандлик воситалари, психотроп моддалар ва прекурсорларга оид норматив-ҳуқуқий ҳужжатлар билан танишган бўлиши керак.
4. Тиббиёт амалиётида қўлланилишига рухсат этилган дори воситалари, тиббий буюмлар ва тиббий техника давлат реестрига киритилган гиёҳвандлик воситалари, психотроп моддалар ва таркибида прекурсор бўлган дори воситаларини дорихоналарда сақлашга йўл қўйилади.
2-боб. Гиёҳвандлик воситаларини сақлаш, реализация қилиш, бериш ва ҳисобга олиш
1-§. Дорихоналарда гиёҳвандлик воситаларини сақлаш, реализация қилиш, бериш ва ҳисобга олиш
5. Гиёҳвандлик воситалари сейфларда сақланади. Сейфлар ёпиқ ҳолда бўлиши керак.
Масъул шахс томонидан иш вақти тугагандан сўнг сейфлар қулфланиши, пломбаланиши керак.
6. Дорихоналардан гиёҳвандлик воситаларини жисмоний шахсларга шифокор рецепти асосида реализация қилиш (бериш) қуйидаги шахслар томонидан амалга оширилади:
дорихона мудири;
фармацевт (провизор);
дорихона фармацевти ассистенти.
Гиёҳвандлик воситалари мазкур Низомнинг 1-иловасидаги шакл бўйича махсус пушти рецепт (бундан буён матнда рецепт деб юритилади) бланка асосида реализация қилинади (берилади).
7. Фармацевт (провизор) томонидан таркибида гиёҳвандлик воситаси бўлган дорининг рецепти бўйича қуйидагилар аниқланиши лозим:
таркибида гиёҳвандлик воситаси бўлган дорини қабул қилувчи беморнинг ёши;
таркибида гиёҳвандлик воситаси бўлган дори дозасининг тўғри белгиланганлиги;
таркибида гиёҳвандлик воситаси бўлган дори таркибий қисмларининг мутаносиблиги.
Бунда, фармацевт (провизор) томонидан таркибида гиёҳвандлик воситаси бўлган дорининг номини қизил ручка билан чизиб кўрсатиши керак.
8. Гиёҳвандлик воситалари сақланадиган сейфда уларни ўлчаш ва дори тайёрлаш учун қўл тарозилари, тарози тошлари, ҳовончалар, цилиндр ва воронкалар бўлиши керак.
Бунда, ушбу жиҳозлар фармацевт ассистенти ёки фармацевт (провизор) томонидан бошқа идишлардан алоҳида ҳолда ювилиши ва қайта ишлатилиши лозим.
Таркибида гиёҳвандлик воситаси бўлган дори воситалари тайёрланадиган идишлар ёрлиқланган бўлиши керак.
9. Таркибида гиёҳвандлик воситаси бўлган дорининг рецепти асосида фармацевт (провизор) томонидан гиёҳвандлик воситаси сейфдаги штанглас идишдан ўлчаб олинади ва фармацевт ассистентига берилади, шундан сўнг штанглас дарҳол сейфга олиб қўйилади.
Бунда, фармацевт (провизор) рецептнинг орқа томонига гиёҳвандлик воситасини фармацевт ассистентига бергани ҳақида имзо қўяди ёки муҳр босиши мумкин.
Фармацевт ассистенти томонидан қабул қилиб олинган гиёҳвандлик воситаси дарҳол дори тайёрлаш учун ишлатилиши ва тайёрланган дори воситаси фармацевт (провизор) томонидан текшириб кўрилиши керак.
Тайёрланган дори воситаси бўйича фармацевт (провизор) ва унинг ассистенти томонидан мазкур Низомнинг 2-иловасида келтирилган шаклдаги жадвал тўлдирилади.
10. Рецептда гиёҳвандлик воситаси билан бошқа ингредиентлар бирга ёзилган бўлса, гиёҳвандлик воситасини алоҳида беришга йўл қўйилмайди.
11. Гиёҳвандлик воситалари Ўзбекистон Республикасининг тегишли маъмурий-ҳудудий бирлигидаги дорихонадан мазкур маъмурий-ҳудудий бирликда жойлашган даволаш-профилактика муассасасининг рецепти асосида реализация қилинади (берилади).
12. Гиёҳвандлик воситасини гиёҳвандлик воситалари сақланадиган хонадан ассистентлар хонасига ўтказиш дорихона мудири ёки масъул шахс томонидан амалга оширилади.
13. Масъул шахс томонидан гиёҳвандлик воситалари тунги вақтларда дорихонанинг ассистентлар хонасида қолдирилмаслиги керак.
14. Гиёҳвандлик воситалари рақамланган, ип ўтказиб тикилган, дорихона мудирининг муҳри ва имзоси билан тасдиқланган ҳисобга олиш китобида мазкур Низомнинг 3-иловасига мувофиқ ҳисобда туриши керак.
15. Масъул шахс томонидан ҳар ойнинг учинчи санасига қадар олдинги ойда дорихонада бўлган гиёҳвандлик воситалари инвентаризациядан ўтказилади ва инвентаризация натижалари мазкур Низомнинг 4-иловасидаги шакл бўйича расмийлаштирилади.
Бунда, ўтказилган инвентаризация натижаларига кўра гиёҳвандлик воситаларида номувофиқликлар аниқланган тақдирда дорихона мудири бу ҳолат аниқланганидан сўнг уч кунлик муддат ичида ички ишлар органлари ва Соғлиқни сақлаш вазирлигига мазкур Низомнинг 5-иловасига мувофиқ шакл бўйича ёзма ёки электрон шаклда хабар бериши лозим.
16. Дорихонанинг гиёҳвандлик воситалари сақланадиган хонада гиёҳвандлик воситалари бўйича берилган рецептлар беш йил давомида муҳрланган ҳолда сақланади.
Бунда, масъул шахслар томонидан сақлаш муддати тугаган рецептлар ёқиб юбориш йўли билан йўқ қилиниб, мазкур Низомнинг 6-иловасидаги шаклда далолатнома расмийлаштирилади.
2-§. Даволаш-профилактика муассасасида гиёҳвандлик воситаларини сақлаш, бериш ва ҳисобга олиш
17. Навбатчи тиббиёт ходими томонидан гиёҳвандлик воситалари сейфда сақланиши, ушбу сейф полга (деворга) қотирилган бўлиши керак. Бунда, гиёҳвандлик воситалари захираси бир кунлик эҳтиёждан ошмаслиги керак.
Гиёҳвандлик воситалари сақланадиган сейфда уларнинг бир марталик ва бир кунлик дозаси кўрсатилган жадваллар ҳамда улардан заҳарланиш ҳолатларида унга қарши ишлатиладиган моддалар жадвали бўлиши керак.
18. Беморларга гиёҳвандлик воситаларини бериш бошқа дори воситаларидан алоҳида ажратилган ҳолда амалга оширилади.
