Ҳужжат кучини йўқотган " " 03.12.2021

Ўзбекистон Республикаси Иқтисодиёт вазирлиги
Ўзбекистон Республикасининг Хусусийлаштириш, монополиядан чиқариш ва рақобатни ривожлантириш давлат қўмитасининг

Қарори

Корпоратив бошқарувчи малака аттестатини бериш тартиби тўғрисидаги низомни тасдиқлаш ҳақида

[Ўзбекистон Республикаси Адлия вазирлиги томонидан 2016 йил 28 январда 2755-сон билан давлат рўйхатидан ўтказилган]

LexUZ шарҳи

Мазкур қарор Ўзбекистон Республикаси адлия вазирининг 2021 йил 2 декабрдаги 21-мҳ-сонли «Айрим идоравий норматив-ҳуқуқий ҳужжатларни идоравий норматив-ҳуқуқий ҳужжатларнинг давлат реестридан чиқариш тўғрисида»ги буйруғига (рўйхат рақами 3340, 03.12.2021 й.) асосан давлат реестридан чиқарилган.

Ўзбекистон Республикасининг «Акциядорлик жамиятлари ва акциядорларнинг ҳуқуқларини ҳимоя қилиш тўғрисида»ги ва «Масъулияти чекланган ҳамда қўшимча масъулиятли жамиятлар тўғрисида»ги қонунлари, Ўзбекистон Республикаси Президентининг 2015 йил 24 апрелдаги ПФ-4720-сон «Акциядорлик жамиятларида замонавий корпоратив бошқарув услубларини жорий этиш чора-тадбирлари тўғрисида»ги Фармонига мувофиқ Ўзбекистон Республикаси Иқтисодиёт вазирлиги ва Ўзбекистон Республикасининг Хусусийлаштириш, монополиядан чиқариш ва рақобатни ривожлантириш давлат қўмитаси қарор қилади:

1. Корпоратив бошқарувчи малака аттестатини бериш тартиби тўғрисидаги низом иловага мувофиқ тасдиқлансин.

2. Мазкур қарор расмий эълон қилинган кундан эътиборан кучга киради.

Иқтисодиёт вазири Г. САИДОВА

Тошкент ш.,

2016 йил 11 январь,

110-сон

Хусусийлаштириш, монополиядан чиқариш ва рақобатни ривожлантириш давлат қўмитаси раиси Д. ХИДОЯТОВ

Тошкент ш.,

2016 йил 11 январь,

01/03-26/29-сон

Ўзбекистон Республикаси Иқтисодиёт вазирлиги ва Ўзбекистон Республикасининг Хусусийлаштириш, монополиядан чиқариш ва рақобатни ривожлантириш давлат қўмитасининг 2016 йил 11 январдаги 110, 01/03-26/29-сонли қарорига
ИЛОВА

Корпоратив бошқарувчи малака аттестатини бериш тартиби тўғрисидаги

НИЗОМ

Мазкур Низом Ўзбекистон Республикасининг «Акциядорлик жамиятлари ва акциядорларнинг ҳуқуқларини ҳимоя қилиш тўғрисида»ги, «Масъулияти чекланган ва қўшимча масъулиятли жамиятлар тўғрисида»ги қонунлари, Ўзбекистон Республикаси Президентининг 2015 йил 24 апрелдаги ПФ-4720-сонли «Акциядорлик жамиятларида замонавий корпоратив бошқарув услубларини жорий этиш чора-тадбирлари тўғрисида»ги Фармони, Ўзбекистон Республикаси Президентининг 2015 йил 30 сентябрдаги ПҚ-2414-сонли «Корпоратив бошқарув илмий-таълим маркази фаолиятини ташкил этиш чора-тадбирлари тўғрисида»ги қарори, Ўзбекистон Республикаси Вазирлар Маҳкамасининг 2015 йил 27 октябрдаги 305-сонли «Корпоратив бошқарув илмий-таълим марказининг самарали фаолиятини таъминлашга доир ташкилий чора-тадбирлар тўғрисида»ги қарорига мувофиқ корпоратив бошқарувчи малака аттестатини бериш тартибини белгилайди.

1-боб Умумий қоидалар

1. Корпоратив бошқарувчи малака аттестати (бундан буён матнда малака аттестати деб юритилади) Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги Абу Райҳон Беруний номидаги Бизнес ва бошқарув республика олий мактаби (бундан буён матнда Олий мактаб деб юритилади) томонидан корпоратив бошқарув соҳасида малака мавжудлигини тасдиқлаш учун берилади.

