Ўзбекистон Республикаси Президентининг
Қарори
Саноат соҳасида нуфузли халқаро брендлар билан ҳамкорликни ривожлантириш ва миллий брендларни қўллаб-қувватлаш чора-тадбирлари тўғрисида
Ўзбекистон Республикасига саноат соҳасидаги нуфузли халқаро брендларни жалб қилиш бўйича янгича ёндашувларни жорий қилиш, халқаро брендлар остида саноат маҳсулотлари ишлаб чиқариш ҳажмини кенгайтириш, ички ва ташқи бозорларда рақобатбардош миллий брендларни яратишни янада рағбатлантириш ҳамда бу борада тадбиркорлик субъектларини қўллаб-қувватлаш мақсадида:
1. Савдо-саноат палатаси ҳамда Инвестициялар, саноат ва савдо вазирлигининг тадбиркорлик субъектларининг «Ўзбекистонда ишлаб чиқарилган» («Made in Uzbekistan») ёрлиғи остида халқаро брендларнинг глобал қўшилган қиймат занжирига киришини рағбатлантириш ҳамда миллий саноат брендларини қўллаб-қувватлаш дастурини амалга ошириш тўғрисидаги таклифи маъқуллансин.
2. Шундай тартиб ўрнатилсинки, унга мувофиқ 2025 йилдан бошлаб ҳар йили 1 апрелга қадар Савдо-саноат палатаси махсус электрон платформада:
а) нуфузли халқаро брендлар рўйхатини халқаро эътироф этилган ташкилотларнинг сўнгги рейтингида биринчи 500 ўринни эгаллаган саноат йўналишидаги бренд эгалари ичидан саралаб олган ҳолда шакллантиради ва эълон қилади;
б) миллий брендлар рўйхатини икки босқичда шакллантиради ва эълон қилади:
биринчи босқичда — Адлия вазирлиги ва Солиқ қўмитаси билан биргаликда 1-иловага мувофиқ саноат йўналишлари бўйича юқори ва ўрта барқарорлик рейтингига эга тадбиркорлик субъектларининг белгиланган тартибда рўйхатдан ўтказилган товар белгилари рўйхатини шакллантиради;
иккинчи босқичда — рўйхатга киритилган товар белгилари бўйича миллий консалтинг компанияларининг тадқиқотлари, мазкур товар белгилари оммавий ахборот воситалари, интернет ва ижтимоий тармоқларда ёритилиши ҳолати ва улар тўғрисида сўровлар сони, аҳоли ўртасида ўтказилган ижтимоий сўровлар таҳлили натижалари асосида миллий брендлар рўйхатини шакллантиради ва эълон қилади.
Савдо-саноат палатаси Адлия вазирлиги, Солиқ қўмитаси ҳамда манфаатдор идоралар билан биргаликда 2024 йил 1 сентябрга қадар ушбу бандда белгиланган тартиб асосида 2024 йил учун нуфузли халқаро ва миллий брендлар рўйхатлари шакллантирилиши ва эълон қилинишини таъминласин.
3. 2024 йил 1 сентябрдан бошлаб Савдога кўмаклашиш жамғармаси маблағлари ҳисобидан қуйидаги молиявий қўллаб-қувватлаш чоралари жорий қилинсин:
а) нуфузли халқаро брендлар рўйхатига киритилган бренд эгалари билан саноат маҳсулотларини ишлаб чиқаришни йўлга қўйиш тўғрисида тўғридан-тўғри шартнома тузган юқори ва ўрта барқарорлик рейтингидаги тадбиркорлик субъектлари (кейинги ўринларда — бренд ҳамкорлари) учун:
халқаро стандартларни жорий қилиш, экологик ва мувофиқлик бўйича сертификатлаш, шунингдек, мазкур қарорга 2-иловада келтирилган рўйхатдаги мутахассисларнинг бренд эгалари ҳисобланган корхоналарда, жумладан, уларнинг ишлаб чиқариш майдонларида малакасини ошириш харажатларини қоплаш;
нуфузли халқаро брендлар остида камида 1 миллион АҚШ доллари миқдорида саноат маҳсулотлари ишлаб чиқарилганда — грантлар ажратиш;
б) миллий брендлар рўйхатига киритилган бренд эгаларига (кейинги ўринларда — миллий бренд эгалари) қуйидаги харажатларнинг 50 фоизигача қисмини қоплаб бериш:
стандартлаштириш ва сертификатлашнинг халқаро тизимларини жорий этиш, шунингдек, хорижий ваколатли органларда миллий маҳсулотлар ва брендларни (товар белгиларини) рўйхатдан ўтказиш;
халқаро савдо майдончаларига (маркетплейсларга) чиқиш, хорижий давлатлардаги «Made in Uzbekistan» шоурумларида маҳсулотларини жойлаштириш, хорижий савдо уйларини ташкил қилишда биноларни ижарага олиш;
халқаро кўргазмаларда қатнашиш учун рўйхатдан ўтиш, жойни ижарага олиш, кўргазма стендларини ташкил этиш ва маҳсулотлар рекламасини интернет тармоғида жойлаштириш;
ишлаб чиқариш бизнес жараёнларини автоматлаштириш бўйича (CRM, ERP, CERM) ахборот тизимларини жорий қилиш;
мазкур қарорга 2-иловага мувофиқ камида бир йилга жалб қилинган малакали хорижий мутахассисларнинг иш ҳақини тўлаш;
в) Савдо-саноат палатаси ҳамда Инвестициялар, саноат ва савдо вазирлиги томонидан тармоқ уюшмалари билан биргаликда ишлаб чиқиладиган дастур асосида саноат соҳалари учун талаб юқори бўлган, мазкур қарорнинг 2-иловасида кўрсатилган йўналишлар бўйича маҳаллий мутахассисларни ўқитиш ва малакасини ошириш.
Мазкур бандда назарда тутилган харажатларни молиялаштириш учун Савдога кўмаклашиш жамғармасидан 25 миллион АҚШ доллари миқдорида маблағ йўналтирилсин.
4. Савдо-саноат палатаси:
а) 2024/2025 ўқув йилидан бошлаб Вазирлар Маҳкамаси ҳузуридаги Бизнес ва тадбиркорлик олий мактаби ҳамда Туркия Иқтисодиёт ва технологиялар университетининг Тошкент шаҳридаги филиалида «Мода», «Дизайн», «Технология», «Стандартлаштириш», «Инновациялар», «Маркетинг» ва «Менежмент» таълим йўналишларида маҳаллий мутахассисларни тайёрлашни йўлга қўйсин;
