O‘zbekiston Respublikasi Vazirlar Mahkamasining
qarori
Qishloq xo‘jaligiga mo‘ljallangan yerlardan oqilona foydalanish tartibi to‘g‘risidagi nizomni tasdiqlash haqida
O‘zbekiston Respublikasining Yer kodeksi va “Yaylovlar to‘g‘risida”gi Qonuni hamda O‘zbekiston Respublikasi Prezidentining “O‘zbekiston — 2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturi to‘g‘risida” 2024-yil 21-fevraldagi PF-37-son Farmoniga muvofiq, shuningdek, qishloq xo‘jaligiga mo‘ljallangan yerlardan oqilona foydalanishning samarali tizimini joriy etish maqsadida Vazirlar Mahkamasi qaror qiladi:
1. Quyidagilarni nazarda tutuvchi Qishloq xo‘jaligiga mo‘ljallangan yerlardan oqilona foydalanish tartibi to‘g‘risidagi nizom ilovaga muvofiq tasdiqlansin:
tuproq unumdorligini saqlash va oshirish, almashlab ekishni suvdan foydalanish manbalarini hisobga olgan holda tashkil etish orqali qishloq xo‘jaligiga mo‘ljallangan yerlardan oqilona foydalanish;
tuproq unumdorligini saqlash va oshirish, suvdan foydalanish manbalarini hisobga olgan holda yaylovlar almashinishini yo‘lga qo‘yish orqali yaylovlardan oqilona foydalanish;
qishloq xo‘jaligiga mo‘ljallangan yerlardan oqilona foydalanish holatini baholash va uning natijasi bo‘yicha xulosani shakllantirish.
2. Belgilansinki:
qishloq xo‘jaligiga mo‘ljallangan yerlardan oqilona foydalanilganligi Vazirlar Mahkamasining 2022-yil 14-yanvardagi 22-son qarori bilan tasdiqlangan Qishloq xo‘jaligiga mo‘ljallangan yerlar va ekin maydonlarida monitoring ishlarini amalga oshirish tartibi to‘g‘risidagi nizomga muvofiq O‘zbekiston Respublikasi Qishloq xo‘jaligi vazirligi va uning hududiy bo‘linmalarining yer tuzish va yerdan foydalanish bo‘yicha xodimlari tomonidan aniqlanadi;
qishloq xo‘jaligiga mo‘ljallangan yerlardan yerlarni almashlab ekish rejasiga hamda yaylovlar almashinishi rejasiga muvofiq yerdan foydalanuvchilar tomonidan oqilona foydalaniladi;
tuman (Quvasoy shahar) hokimliklariga O‘zbekiston Respublikasi Qishloq xo‘jaligi vazirligining tuman (Quvasoy shahar) bo‘limlari xulosasiga asosan yerdan foydalanuvchilarning qishloq xo‘jaligiga mo‘ljallangan yerlardan oqilona foydalanish tartibiga rioya qilmaganligi hamda yerning normativ qiymatidan kelib chiqqan holda, yer uchastkasining ijara muddatiga hisoblangan qo‘shimcha to‘lovlarni to‘lamaganligi uchun ularning yerga bo‘lgan ijara huquqini bekor qilish yuzasidan sudga to‘g‘ridan-to‘g‘ri da’vo arizasini kiritish huquqi beriladi.
3. O‘zbekiston Respublikasi Qishloq xo‘jaligi vazirligi Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda uch oy muddatda:
“E-ijara” axborot tizimida qishloq xo‘jaligiga mo‘ljallangan yerlardan oqilona foydalanish holatini baholash va uning natijasi bo‘yicha xulosani shakllantirishning elektron tizimini yaratsin;
ushbu qarorning mazmun-mohiyati va ahamiyatini qishloq xo‘jaligiga mo‘ljallangan yerlardan foydalanuvchilar o‘rtasida keng tushuntirilishini ta’minlasin.
4. Ushbu qaror rasmiy e’lon qilingan kundan e’tiboran uch oy o‘tgach kuchga kiradi.
5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari J.A. Xodjayev zimmasiga yuklansin.
O‘zbekiston Respublikasining Bosh vaziri A. ARIPOV
Toshkent sh.,
2024-yil 30-dekabr,
914-son
Vazirlar Mahkamasining 2024-yil 30-dekabrdagi 914-son qaroriga
ILOVA
ILOVA
Qishloq xo‘jaligiga mo‘ljallangan yerlardan oqilona foydalanish tartibi to‘g‘risida
NIZOM
1-bob. Umumiy qoidalar
1. Mazkur Nizom qishloq xo‘jaligiga mo‘ljallangan yerlardan (shu jumladan, yaylovlardan) oqilona foydalanish tartibini belgilaydi.
2. Ushbu Nizom O‘zbekiston Respublikasi Yer kodeksining 36-moddasiga muvofiq yerdan oqilona foydalanilmaganda, yer uchastkasiga bo‘lgan huquqni bekor qilishning aniq holatlarini belgilash maqsadida ishlab chiqilgan.
