Ўзбекистон Республикаси Президентининг

Ўзбекистон Республикаси фуқароларини ҳарбий хизматга чақириш тартибини янада такомиллаштириш чора-тадбирлари тўғрисида

Ўтган давр мобайнида Ўзбекистон Республикаси Қуролли Кучлари сафида муддатли ҳарбий хизматни ўташ тизимини шакллантириш ва унинг нуфузини оширишда, шунингдек, ҳарбий хизматчилар томонидан ўз муқаддас бурчини сидқидилдан адо этиб, ҳар қандай хавф-хатарга муносиб зарба бера оладиган қудратли, тезкор ва самарали кучга айланишига қаратилган кенг кўламли ишлар амалга оширилди.

Буларнинг барчаси Ўзбекистон халқида, айниқса, ёшлар ўртасида миллий армия билан фахрланиш туйғусини, Ватан ҳимоячисидек шарафли касбга ҳурмат-эҳтиром ҳиссини уйғотмоқда.

Шу билан бирга, ҳарбий хизматга номзодларни танлаб олиш, тиббий кўрикдан ўтказиш ва ҳарбий хизматга чақиришнинг амалдаги тизими бугунги кун талабларига жавоб бермаслиги, бу борада янада самарали тизим ишлаб чиқишни, Қуролли Кучларнинг жанговар тайёргарлиги ва салоҳиятини оширишга қаратилган комплекс чора-тадбирларни амалга оширишни тақозо этмоқда.

Чақирилувчиларни ҳарбий хизматга чақириш тизимини такомиллаштириш, мазкур жараённи амалга оширишда очиқлик ва ошкораликни таъминлаш, номзодларга қўшин турларини танлаш имкониятини яратиш, шунингдек, муддатли ҳарбий хизматга чақириш жараёнидаги бир-бирини такрорловчи тадбирларга барҳам бериш мақсадида:

1. Қуйидагилар Ўзбекистон Республикаси фуқароларини ҳарбий хизматга чақириш тартибини янада такомиллаштиришнинг асосий йўналишлари этиб белгилансин:

Ўзбекистон Республикаси Қуролли Кучлари сафини ҳар томонлама етук, соғлом, жисмонан бақувват, интеллектуал салоҳиятли чақирувчилар билан бутлаш;

чақирилувчилар онгида миллий ғурур, она юртга садоқат ва ватанпарварлик туйғусини кучайтириш;

чақирилувчиларни муддатли ҳарбий хизматга чақиришнинг мавжуд тизимини оптималлаштириш;

чақирилувчиларни тиббий кўрикдан ўтказишда бир-бирини такрорловчи босқичларни соддалаштириш, тиббий кўрикдан ўтказиш сифати ва самарадорлигини ошириш ҳамда чуқурлаштирилган тиббий кўрикларни ҳарбий округлар ҳарбий госпиталлари мутахассислари томонидан ўтказиш;

ҳарбий хизмат назарда тутилган вазирликлар ва идоралар раҳбарлари, шунингдек, ҳарбий округ қўмондонларининг шахсий жавобгарлигини ошириш.

2. Чақирув тадбирларини сифатли ташкил этиш мақсадида фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича қуйидаги комиссиялар тузилсин:

а) муддатли ҳарбий хизматга чақириш учун:

Қорақалпоғистон Республикаси, вилоятлар ва Тошкент шаҳар мудофаа ишлари бошқармалари ҳузурида Раҳбарият кенгаши (кейинги ўринларда — Раҳбарият кенгаши);

Қорақалпоғистон Республикаси, вилоятлар ва Тошкент шаҳар йиғиш пунктларида ҳарбий-тиббий комиссия (кейинги ўринларда — ҳарбий-тиббий комиссия);

туман (шаҳар) мудофаа ишлари бўлимлари ҳузурида Қуролли Кучларни бутлаш комиссияси (кейинги ўринларда — бутлаш комиссияси);

б) муқобил хизматга чақириш, сафарбарлик чақируви резерви хизматига олиш, ҳарбий хизматга чақиришни кечиктириш ва Ўзбекистон Республикаси Қуролли Кучлари захирасига ўтказиш учун — туман (шаҳар) мудофаа ишлари бўлимлари ҳузурида ҳудудий комиссия (кейинги ўринларда — ҳудудий комиссия);

в) чақирилувчиларни тиббий кўрикдан ўтказиш, соғлиги даражасини аниқлаш ва даволанишга йўналтириш учун — мудофаа ишлари бўлимлари ҳузурида ҳудудий тиббий комиссия (кейинги ўринларда — ҳудудий тиббий комиссия).

3. Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссиялар фаолиятини ташкил этиш тартиби тўғрисидаги низом 1-иловага мувофиқ тасдиқлансин.

4. Қуйидагилар белгилансин:

а) Раҳбарият кенгашининг асосий вазифалари этиб:

чақирилувчиларни муддатли ҳарбий хизматга чақириш тадбирларини сифатли ташкил этиш;

чақирилувчиларнинг жисмоний тайёргарлиги, фикрлаш қобилияти, тафаккури, фидойилиги, қизиқишлари ва бошқа хусусиятларини инобатга олган ҳолда, улар бутлаш комиссияси томонидан қўшин турларига тўғри тайинланганлигига баҳо бериш;

ҳарбий-тиббий комиссия томонидан соғлиги бўйича ҳарбий хизматга яроқли деб топилган чақирилувчиларни Қуролли Кучлар қўшин тури командаларига тайинлаш (ёки турли сабабларга кўра командаларга тайинланмаганлиги) бўйича қарор қабул қилиш;

