O‘zbekiston Respublikasi Vazirlar Mahkamasining
qarori
Moliyaviy hisobotning halqaro standartlari va unga tushuntirishlar matnini tan olish tartibi to‘g‘risidagi nizomni tasdiqlash haqida
O‘zbekiston Respublikasi Prezidentining “Moliyaviy hisobotning xalqaro standartlariga o‘tish bo‘yicha qo‘shimcha chora-tadbirlar to‘g‘risida” 2020-yil 24-fevraldagi PQ-4611-son qarori ijrosini ta’minlash maqsadida Vazirlar Mahkamasi qaror qiladi:
1. Quyidagilarni nazarda tutuvchi Moliyaviy hisobotning xalqaro standartlari va unga tushuntirishlar matnini tan olish tartibi to‘g‘risidagi nizom ilovaga muvofiq tasdiqlansin:
O‘zbekiston Respublikasi hududida qo‘llash uchun moliyaviy hisobotning xalqaro standartlari hujjatlarini ekspertizadan o‘tkazish;
moliyaviy hisobotning xalqaro standartlari hujjatlarini ekspertizadan o‘tkazish bo‘yicha ekspertiza komissiyasini shakllantirish tartibi;
moliyaviy hisobotning xalqaro standartlari hujjatlarini ushbu hujjatlardan foydalananuvchilar va ilmiy jamoatchilik vakillari bilan muhokama qilish;
O‘zbekiston Respublikasi hududida moliyaviy hisobotning xalqaro standartlari hujjatlarini joriy etish to‘g‘risida qaror qabul qilish.
2. O‘zbekiston Respublikasi Moliya vazirligi buxgalterlar va auditorlarning respublika jamoat birlashmalari bilan birgalikda xalqaro ekspertlarni jalb qilgan holda, quyidagi tadbirlar doimiy ravishda amalga oshirilishini ta’minlasin:
moliyaviy hisobotning xalqaro standartlari hujjatlari matnidan davlat tili va boshqa tillarda foydalanishga ruxsat olish maqsadida moliyaviy hisobotning xalqaro standartlari fondi bilan shartnoma shartlarini ko‘rib chiqish;
moliyaviy hisobotning xalqaro standartlari hujjatlarining davlat tilidagi matnini mazkur hujjatlardan foydalanuvchilar, ilmiy jamoatchilik vakillari bilan muhokama qilish;
mutaxassislar muhokamalari natijasida kelib tushgan takliflarni ko‘rib chiqish va zarurat bo‘lganda, davlat tiliga tarjima qilingan moliyaviy hisobotning xalqaro standartlari hujjatlari matnini qayta ko‘rib chiqish;
xalqaro va mahalliy ekspertlarni jalb qilgan holda, moliyaviy hisobotning xalqaro standartlari hujjatlarini qo‘llash amaliyoti bo‘yicha tizimli ravishda seminar-treninglar o‘tkazish.
3. O‘zbekiston Respublikasi Moliya vazirligi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
4. Mazkur qarorning bajarilishini nazorat qilish O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri J.A. Qo‘chqorov va O‘zbekiston Respublikasi moliya vaziri T.A. Ishmetov zimmasiga yuklansin.
O‘zbekiston Respublikasining Bosh vaziri A. ARIPOV
Toshkent sh.,
2020-yil 24-avgust,
507-son
Vazirlar Mahkamasining 2020-yil 24-avgustdagi 507-son qaroriga
ILOVA
Moliyaviy hisobotning xalqaro standartlari va unga tushuntirishlar matnini tan olish tartibi to‘g‘risida
NIZOM
1-bob. Umumiy qoidalar
1. Mazkur Nizom O‘zbekiston Respublikasi hududida qo‘llash uchun Moliyaviy hisobotning xalqaro standartlari fondi (keyingi o‘rinlarda — MHXS fondi) tomonidan qabul qilingan moliyaviy hisobotning xalqaro standartlari va unga tushuntirishlar matnini tan olish tartibini belgilaydi.