3. Ushbu Nizomda quyidagi asosiy tushunchalardan foydalaniladi:
almashlab ekish — ma’lum vaqt davomida yer uchastkalari bo‘yicha qishloq xo‘jaligi ekinlarini ilmiy asoslangan holda navbatlab ekish;
dala — qishloq xo‘jaligi maqsadlarida foydalaniladigan hududlarda qishloq xo‘jaligi ekinlarini yetishtirish va/yoki chorva mollarini boqish (o‘tlatish) uchun foydalaniladigan alohida kontur raqami bilan belgilangan va alohida chegara belgilariga ega bo‘lgan yer maydoni birligi;
yerdan foydalanuvchilar — qishloq xo‘jaligiga mo‘ljallangan yerlardan doimiy yoki ijara asosida foydalanish huquqiga ega bo‘lgan yuridik yoki jismoniy shaxslar;
yerlar degradatsiyasi — yerlarning tabiiy-xo‘jalik ahamiyatining pasayishiga olib keluvchi tabiiy va antropogen ta’sirlar natijasida qishloq xo‘jaligiga mo‘ljallangan yerlar holatining yomonlashishi;
tuproq unumdorligining sezilarli pasayishi — tuproq sifatini baholash, agrokimyoviy va/yoki agromeliorativ tadqiqotlar natijalari taqqoslanganda, tuproq unumdorligi ko‘rsatkichining pasayishi;
umumiy yaylov maydoni bo‘yicha foydalanish me’yori — Vazirlar Mahkamasining 2019-yil 19-avgustdagi 689-son qarori bilan tasdiqlangan Yaylovlarda chorva mollarini o‘tlatishda eng ko‘p yo‘l qo‘yiladigan foydalanish normalarini belgilash, yaylovlar almashinishini ta’minlash va yuritish tartibi to‘g‘risidagi nizomga muvofiq umumiy yaylov maydoni bo‘yicha aniqlangan eng ko‘p yo‘l qo‘yiladigan foydalanish me’yori;
chorva hayvonlari ko‘chib yurish (yoyib) tartibida boqiladigan (o‘tlatiladigan) yaylovlar — aholi punktidan uzoqdagi hududlarda chorva hayvonlarini ko‘chib yurish (yoyib) tartibida boqish (o‘tlatish) uchun foydalaniladigan yaylovlar;
yaylovlar almashinishi — yaylovlarni boshqarish va ulardan foydalanish rejasiga muvofiq yaylovlardan davriy va navbat bilan foydalanish hamda uning mahsuldorlik holatini saqlash uchun xizmat qiladigan tizim;
yaylovlarda boqiladigan (o‘tlatiladigan) chorva hayvonlari (keyingi o‘rinlarda — chorva hayvonlari) — yirik shoxli mollar, qo‘ylar, echkilar, otlar, tuyalar va boshqalar;
yaylovlarning oziqa (yem-xashak) hajmi — yaylovlar maydoni birligi bo‘yicha yaylov o‘tlarining mahsuldorligi;
yaylovlardan oqilona foydalanish — tabiiy me’yorlarga (umumiy yaylovlarda eng ko‘p yo‘l qo‘yiladigan foydalanish me’yoriga) rioya qilish orqali va ekologik muhimligini hisobga olgan holda, yaylovlarning normal holatini saqlash va qayta tiklash imkonini yaratgan holda, yaylovlarning oziqa (yem-xashak) resurslaridan samarali foydalanish;
qishloq xo‘jaligiga mo‘ljallangan yerlardan oqilona foydalanish — yer maydonlarida tuproq unumdorligining pasayishi va meliorativ holatining yomonlashishiga yo‘l qo‘ymaslik hamda mahsuldorlikning zarur ko‘rsatkichlariga erishish maqsadida yerdan foydalanuvchilar tomonidan qishloq xo‘jaligiga mo‘ljallangan yerlardan (shu jumladan, yaylovlardan) oqilona foydalanishni ta’minlanishi.
4. Qishloq xo‘jaligiga mo‘ljallangan yerlardan oqilona foydalanilganligi Vazirlar Mahkamasining 2022-yil 14-yanvardagi 22-son qarori bilan tasdiqlangan Qishloq xo‘jaligiga mo‘ljallangan yerlar va ekin maydonlarida monitoring ishlarini amalga oshirish tartibi to‘g‘risidagi nizomga muvofiq O‘zbekiston Respublikasi Qishloq xo‘jaligi vazirligi va uning hududiy bo‘linmalarining yer tuzish va yerdan foydalanish bo‘yicha xodimlari tomonidan aniqlanadi.
