326-сон 10.06.2022. Фуқаролар иштирокидаги аудит ўтказиладиган объектни аниқлаш ва давлат молиявий назорати органлари фаолияти самарадорлигини жамоатчилик томонидан баҳолаб бориш тартиби тўғрисидаги низомни тасдиқлаш ҳақида

Ўзбекистон Республикаси Вазирлар Маҳкамасининг

қарори

Фуқаролар иштирокидаги аудит ўтказиладиган объектни аниқлаш ва давлат молиявий назорати органлари фаолияти самарадорлигини жамоатчилик томонидан баҳолаб бориш тартиби тўғрисидаги низомни тасдиқлаш ҳақида

Давлат молиявий назорати органлари фаолиятининг очиқлигини таъминлаш, унда фуқаролар иштироки ролини ошириш, шунингдек, Ўзбекистон Республикаси Президентининг «Давлат молиявий назорати тизимини янада такомиллаштириш чора-тадбирлари тўғрисида» 2021 йил 27 августдаги ПФ-6300-сон Фармони ижросини таъминлаш мақсадида Вазирлар Маҳкамаси қарор қилади:

1. Қуйидагиларни назарда тутувчи Фуқаролар иштирокидаги аудит ўтказиладиган объектни аниқлаш ва давлат молиявий назорати органлари фаолияти самарадорлигини жамоатчилик томонидан баҳолаб бориш тартиби тўғрисидаги низом иловага мувофиқ тасдиқлансин:

«Давлат аудити» дастурига фуқаролар томонидан танланиши мумкин бўлган назорат объектлари рўйхатини киритиш;

фуқаролар томонидан энг кўп маротаба танланган назорат объектларида назорат тадбирини ўтказиш тартиб-таомиллари;

давлат молиявий назорати органи ва ички аудит хизматлари фаолияти самарадорлигини жамоатчилик томонидан баҳолаш тартиби.

2. Белгилансинки, Ўзбекистон Республикаси Молия вазирлиги ҳузуридаги Давлат молиявий назорат инспекцияси ҳамда вазирлик ва идораларнинг ички аудит хизматлари назорат ишларининг йиллик режасини февраль ойнинг 10 санасидан кечиктирмай, шунингдек, фуқаролар иштирокидаги аудит бўйича ўтказилган назорат тадбирининг натижалари тўғрисидаги маълумотларни ҳар чорак якунларига кўра, чоракдан кейинги ойнинг 25 санасидан кечиктирмай «Давлат аудити» дастурида жамоатчилик муҳокамаси учун эълон қилинади.

3. Ўзбекистон Республикаси Молия вазирлиги Олий ва ўрта махсус таълим вазирлиги билан биргаликда бир ой муддатда 2023 йил давомида иқтисодиёт ва молия йўналишидаги олий таълим муассасаларида вазирлик ва идораларда ички аудит хизматларини ривожлантиришнинг ўзига хос хусусиятлари юзасидан амалий семинарлар ўтказиш графигини тасдиқласин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2022 йил 10 июнь,

326-сон

Вазирлар Маҳкамасининг 2022 йил 10 июндаги 326-сон қарорига
ИЛОВА

НИЗОМ

1-боб. Умумий қоидалар

1. Мазкур Низом фуқаролар иштирокидаги аудит ўтказиладиган объектни аниқлаш ҳамда давлат молиявий назорати органи ва вазирлик ва идораларнинг ички аудит хизматлари фаолияти самарадорлигини жамоатчилик томонидан баҳолаб бориш тартибини белгилайди.

Олдинги таҳрирга қаранг.

2. Ушбу Низом талаблари Давлат молиявий назорати инспекцияси (кейинги ўринларда — Инспекция) ҳамда вазирлик ва идораларнинг ички аудит хизматлари (кейинги ўринларда — ички аудит хизматлари), барча бюджет ташкилотлари, давлат мақсадли жамғармалари ва белгиланган тартибда ташкил этилган бошқа жамғармалар учун татбиқ этилади.

