Ўзбекистон Республикаси Президенти И. Каримов томонидан мамлакатимизнинг иқтисодий стратегиясини амалга ошириш, Ўзбекистонда қабул қилинган мамлакатни ислоҳ этиш ва модернизация қилиш борасида ўз моделимизни изчил рўёбга чиқариш, жаҳон молиявий-иқтисодий инқирози оқибатларининг олдини олиш ҳамда унинг мамлакатимиздаги ижтимоий-иқтисодий вазиятга таъсирини юмшатиш юзасидан қўйилган дастурий вазифаларнинг амалга оширилиши иқтисодий ўсишнинг барқарор юқори суръатлари сақланиб қолишини таъминлади. 2009 йилнинг тўққиз ойида ялпи ички маҳсулотнинг ўсиши 8 фоизни ташкил этди, саноат маҳсулотлари ишлаб чиқариш ҳажмлари 9,1 фоизга, истеъмол товарлари ишлаб чиқариш 13,7 фоизга, қишлоқ хўжалиги маҳсулотлари етиштириш 3,3 фоизга, хизматлар кўрсатиш 15,8 фоизга кўпайди. Мамлакатимиз экспорт қилувчиларини қўллаб-қувватлашга қаратилган тизимли чора-тадбирлар натижасида экспорт қилинаётган маҳаллий маҳсулотлар турлари ва экспорт бозорлари географияси кенгайди, ташқи савдо айланмасининг 2,3 миллиард АҚШ долларидан ортиқ миқдордаги ижобий сальдоси таъминланди.

Инқирозга қарши чораларнинг 2009 — 2012 йилларга мўлжалланган дастурини амалга ошириш борасида маҳаллий ҳокимият органлари зиммасига Дастурда белгиланган чора-тадбирларни бажаришда фаол ва бевосита иштирок этишини талаб қиладиган масъулиятли вазифалар юклатилган.

Ўзбекистон Республикаси Олий Мажлиси Сенатининг 2009 йил 27 мартдаги 624-I-сонли Қарорининг ижро этилишини ўрганиш шуни кўрсатдики, умуман олганда, халқ депутатлари маҳаллий Кенгашларининг ишида 2009 йил апрель ойидан бошлаб айрим ижобий ўзгаришлар бўлмоқда. Ўзбекистон Республикаси Олий Мажлиси Сенатининг ўн саккизинчи ялпи мажлисида қайд этилган маҳаллий давлат ҳокимияти органларининг фаолиятидаги камчиликлар умуман олганда, бартараф этилган.

Барча ҳудудларда Иқтисодиётнинг реал сектори базавий тармоқлари корхоналарини қўллаб-қувватлаш, уларнинг барқарор ишлашини таъминлаш ва экспорт салоҳиятини ошириш чора-тадбирлари дастурининг амалга оширилишини мониторинг ва назорат қилиш бўйича инқирозга қарши махсус комиссиялар тузилган.

Халқ депутаталари маҳаллий Кенгашларининг сессияларида ва уларнинг доимий комиссиялари мажлисларида маҳаллий давлат бошқарув органларининг инқирозга қарши чораларнинг ҳудудий ва тармоқ дастурларини амалий жиҳатдан рўёбга чиқариш учун масъул раҳбарларининг ҳисоботлари эшитиб борилмоқда. Инқирозга қарши чораларнинг 2009 — 2012 йилларга мўлжалланган дастурини амалга оширишда маҳаллий вакиллик ҳокимияти органлари билан давлат ва хўжалик бошқаруви ҳудудий органлари ўртасида ўзаро яқин ҳамкорлик ҳамда уйғунликни таъминлаш бўйича комплекс чора-тадбирлар амалга оширилмоқда. Кўпчилик ҳолларда халқ депутатлари маҳаллий Кенгашларининг депутатлари инқирозга қарши махсус комиссиялар таркибига киритилган.