б) Инвестициялар, саноат ва савдо вазирлиги ҳамда Ташқи ишлар вазирлиги билан биргаликда ҳар йили 1 сентябрга қадар нуфузли халқаро брендлар рўйхатидаги бренд эгалари билан ҳамкорликни йўлга қўйиш бўйича музокаралар ўтказиб:
ишлаб чиқаришни уларнинг талабларига мослаштириш бўйича тавсиялар тадбиркорлик субъектларига етказилишини таъминласин;
нуфузли брендлар остида ишлаб чиқаришни йўлга қўйиш бўйича «йўл хариталари»ни Вазирлар Маҳкамасига киритсин;
в) ҳар йили 1 январга қадар тасдиқланадиган режа-графиклар бўйича намунавий қўлланмалар асосида ишлаб чиқариш фаолиятини нуфузли халқаро бренд талабларига мослаштириш, миллий бренд яратиш (брендинг), бренд менежмент ва маркетинг йўналишларида тадбиркорлик субъектлари ва уларнинг мутахассислари учун ўқув семинарларини ташкил қилиб борсин;
г) Инвестициялар, саноат ва савдо вазирлиги билан биргаликда Савдога кўмаклашиш жамғармаси маблағлари ҳисобидан саноат соҳалари учун талаб юқори бўлган, мазкур қарорнинг 2-иловасида кўрсатилган йўналишлар бўйича маҳаллий мутахассисларни нуфузли халқаро брендларнинг ишлаб чиқариш майдонларида ўқитишни ташкил қилсин.
5. Вазирлар Маҳкамаси икки ҳафта муддатда миллий бренд эгаларини ҳамда нуфузли халқаро брендлар ҳамкорларини Савдога кўмаклашиш жамғармаси маблағлари ҳисобидан қўллаб-қувватлаш тартибини тасдиқласин.
6. Ўзбекистон Республикаси Президентининг 2024 йил 21 февралдаги «Ўзбекистон — 2030» стратегиясини «Ёшлар ва бизнесни қўллаб-қувватлаш йили»да амалга оширишга оид давлат дастури тўғрисида»ги ПФ-37-сон Фармони билан 2024 йил 1 июлдан бошлаб:
нуфузли халқаро брендлар билан ишлаб чиқаришни бошлаётган корхоналар уч йил давомида нуфузли халқаро брендлар остида ишлаб чиқариладиган маҳсулотлар учун зарур бўлган барча хомашёлар маҳаллийлаштириш даражасини камида 60 фоизга етказиш шарти билан божхона божидан озод этилганлиги;
нуфузли халқаро брендлардан жалб қилинган технолог, дизайнер, маркетолог каби мутахассислардан Ўзбекистон Республикаси ҳудудида меҳнат фаолиятини амалга ошириш ҳуқуқини берувчи тасдиқнома берилганлиги учун тўловлар ундирилиши бекор қилинганлиги маълумот учун қабул қилинсин.
7. Белгилансинки:
а) мазкур қарорнинг 6-бандида белгиланган божхона божи имтиёзлари «Лойиҳалар ва импорт контрактларини комплекс экспертиза қилиш маркази» ДУК хулосаси асосида тақдим этилади.
Бунда 2027 йил 1 январь ҳолатига нуфузли халқаро брендлар остида ишлаб чиқариладиган маҳсулотларнинг маҳаллийлаштириш даражаси 60 фоиздан кам бўлганда имтиёз қўлланиши натижасида тадбиркорлик субъектлари ихтиёрида қолган суммалар қайтариб олинади;
б) 2024 йил 1 сентябрдан 2027 йил 1 январга қадар маҳсулотининг камида 30 фоизини нуфузли халқаро бренд остида ишлаб чиқарадиган бренд ҳамкорлари учун ер солиғи, мол-мулк солиғи ва сув ресурсларидан фойдаланганлик учун солиқ ставкалари ҳисобот даврида 50 фоизга камайтирилади;
в) 2024 йил 1 сентябрдан бошлаб бренд ҳамкорлари ва миллий бренд эгалари томонидан мазкур қарорга 2-иловадаги рўйхат бўйича мутахассис сифатида жалб қилинган чет эл фуқаролари учун Ўзбекистон Республикаси ҳудудида меҳнат фаолиятини амалга ошириш ҳуқуқини берувчи тасдиқноманинг амал қилиш муддати 3 йилгача этиб белгиланади.
8. Савдо-саноат палатаси Рақамли технологиялар вазирлиги билан биргаликда 2025 йил 1 январга қадар қуйидагиларни назарда тутувчи электрон платформани ишга туширсин:
нуфузли халқаро брендлар рўйхатини шакллантириш, уларнинг талаблари, ушбу талабларга маҳаллий тадбиркорлик субъектларини мослаштириш бўйича тавсиялар, шунингдек, брендларни жалб қилиш учун назарда тутилган қўллаб-қувватлаш чораларини акс эттириш;
миллий брендлар рўйхатини шакллантириш ва унга киритилган бренд эгалари учун назарда тутилган қўллаб-қувватлаш чораларини акс эттириш.
9. Халқаро брендларни жалб қилиш ва миллий брендларни қўллаб-қувватлаш бўйича «йўл харитаси» 3-иловага мувофиқ тасдиқлансин.
10. Савдо-саноат палатаси қуйидагилар бўйича Вазирлар Маҳкамасига таклифлар киритсин:
уч ой муддатда Иқтисодиёт ва молия вазирлиги билан биргаликда 2025 йилдан бошлаб Савдога кўмаклашиш жамғармасига мазкур қарорда назарда тутилган харажатларни молиялаштириш учун зарур маблағларни Давлат бюджети ҳисобидан ажратиш тўғрисида;
икки ой муддатда манфаатдор вазирлик ва идоралар билан биргаликда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида.
11. Мазкур қарор ижросини самарали ташкил қилишга масъул ва шахсий жавобгар этиб Бош вазир ўринбосари Ж.А. Ходжаев ва Савдо-саноат палатаси раиси Д.А. Ваҳобов белгилансин.
Қарор ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2024 йил 7 август,
ПҚ-286-сон
Ўзбекистон Республикаси Президентининг 2024 йил 7 августдаги ПҚ-286-сон қарорига
1-ИЛОВА
Миллий брендлар рўйхатига киритиладиган саноат йўналишлари
РЎЙХАТИ