чақирилувчиларни муддатли ҳарбий хизматга чақириш;

маҳаллий ижро этувчи ҳокимият органлари ва жамоат ташкилотлари томонидан чақирилувчиларни йиғиш ва тантанали равишда ҳарбий қисмларга юбориш бўйича тадбирлар ўтказилишида ўзаро ҳамкорликни ташкил этиш;

бутлаш комиссияси, ҳарбий-тиббий комиссия, ҳудудий тиббий комиссия учун жойларда зарур шарт-шароитларни яратиш, дори воситалари, тиббий буюмлар ва бошқа моддий-техник воситалар билан таъминлаш, жамоат тартибини сақлаш ишларини ташкил қилиш;

муддатли ҳарбий хизматга чақириш ишларининг ошкоралигини, шунингдек, чақирувга оид тадбирларнинг оммавий ахборот воситаларида кенг ёритилишини таъминлаш;

ҳарбий-тиббий комиссия, бутлаш комиссияси ва ҳудудий тиббий комиссия қарорларидан норози бўлган чақирилувчиларнинг шикоятларини кўриб чиқиш ва ечими бўйича тегишли қарор қабул қилиш;

Ўзбекистон Республикаси Қуролли Кучлари сафидан турли сабабларга кўра қайтарилган муддатли ҳарбий хизматчилари бўйича текширув ўтказиш ва тегишли чора-тадбирлар белгилаш;

б) Ҳарбий-тиббий комиссиянинг асосий вазифалари этиб:

Бутлаш комиссияси томонидан қўшин турларига тайинланган чақирилувчиларни чуқурлаштирилган тиббий кўрикдан ўтказиш;

шифокор-мутахассислар томонидан чақирилувчиларнинг ҳисоб карталарига киритилган ёзув ва хулосаларнинг тўғрилигини текшириш;

Раҳбарият кенгаши раиси билан ҳамкорликда чақирилувчиларни қўшимча текширув ва даволашга йўналтириш, шунингдек, қўшимча текширув ва даволашдан кейин уларнинг қайтишларини назоратга олиш;

чақирилувчиларнинг соғлиги даражаси бўйича ҳарбий хизматга яроқлилиги юзасидан якуний тиббий хулоса бериш;

тиббий комиссия фаолияти жараёнида йўл қўйилган камчиликлар таҳлилини инобатга олган ҳолда, ҳарбий-тиббий комиссия шифокор-мутахассислари билан кенгашлар ўтказиш;

Қуролли Кучларни бутлаш якуни бўйича тиббий комиссия иши натижаларини умумлаштириш, ҳисобот тайёрлаш ва белгиланган тартибда Раҳбарият кенгаши раиси, Ўзбекистон Республикаси Мудофаа вазирлиги ва Соғлиқни сақлаш вазирлигига тақдим этиш;

в) Бутлаш комиссиясининг асосий вазифалари этиб:

муддатли ҳарбий хизматга юбориш учун тавсия этилган ва ҳудудий тиббий комиссия томонидан ҳарбий хизматга яроқли деб топилган чақирилувчилар билан суҳбат ўтказиш, соғлиги даражаси, жисмоний тайёргарлиги, фикрлаш қобилияти ва бошқа хусусиятларини инобатга олган ҳолда, қўшин турларига тайинлаш бўйича қарор қабул қилиш;

қабул қилинган қарорларни чақирилувчилар йиғмажилдидаги тегишли саҳифага белгиланган тартибда расмийлаштириш ва имзолаш;

чақирилувчиларни муддатли ҳарбий хизматга чақириш ишларининг ошкоралиги ва холислигини таъминлаш;

жойлардаги тегишли идоралар, маҳаллий ижро этувчи ҳокимият органлари ва жамоат ташкилотларининг чақирилувчиларни йиғиш ва уларни тантанали равишда ҳарбий қисмларга юбориш бўйича тадбирларни ўтказишда ўзаро ҳамкорлигини ташкил этиш;

чақирилувчилар, уларнинг ота-оналарининг чақирувга оид мурожаатларини ўз вақтида кўриб чиқиш ва тегишли қарор қабул қилиш;

г) Ҳудудий комиссиянинг асосий вазифалари этиб:

чақирилувчиларни муқобил хизматга чақириш, сафарбарлик чақируви резерви хизматига олиш, ҳарбий хизматга чақиришни кечиктириш ва Ўзбекистон Республикаси Қуролли Кучлари захирасига ўтказиш;

чақирилувчиларни йиғиш, муқобил хизматга юбориш, сафарбарлик чақируви резервидаги хизматга олиш ҳамда Қуролли Кучлар резервига бўшатилган ҳарбий хизматчиларни доимий яшаш жойларига қайтаришга оид тадбирларни тантанали равишда ўтказишда маҳаллий ижро этувчи ҳокимият органлари ва жамоат ташкилотлари билан ўзаро ҳамкорлигини ташкил этиш;

чақирилувчиларни муддатли ҳарбий ва муқобил хизматга чақириш, сафарбарлик чақируви резервидаги хизматга олиш, Қуролли Кучлар резервига бўшатилган ҳарбий хизматчиларни доимий яшаш жойларига қайтариш бўйича тадбирларни ташкил этиш;

ҳудудий комиссиялар фаолияти ва чақирувнинг ошкоралигини таъминлаш;

д) Ҳудудий тиббий комиссияларнинг асосий вазифалари этиб:

чақирилувчиларни бирламчи тиббий кўрикдан ўтказиш;

руҳий-асаб касалликлари, наркологик, тери-таносил диспансерлари, ОИТСга қарши курашиш ва санитария-эпидемиология осойишталиги, фтизиатрия ва пульмонология марказлари рўйхатида турувчи чақирилувчилар тўғрисида маълумотга эга бўлиш;