Халқ депутатлари вилоят Кенгашларининг доимий комиссиялари ва халқ депутатлари туман (шаҳар) Кенгашларининг соҳалар бўйича доимий комиссиялари ўртасида ҳамкорлик механизми аста-секин йўлга тушиб бормоқда. Фуқаролар ўзини ўзи бошқариш органларининг салоҳияти ва имкониятларидан кенгроқ фойдаланила бошланди. Андижон, Бухоро, Навоий, Наманган, Самарқанд, Сурхондарё ва Фарғона вилоятлари халқ депутатлари маҳаллий Кенгашлари маҳаллаларнинг фаоллари, таълим муассасаларининг ходимларини жалб этган ҳолда жаҳон молиявий-иқтисодий инқирозининг мамлакатимиздаги ижтимоий-иқтисодий вазиятга таъсири ҳақида, инқироз оқибатларининг олдини олиш ҳамда уларни юмшатиш юзасидан давлат томонидан кўрилаётган чоралар моҳияти ва аҳамияти тўғрисида аҳоли ўртасида тушунтириш ишларини олиб бормоқда.

Наманган, Сурхондарё ва Тошкент вилоятлари маҳаллий давлат ҳокимияти органларининг фаолиятини таҳлил қилиш Инқирозга қарши чораларнинг 2009 — 2012 йилларга мўлжалланган дастурининг иқтисодиётни ташкил этувчи қисми белгиланган муддатларда бажарилганлигини кўрсатди.

Сурхондарё вилоятида Ўзбекистон Республикаси Олий Мажлиси Сенатининг 2009 йил 27 мартдаги 624-I-сонли Қарорини муҳокама қилиш якунлари бўйича халқ депутатлари маҳаллий Кенгашлари депутатларининг фаолиятини кучайтиришга қаратилган чора-тадбирлар қабул қилинган. Барча туманларда (шаҳарларда) халқ депутатлари маҳаллий Кенгашларининг депутатлари учун ўқув семинарлари ташкил этилган, халқ депутатлари туман ва шаҳар Кенгашлари ҳамда уларнинг доимий комиссияларига амалий ёрдам кўрсатиш бўйича махсус ишчи гуруҳлар ташкил этилган.

Шу билан бирга айрим халқ депутатлари маҳаллий Кенгашлари ва улар доимий комиссияларининг Инқирозга қарши чораларнинг 2009 — 2012 йилларга мўлжалланган дастурини амалга ошириш ва Ўзбекистон Республикаси Олий Мажлиси Сенатининг 2009 йил 27 мартдаги 624-I-сонли Қарорини бажариш борасидаги фаолиятида ҳали ҳам жиддий камчиликлар мавжуд.

Наманган ва Тошкент вилоятларида эришилган ижобий иқтисодий кўрсаткичларга қарамай, халқ депутатлари маҳаллий Кенгашлари депутатларининг, халқ депутатлари маҳаллий Кенгашлари доимий комиссияларининг салоҳиятини тўла-тўкис рўёбга чиқаришга муваффақ бўлинмади.

Айрим ҳолларда халқ депутатлари маҳаллий Кенгашларининг депутатлари Иқтисодиётнинг реал сектори базавий тармоқлари корхоналарини қўллаб-қувватлаш, уларнинг барқарор ишлашини таъминлаш ва экспорт салоҳиятини ошириш чора-тадбирлари дастурининг амалга оширилишини мониторинг ва назорат қилиш бўйича инқирозга қарши махсус комиссияларнинг ишига етарли даражада жалб этилмаган.