Т/р

Саноат йўналишлари

Саноат маҳсулотлари

1.

Тўқимачилик саноати

Тўқимачилик, трикотаж ва бошқа тайёр кийимлар, гиламлар

2.

Чарм-пойабзал саноати

Пойабзал ва чарм-атторлик маҳсулотлари

3.

Ипакчилик саноати

Ипакдан тайёр матолар, кийимлар, гиламлар ва бошқа буюмлар

4.

Озиқ-овқат саноати

Қуритилган, қадоқланган ва консерваланган озиқ-овқат маҳсулотлари, спиртсиз ичимликлар (энергетик ичимликлардан ташқари), қадоқланган гўшт ва колбаса маҳсулотлари, қандолат маҳсулотлари

5.

Қурилиш материаллари саноати

Бўёқлар, кафель, сантехника маҳсулотлари

6.

Электротехника саноати

Электротехника маҳсулотлари

7.

Фармацевтика саноати

Дори-дармонлар, тиббий буюмлар, тиббий техника, биологик фаол қўшимчалар

8.

Заргарлик саноати

Тайёр заргарлик буюмлари

9.

Мебелчилик саноати

Тайёр мебеллар

10.

Кимё, парфюмерия ва косметика саноати

Кимё воситалари, шу жумладан косметика, парфюмерия, шампунь, совун

11.