19. Гиёҳвандлик воситаларининг бемор томонидан қабул қилиниши шифокор ёки ҳамшира иштирокида амалга оширилади.
20. Дорихоналар томонидан даволаш-профилактика муассасаларига бериладиган гиёҳвандлик воситаларининг сигнатура ёки ёрлиғида аниқ ва яққол кўринувчи белгилар («Ичиш учун», «Сиртқи», «Инъекция учун», «Кўз томчилари» ва бошқалар) бўлиши керак.
21. Даволаш-профилактика муассасасининг дорихонасидан гиёҳвандлик воситаларини олиш учун ёзилган талабнома мазкур Низомнинг 7-иловасидаги шакл бўйича расмийлаштирилади, бунда гиёҳвандлик воситаларининг номлари фақат лотин тилида ёзилади.
22. Навбатчи тиббиёт ходимларида ва бўлимларда (хоналарда) сақланадиган гиёҳвандлик воситалари мазкур Низомнинг 8 ва 9-иловаларида кўрсатилган шакл бўйича рақамланган, ип ўтказиб тикилган, даволаш-профилактика муассасаси раҳбарининг муҳри ва имзоси билан тасдиқланган ҳисобга олиш китобда қайд этилади.
23. Даволаш-профилактика муассасасининг дорихонасида гиёҳвандлик воситалари захираси бир ойлик эҳтиёждан ошмаслиги, бўлимларида эса уч кунлик эҳтиёждан ошмаслиги керак.
24. Даволаш-профилактика муассасасининг қабулхонасида кечки вақтларда тез тиббий ёрдам кўрсатиш учун гиёҳвандлик воситаларининг захираси беш кунлик эҳтиёждан ошмаслиги керак.
Бунда, гиёҳвандлик воситаларининг ушбу захираси масъул навбатчи шифокор рухсати билан даволаш-профилактика муассасаларининг барча бўлимларида ишлатилади.
25. Даволаш-профилактика муассасаларига гиёҳвандлик воситалари учун зарур бўлган рецепт бланкалари Соғлиқни сақлаш вазирлигининг ҳудудий бошқармалари томонидан берилади.
26. Гиёҳвандлик воситалари учун рецепт бланкалари даволаш-профилактика муассасасининг раҳбари буйруғи билан тайинланган масъул шахслар томонидан Соғлиқни сақлаш вазирлигининг ҳудудий бошқармаларидан далолатнома асосида қабул қилинади.
27. Даволаш-профилактика муассасасида раҳбар буйруғи билан рецепт бланкаларини олиш, сақлаш, ҳисобга олиш ҳамда уларни беришга жавобгар шахс тайинланади.
Гиёҳвандлик воситалари учун мўлжалланган рецепт бланкалари захираси сейф ёки темир қоплагич билан мустаҳкамланган металл жавонларда жавобгар шахс назорати остида сақланиши, унинг калитлари даволаш-профилактика муассасасининг раҳбарида ёки масъул шахсда бўлиши керак.
28. Гиёҳвандлик воситаларининг рецепт бланкалари ҳисоби саҳифалари рақамланган, ип ўтказиб тикилган ва даволаш-профилактика муассасасининг раҳбари имзоси ва муҳри билан тасдиқланган, мазкур Низомнинг 10-иловасида кўрсатиб ўтилган шакл бўйича ҳисобга олиш китобида қайд этилади.
29. Гиёҳвандлик воситалари учун ўнтадан ортиқ бўлмаган рецепт бланкалари раҳбар ёки унинг ўринбосари кўрсатмаси асосида шифокорга икки ҳафталик эҳтиёж миқдорида берилади.
Бунда, гиёҳвандлик воситаларига эҳтиёжлар ортган ҳолларда рецепт бланкаларининг сони раҳбар ёки унинг ўринбосари кўрсатмасига кўра оширилиши мумкин.
30. Даволовчи шифокорларда кундалик эҳтиёж учун зарур бўлган рецепт бланкалари қулфланган ҳолатда сақланиши керак.
31. Даволаш-профилактика муассасаларидаги кундалик эҳтиёжлар учун зарур бўлган рецепт бланкалари захираси бир ойлик эҳтиёж миқдоридан ошмаслиги керак.
32. Даволаш-профилактика муассасасида раҳбар буйруғи билан доимий фаолият юритадиган комиссия (бундан буён матнда комиссия деб юритилади) тузилади.
Бунда, ушбу комиссия даволаш-профилактика муассасаси раҳбари, даволаш ишлари бўйича ўринбосар, дорихона мудири, бош ёки катта ҳамшира ва бўлим бошлиғи орасидан беш кишидан иборат таркибда шакллантирилади.
Комиссия ҳар чоракда бир марта шифокорларнинг гиёҳвандлик воситаси бўйича тавсияси тўғри эканлигини, гиёҳвандлик воситалари ва рецепт бланкаларининг сейфда сақланишини, унинг сони ҳисобини олиб бориладиган китобидаги маълумотга мос келишини текширади ва сарфини назорат қилади.
Бунда, ушбу назорат тадбирлари натижаларига кўра комиссия томонидан аниқланган камчиликларни бартараф қилишга қаратилган тегишли чора-тадбирлар кўрилади.
3-§. Шифокор томонидан гиёҳвандлик воситалари учун рецептни беморга ёзиб бериш
33. Шифокор томонидан гиёҳвандлик воситалари билан беморни даволашда даволаш-профилактика муассасасининг штампи ва юмалоқ муҳри ҳамда унинг имзоси ва шахсий муҳри қўйилган рецепт бланкалари расмийлаштирилади.
Бунда, ушбу рецепт бланкалари даволаш-профилактика муассасаси раҳбари ёки унинг даволаш ишлари бўйича ўринбосари томонидан тасдиқланади.
34. Рецепт бланкасида шифокор томонидан гиёҳвандлик воситасининг халқаро патентланмаган номи, таркиби, шакли, уни тайёрлаш ва бериш ҳақидаги ёзма кўрсатмаси лотин тилида ёзилади. Дори воситаларини қўллаш усули давлат тилида кўрсатилиши шарт.
Шифокорлар рецепт бланкасида аввал гиёҳвандлик воситаларининг номини, сўнгра бошқа ингредиентлар номларини ёзиши зарур.
35. Шифокорга тўлдирилмаган рецепт бланкаларига шахсий муҳрини босишга йўл қўйилмайди.
36. Бир дона рецепт бланкасида шифокор томонидан фақат битта номдаги гиёҳвандлик воситаси миқдори етти кунлик эҳтиёждан оширилмаган ҳолда ёзилиши керак.
Даволаш-профилактика муассасасининг шифокори беморга гиёҳвандлик воситалари берилган муддатдан бошлаб етти кун ўтгач уларни қайта тавсия этиши мумкин.