(1-банд Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

2. Хўжалик жамиятларининг устав капиталидаги давлат улуши бўйича давлатнинг ишончли вакиллари ва кузатув кенгаши аъзолари сифатида тайинланадиган шахслар малака аттестатини олиши шарт, қуйидагилар бундан мустасно:

Ўзбекистон Республикаси Давлат активларини бошқариш агентлиги (бундан буён матнда Агентлик деб юритилади) ходимлари;

инвестиция активларини ишончли бошқарувчиси томонидан кузатув кенгаши аъзоси сифатида илгари сурилган шахслар;

кузатув кенгашининг давлат улуши бўйича мустақил аъзоси сифатида илгари сурилган, тегишли тармоқда иш тажрибасига эга бўлган, шу жумладан хорижий шахслар;

кузатув кенгаши таркибига киритиш учун малака аттестатига эга номзодлар белгиланган муддатларда тақдим этилмаган хўжалик жамиятларининг акциядорлари (иштирокчилари) ҳисобланган маҳаллий давлат ҳокимияти органларининг раҳбарлари — белгиланган талабларга мувофиқ бўлган номзодлар тасдиқлангунга қадар муддатда. Бунда ушбу раҳбарлар мазкур муддат мобайнида ўзининг ўрнига ёки қўшимча равишда ўзининг ходимларини кузатув кенгаши таркибига номзод сифатида тайинлаш ҳуқуқига эга.

(2-банд Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

LexUZ шарҳи

2-банднинг бешинчи хатбошиси Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарорига асосан 2019 йил 1 июлдан кучга киради.

3. Малака аттестатини олиш учун фақат Олий мактабнинг корпоратив бошқарувчи махсус дастури бўйича ўқув курсларини тамомлаганлик тўғрисидаги давлат сертификатига эга бўлган шахслар даъвогарлик қилиш ҳуқуқига эга. Бунда ариза ушбу ўқув курслари якунланган кундан бошлаб бир йил мобайнида берилиши мумкин.

(3-банд Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

2-боб Малака аттестатини олишга даъвогарлик қилаётган шахслар билан суҳбат ўтказиш

4. Малака аттестатини бериш суҳбат натижалари асосида амалга оширилади.

5. Малака аттестатини олишга даъвогарлик қилаётган шахс (бундан буён матнда аризачи деб юритилади) Олий мактабга Ф.И.О., паспорт ва боғланиш маълумотлари, иш жойи кўрсатилган аризани тақдим этади.

(5-банд Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

6. Аризачи бевосита, почта алоқа воситалари орқали ёки электрон шаклда ариза бериши мумкин.

7. Аризада кўрсатилган маълумотларнинг ҳаққонийлиги учун аризачи жавобгар ҳисобланади.

8. Олий мактаб ариза олган кундан бир иш куни мобайнида аризачини суҳбатга киритиш ҳақида қарор қабул қилади ёки мазкур Низомнинг 3 ва 18-бандлари талабларига риоя этилмаган тақдирда, асослантирилган рад жавобини юборади.

(8-банд Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

9. Суҳбат Ўзбекистон Республикаси Президенти ҳузуридаги Лойиҳа бошқаруви миллий агентлиги, Агентлик ва Олий мактабнинг масъул ходимларидан иборат таркибдаги комиссия томонидан ўтказилади. Комиссия таркибига қўшимча равишда бошқа манфаатдор ташкилотларнинг вакиллари киритилиши мумкин. Комиссиянинг шахсий таркиби Олий мактаб директори қарори билан тасдиқланади.

Комиссия аъзоларининг сони 9 кишидан кам бўлмаслиги керак. Комиссиянинг раиси Олий мактаб директори, унинг йўқлигида эса ўрнини босувчи шахс ҳисобланади.

(9-банд Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

10. Комиссия мажлислари аризалар мавжудлигида ҳар жума куни ўтказилади.

11. Олий мактаб комиссия мажлиси ўтказилишидан камида 2 кун олдин ўтказилиш санаси ва жойи ҳақида ўз веб-сайтида маълумотни эълон қилади ва комиссия аъзоларини хабардор қилади.

(11-банд Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

12. Комиссия йиғилишлари аъзоларининг камида 75 фоизи иштирок этганида ваколатли ҳисобланади.

13. Ҳар бир аризачи билан суҳбат ўтказишнинг давомийлиги 15 дақиқадан ошмаслиги керак.

14. Суҳбат давлат тилида ўтказилади. Суҳбат аризачининг сўровига асосан Олий мактабнинг имкониятларидан келиб чиқиб бошқа тилларда ҳам ўтказилиши мумкин.