Автомобиль саноати

Автотранспорт воситалари ва бутловчи қисмлар

12.

Металлургия саноати

Металл маҳсулотлар ва буюмлар
* Инвестицияларни жалб қилиш, саноатни ривожлантириш ва савдони тартибга солиш масалалари бўйича Ҳукумат комиссиясига Савдо-саноат палатасининг таклифларига асосан ушбу рўйхатга ўзгартириш ва қўшимчалар киритиш ваколати берилади.
Ўзбекистон Республикаси Президентининг 2024 йил 7 августдаги ПҚ-286-сон қарорига
2-ИЛОВА
Саноат йўналишлари бўйича жалб қилинадиган хорижий мутахассисларнинг
РЎЙХАТИ

Т/р

Саноат йўналишлари

Талаб юқори бўлган мутахассислар

1.

Тўқимачилик саноати

Модельер-дизайнер, муҳандис (технолог), маркетолог

2.

Чарм-пойабзал саноати

Модельер-дизайнер, муҳандис (технолог), маркетолог

3.

Ипакчилик саноати

Пиллачилик мутахассиси, гренаж мутахассиси, технолог

4.

Озиқ-овқат саноати

Муҳандис (технолог), маркетолог

5.

Қурилиш материаллари саноати

Геодезист, технолог

6.

Электротехника саноати

Модельер-дизайнер, муҳандис (технолог), маркетолог

7.

Фармацевтика саноати

Кимё-технологи, маркетолог, биофармаколог

8.

Заргарлик саноати

Модельер-дизайнер, муҳандис (технолог), маркетолог

9.

Мебелчилик саноати

Модельер-дизайнер, муҳандис (технолог), маркетолог

10.

Кимё, парфюмерия ва косметика саноати

Кимё-технологи, маркетолог

11.

Автомобиль саноати

Муҳандис (технолог), маркетолог

12.

Металлургия саноати

Муҳандис (технолог), маркетолог
* Инвестицияларни жалб қилиш, саноатни ривожлантириш ва савдони тартибга солиш масалалари бўйича Ҳукумат комиссиясига Савдо-саноат палатасининг таклифларига асосан ушбу рўйхатга ўзгартириш ва қўшимчалар киритиш ваколати берилади.
Ўзбекистон Республикаси Президентининг 2024 йил 7 августдаги ПҚ-286-сон қарорига
3-ИЛОВА
Халқаро брендларни жалб қилиш ва миллий брендларни қўллаб-қувватлаш бўйича
«ЙЎЛ ХАРИТАСИ»
Олдинги таҳрирга қаранг.

Т/р

Чора-тадбирлар номи

Амалга ошириш механизми

Амалга ошириш муддати

Бажариш учун масъуллар

I. Халқаро брендларни жалб қилиш бўйича

1.

Нуфузли халқаро брендлар рўйхатини шакллантириш.

1. Халқаро эътироф этилган ташкилотларнинг сўнгги рейтинг натижаларини таҳлил қилиш.

2024 йил 1 сентябрь,

Савдо-саноат палатаси

(Д. Ваҳобов),

Инвестициялар, саноат ва савдо вазирлиги

(Л. Кудратов)

2. Рейтингларда биринчи 500 ўринни эгаллаган саноат йўналишидаги бренд эгалари ичидан нуфузли халқаро брендлар рўйхатини шакллантириш ва эълон қилиш.

2025 йилдан бошлаб ҳар йили 1 апрелга қадар

2.

Нуфузли халқаро брендлар билан музокаралар ўтказиш бўйича хорижий консалтинг компанияларини жалб қилиш.

1. Консалтинг компаниясини жалб қилиш бўйича техник топшириқни ишлаб чиқиш.

2024 йил 1 октябрь

Савдо-саноат палатаси

(Д. Ваҳобов),

Инвестициялар, саноат ва савдо вазирлиги

(Л. Кудратов),

Ташқи ишлар вазирлиги

(Б. Саидов),

тармоқ ташкилотлари

2. Техник топшириққа асосан тендер ҳужжатларини ишлаб чиқиш.

2024 йил 1 ноябрь

3. Тендер эълон қилиш ва ғолибни аниқлаш ҳамда ғолиб компания билан шартнома имзолаш.

2024 йил 1 декабрь

3.

Нуфузли халқаро брендлар билан амалга оширишга таклиф этиладиган истиқболли лойиҳа таклифларини ишлаб чиқиш.

1. Ҳудуд ва тармоқларнинг салоҳияти ва имкониятларини ўрганиб чиқиш. Драйвер соҳаларни белгилаб олиш.

2024 йил 1 октябрь

Савдо-саноат палатаси

(Д. Ваҳобов),

Инвестициялар, саноат ва савдо вазирлиги

(Л. Кудратов),

тармоқ ташкилотлари

2. Танлаб олинган соҳалар бўйича таҳлилий маълумотлар тайёрлаш ва масъул идоралар билан келишиш.