Бунда, аввал тавсия этилган гиёҳвандлик воситаларидан бўшаган ампулаларни бемор ёки унинг қариндошлари томонидан рецептда кўрсатилган миқдорда даволаш-профилактика муассасасига қайтариб топширилиши шарт.
Шифокор томонидан гиёҳвандлик воситалари учун ёзилган рецептлар етти кун давомида ҳақиқий ҳисобланади.
37. Амбулатор шароитда даволанувчи беморларга наркоз учун қўлланиладиган препаратлар учун рецептлар ёзишга йўл қўйилмайди.
38. Даволаш-профилактика муассасаси раҳбарининг ёки унинг ўринбосари кўрсатмаси асосида шифокор томонидан амбулатор шароитда даволанувчи бемор учун гиёҳвандлик воситаларини оладиган дорихонага ушбу Низомнинг 11-иловасида келтирилган шакл бўйича бириктирувчи талон расмийлаштирилади.
биринчи маротаба беморга гиёҳвандлик воситаси учун рецепт ёзилганда;
рецептдаги гиёҳвандлик воситаси бошқа гиёҳвандлик воситасига ўзгартирилганда ёки рецептда ёзилган кунлик қабул қилиш миқдори ўзгартирилганда;
инкурабел беморларни даволаш учун ёзиладиган бир рецептдаги гиёҳвандлик воситаларининг миқдори икки марта оширилганда.
39. Шифокор томонидан ёзилган рецепт мазкур Низомнинг 33, 34, 36-бандларига мувофиқ тўлдирилмаган ёки таркибида номутаносиб дори воситаси ёзилган ҳолатларда рецепт яроқсиз ҳисобланади.
40. Барча нотўғри ёзилган рецептлар дорихоналарда қолдирилади ва «Рецепт яроқсиз» деган штамп босилади ҳамда махсус дафтарда қайд этилади.
41. Ҳар чоракда даволаш-профилактика муассасаси раҳбари томонидан буйруқ билан тасдиқланган, гиёҳвандлик воситалари учун рецепт ёзадиган шифокорларнинг шахсий муҳри ва имзо нусхалари рўйхатини дорихоналарга юбориши зарур.
4-§. Дорихона омборхоналарида гиёҳвандлик воситаларини сақлаш, реализация қилиш, бериш ва ҳисобга олиш
42. Дорихона омборхоналарида гиёҳвандлик воситалари қулфланадиган, пломбаланадиган хона ва сейф ёки металл жавонларда сақланади.
43. Гиёҳвандлик воситалари сақланадиган хонага дорихона омборхонаси раҳбари буйруғи билан тайинланган, бевосита улар билан ишлаш ҳуқуқи берилган шахсларга киришга йўл қўйилади.
44. Дорихона омборхонаси раҳбари ёки масъул шахс гиёҳвандлик воситалари миқдорини текширган ҳолда уларнинг қабул қилинишини таъминлайди.
45. Масъул шахс кукун ҳолатдаги гиёҳвандлик воситалари дорихона омборхонасидан фақат муҳрланган ҳолда реализация қилинади (берилади).
46. Дорихона омборхоналарида гиёҳвандлик воситаларининг реализация қилиниши (берилиши) даволаш-профилактика муассасаси раҳбари ёки унинг ўринбосари томонидан имзоланган ва муҳр босилган талабнома асосида амалга оширилади.
47. Гиёҳвандлик воситалари учун ёзиладиган талабномалар бошқа дори воситаларига ёзиладиган талабномалардан алоҳида ёзилиши, миқдорлар сўз билан ёзилган ҳолда кўрсатилиши керак.
48. Дорихона омборхоналаридан гиёҳвандлик воситаларини даволаш-профилактика муассасасига реализация қилиш (бериш) тегишли ҳужжат асосида амалга оширилади.
Бунда, олинаётган гиёҳвандлик воситаларининг номи ва уларнинг миқдори сўз билан ёзилган ҳолда расмийлаштирилади.
49. Гиёҳвандлик воситаларини реализация қилишдан (беришдан) олдин уларнинг сақланишига масъул шахс гиёҳвандлик воситаларини қадоқлашнинг тўғрилигини текшириши ҳамда омборхонада қолдириладиган товар-транспорт ҳужжати нусхасига имзо қўйиши лозим.
50. Дорихона омборхоналарида гиёҳвандлик воситалари ҳисоби саҳифалари рақамланган ва ип ўтказиб тикилган, ушбу омборхона муҳри ҳамда раҳбар имзоси билан тасдиқланган, мазкур Низомнинг 12-иловасида кўрсатилган шаклга кўра ҳисобга олиш китобида олиб борилади.
51. Дорихона омборхонасида гиёҳвандлик воситаларининг кирими ва чиқимига тааллуқли бўлган барча ҳужжатлар масъул шахсда сақланади.
Бунда, ушбу ҳужжатларнинг сақланиш муддати 5 йил.
5-§. Илмий-тадқиқот институтлари, олий таълим ташкилотлари ва назорат-таҳлил лабораторияларида гиёҳвандлик воситаларини сақлаш, бериш ва ҳисобга олиш
52. Илмий-тадқиқот институтлари, олий таълим ташкилотлари ва назорат-таҳлил лабораторияларида гиёҳвандлик воситалари алоҳида жиҳозланган хоналарда сақланади, бунда гиёҳвандлик воситалари ёпиқ, пломбаланган сейфларда сақланади.
53. Масъул шахсга берилган гиёҳвандлик воситалари алоҳида қулфланган ҳолда сақланиши зарур.
54. Илмий-тадқиқот институтлари, олий таълим ташкилотлари ва назорат-таҳлил лабораторияларига таҳлил учун гиёҳвандлик воситалари фармацевтика ташкилотларидан уч маротаба таҳлил қилишга етадиган миқдорда келиб тушиши керак.
Илмий-тадқиқот институтлари, олий таълим ташкилотлари ва назорат-таҳлил лабораторияларида гиёҳвандлик воситалари таҳлил қилингандан сўнг уларнинг қолдиғи намуна сифатида яроқлилик муддати тугагунга қадар сақланади.
Яроқлилик муддати тугаганда гиёҳвандлик воситалари йўқ қилинади.
55. Кундалик ишлаш учун зарур бўлган гиёҳвандлик воситалари таҳлил ўтказувчининг сўрови асосида фақат лаборатория мудирининг ёки кафедра мудирининг ёзма рухсати билан берилади.
56. Илмий-тадқиқот институтлари, олий таълим ташкилотлари ва назорат-таҳлил лабораторияларида гиёҳвандлик воситалари ҳисоби саҳифалари рақамланган, ип ўтказиб тикилган, муҳр ва раҳбарнинг имзоси қўйилган алоҳида китобда мазкур Низомнинг 13 ва 14-иловаларида кўрсатилган шаклда расмийлаштирилади.
