Savdo sohasida chiqimga qarshi mexanizmning faoliyat ko‘rsatishi uchun amaliy shart-sharoitlar yaratish va soliq solish tartibini takomillashtirish hisobiga savdo korxonalari hamda tashkilotlarining muomala xarajatlarini kamaytirishdan manfaatdorliklarini oshirish maqsadida, O‘zbekiston Respublikasi Oliy Kengashining “O‘zbekiston Respublikasi 1994-yilgi budjetining asosiy parametrlari to‘g‘risida” 1993-yil 28-dekabrdagi 993-XII-son qarorining 6 va 7-bandlariga muvofiq Vazirlar Mahkamasi qaror qiladi:

1. 1994-yil 1-yanvardan boshlab, qaysi idoraga bo‘ysunishi va mulkchilik shaklidan qat’i nazar, savdo korxonalariga soliq solishning yangi tartibi belgilansin.

Savdo korxonalari va tashkilotlari budjetga to‘lanadigan qo‘shilgan qiymat solig‘i va daromaddan olinadigan soliqdan ozod etilsin.

Savdo korxonalarining daromadlilik darajasiga ko‘ra yalpi daromaddan tabaqalashtirilgan stavkalar bo‘yicha olinadigan soliq ilovaga muvofiq joriy etilsin.

2. O‘zbekiston Respublikasi Davlat soliq qo‘mitasi O‘zbekiston Respublikasi Moliya vazirligi bilan kelishgan holda savdo qiluvchi tashkilotlar yalpi daromadiga solinadigan soliqni hisob-kitob qilish tartibini tasdiqlasin va uni soliq to‘lovchilarga yetkazsin.

3. O‘zbekiston Respublikasi Moliya vazirligi, Davlat soliq qo‘mitasi “O‘zbeksavdo” davlat uyushmasi va O‘zbekbirlashuv boshqaruvi bilan birgalikda savdo korxonalarining 1994-yil 1 yarim yilligi ish yakunlari bo‘yicha amaldagi soliq stavkalari holatini va samaraliligini tahlil qilsinlar hamda zarur bo‘lganda bu masala yuzasidan O‘zbekiston Respublikasi Vazirlar Mahkamasiga tegishli takliflar kiritsinlar.

4. O‘zbekiston Respublikasi Vazirlar Mahkamasining 1994-yil 26-fevraldagi 98-son qaroriga ilova o‘z kuchini yo‘qotgan deb hisoblansin.