2024 йил 15 октябрь

3. Таҳлилий маълумотларга асосан истиқболли лойиҳа таклифларини ишлаб чиқиш.

2024 йил 15 ноябрь

4. Консалтинг компаниялари билан ишлаб чиқилган лойиҳаларни танлаб олиш ва уларга техник-иқтисодий шартларни ишлаб чиқиш.

2024 йил 15 декабрь

4.

Лойиҳа таклифларига нуфузли халқаро брендларни жалб қилиш бўйича тарғибот ишларини олиб бориш.

1. Халқаро брендлар рўйхатига киритилган компаниялар билан ҳамкорликни йўлга қўйиш бўйича музокаралар ўтказишни соҳалар кесимида ташкиллаштириш.

2024 йил сентябрь-октябрь

Инвестициялар, саноат ва савдо вазирлиги

(Л. Кудратов),

Савдо-саноат палатаси

(Д. Ваҳобов),

Ташқи ишлар вазирлиги

(Б. Саидов),

тармоқ ташкилотлари

2. Музокаралар натижасидан келиб чиқиб ишлаб чиқаришни ташкил этиш бўйича шартномалар тузиш.

2024 йил ноябрь-декабрь

3. Тадбиркорлик субъектларига брендлар билан ишлаб чиқаришни ташкил этиш бўйича барча ташкилий масалаларда кўмаклашиш.

Доимий равишда

5.

Нуфузли халқаро брендлар остида ишлаб чиқаришни йўлга қўйиш бўйича «йўл хариталари»ни ишлаб чиқиш.

1. Нуфузли халқаро брендлар остида ишлаб чиқаришни йўлга қўйиш бўйича «йўл хариталари»ни ишлаб чиқиш ва Ҳукумат комиссиясида тасдиқлаш.

2024 йил 1 октябрь

Вазирлар Маҳкамаси

(Ж. Ходжаев),

Инвестициялар, саноат ва савдо вазирлиги

(Л. Кудратов),

Савдо-саноат палатаси

(Д. Ваҳобов),

тармоқ ташкилотлари

2. «Йўл хариталари»да белгиланган вазифалар ижросини назорат қилиш ва муддатида ижросини таъминлаш.

Доимий равишда

6.

100 та тадбиркорлик субъектини нуфузли халқаро брендлар талабларига тўлиқ мослаштириш.

1. Нуфузли халқаро брендлар талабларига мослаштириладиган 100 та тадбиркорлик субъектини танлов асосида саралаб олиш.

2024 йил 1 октябрь

Вазирлар Маҳкамаси

(Ж. Ходжаев),

Савдо-саноат палатаси

(Д. Ваҳобов),

Инвестициялар, саноат ва савдо вазирлиги

(Л. Кудратов),

Ташқи ишлар вазирлиги

(Б. Саидов),

Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари,

тармоқ ташкилотлари

2. Саралаб олинган тадбиркорлик субъектлари фаолиятига брендлар талабига мувофиқ халқаро стандартлар ва сертификатларни жорий қилиш чораларини кўриш.

2024 йил октябрь — декабрь

3. Тадбиркорлик субъектлари ишлаб чиқаришидаги меҳнат шароитларини брендлар талабига мувофиқлаштириш.

2024 йил октябрь — декабрь

4. Брендлар талабларига мувофиқ бошқа ташкилий чораларни амалга ошириш.

2024 йил декабрь

7.

Тўқимачилик саноатига нуфузли халқаро брендларни жалб қилиш.

1. Мато, уй текстиль маҳсулотлари, тайёр кийимлар, гилам маҳсулотлари ишлаб чиқарувчи нуфузли халқаро брендлар билан маҳаллий корхоналарда «франчайзинг» ва «аутсорсинг» асосида ишлаб чиқаришни йўлга қўйиш бўйича брендлар буюртмаларини жойлаштирувчи «сорсинг» компаниялари билан музокаралар олиб бориш.

2024 йил август-сентябрь

«Ўзтўқимачиликсаноат» уюшмаси

(М. Султонов),

«Ўзмиллийбанк» АЖ

(А. Мирсоатов),

«Асакабанк» АЖ

(К. Туляганов),

Ташқи ишлар вазирлиги

(Б. Саидов)

2. Музокаралар натижаларига кўра нуфузли халқаро брендлар талабларига маҳаллий корхоналарни тайёрлаш.

2024 йил октябрь-ноябрь

3. Нуфузли халқаро брендлар ва маҳаллий корхоналарнинг ишлаб чиқариш ҳамкорлигини йўлга қўйиш.

2024 йил декабрь

8.

Чарм-пойабзал саноатига нуфузли халқаро брендларни жалб қилиш.