(2-банд Ўзбекистон Республикаси Вазирлар Маҳкамасининг 2025 йил 1 мартдаги 135-сонли қарори таҳририда — Қонунчилик маълумотлари миллий базаси, 03.03.2025 й., 09/25/135/0208-сон)

3. Ушбу Низомда қуйидаги асосий тушунчалардан фойдаланилади:

«Давлат аудити» дастури — Ўзбекистон Республикаси Ҳисоб палатасининг «Давлат аудити» дастурий комплекси;

ваколатли тузилма — Инспекция ҳамда ички аудит хизматлари;

назорат объекти — бюджет ташкилоти, давлат мақсадли жамғармалари ва белгиланган тартибда ташкил этилган бошқа жамғармалар;

назорат тадбирлари — ички аудит хизматлари томонидан ўтказиладиган аудит тадбирлари ҳамда Инспекция томонидан ўтказиладиган қонунчиликда белгиланган молиявий назорат шакллари;

фуқаролар иштирокидаги аудит тизими — фуқаролар томонидан танланган назорат объектларини саралаш, уларда назорат тадбирларини ўтказиш ҳамда натижаларини эълон қилиб бориш жараёни.

2-боб. Фуқаролар иштирокидаги аудит ўтказиладиган объектни аниқлаш тартиби

4. Фуқаролар иштирокидаги аудит ўтказиладиган назорат объектини аниқлаш ушбу Низомнинг 1-иловасига мувофиқ схема асосида амалга оширилади.

5. Назорат объектини аниқлашда иштирок этиш учун фуқаролар «Давлат аудити» дастурида рўйхатдан ўтадилар.

6. Фуқароларни «Давлат аудити» дастурида аутентификациялаш электрон рақамли имзо воситалари, мобил телефон рақамлари, шахсларнинг биометрик маълумотлари, Мобил-ID, Face-ID шунингдек бошқа усуллар билан белгиланган тартибда амалга оширилади.

Олдинги таҳрирга қаранг.

7. Фуқаролар томонидан келгуси йил учун танланиши мумкин бўлган назорат объектлари рўйхати ваколатли тузилмалар томонидан ҳар йили 31 декабрь санасига қадар жорий йил учун тасдиқланган биринчи даражали бюджет маблағларини тақсимловчилари сифатида белгиланган вазирлик ва идоралар кесимида шакллантирилади ҳамда «Давлат аудити» дастурига киритилади.

(7-банднинг биринчи хатбошиси Ўзбекистон Республикаси Вазирлар Маҳкамасининг 2025 йил 16 июлдаги 446-сонли қарори таҳририда — Қонунчилик маълумотлари миллий базаси, 17.07.2025 й., 09/25/446/0626-сон)

Бунда, ички аудит хизматлари мавжуд бўлмаган вазирлик ва идоралар бўйича назорат объектлари рўйхати Инспекция томонидан киритилади.

8. Фуқаролар томонидан танланиши мумкин бўлган назорат объектлари рўйхатига қуйидагилар киритилмайди:

ваколатли тузилмаларнинг йиллик режасига киритилган назорат объектлари;

фаолияти давлат ҳокимияти ва бошқарувида алоҳида муҳим аҳамиятга эга бўлган биринчи даражали бюджет маблағларини тақсимловчилари сифатида эътироф этилган идоралар ҳамда улар тизимидаги назорат объектлари;

охирги икки йил мобайнида фуқаролар иштирокидаги аудит тизими орқали танланган ва назорат тадбирлари ўтказилган назорат объектлари;

молиялаштириш давлат сири ёки қонун билан қўриқланадиган бошқа сир сифатида эътироф этилган вазирлик ва идоралар ҳамда улар тизимидаги назорат объектлари.

Олдинги таҳрирга қаранг.

Бунда, фаолияти давлат ҳокимияти ва бошқарувида алоҳида муҳим аҳамиятга эга бўлган идоралар рўйхати Иқтисодиёт ва молия вазирлиги томонидан тасдиқланади.