чақирилувчиларни қўшимча текширув ва даволашга йўналтириш, қўшимча текширув ва даволашдан сўнг уларнинг тиббий комиссияга келишларини назоратга олиш;

чақирилувчиларнинг соғлиги даражаси бўйича ҳарбий хизматга яроқлилиги юзасидан хулоса бериш;

тиббий кўрикдан ўтказишни сифатли ва холисона амалга ошириш мақсадида мунтазам равишда тиббий комиссия аъзолари билан йўл қўйилган камчиликларни бартараф этиш борасида кенгашлар ўтказиб бориш;

чақирилувчиларни тиббий кўрикдан ўтказиш натижалари бўйича ҳисобот тайёрлаш ва ушбу ҳисоботни ҳарбий-тиббий комиссия, Ўзбекистон Республикаси Соғлиқни сақлаш вазирлиги ҳудудий бошқармаси (органлари) ҳамда мудофаа ишлари бошқармасига тақдим этиш.

5. Ўзбекистон Миллий телерадиокомпаниясига Ўзбекистон Республикаси Мудофаа вазирлиги, Ички ишлар вазирлиги, Фавқулодда вазиятлар вазирлиги, Миллий гвардияси, Давлат хавфсизлик хизмати ва Ўзбекистон ёшлар иттифоқи билан ҳамкорликда чақирув тадбирларини ташкил этиш ва ўтказиш билан боғлиқ тадбирларни оммавий ахборот воситаларида кенг ёритиб бориш тавсия этилсин.

6. Ўзбекистон Республикаси Президентининг 2019 йил 12 сентябрдаги ПҚ-4447-сон қарори билан тасдиқланган Ўзбекистон Республикаси фуқароларининг ҳарбий хизматни ўташ тартиби тўғрисидаги низомнинг 24-банди иккинчи хатбошисидаги «туман (шаҳар) чақирув комиссияси» сўзлари «Қорақалпоғистон Республикаси, вилоятлар ва Тошкент шаҳар мудофаа ишлари бошқармалари ҳузуридаги Раҳбарият кенгаши» сўзлари билан алмаштирилсин.

7. Ўзбекистон Республикаси Ҳукуматининг айрим қарорлари 2-иловага мувофиқ ўз кучини йўқотган деб ҳисоблансин.

8. Ўзбекистон Республикаси Мудофаа вазирлиги манфаатдор вазирлик ва идоралар билан биргаликда қонун ҳужжатларига ушбу қарордан келиб чиқадиган ўзгартириш ва қўшимчалар тўғрисида икки ой муддатда Ўзбекистон Республикаси Вазирлар Маҳкамасига таклифлар киритсин.

9. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Президенти ҳузуридаги Хавфсизлик кенгаши котиби В.В. Махмудов зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2020 йил 6 март,

ПҚ-4630-сон

Ўзбекистон Республикаси Президентининг 2020 йил 6 мартдаги ПҚ-4630-сон қарорига

1-ИЛОВА

Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссиялар фаолиятини ташкил этиш тартиби тўғрисида

1-боб. Умумий қоидалар

1. Мазкур Низом «Умумий ҳарбий мажбурият ва ҳарбий хизмат тўғрисида»ги Ўзбекистон Республикасининг Қонунига мувофиқ ўтказиладиган чақирув ёшидаги фуқароларни (кейинги ўринларда — чақирилувчилар) муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссиялар фаолиятини ташкил этиш тартибини белгилайди.

2. Ўзбекистон Республикаси Президентининг фуқароларни ҳарбий хизматга навбатдаги чақируви ва муддатли ҳарбий хизмат муддатини ўтаб бўлган ҳарбий хизматчиларни Қуролли Кучлар резервига бўшатиш бўйича қарори эълон қилинганидан сўнг Раҳбарият кенгаши, ҳарбий-тиббий комиссия, бутлаш комиссияси, ҳудудий комиссия ва ҳудудий тиббий комиссиялар таркиби ҳамда уларнинг фаолиятини ташкил этиш бўйича чора-тадбирлар тегишлича Қорақалпоғистон Республикаси Вазирлар Кенгаши раиси, вилоятлар, Тошкент шаҳар ва туман (шаҳар) ҳокимлари томонидан тасдиқланади.

3. Раҳбарият кенгаши, ҳарбий-тиббий комиссия, бутлаш комиссияси, ҳудудий комиссия ва ҳудудий тиббий комиссиялар ўз фаолиятини Ўзбекистон Республикаси Конституцияси ва қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари, қарорлари ва фармойишлари, Ўзбекистон Республикаси Вазирлар Маҳкамасининг қарорлари ва фармойишлари, бошқа норматив-ҳуқуқий ҳужжатлар, Ўзбекистон Республикаси Мудофаа вазирлигининг идоравий норматив-ҳуқуқий ҳужжатлари ҳамда мазкур Низомга мувофиқ амалга оширади.

Ҳарбий-тиббий комиссия ва ҳудудий тиббий комиссиялар Ўзбекистон Республикаси Президентининг 2018 йил 25 декабрдаги «Ўзбекистон Республикаси Қуролли Кучларида тинчлик ва уруш даврида тиббий кўрикдан ўтказиш тўғрисидаги низомни тасдиқлаш ҳақида»ги ПҚ-4076-сон қарори ва соҳага оид бошқа қонун ҳужжатларига мувофиқ чақирилувчиларни тиббий кўрикдан ўтказишни ташкил этади, тиббий кўрикдан ўтказади, тиббий кўрик натижаси бўйича хулосалар беради ва ҳужжатларни расмийлаштиради.