1. Пойабзал ва чарм-атторлик маҳсулотлари ишлаб чиқарувчи нуфузли халқаро брендлар билан маҳаллий корхоналарда «франчайзинг» ва «аутсорсинг» асосида ишлаб чиқаришни йўлга қўйиш бўйича брендлар буюртмаларини жойлаштирувчи «сорсинг» компаниялари билан музокаралар олиб бориш.

2024 йил август-сентябрь

«Ўзчармсаноат» уюшмаси

(А. Султанов),

Савдо-саноат палатаси

(Д. Ваҳобов),

АТ «Халқ банки»

(Ш. Атабаев),

Ташқи ишлар вазирлиги

(Б. Саидов)

2. Музокаралар натижаларига кўра нуфузли халқаро брендлар талабларига маҳаллий корхоналарни тайёрлаш.

2024 йил октябрь-ноябрь

3. Нуфузли халқаро брендлар ва маҳаллий корхоналарнинг ишлаб чиқариш ҳамкорлигини йўлга қўйиш қилиш.

2024 йил декабрь

9.

Қурилиш материаллари саноатига нуфузли халқаро брендларни жалб қилиш.

1. Лок-бўёқ, мармар, чинни, кафель, идиш ва сантехника маҳсулотлари ишлаб чиқарувчи нуфузли халқаро брендлар билан маҳаллий корхоналарда «франчайзинг» ва «аутсорсинг» асосида ишлаб чиқаришни йўлга қўйиш бўйича брендлар буюртмаларини жойлаштирувчи «сорсинг» компаниялари билан музокаралар олиб бориш.

2024 йил август-сентябрь

«Ўзсаноатқурилишматериаллари» уюшмаси

(Б. Бобоқулов),

Савдо-саноат палатаси

(Д. Ваҳобов),

«Ўзсаноатқурилишбанк» АТБ

(А. Акбаржонов),

Ташқи ишлар вазирлиги

(Б. Саидов)

2. Музокаралар натижаларига кўра нуфузли халқаро брендлар талабларига маҳаллий корхоналарни тайёрлаш.

2024 йил октябрь-ноябрь

3. Нуфузли халқаро брендлар ва маҳаллий корхоналарнинг ишлаб чиқариш ҳамкорлигини йўлга қўйиш қилиш.

2024 йил декабрь

10.

Озиқ-овқат саноатига нуфузли халқаро брендларни жалб қилиш.

1. Қуритилган ва консерваланган мева-сабзавот, қандолат маҳсулотлари ишлаб чиқарувчи нуфузли халқаро брендлар билан маҳаллий корхоналарда «франчайзинг» ва «аутсорсинг» асосида ишлаб чиқаришни йўлга қўйиш бўйича брендлар буюртмаларини жойлаштирувчи «сорсинг» компаниялари билан музокаралар олиб бориш.

2024 йил август-сентябрь

Қишлоқ хўжалиги вазирлиги

(И. Абдурахмонов),

Савдо-саноат палатаси

(Д. Ваҳобов),

Божхона қўмитаси

(А. Мавлонов),

«Туронбанк» АТБ

(Ч. Мирзаев),

«Микрокредитбанк» АТБ

(А. Хамидов),

Ташқи ишлар вазирлиги

(Б. Саидов)

2. Музокаралар натижаларига кўра нуфузли халқаро брендлар талабларига маҳаллий корхоналарни тайёрлаш.

2024 йил октябрь-ноябрь

3. Нуфузли халқаро брендлар ва маҳаллий корхоналарнинг ишлаб чиқариш ҳамкорлигини йўлга қўйиш қилиш.

2024 йил декабрь

11.

Кимё саноати соҳасига нуфузли халқаро брендларни жалб қилиш.

1. Кимёвий воситалар ишлаб чиқарувчи нуфузли халқаро брендлар билан маҳаллий корхоналарда «франчайзинг» ва «аутсорсинг» асосида ишлаб чиқаришни йўлга қўйиш бўйича брендлар буюртмаларини жойлаштирувчи «сорсинг» компаниялари билан музокаралар олиб бориш.

2024 йил август-сентябрь

«Ўзкимёсаноат» АЖ

(Т. Мухамеджанов),

Савдо-саноат палатаси

(Д. Ваҳобов),

Ташқи ишлар вазирлиги

(Б. Саидов)

2. Музокаралар натижаларига кўра нуфузли халқаро брендлар талабларига маҳаллий корхоналарни тайёрлаш.

2024 йил октябрь-ноябрь

3. Нуфузли халқаро брендлар ва маҳаллий корхоналарнинг ишлаб чиқариш ҳамкорлигини йўлга қўйиш қилиш.

2024 йил декабрь

II. Миллий брендларни қўллаб-қувватлаш бўйича

12.