Халқ депутатлари маҳаллий Кенгашларининг сессияларида инқирозга қарши чораларнинг ҳудудий ва тармоқ дастурлари ижро этилиши мунтазам кўриб чиқилмаётир, қатор ҳолларда маҳаллий давлат бошқаруви органларининг инқирозга қарши чораларнинг ҳудудий ва тармоқ дастурларини амалий жиҳатдан рўёбга чиқариш учун масъул бўлган раҳбарларининг ҳисоботлари эшитилмаётир. Айрим ҳолларда бундай мажлислар номигагина ўтказилмоқда, қабул қилинаётган қарорлар эса декларатив хусусиятга эга бўлиб қолмоқда. Кўпгина ҳолларда инқирозга қарши чораларнинг ҳудудий дастурлари, халқ депутатлари маҳаллий Кенгашлари сессиялари ва уларни доимий комиссиялари қарорларининг ижроси устидан назорат ўрнатилмаётир.

Халқ депутатлари маҳаллий Кенгашларининг айрим доимий комиссиялари 2009 йилнинг тўққиз ойи давомида Инқирозга қарши чораларнинг 2009 — 2012 йилларга мўлжалланган дастурини амалга оширишнинг боришини муҳокама қилмаганлар ва амалда бу жараёнда иштирок этишдан ўзларини четга олганлар (Андижон, Жиззах, Навоий, Қашқадарё, Самарқанд, Сирдарё, Тошкент, Фарғона вилоятлари).

Халқ депутатлари маҳаллий Кенгашлари депутатлари томонидан тушунтириш ишларини олиб борилиши доимий ва тизимли характерга эга эмас. Депутатлар корпусининг фаолиятини оммавий ахборот воситаларида ёритиш ишлари суст ташкил этилган. Халқ депутатлари маҳаллий Кенгашлари сессиялари ва улар доимий комиссияларининг қарорлари, халқ депутатлари маҳаллий Кенгашларининг сессияларида тасдиқланган инқирозга қарши чораларнинг ҳудудий дастурлари маҳаллий газеталарда эълон қилинмаётир.

Депутатлик мажбуриятларини тегишли даражада бажармаганлиги учун халқ депутатлари маҳаллий Кенгашларининг 84 нафар депутатига огоҳлантириш эълон қилинган, 18 нафар депутат хусусида эса ваколатларини муддатидан олдин тугатиш ташаббуси билан чиқилган.

Маҳаллий ҳокимият органларининг Ўзбекистон Республикаси Олий Мажлиси Сенатининг 2009 йил 27 мартдаги «Инқирозга қарши чораларнинг 2009 — 2012 йилларга мўлжалланган дастурини сўзсиз бажариш борасида маҳаллий ҳокимият органларининг роли ва масъуллиги тўғрисида»ги 624-I-сонли Қарорини сўзсиз бажариш борасидаги роли ва масъуллигини янада ошириш мақсадида Ўзбекистон Республикаси Олий Мажлисининг Сенати қарор қилади:

1. Ўзбекистон Республикаси Олий Мажлиси Сенати комиссиясининг маҳаллий ҳокимият органларининг Инқирозга қарши чораларнинг 2009 — 2012 йилларга мўлжалланган дастурини сўзсиз бажариш борасидаги жорий йилнинг тўққиз ойлик фаолиятини ўрганиш якунларига доир ахбороти, шунингдек халқ депутатлари Наманган, Сурхондарё, Тошкент вилоятлари Кенгашлари раҳбарларининг ушбу масала бўйича ҳисоботлари маълумот учун қабул қилинсин.

2. Қайд этилсинки, Ўзбекистон Республикаси Олий Мажлиси Сенатининг 2009 йил 27 мартдаги 624-I-сонли Қарорини ижро этиш юзасидан Сурхондарё вилоятида халқ депутатлари маҳаллий Кенгашларининг фаолиятини кучайтириш, уларнинг Инқирозга қарши чораларнинг 2009 — 2012 йилларга мўлжалланган дастури сўзсиз бажарилишини таъминлашдаги роли ва масъуллигини ошириш борасида аниқ мақсадга қаратилган иш олиб борилмоқда.