4. Ҳарбий округ қўшинлари қўмондонлари чақирилувчиларни ҳарбий хизматга чақириш тадбирларининг ўтказилишига умумий раҳбарлик қилади, шунингдек, Раҳбарият кенгаши, ҳарбий-тиббий комиссия, бутлаш комиссияси, ҳудудий комиссия ва ҳудудий тиббий комиссияларнинг самарали фаолият юритиши учун шахсан масъулдир.

5. Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссиялар фаолияти ушбу Низомга иловага мувофиқ схема бўйича ташкил этилади.

2-боб. Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссиялар таркиби

6. Раҳбарият кенгаши таркибига қуйидагилар киради:

а) кенгаш раиси — ҳарбий округ қўшинлари қўмондони ўринбосари (ҳарбий-маъмурий сектор раҳбарининг ўринбосари);

б) кенгаш аъзолари:

Қорақалпоғистон Республикаси ички ишлар вазири, Тошкент шаҳар ва Тошкент вилояти ички ишлар бош бошқармалари ҳамда вилоятлар ички ишлар бошқармалари бошлиқларининг ўринбосарлари;

Қорақалпоғистон Республикаси фавқулодда вазиятлар бошқармаси, Тошкент шаҳар ва вилоят бошқармаси бошлиқларининг ўринбосарлари;

Ўзбекистон Республикаси Давлат хавфсизлик хизмати Чегара қўшинлари вакили;

Ўзбекистон Республикаси Миллий гвардияси вакили;

ҳарбий округ бошқарма, хизмат ва бўлим бошлиқлари;

мудофаа ишлари бошқармалари бошлиқлари;

в) кенгаш котиби — Ўзбекистон Республикаси Мудофаа вазирлигининг ўрта тиббий маълумотга эга бўлган вакили.

7. Ҳарбий-тиббий комиссия таркибига қуйидагилар киради:

а) комиссия раиси — Ўзбекистон Республикаси Мудофаа вазирлиги ҳарбий госпиталининг шифокор-мутахассиси;

б) комиссия аъзолари:

Ўзбекистон Республикаси Мудофаа вазирлиги ҳарбий госпиталидан терапевт, жарроҳ ва невропатолог;

Соғлиқни сақлаш вазирлиги ҳудудий бошқармаларидан (органларидан) оториноларинголог, офтальмолог ва психиатр.

8. Бутлаш комиссияси таркибига қуйидагилар киради:

а) комиссия раиси — ҳарбий округ бошқарма, хизмат ва бўлим бошлиқлари, ҳарбий қисм командирлари ва уларнинг ўринбосарлари;

б) комиссия аъзолари — Ўзбекистон Республикаси Ички ишлар вазирлиги, Фавқулодда вазиятлар вазирлиги, Давлат хавфсизлик хизмати Чегара қўшинлари, Миллий гвардияси вакиллари.

9. Ҳудудий комиссия таркибига қуйидагилар киради:

а) комиссия раиси — туман (шаҳар) ҳокимининг ўринбосари;

б) комиссия раисининг ўринбосари — мудофаа ишлари бўлими бошлиғи;

в) комиссия аъзолари:

туман (шаҳар) ички ишлар бўлими бошлиғининг ўринбосари;

фуқароларнинг ўзини ўзи бошқариш органлари фаолиятини мувофиқлаштирувчи туман (шаҳар) кенгаши раисининг биринчи ўринбосари;

тиббий комиссия катта шифокори;

г) комиссия котиби — мудофаа ишлари бўлими бўлинма бошлиғининг ёрдамчиси.

10. Ҳудудий тиббий комиссия таркибига туман (шаҳар) тиббиёт бирлашмаларидан ажратиладиган жарроҳ, терапевт (катта шифокор вазифаси жарроҳ ёки терапевт зиммасига юкланади), дерматовенеролог, стоматолог, офтальмолог, оториноларинголог, психиатр ва невропатолог киради.

11. Қуйидагилар ўз фаолиятини ҳар йили:

туман (шаҳар) мудофаа ишлари бўлимлари ҳузуридаги ҳудудий тиббий комиссиялар — 15 февралдан 30 апрелгача;

туман (шаҳар) мудофаа ишлари бўлимлари ҳузуридаги бутлаш комиссиялари — 15 февралдан 30 апрелгача;

Қорақалпоғистон Республикаси, вилоятлар ва Тошкент шаҳар йиғиш пунктларида ҳарбий-тиббий комиссиялар — 20 февралдан 30 апрелгача;

Қорақалпоғистон Республикаси, вилоятлар ва Тошкент шаҳар мудофаа ишлари бошқармалари ҳузуридаги Раҳбарият кенгаши — 20 февралдан 30 апрелгача;

туман (шаҳар) мудофаа ишлари бўлимлари ҳузуридаги ҳудудий комиссиялар — 1 мартдан 30 апрелгача амалга оширади.

3-боб. Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссияларнинг ҳуқуқлари ва жавобгарлиги

12. Раҳбарият кенгаши:

ҳар бир фуқаро бўйича қабул қилинадиган қарор ва хулосаларга нисбатан ўз фикрини билдириш;

бутлаш комиссияси томонидан қўшин турларига тайинлаш бўйича қабул қилинган қарорларни кўриб чиқиш ва бекор қилиш;

мажбуриятларни бажариш билан боғлиқ келиб чиққан низоларни томонларнинг келишуви ёки суд орқали ҳал қилиш ҳуқуқига эга.

Раҳбарият кенгаши қонун ҳужжатларига мувофиқ бошқа ҳуқуқларга ҳам эга бўлиши мумкин.