Миллий брендлар рўйхатини шакллантириш.

1. Саноат йўналишлари бўйича юқори ва ўрта барқарорлик рейтингига эга ва товар белгиси белгиланган тартибда рўйхатдан ўтказилган тадбиркорлик субъектларининг товар белгилари рўйхатини шакллантириш.

2024 йил 1 сентябрь,

Савдо-саноат палатаси

(Д. Ваҳобов),

Солиқ қўмитаси

(Ш. Кудбиев),

Адлия вазирлиги

(А. Ташкулов),

Савдо-саноат палатаси

(Д. Ваҳобов)

2. Рўйхатга киритилган товар белгилари бўйича миллий консалтинг компанияларининг тадқиқотлари, мазкур товар белгилари оммавий ахборот воситалари, Интернет ва ижтимоий тармоқларда ёритилиши ҳолати ва улар тўғрисида сўровлар сони, аҳоли ўртасида ўтказилган ижтимоий сўровлар таҳлили натижалари асосида миллий брендлар рўйхатини шакллантириш ва эълон қилиш.

2025 йилдан бошлаб ҳар йили 1 апрелга қадар

13.

Маҳаллий ишлаб чиқарувчи корхоналарнинг ўз брендини яратиш бўйича тушунчаси ва кўникмаларини ошириш.

1. Халқаро бренд менежерлар, маҳаллий илғор тадбиркорлар иштирокида ҳудудларда ўқув семинарлари ва тақдимотлар ташкил этиш.

2024 йил сентябрь-октябрь

Инвестициялар, саноат ва савдо вазирлиги

(Л. Кудратов),

Адлия вазирлиги

(А. Ташкулов),

Савдо-саноат палатаси

(Д. Ваҳобов),

Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари,

тармоқ ташкилотлари

2. Интеллектуал мулк ҳуқуқи бўйича маҳаллий тадбиркорларнинг билим ва кўникмаларини ошириш юзасидан ўқув семинарлари ва тақдимотлар ташкил этиш.

Доимий равишда

14.

Ишлаб чиқаришга халқаро стандартлар ва сертификатлаш талабларини жорий қилиш бўйича мутахассисларнинг малакасини ошириш дастурини амалга ошириш.

1. Стандартлар институтида халқаро стандартлар ва сертификатлаш талаблари бўйича мутахассислар малакасини ошириш дастурини ишлаб чиқиш ва Вазирлар Маҳкамасига тасдиқлаш учун киритиш.

2024 йил сентябрь

Инвестициялар, саноат ва савдо вазирлиги

(Л. Кудратов),

Ўзбекистон техник жиҳатдан тартибга солиш агентлиги

(А. Жуманазаров),

Савдо-саноат палатаси

(Д. Ваҳобов)

2. Дастур доирасида маҳаллий корхоналар мутахассисларини халқаро стандартлар асосида ўқитиш ва ўқиш жараёнларига хорижий малакали экспертлар ва ўқитувчиларни жалб қилиш чораларини кўриш.

Дастурда белгиланган муддатларда

15.

Миллий маҳсулотлар ва брендларнинг (товар белгиларини) хорижда кўргазма-ташвиқот тадбирлари ва реклама кампанияларини ташкил қилиш.

1. Хорижий оммавий ахборот воситалари, халқаро босма нашрлар ва нуфузли бизнес-каталогларда миллий маҳсулотлар ва брендларнинг тарғиботини мунтазам равишда ўтказиб бориш.

2. Миллий маҳсулотлар ва брендларнинг (товар белгиларининг) ташқи бозорларга кириши учун хорижда кўргазма-ташвиқот тадбирлари ва реклама кампанияларини ташкил қилишга Ўзбекистон Республикасининг чет элдаги элчихоналарини фаол жалб қилиш.

3. Маҳаллий корхоналарга хорижий давлатларда савдо уйларини очиш масалаларида амалий ёрдам кўрсатиш.

доимий равишда

Савдо-саноат палатаси

(Д. Ваҳобов),

Инвестициялар, саноат ва савдо вазирлиги

(Л. Кудратов),

Ташқи ишлар вазирлиги

(Б. Саидов),

тармоқ ташкилотлари

16.

Истиқболли ташқи бозорларда салоҳиятли маҳаллий корхоналар ва брендларнинг «роад-шоу»лари ва ҳар бир тармоқ бўйича дунёдаги нуфузли экспертлар ва компанияларни жалб қилган ҳолда «Ўзбекистон кунлари» тарғибот тадбирларини ўтказиш.

1. Тақдимот материалларини тайёрлаш, маркетинг тадқиқотларини амалга ошириш («роад-шоу» ва бошқалар).

2. Мунтазам фаолият юритувчи «Made in Uzbekistan» шоурумларининг самарали фаолиятини таъминлаш.