5. Qishloq xo‘jaligiga mo‘ljallangan yerlardan oqilona foydalanish quyidagilar mezonlar bo‘yicha baholanadi:
tuproq unumdorligini saqlash va oshirish (haydalma qatlamida umumiy gumus, harakatchan fosfor va almashinuvchan kaliyning maqbul darajasini ta’minlash);
asosiy qishloq xo‘jaligi ekinlarining hosildorligini belgilangan darajada saqlash va oshirish;
suvdan foydalanish manbalarini hisobga olgan holda almashlab ekish;
yaylovlar almashinishini hisobga olgan holda yaylovlardan foydalanish;
tuproqning unumdorligi va meliorativ holatini saqlash va oshirish;
chorvachilik mahsulotlarini ishlab chiqarishda yaylovlardagi maqbul (optimal) foydalanish me’yorini ta’minlash;
yerlarning xo‘jalik aylanmasidan (foydalanishdan) chiqib ketishining oldini olish, yerlarni begona o‘tlar va butasimon daraxtlar qoplashiga hamda ularning maishiy va ishlab chiqarish chiqindilari bilan ifloslanishiga yo‘l qo‘ymaslik;
yerga ishlov berishda qishloq xo‘jaligi ekinlarini ang‘iz qoldiqlari va ikkilamchi mahsulotlarni yoqishga yo‘l qo‘ymaslik;
dala chetlariga, bog‘lar va tokzorlarning qator oralariga, shu jumladan, kanallar, sug‘orish va kollektor-drenaj tarmoqlari atrofidagi maydonlarga maqbul ekinlarni ekib daromad olish (sug‘orish suvlari bilan ta’minlangan yerlarda);
ichki sug‘orish tarmoqlari va zovurlarni o‘z vaqtida tozalash.
Mazkur band talablari bajarilmagan holatlarda, qishloq xo‘jaligiga mo‘ljallangan yerlardan va yaylovlardan oqilona foydalanilmagan hisoblanadi.
6. Qishloq xo‘jaligiga mo‘ljallangan yerlardan oqilona foydalanishni baholash uchun yerdan foydalanuvchilarda quyidagi hujjatlar mavjud bo‘lishi shart:
a) qishloq xo‘jaligi faoliyati to‘g‘risidagi yillik statistika hisoboti shakllari bo‘yicha statistika ma’lumotlari.
Bunda qishloq xo‘jaligi faoliyati to‘g‘risidagi yillik statistika hisoboti shakllari bo‘yicha statistika ma’lumotlari yerdan foydalanuvchilarning so‘rovnomalariga asosan tuman statistika bo‘limlari tomonidan beg‘araz taqdim etiladi;
b) mazkur Nizomga 1-ilovaga muvofiq shakldagi almashlab ekish rejasi;
v) mazkur Nizomga 2-ilovaga muvofiq shakldagi yaylovlar almashinishi rejasi;
g) xo‘jalik ichida yer tuzish loyihasi (dehqon xo‘jaliklari va tomorqa yer egalarining qishloq xo‘jaligiga mo‘ljallangan yerlardan oqilona foydalanish holatini aniqlash bundan mustasno).
7. Xo‘jalik ichida yer tuzish loyihasi yerdan foydalanuvchilarning murojaatiga asosan “O‘zdaverloyiha” davlat ilmiy-loyihalash instituti va uning hududiy bo‘linmalari tomonidan xo‘jalik shartnomalari asosida ishlab chiqiladi hamda tuman (Quvasoy shahar) hokimining qishloq va suv xo‘jaligi masalalari bo‘yicha o‘rinbosari tomonidan tasdiqlanadi.
2-bob. Qishloq xo‘jaligiga mo‘ljallangan yerlardan oqilona foydalanish tartibi
8. Yerdan foydalanuvchilar qishloq xo‘jaligiga mo‘ljallangan yerlardan foydalanishda umumiy foydalanish uchun chop etilgan ilmiy-tadqiqot institutlarining ilmiy asoslangan tavsiyalari asosida ishlab chiqilgan va tasdiqlangan almashlab ekish rejasiga muvofiq almashlab ekishga rioya qiladi.
Yerdan foydalanuvchilar yaylovlardan foydalanishda eng ko‘p yo‘l qo‘yiladigan foydalanish me’yorining 20 foizidan kam bo‘lmagan miqdordagi qishloq xo‘jaligi hayvonlarining mavjudligini va uning belgilangan me’yordan oshib ketmasligini ta’minlaydi.
9. Xo‘jalikning ixtisoslashuvi va yerni ijaraga olish shartnomasiga muvofiq yetishtiriladigan ekinlarning rotatsiyasi bo‘yicha tanlangan almashlab ekish tizimiga bog‘liq holda qishloq xo‘jaligi ekinlarining to‘liq vegetatsiyaga muvofiq davrni o‘z ichiga olgan almashlab ekish rejasi yerdan foydalanuvchilar tomonidan ishlab chiqilib, O‘zbekiston Respublikasi Qishloq xo‘jaligi vazirligining tuman (Quvasoy shahar) qishloq xo‘jaligi bo‘limi tomonidan tasdiqlanadi va bir nusxasi ushbu tashkilotda saqlanadi.