13. Раҳбарият кенгаши:

кенгаш фаолияти ҳамда қарор қабул қилиш жараёнида бевосита иштирок этиш;

ўз иш фаолиятининг ошкоралиги, фуқаролар учун очиқлиги, улар томонидан қабул қилинаётган қарорларнинг холислигини таъминлаш;

маҳаллий ижро этувчи ҳокимият органлари ва жамоат ташкилотлари билан ҳамкорликда ҳарбий хизматга чақириладиган чақирилувчиларни йиғиш, ҳарбий қисмларга тантанали равишда кузатиш, Қуролли Кучлар резервига бўшатилган ҳарбий хизматчиларни яшаш жойларида тантанали кутиб олиш бўйича ўтказиладиган тадбирлар юқори савияда ўтишини ташкил этиш;

йиғиш ва чақирув пунктларида чақирув тадбирларини ўтказиш учун тайёргарлик ишларини ташкил этиш;

комиссиялар аъзоларининг услубий тайёргарлигини ташкил этиш, мажбуриятларни улар ўртасида тақсимлаш ва тасдиқлаш;

муддатли ҳарбий хизматга чақирилган ҳарбий хизматчиларни ҳарбий қисмларга юбориш жараёнида йўл ҳаракати хавфсизлигини таъминлаш учун барча хавфсизлик чораларини кўриш, шунингдек, чақирилувчиларнинг йиғиш ва чақирув пунктларига ўз вақтида етиб келишлари юзасидан ички ишлар органлари билан ҳамкорликда тадбирларни ташкил этиш;

давлат ва жамоат ташкилотлари билан ҳамкорликда ҳарбий хизматга чақириш тизимида амалга оширилаётган ислоҳотлар, бу борада амалга оширилаётган ишлар тўғрисида муддатли ҳарбий хизматга чақирилаётган чақирилувчилар ва аҳоли ўртасида тушунтириш ишларини ташкил этиш;

муддатли ҳарбий хизматга чақирилаётган ёшлар билан Амир Темур, Жалолиддин Мангуберди, Заҳириддин Муҳаммад Бобур каби буюк саркардаларимиз ва улуғ аждодларимиз ҳақида давра суҳбатларини ташкил этиш;

чақирув ва йиғиш пунктлари учун буюк саркардаларимиз Амир Темур, Заҳириддин Муҳаммад Бобур ва Жалолиддин Мангуберди жасоратларини намоён этувчи, Темур тузуклари ва шу каби бошқа тарихий асарлар тўғрисида чақирилувчилар тушунадиган талқинда кўргазмали баннерлар тайёрлаш, чоп этиш ва тарқатиш ишларини ташкил этиш;

тегишли вазирликлар, идоралар ва жамоат ташкилотлари билан ҳамкорликда муддатли ҳарбий хизматга чақирилган ва резервга бўшатилган ёшлар ўртасида ҳарбий хизматчиларга бериладиган имтиёзлар тўғрисида тушунтириш ишларини ташкил этиш;

ёшларни ҳарбий-ватанпарварлик руҳида тарбиялаш, уларда фаол фуқаролик позицияси, мамлакатимизнинг келажаги ва тақдири учун жавобгарлик ҳисси, Қуролли Кучлар билан фахрланиш, ҳарбий хизматга бўлган ҳурмат, шунингдек, Ватанга чуқур муҳаббат ва садоқат туйғусини шакллантириш бўйича тарғибот-ташвиқот материаллари, кўргазмали баннерлар, кичик ҳажмдаги рисолалар ва тарқатма буклетлар тайёрлаб, йиғиш ва чақирув пунктларини жиҳозлаш ишларига жавобгардир.

Раҳбарият кенгаши қонун ҳужжатларига мувофиқ бошқа мажбуриятларни ҳам олиши мумкин.

14. Ҳарбий-тиббий комиссия:

ҳудудий тиббий комиссия томонидан тиббий кўрик натижаларига кўра қабул қилинган хулосаларни кўриб чиқиш ва бекор қилиш;

ҳар бир фуқаронинг соғлиги бўйича қабул қилинадиган қарор ва хулосаларга нисбатан ўз фикрини билдириш;

тиббий кўрик хулосаларига кўра чақирилувчиларни қўшимча текширувга юбориш ҳуқуқига эга.

Ҳарбий-тиббий комиссия қонун ҳужжатларига мувофиқ бошқа ҳуқуқларга ҳам эга бўлиши мумкин.

15. Ҳарбий-тиббий комиссия:

фаолиятини бошлашдан аввал шифокорлар хоналарининг санитар қоидалари, нормалари ва гигиена нормативлари талабларига мувофиқлиги, тиббий жиҳоз ва ускуналарнинг мавжудлиги, уларни ишлатилиш ҳолатини, дори воситалари ва тиббий буюмлар борлигини кўздан кечириш;

Раҳбарият кенгашига чақирилувчилар тиббий ҳужжатлари ҳамда касаллик тарихидан кўчирмалар, руҳий-асаб касалликлари, наркологик, тери-таносил диспансерлари, ОИТСга қарши кураш ва санитария-эпидемиология осойишталиги, фтизиатрия ва пульмонология марказларидан рўйхатлар ўз вақтида тақдим этилишини таъминлаш;

чақирилувчиларни чуқурлаштирилган тиббий кўрикдан ўтказиш ва уларнинг соғлиги даражаси бўйича ҳарбий хизматга яроқлилиги юзасидан якуний тиббий хулоса бериш;