3. Ҳар бир тармоқ бўйича республикада жорий этилаётган қулайликларнинг мазмун-моҳиятини дунёдаги нуфузли экспертлар ва компаниялар ўртасида тарғиб қилиш ҳамда уларда ижобий фикрни шакллантириш мақсадида оммавий ахборот воситалари ва ижтимоий тармоқларда кенг тарғибот-ташвиқот ишларини амалга ошириш.

доимий равишда

Савдо-саноат палатаси

(Д. Ваҳобов),

Инвестициялар, саноат ва савдо вазирлиги

(Л. Кудратов),

Ташқи ишлар вазирлиги

(Б. Саидов)

17.

Ташқи бозорларда ишончли етказиб берувчи сифатида ижобий имиджни мустаҳкамлаш.

Миллий маҳсулотларни ишлаб чиқариш жараёнларига сифат, бошқарув, ижтимоий, хавфсизлик каби халқаро стандарт ва сертификатлар жорий этилганлиги ҳамда ишлаб чиқариш технологиялари халқаро талабларга мувофиқлиги тўғрисида хорижлик харидорлар ва истеъмолчилар хабардорлигини ошириш.

доимий равишда

Савдо-саноат палатаси

(Д. Ваҳобов),

Инвестициялар, саноат ва савдо вазирлиги

(Л. Кудратов),

Ташқи ишлар вазирлиги

(Б. Саидов)

III. Халқаро брендларни жалб қилиш ва миллий брендларни ривожлантириш учун қўллаб-қувватлаш чораларини тақдим этишни молиялаштириш ва рақамлаштириш бўйича

18.

Миллий бренд эгаларини ҳамда нуфузли халқаро брендлар ҳамкорларини Савдога кўмаклашиш жамғармаси маблағлари ҳисобидан қўллаб-қувватлаш тартибини жорий қилиш.

1. Миллий бренд эгаларини ҳамда нуфузли халқаро брендлар ҳамкорларини Савдога кўмаклашиш жамғармаси маблағлари ҳисобидан қўллаб-қувватлаш тартибини ишлаб чиқиш.

2. Тартибни тасдиқлаш учун Вазирлар Маҳкамасига киритиш.

2024 йил 31 август

Савдо-саноат палатаси

(Д. Ваҳобов),

Инвестициялар, саноат ва савдо вазирлиги

(Л. Кудратов)

19.

Халқаро брендларни жалб қилиш ва миллий брендларни ривожлантириш бўйича молиявий қўллаб-қувватлаш харажатларини Савдога кўмаклашиш жамғармаси маблағлари ҳисобидан молиялаштириш.

1. Қарорда назарда тутилган харажатларни молиялаштириш учун Савдога кўмаклашиш жамғармасидан маблағлар ажратиш.

2024 йил 1 сентябрдан бошлаб

Савдо-саноат палатаси

(Д. Ваҳобов),

Инвестициялар, саноат ва савдо вазирлиги

(Л. Кудратов)

Тикланиш ва тараққиёт жамғармаси

(Ш. Вафаев)

Иқтисодиёт ва молия вазирлиги

(И. Норқулов)

2. 2025 йилдан бошлаб давлат бюджети параметрларида Савдога кўмаклашиш жамғармасига мазкур қарорда назарда тутилган харажатларни молиялаштириш учун зарур маблағлар ажратилиши бўйича таклиф ишлаб чиқиш ва Вазирлар Маҳкамасига киритиш.

2024 йил 1 октябрь

20.

Нуфузли халқаро ва миллий брендлар бўйича электрон платформани ишга тушириш.

Қуйидагиларни назарда тутувчи электрон платформани ишга тушириш:

нуфузли халқаро брендлар рўйхати, уларнинг талаблари, ушбу талабларга маҳаллий тадбиркорлик субъектларини мослаштириш бўйича тавсиялар, шунингдек, брендларни жалб қилиш учун назарда тутилган қўллаб-қувватлаш чоралари;

миллий брендлар рўйхати ва унга киритилган бренд эгалари учун назарда тутилган қўллаб-қувватлаш чоралари.

2025 йил 1 январь

Савдо-саноат палатаси

(Д. Ваҳобов),

Инвестициялар, саноат ва савдо вазирлиги

(Л. Кудратов),

Рақамли технологиялар вазирлиги

(Ш. Шерматов)

(3-илова Ўзбекистон Республикаси Президентининг 2024 йил 27 декабрдаги ПФ-229-сонли Фармони таҳририда — Қонунчилик маълумотлари миллий базаси, 28.12.2024 й., 06/24/229/1090-сон)

(Қонунчилик маълумотлари миллий базаси, 12.08.2024 й., 07/24/286/0606-сон; 28.12.2024 й., 06/24/229/1090-сон)