10. Tuproq unumdorligining quyidagi ko‘rsatkichlar bo‘yicha pasayishiga yo‘l qo‘yilmaydi:
sug‘oriladigan tuproqlarning unumdor qatlamida (0 — 30 sm) umumiy gumus (>0,8%) miqdorini, harakatchan fosfor (>30 mg/kg) va almashinuvchan kaliyning (>200 mg/kg) tuproqdagi miqdorlarini kam ta’minlangan darajadan tushirmaslik;
ushbu Nizomga 3-ilovaga muvofiq tuproqning gumus va oziqa elementlari bilan ta’minlanganligining kam ko‘rsatkichlariga ega bo‘lgan yerlarni kengaytirmaslik;
qonunchilik hujjatlari bilan tasdiqlangan talablarga muvofiq yerlarni maksimal ruxsat etilgan konsentratsiyasidan yuqori darajada mineral o‘g‘itlar va pestitsidlar bilan ifloslantirmaslik;
eroziya natijasida yuqori gumus qatlam qalinligining 5 santimetrdan ortiq pasayishi;
tuproqning 30 santimetrgacha bo‘lgan qatlamida zaharli tuzlar umumiy miqdorining ko‘payishiga (xlor 0,01 foizdan, sulfat 0,03-0,04 foizdan ortiq, tuproqdagi sho‘rlanish darajasini umumiy maydonning 5 foizdan oshirmaslik) yo‘l qo‘ymaslik;
qishloq xo‘jaligi maqsadlari uchun berilgan yerlarni qishloq xo‘jaligi foydalanishidan chiqarib yubormaslik.
11. Yerdan foydalanuvchilar asosiy qishloq xo‘jaligi ekinlari, bog‘lar va tokzorlar tuproqlarining bir bonitet balliga nisbatan hisoblangan normativ hosildorligiga muvofiq ularning hosildorligini ta’minlashi shart.
12. Yerdan foydalanuvchilar chorvachilik maqsadlari uchun qishloq xo‘jaligiga mo‘ljallangan yerlardan foydalanishda quyidagi miqdorlarda qishloq xo‘jaligi hayvonlarining mavjudligini ta’minlaydi:
eng ko‘p yo‘l qo‘yiladigan foydalanish me’yorining 20 foizidan pasaytirmaslik;
eng ko‘p yo‘l qo‘yiladigan foydalanish me’yoridan oshirmaslik.
3-bob. Yaylovlardan oqilona foydalanish tartibi
13. Yaylovlardan oqilona foydalanish quyidagi tadbirlarni o‘z ichiga oladi:
yaylovlar almashinishi va suvdan foydalanish manbalarini hisobga olgan holda yaylovlardan foydalanish;
Vazirlar Mahkamasining 2019-yil 19-avgustdagi 689-son qarori bilan tasdiqlangan Yaylovlarda chorva mollarini o‘tlatishda eng ko‘p yo‘l qo‘yiladigan foydalanish normalarini belgilash, yaylovlar almashinishini ta’minlash va yuritish tartibi to‘g‘risida nizomga muvofiq umumiy yaylov maydoni bo‘yicha aniqlangan eng ko‘p yo‘l qo‘yiladigan foydalanish me’yorini ta’minlash;
yaylovlar almashinishi rejasiga muvofiq yaylovlardan foydalanish;
yaylovlarning qishloq xo‘jaligida foydalanishdan chiqib ketishining oldini olish bo‘yicha tadbirlarni amalga oshirish, shu jumladan, yerlarni begona o‘tlar va butasimon daraxtlar qoplashiga hamda maishiy va ishlab chiqarish chiqindilari bilan ifloslanishiga yo‘l qo‘ymaslik.
14. Yerdan foydalanuvchilar yaylovlardan foydalanishda eng ko‘p yo‘l qo‘yiladigan foydalanish normasidan oshmagan miqdorda qishloq xo‘jaligi hayvonlari boqilishini ta’minlaydi.
15. Eng ko‘p yo‘l qo‘yiladigan foydalanish normasini ta’minlash maqsadida qishloq xo‘jaligi hayvonlari bosh soni va yerdan foydalanuvchilar foydalanishida bo‘lgan yaylovlarning oziqa mahsuldorligi to‘g‘risidagi axborotlardan foydalaniladi.
Yerdan foydalanuvchilarga tegishli bo‘lgan qishloq xo‘jaligi hayvonlarining bosh soni miqdorini hisoblash uchun qishloq xo‘jaligi hayvonlarini ro‘yxatga olish bo‘yicha ma’lumotlar bazasidan olingan ma’lumotlar hamda yerlarni masofadan zondlash o‘tkazilgan vaqtdagi axborotlar qabul qilinadi.
Yerdan foydalanuvchilarga tegishli bo‘lgan qishloq xo‘jaligi hayvonlarining bosh soni to‘g‘risida qishloq xo‘jaligi hayvonlarini ro‘yxatga olish bo‘yicha ma’lumotlar bazasida ma’lumotlar bo‘lmagan hollarda, chorva mollarini xatlovdan o‘tkazish va monitoring qilish asosida aniq ma’lumotlarni olishga ruxsat etiladi.