чақирилувчиларни даволаш ёки қўшимча тиббий текширувлар ўтказиш учун йўллаш, шунингдек, уларнинг даволаниш ва қўшимча текширувлардан ўз вақтида қайтиб келишларини назорат қилиш;

шифокор-мутахассислар томонидан чақирилувчининг ҳарбий хизматга яроқлилиги, шунингдек, даволаш ёки қўшимча тиббий текширувлар ўтказиш учун чақирувни кечиктириш бўйича чақирилувчиларнинг ҳисоб варақаларига киритилган ёзув ва хулосаларнинг тўғрилигини текшириш ва якуний хулоса қабул қилиш;

Раҳбарият кенгашига ҳудудий тиббий комиссияларнинг чақирилувчиларни тиббий кўрикдан ўтказиш жараёнида аниқланган камчиликлар юзасидан ахборот ёки маълумот бериш ва уларни бартараф этиш тадбирларини қўллаш;

тиббий кўрикдан ўтказиш ишларини сифатли ташкил этиш мақсадида шифокор — мутахассислар билан услубий-амалий машғулотлар ўтказиш;

чақирилувчиларни тиббий кўрикдан ўтказиш натижалари бўйича ҳисобот тайёрлаш ва Раҳбарият кенгашига, соғлиқни сақлаш бирлашмасига ҳамда мудофаа ишлари бошқармасига тақдим этиш ишларига жавобгардир.

16. Бутлаш комиссияси:

ҳар бир чақирилувчига нисбатан уларни қўшин турларига тайинлаш бўйича қарор қабул қилиш жараёнида ўз фикрини билдириш;

тегишли идоралар, маҳаллий ижро этувчи ҳокимият органлари ва жамоат ташкилотлари билан ўзаро ҳамкорликни ташкил этиш ҳуқуқига эга.

Бутлаш комиссияси қонун ҳужжатларига мувофиқ бошқа ҳуқуқларга ҳам эга бўлиши мумкин.

17. Бутлаш комиссияси:

комиссия фаолияти ҳамда қарор қабул қилиш жараёнида бевосита иштирок этиш;

ўз фаолиятининг ошкоралиги, фуқаролар учун очиқлиги, улар томонидан қабул қилинаётган қарорларнинг холислигини таъминлаш;

чақирув пунктларини чақирув тадбирларини ўтказиш учун тайёрлашда мудофаа ишлари бўлимларига амалий ёрдам кўрсатиш;

муддатли ҳарбий хизматга чақирилган ҳарбий хизматчиларни йиғиш пунктига юбориш жараёнида йўл ҳаракати хавфсизлигини таъминлаш учун барча хавфсизлик чораларини кўриш, шунингдек, чақирилувчиларнинг чақирув пунктига ўз вақтида етиб келишлари юзасидан ички ишлар органлари билан ҳамкорликда тадбирларни ташкил этиш;

ҳарбий хизматга чақириладиган чақирилувчиларни ҳарбий қисмларга тантанали равишда кузатиш, резервга бўшатилган ёшларни яшаш жойларида тантанали кутиб олиш бўйича ўтказиладиган тадбирларини юқори савияда ташкил этиш ва ўтказиш ишларида фаол иштирок этиш ва амалий ёрдам бериш;

муддатли ҳарбий хизматга чақирилаётган ёшлар билан Амир Темур, Жалолиддин Мангуберди, Заҳириддин Муҳаммад Бобур каби буюк саркардаларимиз ва улуғ аждодларимиз ҳақида давра суҳбатларини ташкил этиш;

давлат ва жамоат ташкилотлари билан ҳамкорликда муддатли ҳарбий хизматга чақирилаётган чақирилувчилар, резервга бўшатилган ёшлар ва аҳоли ўртасида ҳарбий хизматга чақириш тизимида амалга оширилаётган ислоҳотлар, ҳарбий хизматчиларга бериладиган имтиёзлар тўғрисида тушунтириш ишларини ташкил этиш ишларига жавобгардир.

18. Ҳудудий комиссия:

чақирилувчиларни муқобил хизматга чақириш, сафарбарлик чақируви резерви хизматига олиш, ҳарбий хизматга чақиришни кечиктириш ва Ўзбекистон Республикаси Қуролли Кучлари захирасига ўтказиш учун қабул қилинадиган қарорларга нисбатан ўз фикрини билдириш;

фуқароларнинг чақирувга оид мурожаатларини кўриб чиқиш ва тегишли қарор қабул қилиш ҳуқуқига эга.

Ҳудудий комиссия қонун ҳужжатларига мувофиқ бошқа ҳуқуқларга ҳам эга бўлиши мумкин.

19. Ҳудудий комиссия:

комиссия фаолияти ҳамда қарор қабул қилиш жараёнида бевосита иштирок этиш;

ўз фаолиятининг ошкоралиги, фуқаролар учун очиқлиги, улар томонидан қабул қилинаётган қарорларнинг холислигини таъминлаш;

чақирув пунктини чақирув тадбирларини ўтказиш учун тайёрлаш;

комиссиялар аъзоларининг услубий тайёргарлигини ташкил этиш, мажбуриятларни улар ўртасида тақсимлаш ва тасдиқлаш;

муддатли ҳарбий хизматга чақирилган ҳарбий хизматчиларни ҳарбий қисмларга юбориш жараёнида йўл ҳаракати хавфсизлигини таъминлаш учун барча хавфсизлик чораларини кўриш, шунингдек, чақирилувчиларнинг йиғиш ва чақирув пунктларига ўз вақтида етиб келишлари юзасидан ички ишлар органлари билан ҳамкорликда тадбирларни ташкил этишда амалий ёрдам кўрсатиш;