2. O‘zbekiston Respublikasi hududida qo‘llash uchun moliyaviy hisobotning xalqaro standartlari va unga tushuntirishlar (keyingi o‘rinlarda — MHXS hujjatlari) matniga MHXS fondi tomonidan qabul qilingan quyidagi hujjatlar kiradi:
moliyaviy hisobotning xalqaro standartlari;
moliyaviy hisobotning xalqaro standartlariga tushuntirishlar;
MHXS hujjatlari matniga kiritiladigan o‘zgartirishlar;
MHXS hujjatlari matnining ajralmas qismi sifatida MHXS fondi tomonidan belgilangan boshqa hujjatlar.
3. O‘zbekiston Respublikasi hududida qo‘llash uchun MHXS hujjatlarini tan olish quyidagi tartibda amalga oshiriladi:
Oldingi tahrirga qarang.
O‘zbekiston Respublikasi Moliya vazirligi (keyingi o‘rinlarda — Moliya vazirligi) tomonidan MHXS fondi bilan MHXS hujjatlaridan foydalanish huquqini olish uchun shartnoma tuzish;
(3-bandning ikkinchi xatboshisi O‘zbekiston Respublikasi Vazirlar Mahkamasining 2022-yil 11-apreldagi 171-sonli qarori tahririda — Qonunchilik ma’lumotlari milliy bazasi, 12.04.2022-y., 09/22/171/0293-son)
Oldingi tahrirga qarang.
MHXS hujjatlarini MHXS fondidan rasmiy ravishda qabul qilish;
(3-band O‘zbekiston Respublikasi Vazirlar Mahkamasining 2022-yil 11-apreldagi 171-sonli qaroriga asosan uchinchi xatboshi bilan to‘ldirilgan — Qonunchilik ma’lumotlari milliy bazasi, 12.04.2022-y., 09/22/171/0293-son)
O‘zbekiston Respublikasi hududida qo‘llash uchun MHXS hujjatlarini ekspertizadan o‘tkazish;
Moliya vazirligining O‘zbekiston Respublikasi hududida qo‘llash uchun MHXS hujjatlarini tan olish to‘g‘risidagi buyrug‘ini qabul qilish;
Moliya vazirligining MHXS hujjatlarini O‘zbekiston Respublikasida tan olish to‘g‘risidagi buyrug‘ini belgilangan tartibda Adliya vazirligida davlat ro‘yxatidan o‘tkazish;
Oldingi tahrirga qarang.
Moliya vazirligining MHXS hujjatlarini O‘zbekiston Respublikasi hududida qo‘llash uchun tan olish to‘g‘risidagi buyrug‘ini hamda MHXS hujjatlari matnini “O‘zbekiston Respublikasi qonun hujjatlari to‘plami” va O‘zbekiston Respublikasi qonunchilik hujjatlari ma’lumotlari milliy bazasida e’lon qilish;
(3-bandning oltinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)
Moliya vazirligining veb-saytida MHXS hujjatlarining davlat va boshqa tillardagi matnini e’lon qilish;
davlat tilidagi MHXS hujjatlari matnining doimiy ravishda yangilanib borilishini ta’minlash.
4. O‘zbekiston Respublikasi hududida qo‘llash uchun MHXS hujjatlarining davlat tilidagi matni tan olinishi lozim.
Moliya vazirligi MHXS hujjatlarining davlat tilidagi tarjimasini MHXS fondidan olinishini ta’minlaydi.
5. O‘zbekiston Respublikasi hududida qo‘llash uchun MHXS hujjatlarini tan olish mazkur Nizomga ilovaga muvofiq sxema bo‘yicha amalga oshiriladi
2-bob. O‘zbekiston Respublikasi hududida qo‘llash uchun MHXS hujjatlarini ekspertizadan o‘tkazish
6. MHXS hujjatlarini ekspertizadan o‘tkazish uchun Moliya vazirligi tomonidan ekspertiza komissiyasi tuziladi.
Ekspertiza komissiyasining tarkibi va ish reglamenti Moliya vazirligining buyrug‘i bilan tasdiqlanadi.
Ekspertiza komissiyasining tarkibi buxgalterlar va auditorlarning respublika jamoat birlashmalari, MHXS hujjatlaridan foydalanuvchilar, xalqaro ekspertlar, ilmiy jamoatchilik vakillaridan iborat bo‘lib, kamida yetti nafarni tashkil etadi.
7. O‘zbekiston Respublikasi hududida qo‘llash mumkinligini tasdiqlash maqsadida ekspertiza komissiyasi har bir MHXS hujjatlarini har tomonlama ko‘rib chiqishni ta’minlashi lozim.