16. Yaylovlardan oqilona foydalanish tuman (Quvasoy shahar) qishloq xo‘jaligi bo‘limi tomonidan tasdiqlangan Yaylovlarni boshqarish va undan foydalanish rejasi bilan tartibga solinadi.
17. Yaylovlarning oziqa mahsuldorligi pasayishiga yo‘l qo‘ymaslik maqsadida quyidagi tadbirlar amalga oshiriladi:
yaylovlarni qishloq xo‘jaligi hayvonlarini boqish (o‘tlatish) bo‘yicha alohida uchastkalarga ajratish (bo‘lish);
yaylovlarning joylashishi va vaqt (yil, mavsum) bo‘yicha yil mavsumi davomida almashinishi;
qishloq xo‘jaligi hayvonlari kiritilmaydigan va boqilmaydigan (o‘tlatilmaydigan) hamda har yili yaylovlar almashinishidan qoldiriladigan yer uchastkasi.
18. Hududlarning tabiiy va xo‘jalik sharoitiga bog‘liq holda yaylovlarda qishloq xo‘jaligi hayvonlarini boqish (o‘tlatish)ning quyidagi tizimlaridan foydalaniladi:
ko‘chib yurish tartibida (yoyib) boqiladigan (o‘tlatiladigan) yaylovlar;
yil davomida boqiladigan (o‘tlatiladigan) yaylovlar.
Qishloq xo‘jaligi hayvonlari ko‘chib yurish tartibida (yoyib) boqiladigan (o‘tlatiladigan) mintaqalarga bog‘liq holda bahor, yoz va kuz oylarida boqiladi hamda qish oylarida molxona sharoitida oziqlantiriladi.
Yerdan foydalanuvchilar hududning tabiiy-iqlim sharoitiga bog‘liq holda yaylovlardan yil davomida foydalanadi. Yerdan foydalanuvchilar noqulay iqlim sharoitida chorvachilik binolaridan foydalanadi va dag‘al oziqa bazasining yetarli darajadagi zaxirasini yaratadi.
4-bob. Qishloq xo‘jaligiga mo‘ljallangan yerlardan oqilona foydalanish holatini o‘rganish hamda uning natijasiga ko‘ra xulosani shakllantirish tartibi
19. O‘zbekiston Respublikasi Qishloq xo‘jaligi vazirligi o‘zining hududiy bo‘linmalari bilan birgalikda har yili 10-fevralga qadar yerdan foydalanuvchilar kesimida qishloq xo‘jaligiga mo‘ljallangan yerlardan (shu jumladan, yaylovlardan) oqilona foydalanish holatini o‘rganish bo‘yicha kalendar rejalarni ishlab chiqadi, tasdiqlaydi hamda Qishloq xo‘jaligi vazirligining www.agro.uz rasmiy saytiga joylashtiradi.
20. Qishloq xo‘jaligiga mo‘ljallangan yerlardan oqilona foydalanish holatini o‘rganish hamda uning natijasiga ko‘ra xulosani shakllantirish bo‘yicha ishchi guruh (keyingi o‘rinlarda — Ishchi guruh) tuziladi.
Ishchi guruhga “O‘zdaverloyiha” instituti, Tuproqshunoslik va agrokimyoviy tadqiqotlar instituti, Respublika agrokimyoviy tahlil markazi hamda ularning hududiy (mintaqaviy) bo‘linmalari xodimlari jalb etiladi.
21. Qishloq xo‘jaligiga mo‘ljallangan yerlardan oqilona foydalanish holatini o‘rganish natijalari ushbu Nizomning 5-bandida keltirilgan mezonlar bo‘yicha baholanadi.
22. Qishloq xo‘jaligiga mo‘ljallangan yerlardan oqilona foydalanish holatini o‘rganish bo‘yicha xulosalar Tuproqshunoslik va agrokimyoviy tadqiqotlar instituti, Respublika agrokimyoviy tahlil markazi yoki ularning hududiy (mintaqaviy) bo‘linmalari tomonidan o‘tkazilgan tuproq tadqiqotlari natijalariga muvofiq tayyorlanadi.
23. Yaylovlardan oqilona foydalanish holatini o‘rganish bo‘yicha xulosalar “O‘zdaverloyiha” instituti yoki uni hududiy bo‘linmalari tomonidan o‘tkazilgan geobotanik tadqiqotlar va yaylovlar monitoringi natijalariga muvofiq tayyorlanadi.
24. Ishchi guruh har bir yerdan foydalanuvchi kesimida qishloq xo‘jaligiga mo‘ljallangan yerlardan oqilona foydalanish holatini o‘rganish hamda uning natijasiga ko‘ra xulosani qabul qilish bo‘yicha dalolatnomani rasmiylashtiradi va “E-ijara” axborot tizimiga kiritadi hamda O‘zbekiston Respublikasi Qishloq xo‘jaligi vazirligining www.agro.uz rasmiy saytiga joylashtiradi.