маҳаллий ижро этувчи ҳокимият органлари ва жамоат ташкилотлари билан ҳамкорликда ҳарбий хизматга чақириладиган чақирилувчиларни ҳарбий қисмга кузатиш, резервга бўшатилган ёшларни яшаш жойларида тантанали кутиб олиш тадбирларни юқори савияда ташкил этиш;

чақирув пунктида буюк саркардаларимиз Амир Темур, Заҳириддин Муҳаммад Бобур ва Жалолиддин Мангуберди жасорати, Темур тузуклари ва шу каби бошқа тарихий асарлар тўғрисида чақирилувчилар тушунадиган талқинда кўргазмали баннерлар тайёрлаш ва чақирув пунктини жиҳозлаш;

чақирув тадбирлари жараёнида ташкил этилган комиссиялар иш фаолияти, шунингдек, чақирувчиларни тиббий кўрикдан ўтказиш учун барча шароитларни яратиш ишларига жавобгардир.

20. Ҳудудий тиббий комиссия:

чақирилувчиларни тиббий кўрикдан ўтказиш жараёнида қўшимча текширувга юбориш;

ҳар бир фуқаронинг соғлиги бўйича қабул қилинадиган қарор ва хулосаларга нисбатан ўз фикрини билдириш ҳуқуқларига эга;

Ҳудудий тиббий комиссия қонун ҳужжатларига мувофиқ бошқа ҳуқуқларга ҳам эга бўлиши мумкин.

21. Ҳудудий тиббий комиссия:

фаолиятини бошлашдан аввал шифокорлар хоналарининг санитар қоидалари, нормалари ва гигиена нормативлари талабларига мувофиқлиги, тиббий жиҳоз ва ускуналарнинг мавжудлиги, уларни ишлатилиш ҳолатини, дори воситалари ва тиббий буюмлар борлигини кўздан кечириш;

чақирилувчиларни бирламчи тиббий кўрикдан ўтказиш ва уларнинг соғлиги даражаси бўйича ҳарбий хизматга яроқлилиги юзасидан тиббий хулоса бериш;

бутлаш комиссияси ва ҳудудий комиссиясига чақирилувчилар тиббий ҳужжатлари ҳамда касаллик тарихидан кўчирмалар, руҳий-асаб касалликлари, наркологик, тери-таносил диспансерлари, ОИТСга қарши кураш ва санитария-эпидемиология осойишталиги, фтизиатрия ва пульмонология марказларидан рўйхатлар ўз вақтида тақдим этилишини таъминлаш;

шифокор-мутахассислар томонидан чақирилувчиларнинг ҳисоб варақаларига ёзув ва хулосаларни киритиш;

чақирилувчини даволаш ёки қўшимча тиббий текширувлар ўтказиш учун йўллаш, шунингдек, уларнинг даволаниш ва қўшимча текширувлардан ўз вақтида қайтиб келишларини назорат қилиш;

чақирилувчиларни тиббий кўрикдан ўтказиш ишларида аниқланган камчиликлар юзасидан ҳудудий комиссияга ахборот бериш ва уларни бартараф этиш тадбирларини қўллаш;

чақирилувчиларни тиббий кўрикдан ўтказиш натижалари бўйича ҳисобот тайёрлаш ва ҳудудий ҳамда бутлаш комиссиясига тақдим этишга жавобгардир.

4-боб. Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссия фаолиятини ташкил этиш тартиби

22. Раҳбарият кенгашининг раиси ва аъзолари Қуролли Кучлар сафини янгидан чақирилаётган муддатли ҳарбий хизматчилар билан ўз вақтида сифатли бутлаш учун масъулдир.

23. Раҳбарият кенгаши, ҳарбий-тиббий комиссия, бутлаш комиссияси ва ҳудудий тиббий комиссия фаолияти Раҳбарият кенгаши раиси томонидан тасдиқланган жадвалга мувофиқ ташкил этилади.

24. Раҳбарият кенгаши ва бутлаш комиссияси ўз ишини чақирилувчиларнинг шахсий ҳужжатлар йиғмажилдларини ўрганишдан бошлайди.

Чақирилувчини тиббий кўрикдан ўтказиш хулосаси, унинг маънавий ва касбий хусусиятлари, оилавий ва моддий шароити, оила аъзоларининг ижтимоий ҳолатини ўрганиш натижаларига мувофиқ Раҳбарият кенгаши ва бутлаш комиссияси томонидан уларни қўшин тури бўйича командаларга тайинлаш ишлари амалга оширилади.

25. Раҳбарият кенгаши ва бутлаш комиссияси томонидан жамоавий тарзда қабул қилинган қарорлар Раҳбарият кенгаши ва бутлаш комиссияларининг «Қабул қилинган қарорлар китоби»да тааллуқлилиги бўйича белгиланган тартибда комиссия котиби томонидан қайд этилади ва Раҳбарият кенгаши ва бутлаш комиссияси томонидан имзоланади.

26. Бутлаш комиссияси раиси томонидан чақирилувчиларни муддатли ҳарбий хизматга чақириш ишларининг якуни бўйича ахборот тайёрланади ва Қуролли Кучларни бутлаш ишлари якунланганидан сўнг беш кун муддат ичида Раҳбарият кенгашига тақдим этилади. Раҳбарият кенгаши эса ўн кун муддат ичида ахборотни Ўзбекистон Республикаси Мудофаа вазирлигига тақдим этади.

27. Ҳудудий комиссия фаолияти комиссия раиси томонидан тасдиқланган жадвалга мувофиқ ташкил этилади ва амалга оширилади.