(8-банднинг олтинчи хатбошиси Ўзбекистон Республикаси Вазирлар Маҳкамасининг 2025 йил 16 июлдаги 446-сонли қарори таҳририда — Қонунчилик маълумотлари миллий базаси, 17.07.2025 й., 09/25/446/0626-сон)

9. «Давлат аудити» дастурига киритилган рўйхат таркибидан назорат объекти фуқаролар томонидан назорат тадбирини ўтказиш зарурлигининг сабаби келтирилган ҳолда танланади.

Бунда, фуқаролар томонидан календарь йил давомида бир назорат объектини бир марта танлаш амалга оширилади.

10. Фуқаролар томонидан назорат объектини танлаш «Давлат аудити» дастурида ҳар чорак биринчи ойининг 10 санасига қадар амалга оширилади.

11. Фуқаролар томонидан танланган назорат объектлари рўйхати ва улардаги танлашлар сони «Давлат аудити» дастурида автоматик тарзда шакллантирилади.

12. Назорат тадбирлари ўтказиладиган назорат объектлари рўйхати ва назорат тадбирлари ўтказиш муддатлари тўғрисидаги маълумотлар «Давлат аудити» дастурида ҳар чорак биринчи ойининг 15 санасига қадар эълон қилинади.

Олдинги таҳрирга қаранг.

13. Ҳар чорак охирги ойининг 10 санасига қадар фуқаролар томонидан танлашлар сони 10 тадан ортиқ бўлган назорат объектлари таркибидан энг кўп марта танланган учтасида назорат тадбири ўтказилади.

(13-банднинг биринчи хатбошиси Ўзбекистон Республикаси Вазирлар Маҳкамасининг 2025 йил 16 июлдаги 446-сонли қарори таҳририда — Қонунчилик маълумотлари миллий базаси, 17.07.2025 й., 09/25/446/0626-сон)

Олдинги таҳрирга қаранг.

Бунда, энг кўп марта танланган назорат объектларида танлашлар сони бир хил бўлганда, уларнинг барчасида назорат тадбирлари ўтказилади ҳамда назорат тадбирлари ўтказилган объектлар икки календарь йил давомида фуқаролар томонидан танланиши мумкин бўлган назорат объектлари рўйхатига қайта киритилмайди.

(13-банднинг иккинчи хатбошиси Ўзбекистон Республикаси Президентининг 2023 йил 29 декабрдаги ПҚ-422-сонли қарори таҳририда — Қонунчилик маълумотлари миллий базаси, 29.12.2023 й., 07/23/422/0994-сон — 2024 йил 1 январдан кучга киради)

14. Назорат тадбирлари тегишли ваколатли тузилмалар томонидан ўтказилади.

Бунда, ички аудит хизматлари мавжуд бўлмаган вазирлик ва идоралар бўйича назорат тадбирлари Инспекция томонидан ўтказилади.

15. Танлов натижаларига кўра рўйхатдаги 10 тадан кўп танланган назорат объекти сони фақат битта бўлган ҳолларда, ушбу назорат объектида назорат тадбири ўтказилади.

16. Танлашлар сони бўйича учта энг кўп танланган назорат объектлари таркибига кирмаган назорат объектлари календарь йили давомида кейинги чоракка ўтказилади ҳамда натижалари сақлаб қолинган ҳолда танлашга қайта қўйилади.

Олдинги таҳрирга қаранг.

17. Назорат тадбирлари якунлангандан сўнг 3 иш куни ичида назорат тадбирлари натижалари тўғрисидаги маълумот «Давлат аудити» дастурида эълон қилинади.

(17-банд Ўзбекистон Республикаси Вазирлар Маҳкамасининг 2025 йил 16 июлдаги 446-сонли қарори таҳририда — Қонунчилик маълумотлари миллий базаси, 17.07.2025 й., 09/25/446/0626-сон)

3-боб. Ваколатли тузилмалар фаолияти самарадорлигини жамоатчилик томонидан баҳолаш тартиби

18. Ваколатли тузилмалар фаолияти самарадорлигини жамоатчилик томонидан баҳолаш (кейинги ўринларда — баҳолаш) «Давлат аудити» дастури орқали ушбу Низомнинг 2-иловасига мувофиқ схема асосида амалга оширилади.