25. Qishloq xo‘jaligiga mo‘ljallangan yerlardan oqilona foydalanish holatini o‘rganish hamda uning natijasiga ko‘ra xulosa elektron shaklda tayyorlanadi va avtomatik ravishda tuman (Quvasoy shahar) hokimligining “E-ijara” axborot tizimidagi kabinetiga yuboriladi.
5-bob. Yakunlovchi qoida
26. Ushbu Nizom talablarini buzganlikda aybdor shaxslar qonunchilik hujjatlarida nazarda tutilgan tartibda javob beradilar.
Qishloq xo‘jaligiga mo‘ljallangan yerlardan oqilona foydalanish tartibi to‘g‘risidagi nizomga
1-ILOVA
1-ILOVA
“TASDIQLAYMAN” | ||||||||||||||
______________ tuman (Quvasoy shahar) | ||||||||||||||
Qishloq xo‘jaligi bo‘limi boshligi | ||||||||||||||
_______________________________ | ||||||||||||||
___(imzo) ______________ (F.I.O.)____ | ||||||||||||||
20___ yil “___” ___________ | ||||||||||||||
Almashlab ekish rejasi | ||||||||||||||
Yer uchastkasining kontur raqami | Ekin yerlari maydoni, gektar | Almashlab ekish rejasini tuzishgacha bo‘lgan yillardagi ekinlar | Qishloq xo‘jaligi ekinlarining rejalashtirilayotgan davrda joylashishi | |||||||||||
20__ yil | 20__ yil | 20__ yil | 20__ yil | 20__ yil | 20__ yil | 20__ yil | 20__ yil | 20__ yil | 20__ yil | 20__ yil | 20__ yil | |||
Qishloq xo‘jaligiga mo‘ljallangan yerlardan oqilona foydalanish tartibi to‘g‘risidagi nizomga
2-ILOVA
2-ILOVA
“TASDIQLAYMAN” | ||||||||
______________ tuman (Quvasoy shahar) | ||||||||
Qishloq xo‘jaligi bo‘limi boshligi | ||||||||
_______________________________ | ||||||||
___(imzo) ______________ (F.I.O.)____ | ||||||||
20___ yil “___” ___________ | ||||||||
Yaylovlarni almashinish kalendar rejasi | ||||||||
Yaylovdan foydalanuvchining kadastr raqami | Kontur raqami (almashlab boqish uchastkasi raqami) | Yillar bo‘yicha foydalanilishi | ||||||
2025-yil | 2026-yil | 2027-yil | 2028-yil | 2029-yil | 2030-yil | |||
To‘ldirish uchun misol: | |||||||
11:05:10:01:05:9424 | 1015 (1) | bahor | kuz | boqilmaydi | yoz | bahor | kuz |
11:05:10:01:05:9424 | 1016 (2) | yoz | bahor | kuz | boqilmaydi | yoz | bahor |
11:05:10:01:05:9424 | 1017 (3) | boqilmaydi | yoz | bahor | kuz | boqilmaydi | yoz |
11:05:10:01:05:9424 | 1018 (4) | kuz | boqilmaydi | yoz | bahor | kuz | boqilmaydi |
Qishloq xo‘jaligiga mo‘ljallangan yerlardan oqilona foydalanish tartibi to‘g‘risidagi nizomga
3-ILOVA
3-ILOVA
Tuproqning gumus va oziqa elementlari bilan ta’minlanganlik ko‘rsatkichlari
T/r | Hududlar nomlari | Tuproqlar tipi | Gumus bilan ta’minlanganligi, foiz | Oziqa elementlari bilan ta’minlanganligi, milligramm/kilogramm | ||||||||||||||
juda kam (<0,4) | kam (0,41 — 0,8) | o‘rtacha (0,81 — 1,2) | ko‘proq (1,2 — 1,6) | ko‘p (1,61 — 2,0) | yuqori (>2,0) | harakatchan fosfor | almashinuvchi kaliy | |||||||||||
juda kam (<15) | kam (16 — 30) | o‘rtacha (31 — 45) | ko‘p (46 — 60) | juda ko‘p (>60) | juda kam (<100) | kam (101 — 200) | o‘rtacha (201 — 300) | ko‘p (301 — 400) | juda ko‘p (>400) | |||||||||
1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 |
1. | Qoraqalpog‘iston Respublikasi | Sur qo‘ng‘ir | 52 634 | 251 740 | 110 461 | 18 639 | 240 | 766 | 293 758 | 125 062 | 15 529 | 1795 | 550 | 24 787 | 222 995 | 137 751 | 42 416 | 8 746 |