3. Халқ депутатлари Наманган ва Тошкент вилоятлари Кенгашлари Ўзбекистон Республикаси Олий Мажлиси Сенатининг 2009 йил 27 мартдаги 624-I-сонли Қарорини бажаришда йўл қўйилган камчиликларни бартараф этиш юзасидан чора-тадбирлар кўрсин ва халқ депутатлари маҳаллий Кенгашларининг Инқирозга қарши чораларнинг 2009 — 2012 йилларга мўлжалланган дастурини амалга ошириш борасидаги фаолиятини кучайтирсин.

4. Қорақалпоғистон Республикаси Жўқорғи Кенгеси, халқ депутатлари вилоятлар, Тошкент шаҳар, туманлар ва шаҳарлар Кенгашларига:

Ўзбекистон Республикаси Олий Мажлиси Сенати комиссиясининг ахборотида қайд этилган жиддий камчиликларни бартараф этиш юзасидан узил-кесил чора-тадбирлар кўрилишини, Ўзбекистон Республикаси Олий Мажлиси Сенатининг 2009 йил 27 мартдаги 624-I-сонли Қарорини сўзсиз бажарилишини таъминласин;

Ўзбекистон Республикаси Президенти И. Каримов томонидан мамлакатимизнинг иқтисодий стратегиясини амалга ошириш, Ўзбекистонда қабул қилинган мамлакатни ислоҳ этиш ва модернизация қилиш борасида ўз моделимизни изчил рўёбга чиқариш, инқирозга қарши чора-тадбирларларни бажариш ҳамда мазкур масалада маҳаллий ҳокимият органларининг роли ва масъуллигини ошириш юзасидан қўйилган дастурий вазифаларни сўзсиз бажарилишини таъминласин;

маҳаллий давлат бошқаруви органларининг инқирозга қарши чораларнинг ҳудудий ва тармоқ дастурларини амалий жиҳатдан рўёбга чиқариш учун масъул бўлган раҳбарларининг шахсий жавобгарлигини ошириш мақсадида уларнинг фаолияти ҳақидаги ҳисоботини ҳар чоракда халқ депутатлари маҳаллий Кенгашларининг сессияларида эшитиб бориш амалиётини жорий этсин;

халқ депутатлари маҳаллий Кенгашларининг сессияларида халқ депутатлари маҳаллий Кенгашлари депутатларининг Инқирозга қарши чораларнинг 2009 — 2012 йилларга мўлжалланган дастурини амалга ошириш борасидаги иштироки ҳақидаги ҳисоботларини мунтазам эшитиб боришни амалиётга жорий этсин. Уларнинг фаолияти қониқарсиз бўлган ҳолларда депутатни чақириб олишгача бўлган зарур чораларни кўрсин;

халқ депутатлари вилоят, туман ва шаҳар Кенгашларининг қўшма сессияларини ўтказиб, уларда тегишли халқ депутатлари Кенгашлари раҳбарларининг ўзлари олиб бораётган ишлари ҳақидаги ҳисоботларини эшитиб боришни амалиётга киритиш тавсия этилсин;

халқ депутатлари вилоят, туман ва шаҳар Кенгашларининг соҳалар бўйича доимий комиссиялари қўшма мажлисларини мунтазам ўтказиб, уларда олиб борилаётган ишлар ҳақидаги ҳисоботларини тинглаш тавсия этилсин;

жаҳон молиявий-иқтисодий инқирози оқибатларининг олдини олиш ва унинг мамлакатимиздаги ижтимоий-иқтисодий вазиятга таъсирини юмшатиш юзасидан давлатимиз томонидан кўрилаётган чораларнинг моҳияти ва аҳамияти тўғрисида аҳолини хабардор қилиш мақсадида маҳаллий ҳокимият органлари томонидан Инқирозга қарши чораларнинг 2009 — 2012 йилларга мўлжалланган дастури доирасида қабул қилинаётган қарорлар оммавий ахборот воситаларида мунтазам эълон қилиб борилишини таъминласин;

