Dehqonchilik sanoati kompleksi tarmoqlarida iqtisodiy qayta o‘zgarishlarni chuqurlashtirishning asosiy yo‘nalishlarini ishlab chiqish va qishloq xo‘jaligi xodimlarining 1995-yildagi birinchi navbatdagi vazifalarini belgilab olish maqsadida Vazirlar Maqkamasi qaror qiladi:

1. Quyidagi muddatlarda respublika kengashlari o‘tkazilsin:

paxtachilik masalalari bo‘yicha — shu yil 14-martda, qatnashuvchilar soni 250 kishi;

g‘allachilik masalalari bo‘yicha (boshoqli don ekinlari, sholi, don uchun makkajo‘xori) — shu yil 15-martda, qatnashuvchilar soni 200 kishi;

chorvachilik masalalari bo‘yicha — shu yil 16-martda, qatnashuvchilar soni 200 kishi;

sabzavotchilik, bog‘dorchilik va uzumchilik masalalari bo‘yicha — shu yil 17-martda, qatnashuvchilar soni 200 kishi.

2. Kengashlarni tayyorlash va o‘tkazish ishlarini tashkil etish uchun ilovaga* muvofiq tarkibda tashkiliy qo‘mita tuzilsin.

3. O‘zbekiston Respublikasi Qishloq xo‘jalik vazirligi, “O‘zmevasabzavotuzumsanoat” uyushmasi Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda bir hafta muddatda dehqonchilik sanoati kompleksi ilg‘orlarini mukofotlash to‘g‘risida takliflar kiritsinlar.

4. Tashkiliy qo‘mita kengashlar qatnashchilarining yetib kelishlari, joylashishlari va jo‘nab ketishlari, ularga tibbiy, savdo hamda madaniy xizmat ko‘rsatishga aloqador barcha masalalarni hal qilgan holda kengashlarning belgilangan muddatlarda o‘tkazilishini ta’minlasin.

5. Kengashlarni o‘tkazish bilan bog‘liq bo‘lgan xarajatlar qatnashchilar soniga mutanosib ravishda O‘zbekiston Respublikasi Qishloq xo‘jaligi vazirligi va “O‘zmevasabzavotuzumsanoat” uyushmasi hisobidan amalga oshirilsin.

6. Mazkur qarorning bajarilishini nazorat qilish Bosh vazirning birinchi o‘rinbosari I. H. Jo‘rabekov zimmasiga yuklansin.