6-§. Фармацевтика ишлаб чиқариш корхоналарида гиёҳвандлик воситаларини сақлаш, реализация қилиш, бериш ва ҳисобга олиш
57. Фармацевтика ишлаб чиқариш корхоналарида (бундан буён матнда корхона деб юритилади) гиёҳвандлик воситалари қулфланадиган, пломбаланадиган, алоҳида жиҳозланган хоналарда жойлашган сейф ёки металл жавонларда сақланади.
58. Гиёҳвандлик воситаларининг сақланишига корхона раҳбари ёки масъул шахс жавобгардир.
59. Гиёҳвандлик воситалари реализация қилинганда (берилганда) корхона раҳбари ёки масъул шахс гиёҳвандлик воситасининг миқдорини илова қилинган ҳужжатларга мос келишини шахсан ўзи текшириб кўриши шарт.
60. Гиёҳвандлик воситаларини ишлаб чиқариш бўлимига реализация қилиниши (берилиши) корхона раҳбари ёки унинг ўринбосари рухсати билан амалга оширилади.
61. Гиёҳвандлик воситалари омборхона ва бўлимларда ҳисоби саҳифалари рақамланган, ип билан тикилган, корхона раҳбарининг имзоси ва муҳри билан тасдиқланган дафтарда олиб борилади.
Омборхоналарнинг ҳисобга олиш китоби дорихона омборлари учун тасдиқланган шаклда олиб борилади, бўлимларда эса ишлаб чиқариш жараёнида маҳсулотнинг ҳисобга олиш учун амалда қабул қилинган шаклда олиб борилади.
62. Ишлаб чиқарилиши ҳали тугалланмаган гиёҳвандлик воситалари сақловчи дори воситалари шаклларининг (эритмалар, таблеткалар ва бошқа дори шаклларини тайёрлаш учун аралашмалар) хавфсизлигига бўлим бошлиғи масъул ҳисобланади.
3-боб. Психотроп моддаларни сақлаш, реализация қилиш, бериш ва ҳисобга олиш
1-§. Дорихоналар, даволаш-профилактика муассасалари, дорихона омборлари, илмий-тадқиқот институтлари, олий таълим ташкилотлари ва назорат-таҳлил лабораторияларида психотроп моддаларни сақлаш, реализация қилиш, бериш ва ҳисобга олиш
63. Психотроп моддалар дорихона омборхоналарининг сейфларида ёки металл жавонларда сақланади.
Психотроп моддаларни сақлаш хонаси битта кириш жойига эга бўлиб, кириш эшиги яхлит, қалинлиги 3 мм дан кам бўлмаган металл листдан тайёрланган бўлиши ва алоҳида сигнализация қурилмаси билан таъминланиши зарур.
Иш вақти тугаганидан сўнг жавонлар ва кириш эшиги қулфланиб, пломбаланади.
64. Дорихоналар, даволаш-профилактика муассасалари дорихоналари, хоналари ва бўлимлари, илмий-тадқиқот институтлари, олий таълим ташкилотлари ва назорат-таҳлил лабораторияларида психотроп моддалар металл жавонларда қулфланган ҳолда сақланади.
65. Шифокор томонидан психотроп моддаларга рецептлар мазкур Низомнинг 15-иловасида келтирилган шакл бўйича ёзилади.
Рецептга шифокорнинг имзоси ва шахсий муҳри қўйилади, сўнгра рецепт даволаш-профилактика муассасаси муҳри билан тасдиқланади.
Психотроп моддалар Ўзбекистон Республикасининг тегишли маъмурий-ҳудудий бирлигидаги дорихонадан мазкур маъмурий-ҳудудий бирликда жойлашган даволаш-профилактика муассасасининг рецепти асосида реализация қилинади (берилади).
Даволаш-профилактика муассасаси раҳбари ҳар чоракда психотроп моддалар учун рецепт ёзадиган шифокорнинг шахсий муҳри ва имзо нусхалари рўйхатини дорихоналарга юбориши зарур.
Рецепт бланкасида шифокор томонидан психотроп моддасининг халқаро патентланмаган номи, таркиби, шакли, уни тайёрлаш ва бериш ҳақидаги ёзма кўрсатмаси лотин тилида ёзилади. Дори воситаларини қўллаш усули давлат тилида кўрсатилиши шарт.
Рецептда шифокор томонидан психотроп модданинг бир ойлик миқдори ёзилиши мумкин.
Шифокор томонидан психотроп моддалар учун ёзилган рецептлар бир ой давомида ҳақиқий ҳисобланади.
Амбулатор беморларга хизмат кўрсатувчи даволаш-профилактика муассасаларида психотроп моддалар учун ёзиладиган рецептларнинг ҳисобга олиш китоби ушбу Низомнинг 16-иловасига мувофиқ юритилади.
Даволаш-профилактика муассасаси амбулатор беморларга ёзиб берилган рецептлар ва рецептдаги психотроп моддалар миқдори бўйича чораклик ва йиллик ҳисоботларни ушбу Низомнинг 17-иловасига мувофиқ шаклда ҳисобот давридан кейинги ойнинг 25-кунидан кечикмасдан, йиллик ҳисоботни ҳисобот йилидан кейинги йилнинг 25-январигача бўлган муддатда Соғлиқни сақлаш вазирлиги ҳузуридаги «Фармацевтика маҳсулотлари хавфсизлиги маркази» давлат муассасасининг Наркотикларни назорат қилиш қўмитасига тақдим этилади.
66. Шифокорлар рецепт бланкасида аввал психотроп модданинг номини, сўнгра бошқа ингредиентлар номларини ёзиши зарур.
67. Даволаш-профилактика муассасасининг дорихонасида психотроп моддасининг захираси бир ойлик эҳтиёждан ошмаслиги, бўлимларида эса икки ҳафталик эҳтиёждан ошмаслиги керак.
Навбатчи тиббиёт ходими томонидан психотроп моддаси сейфда сақланиши, ушбу сейф полга (деворга) қотирилган бўлиши керак. Бунда, психотроп моддаси бир кунлик эҳтиёждан ошмаслиги керак.
68. Психотроп моддаларни даволаш-профилактика муассасаларида сақлаш ва беморларга беришга бўлим мудири ва катта тиббиёт ҳамшираси, дорихоналарда масъул шахс, лабораторияларда эса психотроп моддаларни сақлаш ва ҳисобини олиб боришга лаборатория мудири масъул ҳисобланади.
69. Дорихонанинг психотроп моддалари сақланадиган хонада психотроп моддалари бўйича берилган рецептлар бир йил давомида сақланади. Сақлаш муддати ўтгач рецептлар мазкур Низомнинг 6-иловасидаги шакл бўйича далолатнома асосида йўқ қилинади.
70. Дорихоналарда психотроп моддаларнинг рецептларини қабул қилишда беморнинг ёши ва психотроп моддаларнинг дозаси тўғрилигини аниқлаштириш зарур.