19. Баҳолаш мазкур Низомнинг 2-бобида кўрсатилган тартибга мувофиқ аниқланган назорат объектларида ўтказилган назорат тадбирлари натижалари тўғрисидаги эълон қилинган маълумот асосида фуқаролар томонидан баҳолаш орқали амалга оширилади.

20. Баҳолаш учун фуқароларни «Давлат аудити» дастурида аутентификациялаш электрон рақамли имзо воситалари, мобил телефон рақамлари, шахсларнинг биометрик маълумотлари, Мобил-ID, Face-ID шунингдек бошқа усуллар билан белгиланган тартибда амалга оширилади.

Олдинги таҳрирга қаранг.

21. Баҳолаш ваколатли тузилмалар томонидан эълон қилинган назорат тадбирлари натижалари тўғрисидаги маълумот асосида назорат тадбири ўтказилган чоракнинг охирги ўн кунлигида «Давлат аудити» дастурида амалга оширилади.

(21-банд Ўзбекистон Республикаси Вазирлар Маҳкамасининг 2025 йил 16 июлдаги 446-сонли қарори таҳририда — Қонунчилик маълумотлари миллий базаси, 17.07.2025 й., 09/25/446/0626-сон)

22. Баҳолаш ушбу Низомнинг 19-бандида кўрсатилган маълумотга 1 дан 5 гача (1 энг паст ва 5 энг юқори балл) бутун сонлардаги шкала асосида баҳо бериш орқали амалга оширилади.

23. Баҳолаш натижаларининг ўртача баҳоси «Давлат аудити» дастурида автоматик тарзда алоҳида саҳифада яхлитлаш орқали акс эттириб борилади.

24. Баҳолаш натижаларига назорат тадбирларини ўтказган ваколатли тузилмаларнинг ходимлари натижаси сифатида қаралади.

Бунда, 10 нафардан кам фуқаролар томонидан баҳоланган назорат тадбирлари баҳолаш натижаларининг ўртача баҳосини ҳисоблашда инобатга олинмайди.

25. Баҳолаш натижаларининг ўртача баҳосидан келиб чиқиб ваколатли тузилмалар ходимларининг натижалари қуйидагича белгиланади:

5 балл бўлган ходим — « намунали»;

4 балл бўлган ходим — «яхши»;

3 балл бўлган ходим — «қониқарли»;

3 баллгача бўлган ходим — «қониқарсиз».

26. Баҳолаш натижаларининг рейтинги бўйича:

«намунали» деб топилган ходимга — лавозим маошининг 25 фоизи;

«яхши» деб топилган ходимга — лавозим маошининг 15 фоизи;

«қониқарли» деб топилган ходимга — лавозим маошининг 5 фоизи миқдорида пул мукофоти бериш орқали рағбатлантириш амалга оширилади.

Бунда, ходимларга пул мукофоти бериш бюджет ташкилотлари ходимларини моддий рағбатлантириш махсус фонди маблағлари ҳисобидан амалга оширилади.

27. Баҳолаш натижаларига кўра натижаси «қониқарсиз» деб топилган ходимларга нисбатан қонунчиликда белгиланган кўринишда чоралар қўлланилади.

28. Рағбатлантириш ва чора кўриш масаласи белгиланган тартибда амалга оширилади.

4-боб. Якунловчи қоидалар

29. Ушбу Низом талаблари бузилишида айбдор бўлган шахслар қонунчилик ҳужжатларига мувофиқ жавоб берадилар.

Фуқаролар иштирокидаги аудит ўтказиладиган объектни аниқлаш

СХЕМАСИ

Олдинги таҳрирга қаранг.