28. Ҳудудий комиссия ўз ишини чақирилувчиларнинг шахсий ҳужжатлар йиғмажилдларини ўрганишдан бошлайди.

29. Чақирилувчини тиббий кўрикдан ўтказиш хулосаси, унинг маънавий ва касбий хусусиятлари, оилавий, моддий шароити, оила аъзоларининг ижтимоий ҳолатини ўрганиш натижаларига мувофиқ ҳудудий комиссия қуйидаги қарорлардан бирини қабул қилади:

ҳарбий хизматга яроқлилиги ва сафарбарлик чақируви резервидаги хизматга тайинлаш тўғрисида;

ҳарбий хизматга яроқлилиги ва муқобил хизматга чақириш тўғрисида;

саломатлигига кўра ҳарбий хизматга вақтинча яроқсизлиги тўғрисида;

чақирилиш муддатини белгиланган тартибда кечиктириш ёки ҳарбий хизматга чақирилишдан озод қилиш тўғрисида;

йигирма етти ёшга етганлиги муносабати билан Қуролли Кучлар захирасига ўтказиш тўғрисида;

саломатлигига кўра тинчлик даврида ҳарбий хизматга яроқсизлиги, уруш давридаги ҳарбий хизматга чекланган тарзда яроқлилиги ва захирага ўтказиш тўғрисида;

ҳарбий хизматга яроқсиз деб топиб, ҳарбий рўйхатдан чиқариш тўғрисида.

Ҳудудий комиссия томонидан жамоавий тарзда қабул қилинган қарорлар «Ҳудудий комиссия баённомалари китоби»да комиссия котиби томонидан қайд этилади. Мазкур китоб ҳамда чақирилувчилар шахсий ҳужжатлари йиғмажилдидаги тегишли саҳифа ҳудудий комиссия раиси ва аъзолари томонидан имзоланади.

Ҳудудий комиссия раиси томонидан чақирилувчиларни муқобил хизматга чақириш, сафарбарлик чақируви резерви хизматига олиш, ҳарбий хизматга чақиришни кечиктириш ва Ўзбекистон Республикаси Қуролли Кучлари резервига ва захирасига ўтказиш ишларининг якуни бўйича ахборот тайёрланиб, ўн кун муддат ичида тегишли туман (шаҳар) ҳокимига, мудофаа ишлари бўлими томонидан тегишли мудофаа ишлари бошқармасига тақдим этади.

5-боб. Якунловчи қоидалар

30. Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссиялар аъзоларининг (контракт бўйича ҳарбий хизматчилар бундан мустасно) доимий иш жойи (лавозими) ва ўртача ойлик иш ҳақи улар мазкур Низомда белгиланган мажбуриятларини бажарадиган бутун давр мобайнида сақлаб қолинади.

31. Бутлаш комиссияси, ҳарбий-тиббий комиссия ҳамда ҳудудий тиббий комиссия қарори ва хулосасидан норози бўлган чақирилувчилар ва уларнинг ота-оналари Раҳбарият кенгашига, шунингдек, белгиланган тартибда судга шикоят қилиши мумкин.

32. Мазкур Низом талабларининг бузилишида айбдор бўлган шахслар қонунчиликда белгиланган тартибда жавобгар бўлади.

Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссиялар фаолиятини ташкил этиш тартиби тўғрисида низомга

ИЛОВА

Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга олиш бўйича комиссиялар фаолиятини ташкил этиш

СХЕМАСИ

Ўзбекистон Республикаси Президентининг 2020 йил 6 мартдаги ПҚ-4630-сон қарорига

2-ИЛОВА

Ўзбекистон Республикаси Ҳукуматининг ўз кучини йўқотган деб ҳисобланаётган айрим қарорлари

РЎЙХАТИ

1. Вазирлар Маҳкамасининг 2009 йил 1 октябрдаги «Фуқароларни муддатли ҳарбий ва муқобил хизматларга чақириш, сафарбарлик чақируви резервидаги хизматга қабул қилиш бўйича чақирув комиссиялари тўғрисидаги низомни тасдиқлаш ҳақида»ги 265-сон қарори (Ўзбекистон Республикаси ҚҲТ, 2009 йил, 40-сон, 435-модда).

2. Вазирлар Маҳкамасининг 2017 йил 17 февралдаги «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида»ги 90-сон қарори (Ўзбекистон Республикаси ҚТ, 2017 йил, 2-сон, 15-модда) иловасининг 2-банди.

3. Вазирлар Маҳкамасининг 2017 йил 12 сентябрдаги «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида»ги 712-сон қарори (Ўзбекистон Республикаси ҚҲТ, 2017 йил, 37-сон, 996-модда) иловасининг 13-банди.

4. Вазирлар Маҳкамасининг 2017 йил 1 декабрдаги «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида»ги 960-сон қарори (Ўзбекистон Республикаси ҚҲТ, 2017 йил, 49-сон, 1197-модда) иловасининг 7-банди.

5. Вазирлар Маҳкамасининг 2018 йил 3 майдаги «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида»ги 321-сон қарорининг (Ўзбекистон Республикаси ҚТ, 2018 йил, 5-сон, 101-модда) 1-иловаси 13-банди.

6. Вазирлар Маҳкамасининг 2019 йил 11 мартдаги «Ўзбекистон Республикаси Ҳукуматининг айрим қарорларига ўзгартиришлар ва қўшимча киритиш, шунингдек, айрим қарорларини ўз кучини йўқотган деб ҳисоблаш тўғрисида»ги 210-сон қарори 1-иловасининг 2-банди.

(Қонун ҳужжатлари маълумотлари миллий базаси, 07.03.2020 й., 07/20/4630/0266-сон)