71. Психотроп моддалар ҳисоби саҳифалари рақамланган ва ип ўтказиб тикилган, даволаш-профилактика муассасаси муҳри ва раҳбар имзоси билан тасдиқланган, мазкур Низомнинг 18-иловасида кўрсатилган шаклга кўра махсус китобда олиб борилади.
Масъул шахс томонидан ҳар ойнинг учинчи санасига қадар олдинги ойда дорихонада бўлган психотроп моддалар инвентаризациядан ўтказилади ва инвентаризация натижалари мазкур Низомнинг 4-иловасидаги шакл бўйича расмийлаштирилади.
Бунда, ўтказилган инвентаризация натижаларига кўра психотроп моддаларида номувофиқликлар аниқланган тақдирда дорихона мудири бу ҳолат аниқланганидан сўнг уч кунлик муддат ичида ички ишлар органлари ва Соғлиқни сақлаш вазирлигига мазкур Низомнинг 5-иловасига мувофиқ шакл бўйича ёзма ёки электрон шаклда хабар бериши лозим.
2-§. Фармацевтика корхоналарида психотроп моддаларни сақлаш, ҳисобга олиш ва бериш
72. Психотроп моддалар ва уларни ишлаб чиқаришнинг ярим тайёр маҳсулотлари алоҳида жиҳозланган хоналарда сейф ёки металл жавонларда сақланади, хона иш вақти тугаганидан сўнг масъул шахс томонидан қулфланиб, пломбаланади.
73. Психотроп моддаларнинг ҳисоби саҳифалари рақамланган ва ип ўтказиб тикилган, фармацевтика корхонаси муҳри ва раҳбар имзоси билан тасдиқланган, мазкур Низомнинг 19-иловасида кўрсатилган шаклга кўра ҳисобга олиш китобида олиб борилади.
Фармацевтика корхонаси бўлимларида психотроп моддалар учун маҳсулотни ишлаб чиқариш ҳисоби ушбу корхона раҳбари томонидан тасдиқланган шаклда олиб борилади.
74. Психотроп моддалардан тайёр дори воситаларини ишлаб чиқариш учун ушбу моддаларнинг омборхонадан психотроп моддаларни ишлаб чиқариш бўлимига берилиши фармацевтика корхонаси бўлим бошлиғининг юк хати ва корхона раҳбарининг рухсати билан амалга оширилади.
4-боб. Прекурсорларни сақлаш, реализация қилиш, бериш ва ҳисобга олиш
1-§. Дорихоналар, даволаш-профилактика муассасалари, илмий-тадқиқот институтлари, олий таълим ташкилотлари ва назорат-таҳлил лабораторияларида прекурсорларни сақлаш, реализация қилиш, бериш ва ҳисобга олиш
75. Дорихоналар, даволаш-профилактика муассасалари, илмий-тадқиқот институтлари, олий таълим ташкилотлари ва назорат-таҳлил лабораторияларида ишлатиладиган прекурсорлар уларни тўлиқ сақланишини таъминлайдиган хоналарда сақланиши шарт.
Тез алангаланувчи прекурсорларни (сирка кислотаси ангидриди, ацетон, этил эфири, хлорид кислота, фенилцирка кислотаси, сульфат кислота, толуол) сақланишида уларнинг физик-кимёвий хусусиятларини ҳисобга олиш зарур.
76. Таркибида прекурсор бўлган дори воситалари металл жавонларда сақланади.
77. Назорат-таҳлил лабораторияларида прекурсорларнинг сақланишига ва ҳисобини олиб борилишига лаборатория мудири, дорихоналарда дорихона мудири масъул ҳисобланади. Омборхоналарда прекурсорларни сақлашга масъул шахс (омборхона мудири) масъулдир.
78. Тез алангаланувчи прекурсорлар зич ёпиладиган, чидамли (пишиқ) шиша ёки металл идишларда сақланади.
79. Прекурсорлар солинган бутиллар, баллонлар ва бошқа йирик ҳажмли идишлар баландлиги бўйича бир қаторда бўлган стеллаж токчаларида сақланиши керак, уларнинг баландлиги бўйича бир неча қаторда сақланишига йўл қўйилмайди.
Иситиш асбоблари яқинида ушбу моддаларни жойлаштирилишига йўл қўйилмайди. Стеллаждан ёки штабелдан иситиш элементигача бўлган масофа 1 м дан кам бўлмаслиги керак.
80. Лабораторияларда тез алангаланувчи суюқликлар ички қисми асбест ёки шиша тола билан қопланган металл қутиларда ёки металл жавонларда сақланиши лозим.
Металл жавонларга лаборатория мудири имзолаган, сақланаётган прекурсорлар рўйхати ёпиштирилиши зарур.
Идишлар учдан икки қисмидан кўп бўлмаган ҳажмда прекурсорлар билан тўлдирилиши керак.
Қути қопқоғининг ташқи томонида «ТАС» (тез алангаланувчи суюқликлар) ёзуви бўлиб, қути қулфланадиган бўлиши керак.
81. Тез алангаланувчи ва ёнувчи прекурсорларни минерал кислоталар (сульфат ва азот кислоталар), сиқилган ва суюлтирилган газлар, ёнувчан моддалар (ўсимлик ёғи, олтингугурт, боғловчи материаллар), шунингдек органик моддалар ҳамда хавфли портловчи аралашмалар ҳосил қилувчи (калий хлорат, калий перманганат, калий хромат ва бошқалар) ноорганик тузлар билан биргаликда сақланишига йўл қўйилмайди.
82. Прекурсорлар билан муомалада (қадоқлаш, ташиш, тушириш ва бошқалар) бўлганда эҳтиёткорликка риоя этилиши, шунингдек доимий равишда идишнинг ҳолати, унинг герметик зич ёпилганлиги ва бутунлиги назорат қилиб борилиши зарур.
Идишнинг нуқсони ва яроқсизлиги аниқланган тақдирда зудлик билан уларни бартараф этиш чоралари кўрилиши ёки ундаги моддани бошқа бутун идишга жойлаштирилиши керак.
83. Бочканинг қопқоғини зарба вақтида учқун бермайдиган юмшоқ металл асбоб билан бўшатиш ва бураб маҳкамлашга йўл қўйилади.
Бочкалар сақлаш хоналарига юмалатиб ташилганда ва уларни юклашда бочканинг урилиши ва учқун пайдо бўлишига йўл қўймаслик учун эҳтиёткорликка риоя қилиш зарур. Полга тўкилган суюқлик зудлик билан тозаланиши керак.
84. Тез алангаланувчи ва ёнувчи прекурсорларни (этил эфири ва бошқалар) қадоқлаш ёнғиндан ҳимояланиш воситалари билан жиҳозланган ва вентиляцияси бўлган алоҳида хоналарда амалга оширилиши керак.
Тез алангаланувчи ва ёнувчи прекурсорларни металл идишларга қуйишда ва қадоқлашда прекурсорлар сақланадиган идишида (штангласлар, тунука барабанлар, шиша идишлар ва бошқалар) ерга уланган сими бўлиши керак.