Босқичлар	Субъектлар	Тадбирлар	Муддатлар

1-босқич	Инспекция ҳамда ички аудит хизматлари	Фуқаролар томонидан танланиши мумкин бўлган назорат объектлари рўйхатини «Давлат аудити» дастурига киритиш.	ҳар йили 31 декабрга қадар
1-босқич	Инспекция ҳамда ички аудит хизматлари		ҳар йили 31 декабрга қадар

2-босқич	Фуқаролар	1. «Давлат аудити» дастурида аутентификациядан ўтиш.	1. Заруратга кўра
2-босқич	Фуқаролар	2. «Давлат аудити» дастурига киритилган рўйхатдаги назорат объектларини танлаш.	2. Ҳар чорак биринчи ойининг 10 санасига қадар

3-босқич	«Давлат аудити» дастури*	«Давлат аудити» дастури орқали автоматик тарзда фуқаролар томонидан танланган назорат объектлари рўйхати ва улардаги танлашлар сонини шакллантириш.	Ҳар чорак биринчи ойининг 10 санаси (автоматик тарзда)
3-босқич	«Давлат аудити» дастури*		Ҳар чорак биринчи ойининг 10 санаси (автоматик тарзда)

4-босқич	Инспекция ҳамда ички аудит хизматлари	Назорат тадбирлари ўтказиладиган назорат объектлари рўйхати ва назорат тадбирлари ўтказиш муддатлари тўғрисидаги маълумотларни «Давлат аудити» дастурида эълон қилиш.	Ҳар чорак биринчи ойининг 15 санаси
4-босқич	Инспекция ҳамда ички аудит хизматлари		Ҳар чорак биринчи ойининг 15 санаси

5-босқич	Инспекция ҳамда ички аудит хизматлари	1. «Давлат аудити» дастурида шакллантирилган рўйхатдаги энг кўп марта танланган назорат объектларининг учтасида назорат тадбирини ўтказиш.	1. Ҳар чорак охирги ойининг 10 санасига қадар
5-босқич	Инспекция ҳамда ички аудит хизматлари	2. Назорат тадбирлари якунлангандан сўнг уларнинг натижалари тўғрисидаги маълумотларни «Давлат аудити» дастурида эълон қилиб бориш.	2. Назорат тадбирлари якунлангандан сўнг 3 иш куни ичида

*Ўзбекистон Республикаси Ҳисоб палатасининг «Давлат аудити» дастурий комплекси.

(1-илова Ўзбекистон Республикаси Вазирлар Маҳкамасининг 2025 йил 16 июлдаги 446-сонли қарори таҳририда — Қонунчилик маълумотлари миллий базаси, 17.07.2025 й., 09/25/446/0626-сон)

Ваколатли тузилмалар фаолияти самарадорлигини жамоатчилик томонидан баҳолаш

СХЕМАСИ

Олдинги таҳрирга қаранг.

Босқичлар	Субъектлар	Тадбирлар	Муддатлар

1-босқич	Фуқаролар	1. «Давлат аудити» дастурида аутентификациядан ўтиш.	1. Заруратга кўра
1-босқич	Фуқаролар	2. Ваколатли тузилмалар фаолияти самарадорлигини назорат тадбирлари натижалари тўғрисидаги маълумотлар асосида «Давлат аудити» дастурида баҳолаш.	2. Назорат тадбири ўтказилган чоракнинг охирги ўн кунлигида

2-босқич	«Давлат аудити» дастури*	Ваколатли тузилмалар фаолияти самарадорлигини баҳолаш натижаларининг ўртача баҳосини алоҳида саҳифада яхлитлаш орқали акс эттириб бориш.	Назорат тадбири ўтказилган чоракдан кейинги ойнинг биринчи кунида
2-босқич	«Давлат аудити» дастури*

(2-илова Ўзбекистон Республикаси Вазирлар Маҳкамасининг 2025 йил 16 июлдаги 446-сонли қарори таҳририда — Қонунчилик маълумотлари миллий базаси, 17.07.2025 й., 09/25/446/0626-сон)

(Қонунчилик маълумотлари миллий базаси, 11.06.2022 й., 09/22/326/0515-сон; 29.12.2023 й., 07/23/422/0994-сон; 03.03.2025 й., 09/25/135/0208-сон; 17.07.2025 й., 09/25/446/0626-сон)