халқ депутатлари маҳаллий Кенгашлари депутатларининг ҳуқуқий билим даражасини ошириш, улар Инқирозга қарши чораларнинг 2009 — 2012 йилларга мўлжалланган дастурини амалга ошириш борасида фаол иштироки борасидаги ишларнинг шакл ва усулларини эгаллаб олишлари мақсадида жойларда уларни тизимли ўқитишни ташкил этиш юзасидан аниқ тадбирлар режаларини ишлаб чиқсин;

Ўзбекистон Республикаси Олий Мажлиси Сенатининг 2009 йил 27 мартдаги 624-I-сонли Қарорини бажариш юзасидан олиб борилаётган ишлар ҳақида ҳар чоракда Ўзбекистон Республикаси Олий Мажлиси Сенатининг комиссиясига ахборот тақдим этилишини таъминласин.

5. Ўзбекистон Республикаси Олий Мажлиси Сенати комиссиясининг маҳаллий ҳокимият органларининг Инқирозга қарши чораларнинг 2009 — 2012 йилларга мўлжалланган дастурини сўзсиз бажариш борасидаги жорий йилнинг тўққиз ойлик фаолиятини ўрганиш якунларига доир ахборотида қайд этилган камчиликларни бартараф этиш мақсадида халқ депутатлари Кенгашларининг раислари — вилоятлар, туманлар, шаҳарлар ҳокимларига улар қонун ҳужжатларига мувофиқ қонунларнинг ва Ўзбекистон Республикаси Олий Мажлиси палаталарининг, Ўзбекистон Республикаси Президентининг, Ўзбекистон Республикаси Вазирлар Маҳкамасининг ҳужжатлари, юқори ташкилотлар ҳамда халқ депутатлари тегишли Кенгашининг қарорлари ижросини ташкил этиш учун шахсан жавобгар эканликлари кўрсатиб ўтилсин.

6. Ўзбекистон Республикаси Олий Мажлиси Сенатининг Кенгаши:

маҳаллий ҳокимият органларининг Инқирозга қарши чораларнинг 2009 — 2012 йилларга мўлжалланган дастурини сўзсиз бажаришга қаратилган фаолиятини мониторинг қилиш бўйича Ўзбекистон Республикаси Олий Мажлиси Сенатининг комиссиясини тузсин;

маҳаллий ҳокимият органларининг Инқирозга қарши чораларнинг 2009 — 2012 йилларга мўлжалланган дастурини сўзсиз бажаришга қаратилган фаолиятини мониторинг қилиш бўйича Ўзбекистон Республикаси Олий Мажлиси Сенатининг комиссияси тўғрисидаги Низомни ишлаб чиқсин ва тасдиқласин;

маҳаллий вакиллик органлари депутатларининг Инқирозга қарши чораларнинг 2009 — 2012 йилларга мўлжалланган дастурини амалга ошириш бўйича фаолиятини кучайтиришга қаратилган Ҳаракат дастурини ишлаб чиқсин.

7. Мазкур Қарор Ўзбекистон Республикаси Вазирлар Маҳкамасига, Қорақалпоғистон Республикаси Жўқорғи Кенгесига, халқ депутатлари вилоятлар, Тошкент шаҳар, туманлар ва шаҳарлар Кенгашларига юборилсин.

8. Қорақалпоғистон Республикаси Жўқорғи Кенгеси, халқ депутатлари вилоятлар, Тошкент шаҳар, туманлар ва шаҳарлар Кенгашлари ушбу Қарорнинг ижро этилиши тўғрисида Ўзбекистон Республикаси Олий Мажлиси Сенатининг Кенгашига 2010 йил 15 апрелгача ахборот тақдим этсинлар.

9. Ушбу Қарорнинг ижросини назорат қилиш Ўзбекистон Республикаси Олий Мажлиси Сенатининг Кенгаши зиммасига юклатилсин.