85. Ҳавода тез алангаланувчи ва ёнувчи прекурсорларнинг буғлари ҳосил бўлишига йўл қўймаслик учун прекурсор сақланадиган идишлар (штангласлар, тунука барабанлар, шиша идишлар ва бошқалар) маҳкам ёпилиши керак.
86. Этил эфири қоронғи ва салқин жойда (оловдан ва иситиш приборларидан узоқда) сақланади.
87. Этил эфири билан ишлаш вақтида силкитиш, зарба бериш, ишқаланишга йўл қўйилмайди.
88. Лабораторияларда калий перманганат тез портлаш хусусиятига эга бўлганлиги сабабли тунука барабанларда, дорихоналарда эса қопқоқлари маҳкам ёпиладиган штангласларда алоҳида сақланиши керак.
89. Сульфат кислотаси органик моддалар билан бирга сақланишига йўл қўйилмайди.
90. Ўт ўчиргич мосламаси лабораториянинг ҳар бир хонасида бўлиши керак.
Ҳар бир лабораторияда прекурсорларни ўчиришда фойдаланиладиган қуруқ қумли қути бўлиши керак.
91. Дорихоналарда калий перманганат 3 граммгача ва хлорид кислота 1— 6% эритма ҳолида 250 мл гача рецептсиз сотилишига йўл қўйилади.
92. Тиббий мақсадларда қўлланиладиган, таркибида прекурсор бўлган дори воситаларини фақат шифокор рецепти асосида реализация қилинади (берилади).
Таркибида прекурсор бўлган дори воситаларининг ҳисоби саҳифалари рақамланган, ип ўтказиб тикилган ва дорихона раҳбари имзоси ва муҳри билан тасдиқланган, мазкур Низомнинг 18-иловасида кўрсатиб ўтилган шаклга кўра ҳисобга олиш китобида қайд этилади.
93. Дорихоналар, илмий-тадқиқот институтлари, олий таълим ташкилотлари ва назорат-таҳлил лабораторияларида ва бошқа ташкилотлар омборхоналарида илмий ишлар, таҳлил ва ташхис қўйиш учун фойдаланиладиган прекурсорлар ҳисобга олинади.
Бунда, прекурсорларнинг ҳисоби саҳифалари рақамланган, ип ўтказиб тикилган ва дорихона раҳбари имзоси ва муҳри билан тасдиқланган, мазкур Низомнинг 20-иловасида кўрсатиб ўтилган шаклга кўра ҳисобга олиш китобида қайд этилади.
94. Масъул шахс томонидан ҳар ойнинг учинчи санасига қадар олдинги ойда муассасада бўлган прекурсорлар инвентаризациядан ўтказилади ва инвентаризация натижалари мазкур Низомнинг 4-иловасидаги шакл бўйича расмийлаштирилади.
Бунда, ўтказилган инвентаризация натижаларига кўра прекурсорларда номувофиқликлар аниқланган тақдирда муассаса раҳбари бу ҳолат аниқланганидан сўнг уч кунлик муддат ичида ички ишлар органлари ва Соғлиқни сақлаш вазирлигига мазкур Низомнинг 5-иловасига мувофиқ шакл бўйича ёзма ёки электрон шаклда хабар бериши лозим.
2-§. Саноат корхоналарида прекурсорларни сақлаш, реализация қилиш, бериш ва ҳисобга олиш
95. Саноат корхоналарида прекурсорларни сақлаш, реализация қилиш (бериш) ва ҳисобга олиш прекурсорнинг хавфлилик, ёнғин хавфини туғдириш даражаси ҳамда кимёвий ва физик-кимёвий хоссаларига асосан олиб борилади.
96. Прекурсорлар сақланадиган идишлар пломбаланган бўлиши шарт.
97. Прекурсорлар ишлаб чиқариладиган ва сақланадиган хоналари корхона майдончаларида жойлашган бўлиши керак.
98. Бир-бирлари билан ўзаро таъсирлашадиган прекурсорларни битта омборхонада сақлаганда уларни алоҳида ажратилган ҳолда сақланишига йўл қўйилади.
99. Ишлаб чиқаришда фойдаланиладиган прекурсорлар махсус ажратилган хоналарда ёки омборхоналарда сақланади.
Махсус ажратилган хоналарда ёки омборхоналарда иш узлуксиз давом этмаса ёки ноаниқ вақтга тўхтаб қолса, корхона раҳбарлари уларни қўриқлаш чораларини кўриши керак, омборхоналар эса масъул шахс томонидан пломбалаб қўйилиши шарт.
100. Прекурсорларни ишлаб чиқариш, сақлаш ва фойдаланишни тўғри ташкил этилишига корхона раҳбари масъул ҳисобланади.
101. Прекурсорлар сақланадиган омборхоналарда прекурсорларнинг ҳар бир тури учун ҳисоб карточкаси тузилиши зарур.
Ҳисоб карточкасида модданинг миқдори, келиб тушган санаси, таъминотчининг номи, кимга қачон ва қанча миқдорда реализация қилингани (берилгани) ва қолдиқ миқдори акс эттирилиши керак.
101. Омборхонада барча прекурсорларнинг номи ёзилган рўйхат бўлиши керак. Масъул шахс доимий равишда идиш ва қутиларнинг ташқи ҳолатини (бутунлиги, зич беркитилганлиги, ёрлиқлари мавжудлигини) назорат қилиши керак.
102. Омборхонада сақланаётган прекурсорларни омборга жойлаш ва сақлаш билан боғлиқ бахтсиз ҳодисалар рўй берганда биринчи ёрдам кўрсатиш тўғрисидаги эслатмалар илиб қўйилиши керак.
103. Кислота бўлган прекурсорлар бошқа прекурсорлардан алоҳида жойлашган омборхоналарда сақланади. Кислота бўлган прекурсорларнинг ертўлаларда сақланишига йўл қўйилмайди.
Кислота бўлган прекурсорлар сақланадиган омборхонанинг вентиляцияси табиий бўлиши керак.
104. Саноат корхоналарининг сақлаш майдончалари бемалол кириладиган йўлкалар билан таъминланган бўлиши керак.
105. Саноат корхоналарининг махсус майдонларида прекурсорлар идишларда сақланади. Бунда, ушбу идишларнинг сони 100 донадан кўп бўлмаслиги, ҳар 100 та идиш орасидаги масофа 1 м дан кам бўлмаслиги керак.
106. Саноат корхоналарининг бўлимларида прекурсорларнинг ҳисоби олиб борилади ва бу ҳисобга олиш китобларида қайд этилади.
Саноат корхонаси томонидан унинг фаолиятининг ўзига хос хусусиятларини ўз ичига олувчи ҳисобга олиш китоби юритилади.