Taqir o‘tloqi | ||||||||||||||||||
O‘tloqi taqir | ||||||||||||||||||
Cho‘l qumli | ||||||||||||||||||
O‘tloqi cho‘l qumli | ||||||||||||||||||
O‘tloqi alyuvial | ||||||||||||||||||
O‘tloqi, botqoq-o‘tloqi allyuvial | ||||||||||||||||||
Sur qo‘ng‘ir | ||||||||||||||||||
Taqir o‘tloqi | ||||||||||||||||||
O‘tloqi taqir | ||||||||||||||||||
Cho‘l qumli | ||||||||||||||||||
2. | Andijon viloyati | To‘q tusli bo‘z | 687 | 16241 | 68582 | 84091 | 42160 | 23593 | 65894 | 94441 | 43448 | 14708 | 16861 | 5282 | 130395 | 65058 | 24331 | 10287 |
Tipik bo‘z | ||||||||||||||||||
O‘tloqi allyuvial | ||||||||||||||||||
Botqoq o‘tloqi | ||||||||||||||||||
O‘tloqi saz | ||||||||||||||||||
Bo‘z o‘tloqi | ||||||||||||||||||
O‘tloqi botqoq | ||||||||||||||||||
Och tusli bo‘z | ||||||||||||||||||
Saz o‘tloqi | ||||||||||||||||||
O‘tloqi | ||||||||||||||||||
O‘tloqi bo‘z | ||||||||||||||||||
Botqoqli | ||||||||||||||||||
3. | Buxoro viloyati | O‘tloqi | 7431 | 105832 | 91058 | 12361 | 2023 | 1332 | 160570 | 49368 | 7267 | 2262 | 569 | 19987 | 170562 | 24828 | 3694 | 966 |
O‘tloqi allyuvial | ||||||||||||||||||
Botqoq-O‘tloqi | ||||||||||||||||||
O‘tloqi botqoq | ||||||||||||||||||
Cho‘l o‘tloqi | ||||||||||||||||||
O‘tloqi taqir | ||||||||||||||||||
Taqir o‘tloqi | ||||||||||||||||||
Sur tusli qo‘ng‘ir | ||||||||||||||||||
Sur tusli qo‘ng‘ir o‘tloqi | ||||||||||||||||||
Cho‘l qumli o‘tloqi | ||||||||||||||||||
Taqir o‘tloqi dasht | ||||||||||||||||||
O‘tloqi cho‘l | ||||||||||||||||||
Allyuvial o‘tloqi | ||||||||||||||||||
O‘tloqi cho‘l qumli | ||||||||||||||||||
Botqoq | ||||||||||||||||||
4. | Jizzax viloyati | Bo‘z o‘tloqi | 2818 | 62224 | 147158 | 52725 | 9144 | 1649 | 199482 | 66045 | 8203 | 1459 | 531 | 11076 | 76557 | 120518 | 43465 | 24104 |
Och tusli bo‘z | ||||||||||||||||||
Tipik bo‘z | ||||||||||||||||||
o‘tloqi | ||||||||||||||||||
o‘tloqi bo‘z | ||||||||||||||||||
to‘q tusli bo‘z | ||||||||||||||||||
botqoq o‘tloqi | ||||||||||||||||||
5. | Qashqadaryo viloyati | To‘q tusli bo‘z | 12333 | 160914 | 219697 | 64852 | 11613 | 3590 | 240929 | 165967 | 38710 | 12368 | 15025 | 2118 | 163615 | 179054 | 97167 | 31046 |
Tipik bo‘z | ||||||||||||||||||
Och tusli bo‘z | ||||||||||||||||||
Bo‘z-o‘tloqi | ||||||||||||||||||
O‘tloqi-bo‘z | ||||||||||||||||||
Sur tusli qo‘ng‘ir | ||||||||||||||||||
Sur tusli qo‘ng‘ir o‘t. | ||||||||||||||||||
Qumli cho‘l | ||||||||||||||||||
Taqirli | ||||||||||||||||||
Taqir o‘tloqi | ||||||||||||||||||
O‘tloqi | ||||||||||||||||||
6. | Navoiy viloyati | Tipik bo‘z | 1 359 | 29 406 | 51 980 | 24 578 | 3 470 | 200 | 35 988 | 58 009 | 9 633 | 3 461 | 3 901 | 3 092 | 55 883 | 37 418 | 11 108 | 3 491 |
Och tusli bo‘z | ||||||||||||||||||
Bo‘z-o‘tloqi | ||||||||||||||||||
O‘tloqi-bo‘z | ||||||||||||||||||
Sur tusli qo‘ng‘ir | ||||||||||||||||||
Sur tusli qo‘ng‘ir o‘tloqi | ||||||||||||||||||
cho‘l qumli | ||||||||||||||||||
Cho‘l qumli o‘tloqi | ||||||||||||||||||
Taqir | ||||||||||||||||||
Taqir o‘tloqi | ||||||||||||||||||
O‘tloqi taqir | ||||||||||||||||||
O‘tloqi | ||||||||||||||||||