(14-банд Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

15. Комиссия қарорлари йиғилишда иштирок этаётган аъзоларининг оддий кўпчилик овози билан қабул қилинади, овозлар тенг бўлган тақдирда комиссия раисининг овози ҳал қилувчи ҳисобланади.

16. Ўтказилган суҳбат натижалари бўйича комиссия томонидан малака аттестатини бериш ёки беришни рад этиш тўғрисида баённома шаклида расмийлаштириладиган қарор қабул қилинади. Баённома комиссия аъзолари томонидан имзоланади ва унинг раиси томонидан тасдиқланади.

17. Суҳбатдан ўтмаганда ёки суҳбатга келмаганда комиссия томонидан кейинчалик аризачини хабардор қилган ҳолда малака аттестатини беришни рад этиш тўғрисида қарор қабул қилинади.

18. Суҳбатдан ўтмаган ёки суҳбатга келмаган шахс корпоратив бошқарувчи махсус дастури бўйича ўқув курслари тугаган кундан бир йил мобайнида умумий тартибда 3 мартадан кўп бўлмаган такрорий аризалар бериши мумкин.

19. Суҳбатдан ўтган шахс комиссиянинг малака аттестатини бериш тўғрисидаги қарори қабул қилингандан сўнг 3 ой муддатда Олий мактабга базавий ҳисоблаш миқдорининг иккидан бир қисми миқдорида қиймат тўланганлиги тўғрисидаги тўлов ҳужжатининг нусхасини тақдим этади. Шундан сўнг Олйи мактаб томонидан 3 кун муддатда малака аттестати расмийлаштирилади ва берилади.

Аризачи томонидан 3 ой муддатда Олий мактабга базавий ҳисоблаш миқдорининг иккидан бир қисми миқдорида қиймат тўланганлиги тўғрисидаги тўлов ҳужжатининг нусхаси тақдим этилмаганда комиссия қарорининг ушбу аризачига малака аттестатини бериш бўйича қисми ҳақиқий эмас деб ҳисобланади.

(19-банд Ўзбекистон Республикаси Президенти ҳузуридаги Лойиҳа бошқаруви миллий агентлиги ва Давлат активларини бошқариш агентлигининг 2019 йил 28 июндаги 116-1, 04-25/01-17-сонли қарори (рўйхат рақами 2755-2, 12.07.2019 й.) таҳририда — Қонун ҳужжатлари маълумотлари миллий базаси, 12.07.2019 й., 10/19/2755-2/3413-сон — 2019 йил 1 сентябрдан кучга киради)

20. Малака аттестатининг амал қилиш муддати 5 йилни ташкил этади ва узайтирилишига йўл қўйилмайди.

21. Малака аттестати бланкаси қатъий ҳисобда турадиган ҳужжат ҳисобланади, ҳисобга олиш рақамига ва ҳимояланганлик даражасига эга бўлади. Малака аттестати бланкаси мазкур Низомга иловага мувофиқ шаклда тайёрланади.

3-боб Малака аттестатини қайта расмийлаштириш ва унинг дубликатини бериш

22. Малака аттестатини қайта расмийлаштириш унда кўрсатилган паспорт маълумотларининг ўзгариши муносабати билан амалга оширилади. Бунинг учун малака аттестатининг эгаси Олий мактабга қуйидагиларни тақдим этади:

(22-банднинг биринчи хатбошиси Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

малака аттестатини қайта расмийлаштириш тўғрисидаги ариза;

қайта расмийлаштирилиши лозим бўлган малака аттестатининг асл нусхаси;

паспорт маълумотларига киритилган ўзгаришларни тасдиқловчи ҳужжатнинг нусхаси;

малака аттестатини олишда тўланадиган қийматнинг ярми миқдори тўланганлиги тўғрисидаги тўлов ҳужжатининг нусхаси.

23. Малака аттестатини қайта расмийлаштириш мазкур Низомнинг 22-бандида кўрсатилган ҳужжатлар тақдим этилган кундан бошлаб 5 кун мобайнида аввал берилган малака аттестатининг қолган амал қилиш муддатига малака аттестатининг янги бланкасини бериш орқали амалга оширилади.

Аввал берилган малака аттестатининг бланкаси йўқ қилинади.