3-§. Гиёҳвандлик воситалари, психотроп моддалар ва прекурсорларни ҳисобга олиш китобларини юритиш ва сақлаш
107. Юридик шахс томонидан гиёҳвандлик воситалари, психотроп моддалар ва прекурсорлар муомаласи билан боғлиқ фаолиятга тааллуқли жараёнларни ҳисобга олиш учун ҳисобга олиш китоби юритилади.
108. Ҳисобга олиш китобида ёзувларни қайд этиш учун тартиб рақамлар ўсиб бориш тартибида белгиланади.
Ҳисобга олиш китобининг жорий календар йили давомида ишлатилмаган саҳифалари кейинги йилдан давом эттирилади, бунда тартиб рақами янгидан бошланади.
109. Ҳисобга олиш китобидаги ёзувлар ва ушбу ёзувларга тузатишлар масъул шахс имзоси билан тасдиқланади.
Ҳисобга олиш китоби шкафда сақланади, шкаф калити масъул шахсда туради.
5-боб. Якуний қоида
110. Мазкур Низом талаблари бузилишида айбдор бўлган шахслар қонунчилик ҳужжатларига мувофиқ жавоб беради.
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 1-ИЛОВА
Сиёҳ билан тўлдирилади
Тузатишлар киритишга рухсат этилмайди
Гиёҳвандлик дори воситалари учун рецепт бланкаси
ШАКЛИ
ТАРКИБИДА ГИЁҲВАНДЛИК ВОСИТАЛАРИ БЎЛГАН ДОРИЛАРНИ ОЛИШ ҲУҚУҚИНИ БЕРУВЧИ РЕЦЕПТ
Эслатма: Аввал тасдиқланган бланка намунаси пушти рангда, сув қоғозидаги ҳимоя белгилари мавжуд бўлган.
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 2-ИЛОВА
ДОРИХОНА № ____
(дорихона номи)
Сана
Моддаларнинг номи
Миқдори
Тарозида тортди ва берди
(Ф.И.О., имзо)
Қабул қилди ва тайёрлади
(Ф.И.О., имзо)
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 3-ИЛОВА
ДОРИХОНАЛАРДА ГИЁҲВАНДЛИК ВОСИТАЛАРИНИ ҲИСОБГА ОЛИШ КИТОБИ
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 4-ИЛОВА
БАЛАНСДА МАВЖУД БЎЛГАН ГИЁҲВАНДЛИК ВОСИТАЛАРИ, ПСИХОТРОП МОДДАЛАР ВА ПРЕКУРСОРЛАРНИ
гиёҳвандлик воситалари, психотроп моддалар ва прекурсорларни инвентаризациядан ўтказилгани тўғрисида мазкур инвентаризация рўйхатини туздик
Т/р
Дори воситаси номи
(халқаро патентланмаган номи)
Ўлчов бирлиги
(амп., табл.)
Серия рақами
Дафтардаги қолдиқ
(дорихона/омборхона; бўлим)
Ҳақиқий қолдиқ
(дорихона/омборхона; бўлим)
* Инвентаризация бўлимларни ҳисобга олган ҳолда ўтказилади.
Комиссия раиси
_______________________________
(лавозими, Ф.И.О.)
Комиссия аъзолари:
_______________________________
(лавозими, Ф.И.О.)
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 5-ИЛОВА
Дорихоналар, даволаш-профилактика муассасалари, илмий-тадқиқот институтлари, олий таълим ташкилотлари ва назорат-таҳлил лабораторияларидан гиёҳвандлик воситалари, психотроп моддалар ва прекурсорлар ўғирланган ва йўқолган ҳолларда тақдим этиладиган хабар ШАКЛИ
Т/р
Нима ҳақида хабар берилмоқда
Хабарноманинг мазмуни
Ким томонидан хабар берилди
Тақдим этиш тартиби
Дорихоналар, даволаш-профилактика муассасалари, илмий-тадқиқот институтлари, олий таълим ташкилотлари ва назорат-таҳлил лабораториялардан гиёҳвандлик воситалари, психотроп моддалар ва прекурсорлар ўғирланганлиги ва йўқолганлиги ҳақида хабар
Муассасанинг номи ва манзили.
Гиёҳвандлик воситаларини сақлаш учун талаб этиладиган махсус воситаларнинг мавжудлиги
Бино тавсифи (умумий лойиҳа асосида қурилган, мослаштирилган бино, ғиштли, ёғочли).
Гиёҳвандлик воситаларини сақлаш усуллари (махсус жиҳозланган хоналарда, сейфда, металл шкафларда ва ҳ.к.). Хонада дераза панжараларининг мавжудлиги (ҳа, йўқ).
Ўғирлик содир этилган ёки йўқолгани аниқланган сана. Ўғирланган гиёҳвандлик воситаларининг номи ва миқдори. Ўғирлик содир бўлгани ҳақида хабар қилинган сана.
Дорихона мудири/масъул шахс (муассаса раҳбари)
Хабарнома ўзининг юқори турувчи ташкилотига ҳудудий ички ишлар бошқармаси бўлимларига берилган хабарнинг нусхасини илова этган ҳолда тақдим этилади.
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 6-ИЛОВА
Гиёҳвандлик воситалари ва психотроп моддаларга ёзилган рецептларни йўқ қилиш
ДАЛОЛАТНОМАСИ
Ҳайъат таркибида (3 та одамдан кам бўлмаслиги керак)
__________________ дан ____________________________ гача давр учун ёзиб берилган гиёҳвандлик воситалари ва психотроп моддаларга ёзилган рецептлар йўқ қилинди.
Рецептлар ёқиш йўли билан йўқ қилинди.
Ҳайъат аъзоларининг имзоси:
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 7-ИЛОВА
* Психотроп моддалар учун ҳам талабнома шу каби ёзилади.
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 8-ИЛОВА
БЎЛИМЛАРДА ГИЁҲВАНДЛИК ВОСИТАЛАРИНИ ҲИСОБГА ОЛИШ КИТОБИ
№
КИРИМ
ЧИҚИМ
Т/р
Олинган санаси ва ҳужжат рақами
Дори воситаси номи (халқаро патентланмаган номи), дозаси, ўлчов бирлиги, серияси
Миқдори
Умумий миқдори (кирим билан қолдиқ)
Катта ҳамшира Ф.И.О., имзо
Берилган сана
Миқдори
Серия рақами
Кимга берилди, ҳамшира фамилияси
Қолдиқ
Олган шахс имзоси
1
2
3
4
5
6
7
8
9
10
11
12
* Психотроп моддалар учун ҳам дафтар шу каби юритилади.