7. | Namangan viloyati | To‘k tusli bo‘z | 3650 | 43473 | 112886 | 60582 | 14152 | 5913 | 153632 | 61602 | 14388 | 4800 | 6234 | 21326 | 163069 | 42057 | 9762 | 4442 |
Tipik bo‘z | ||||||||||||||||||
Och tusli bo‘z | ||||||||||||||||||
Bo‘z-o‘tloqi | ||||||||||||||||||
O‘tloqi-bo‘z | ||||||||||||||||||
Sur tusli qo‘ng‘ir o‘tloqi | ||||||||||||||||||
O‘tloqi | ||||||||||||||||||
8. | Samarqand viloyati | To‘k tusli bo‘z | 11043 | 102114 | 138974 | 52325 | 8370 | 2861 | 84019 | 156891 | 49601 | 10244 | 14932 | 11783 | 155658 | 97148 | 38259 | 12839 |
Tipik bo‘z | ||||||||||||||||||
Och tusli bo‘z | ||||||||||||||||||
Bo‘z-o‘tloqi | ||||||||||||||||||
O‘tloqi-bo‘z | ||||||||||||||||||
O‘tloqi | ||||||||||||||||||
O‘tloqi botqoq | ||||||||||||||||||
Botqoq o‘tloqi | ||||||||||||||||||
9. | Surxondaryo viloyati | To‘k tusli bo‘z | 5942 | 87893 | 136923 | 35876 | 6831 | 3052 | 164122 | 78184 | 19323 | 5299 | 9589 | 2015 | 109534 | 74193 | 54855 | 35920 |
Tipik bo‘z | ||||||||||||||||||
Och tusli bo‘z | ||||||||||||||||||
Bo‘z-o‘tloqi | ||||||||||||||||||
O‘tloqi-bo‘z | ||||||||||||||||||
Sur tusli qo‘ng‘ir | ||||||||||||||||||
Sur tusli qo‘ng‘ir o‘tloqi | ||||||||||||||||||
Qumli cho‘l | ||||||||||||||||||
Taqirli | ||||||||||||||||||
Taqir o‘tloqi | ||||||||||||||||||
O‘tloqi | ||||||||||||||||||
10. | Sirdaryo viloyati | O‘tloqi | 1303 | 91594 | 133728 | 26500 | 1865 | 41 | 173605 | 71564 | 7571 | 1755 | 535 | 8992 | 107855 | 106558 | 26131 | 5494 |
Bo‘z o‘tloqi | ||||||||||||||||||
O‘tloqi bo‘z | ||||||||||||||||||
O‘tloqi allyuvial | ||||||||||||||||||
Botqoq o‘tloqi | ||||||||||||||||||
O‘tloqi botqoq | ||||||||||||||||||
Och tusli bo‘z | ||||||||||||||||||
Tipik bo‘z | ||||||||||||||||||
11. | Toshkent viloyati | Tog‘ jigarrang | 2665 | 43488 | 123379 | 100254 | 45472 | 27844 | 116144 | 141497 | 47662 | 14943 | 22856 | 5260 | 111192 | 109926 | 75811 | 40912 |
To‘q tusli bo‘z | ||||||||||||||||||
Tipik bo‘z | ||||||||||||||||||
Bo‘z-o‘tloqi | ||||||||||||||||||
O‘tloqi-bo‘z | ||||||||||||||||||
O‘tloqi | ||||||||||||||||||
O‘tloqi-botqoq | ||||||||||||||||||
Botqoq-o‘tloqi | ||||||||||||||||||
12. | Farg‘ona viloyati | To‘q tusli bo‘z | 6043 | 47896 | 99046 | 89411 | 39296 | 28688 | 159624 | 99234 | 25130 | 9738 | 16654 | 17344 | 223276 | 46571 | 13015 | 10173 |
Tipik bo‘z | ||||||||||||||||||
Och tusli bo‘z | ||||||||||||||||||
Buz-o‘tloqi | ||||||||||||||||||
O‘tloqi-bo‘z | ||||||||||||||||||
Kolmatoj | ||||||||||||||||||
O‘tloqi taqirli | ||||||||||||||||||
O‘tloqi | ||||||||||||||||||
O‘tloqi-saz | ||||||||||||||||||
Saz-o‘tloqi | ||||||||||||||||||
O‘tloqi saz-alivial | ||||||||||||||||||
13. | Xorazm viloyati | Sur-qo‘ng‘ir | 9623 | 82230 | 108277 | 27223 | 7601 | 5133 | 100352 | 93965 | 25872 | 8356 | 11541 | 6160 | 200392 | 26521 | 4186 | 2829 |
O‘tloqi alivial | ||||||||||||||||||
Botqoq o‘tloqi | ||||||||||||||||||
O‘tloqi botqoq | ||||||||||||||||||
Izoh. Sug‘oriladigan tuproqlar tarkibidagi gumus, harakatchan fosfor va alamashinuvchi kaliy miqdorlari konturlar kesimida aniqlanib ularni qiyosiy taqqoslash ham konturlar kesimida hisob-kitob qilinishi shart.
(Qonunchilik ma’lumotlari milliy bazasi, 08.01.2025-y., 09/25/914/0015-son)