24. Малака аттестатининг дубликати йўқолган ёки яроқсиз ҳолга келган малака аттестатининг ўрнига берилади. Бунинг учун малака аттестатининг эгаси Олий мактабга қуйидагиларни тақдим этади:

(24-банднинг биринчи хатбошиси Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

малака аттестатининг дубликатини бериш тўғрисидаги ариза;

яроқсиз холга келган малака аттестатининг асл нусхаси (малака аттестати яроқсиз ҳолга келганда);

25. Малака аттестатининг дубликатини бериш мазкур Низомнинг 24-бандида кўрсатилган ҳужжатлар тақдим этилган кундан бошлаб 5 кун мобайнида аввал берилган малака аттестатининг қолган амал қилиш муддатига юқори ўнг бурчагида «Дубликат» сўзи кўрсатилган малака аттестатининг янги бланкасини бериш орқали амалга оширилади.

Яроқсиз холга келган аввал берилган малака аттестатининг бланкаси йўқ қилинади.

4-боб Якуний қоидалар

26. Олий мактаб малака аттестатига эга бўлган шахслар реестрини юритади, унда қуйидагилар кўрсатилади:

(26-банд Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

малака аттестати берилган сана ва рақами;

малака аттестатига эга бўлган шахсларнинг паспорт, боғланиш маълумотлари ва иш жойи;

қайта расмийлаштирилган малака аттестатлари ва уларнинг дубликатлари тўғрисидаги маълумотлар.

27. Мазкур Низом талаблари бузилишида айбдор бўлган шахслар қонунчилик ҳужжатларига мувофиқ жавоб беради.

(27-банд Ўзбекистон Республикаси адлия вазирининг 2021 йил 30 ноябрдаги 20-мҳ-сонли буйруғи (рўйхат рақами 3338, 30.11.2021 й.) таҳририда — Қонунчилик маълумотлари миллий базаси, 30.11.2021 й., 10/21/3338/1117-сон)

28. Мазкур Низом Ўзбекистон Республикаси Молия вазирлиги ва Корпоратив бошқарув илмий-таълим маркази билан келишилган.

Молия вазири Р. АЗИМОВ

2016 йил 11 январь

Корпоратив бошқарув илмий-таълим маркази директори Б. ГАНИХОДЖАЕВ

2016 йил 11 январь

Корпоратив бошқарувчи малака аттестатини бериш тартиби тўғрисидаги низомга
ИЛОВА

‎ OʻZBEKISTON RESPUBLIKASI PREZIDENTI НUZURIDAGI LOYIНA BOSНQARUVI MILLIY AGENTLIGI QOSНIDAGI ABU RAYНON BERUNIY NOMIDAGI BIZNES VA BOSНQARUV RESPUBLIKA OLIY MAKTABI						‎ REPUBLICAN GRADUATE SCНOOL OF BUSINESS AND MANAGEMENT NAMED AFTER ABU RAYНAN BERUNI UNDER TНE NATIONAL AGENCY OF PROJECT MANAGEMENT UNDER TНE PRESIDENT OF TНE REPUBLIC OF UZBEKISTAN

‎Tartib raqami ________________			‎	‎	‎	‎	‎‎______________________-son
‎	‎	‎	‎	‎	‎	‎	‎	‎	‎
‎‎KORPORATIV BOSНQARUVCНINING MALAKA ATTESTATI
‎‎___________________________________________________________________________________________
‎‎(malaka attestati berilgan shaxsning familiyasi, ismi, otasining ismi)
‎	‎	‎	‎	‎	‎	‎	‎	‎	‎
‎‎pasport maʼlumotlari: __________________________________________________________________________
‎‎20___ yil «_____» ____________dan 20___ yil «_____» ____________gacha amal qiladi.
‎	‎	‎	‎	‎	‎	‎	‎	‎	‎
‎‎____________________________________				‎	‎	‎‎____________________________________
‎	‎‎(F.I.O.)		‎	‎	‎	‎	‎‎(imzo)		‎
‎	‎	‎	‎	‎	M.Oʼ.‎	‎	‎	‎	‎

(илова Ўзбекистон Республикаси Президенти ҳузуридаги Лойиҳа бошқаруви миллий агентлиги ва Ўзбекистон Республикаси Давлат активларини бошқариш агентлигининг 2019 йил 11 мартдаги 53, 01/10-10/52-сонли қарори (рўйхат рақами 2755-1, 16.04.2019 й.) таҳририда — Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон)

(Ўзбекистон Республикаси қонун ҳужжатлари тўплами, 2016 й., 4-сон, 39-модда; Қонун ҳужжатлари маълумотлари миллий базаси, 18.03.2019 й., 10/19/2755-1/2778-сон, 12.07.2019 й., 10/19/2755-2/3413-сон; Қонунчилик маълумотлари миллий базаси, 30.11.2021 й., 10/21/3338/1117-сон)