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 9-ИЛОВА
НАВБАТЧИ ТИББИЁТ ХОДИМИ ТОМОНИДАН ГИЁҲВАНДЛИК ВОСИТАЛАРИ ҲИСОБГА ОЛИШ КИТОБИ
№
КИРИМ
ЧИҚИМ
Қолдиқ
Ҳамшира имзоси
Бўлим мудирининг имзоси
Т/р
Олинган сана
Дори воситасининг номи (халқаро патентланмаган номи), дозаси, ўлчов бирлиги, серияси
Миқдори
Умумий миқдори (кирим билан қолдиқ)
Ф.И.О., имзо
Берилган сана
Беморнинг Ф.И.О., касаллик тарихи рақами
Миқдори
Серияси
1
2
3
4
5
6
7
8
9
10
11
12
13
* Психотроп моддалар учун ҳам дафтар шу каби юритилади.
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 10-ИЛОВА
ГИЁҲВАНДЛИК ВОСИТАЛАРИ УЧУН ЁЗИЛАДИГАН РЕЦЕПТ БЛАНКАЛАРИНИ ҲИСОБГА ОЛИШ КИТОБИ
Т/р
КИРИМ
ЧИҚИМ
Ҳужжатнинг келиб тушган сана
Қаердан олинди ва ҳужжат рақами
Миқдори
Серия рақами
Бланкларнинг умумий миқдори
Берилган сана
Серия рақами
Миқдори
Кимга берилди, шифокорнинг Ф.И.О.
Қабул қилувчининг имзоси
Қолдиқ
1
2
3
4
5
6
7
8
9
10
11
12
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 11-ИЛОВА
/гиёҳвандлик воситаларидан бири кўрсатилсин (халқаро патентланмаган номи)
кунлик қабул қилиш нормаси __________________________________________________________________
/доза ва миқдори/
муҳр ўрни
Бош шифокор _______________________________
ШМК раиси _________________________________
Даволовчи шифокор __________________________
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 12-ИЛОВА
Дорихона омборхоналарида гиёҳвандлик воситаларини ҳисобга олиш КИТОБИ
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 13-ИЛОВА
Таҳлил учун келиб тушган гиёҳвандлик воситаларини ҳисобга олиш КИТОБИ
Таҳлил ўтказувчига таҳлил учун берилган миқдори ва берилган сана, таҳлил ўтказувчининг имзоси
Таҳлил учун сарф бўлган восита миқдори
Таҳлил ўтказилган сана ва унинг имзоси
Таҳлил натижалари
Таҳлилдан ортган қолдиқ
Таҳлилдан ортган қолдиқни омборхонага топширилгани ёки унинг йўқ қилингани тўғрисидаги маълумотлар
Лаборатория мудирининг имзоси
1
2
3
4
5
6
7
8
9
10
11
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 14-ИЛОВА
ИЛМИЙ-ТАДҚИҚОТ ИНСТИТУТЛАРИ, ОЛИЙ ТАЪЛИМ ТАШКИЛОТЛАРИ ВА НАЗОРАТ-ТАҲЛИЛ ЛАБОРАТОРИЯЛАРИДА ГИЁҲВАНДЛИК ВОСИТАЛАРИ ҲИСОБГА ОЛИШ КИТОБИ
Номи ( халқаро патентланмаган номи) ___________________
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 15-ИЛОВА
ПСИХОТРОП МОДДАЛАР ОЛИШ УЧУН РЕЦЕПТ БЛАНКАСИ ШАКЛИ
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 16-ИЛОВА
Амбулатор беморларга психотроп моддалар учун ёзиладиган рецептларни ҳисобга олиш КИТОБИ
Т/р
Беморнинг Ф.И.О.
Амбулатор картаси номери
Рецепт ёзилган сана
Дори воситасининг номи, (халқаро патентланмаган номи) дозаси, шакли
Рецептдаги дори воситасининг миқдори
Шифокорнинг Ф.И.О.
Шифокор имзоси
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 17-ИЛОВА
20_ й____________________ учун амбулатор беморларга психотроп моддалар учун ёзиб берилган рецептларни ва рецептдаги психотроп моддалар миқдори бўйича ҳисобот
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 18-ИЛОВА
ДОРИХОНАЛАРДА ПСИХОТРОП МОДДАЛАРНИ ҲИСОБГА ОЛИШ КИТОБИ
Дори воситаси номи (халқаро патентланмаган номи) ____________________________
Ўлчов бирлиги ____________________________
Масъул шахс ___________________________________________________
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 19-ИЛОВА
Фармацевтика корхоналари омборхоналарида психотроп моддаларни ҳисобга олиш КИТОБИ
Гиёҳвандлик воситалари, психотроп моддалар ва прекурсорларни сақлаш, реализация қилиш, бериш, тақсимлаш ва ҳисобга олиш тартиби тўғрисидаги низомга 20-ИЛОВА
Илмий, таҳлилий ва ташхис қўйиш мақсадлари учун қўлланиладиган прекурсорларни ҳисобга олиш КИТОБИ
Ўзбекистон Республикаси соғлиқни сақлаш вазирининг 2024 йил 25 декабрдаги 36-сон буйруғига 2-ИЛОВА
Ўз кучини йўқотган деб топилаётган идоравий норматив ҳуқуқий ҳужжатлар рўйхати
1. Ўзбекистон Республикаси соғлиқни сақлаш вазирининг 2001 йил 28 ноябрдаги 527-сон «Гиёҳвандлик воситалари, психотроп моддалар ва прекурсорларни сақлаш, бериш, сотиш, тақсимлаш, ҳисобга олиш шартлари тўғрисидаги низомни тасдиқлаш ҳақида»ги буйруғи (рўйхат рақами 1090, 2001-йил 29 декабрь) (Ўзбекистон Республикаси вазирликлари, давлат қўмиталари ва идоралари меъёрий ҳужжатлари ахборотномаси, 2001 й. 23-24-сон).
2. Ўзбекистон Республикаси соғлиқни сақлаш вазирининг 2014 йил 24 мартдаги 4-сон «Гиёҳвандлик воситалари, психотроп моддалар ва прекурсорларни сақлаш, бериш, сотиш, тақсимлаш ва ҳисобга олиш шартлари тўғрисидаги низомга ўзгартириш ва қўшимчалар киритиш ҳақида»ги буйруғи (рўйхат рақами 1090-1, 2014 йил 23 апрель) (Ўзбекистон Республикаси қонун ҳужжатлари тўплами, 2014 й., 17-сон, 197-модда).
3. Ўзбекистон Республикаси соғлиқни сақлаш вазирининг 2017 йил 3 августдаги 103-сон «Гиёҳвандлик воситалари, психотроп моддалар ва прекурсорларни сақлаш, бериш, сотиш, тақсимлаш ва ҳисобга олиш шартлари тўғрисидаги низомга ўзгартиришлар киритиш ҳақида»ги буйруғи (рўйхат рақами 1090-2, 2017 йил 9 август) (Ўзбекистон Республикаси қонун ҳужжатлари тўплами, 2017 й., 32-сон, 825-модда).
(Қонунчилик маълумотлари миллий базаси, 30.01.2025 й., 10/25/3604/0089-сон)