8. MHXS hujjatlarini ekspertizadan o‘tkazish uchun Moliya vazirligi tomonidan ekspertiza komissiyasiga barcha zarur hujjatlar taqdim etiladi.
9. Ekspertiza natijalari ekspertiza komissiyasining xulosasi shaklida rasmiylashtiriladi va unda quyidagi yakuniy fikrlardan biri aks ettiriladi:
O‘zbekiston Respublikasi hududida MHXS hujjatlarini to‘liq qo‘llash mumkinligini tasdiqlash;
O‘zbekiston Respublikasi hududida MHXS hujjatlarining ayrim qoidalarini chiqarib tashlagan holda qo‘llash mumkinligini tasdiqlash va bunda ushbu hujjatlarning O‘zbekiston Respublikasi hududida qo‘llanishi mumkin bo‘lmagan qoidalarini ko‘rsatish;
O‘zbekiston Respublikasi hududida MHXS hujjatlarini to‘liq qo‘llash mumkin emasligini tasdiqlash.
10. Ushbu Nizomning 9-bandi uchinchi va to‘rtinchi xatboshilaridagi holatlarda, ekspertiza komissiyasining xulosasida MHXS hujjatlarini O‘zbekiston Respublikasi hududida qo‘llash mumkin emasligi tasdiqlanishi yoki alohida MHXS hujjatlarini O‘zbekiston Respublikasi hududida qo‘llashni tasdiqlashga olib kelishi mumkin bo‘lmagan shartlar va sharoitlar ko‘rsatilgan bo‘lishi lozim.
11. Ekspertiza komissiyasining faoliyati va ekspertiza natijalari Moliya vazirligining rasmiy veb-sayti orqali jamoatchilikka taqdim etib boriladi.
3-bob. O‘zbekiston Respublikasi hududida MHXS hujjatlarini joriy etish to‘g‘risida qaror qabul qilish
12. O‘zbekiston Respublikasi hududida MHXS hujjatlarini joriy etish to‘g‘risidagi qaror Moliya vazirligi tomonidan ekspertiza komissiyasining xulosasi asosida qabul qilinadi.
13. Moliya vazirligining MHXS hujjatlarini amalga kiritish bo‘yicha qarori quyidagilardan biri to‘g‘risida bo‘lishi mumkin:
O‘zbekiston Respublikasi hududida MHXS hujjatini to‘liq amalga kiritish to‘g‘risida;
ushbu Nizomning 9-bandi uchinchi xatboshida nazarda tutilgan MHXS hujjatlarining ayrim qoidalarini chiqarib tashlagan holda, O‘zbekiston Respublikasi hududida amalga kiritish to‘g‘risida;
ushbu Nizomning 9-bandi to‘rtinchi xatboshida nazarda tutilgan alohida MHXS hujjatlarini O‘zbekiston Respublikasi hududida qo‘llash mumkin emasligi to‘g‘risida.
14. Moliya vazirligining O‘zbekiston Respublikasi hududida MHXS hujjatlarini amalga kiritish yoki tugatish to‘g‘risidagi qarori ekspertiza komissiyasining xulosasi kelib tushgandan so‘ng e’tirozlar bo‘lmaganda qabul qilinadi.
Ekspertiza xulosasi bo‘yicha e’tirozlar bo‘lsa, Moliya vazirligi uni ekspertiza komissiyasiga qayta ko‘rib chiqish uchun yuboradi. Qayta ko‘rib chiqish natijalari ekspertiza komissiyasining xulosasi shaklida rasmiylashtiriladi va shunga asosan Moliya vazirligining buyrug‘i qabul qilinadi.
MHXS fondidan MHXS hujjatlarini to‘liq yoki uning alohida qoidalarining amal qilishini tugatish to‘g‘risidagi tegishli hujjat kelib tushganda, MHXS hujjatlarini ekspertizadan o‘tkazmagan holda ularning O‘zbekiston Respublikasi hududida amal qilishini tugatish to‘g‘risida qaror qabul qilinadi.
15. MHXS hujjatlarini O‘zbekiston Respublikasi hududida qo‘llash uchun tan olish O‘zbekiston Respublikasi moliya vazirining buyrug‘i bilan rasmiylashtiriladi.
Oldingi tahrirga qarang.
Mazkur buyruq belgilangan tartibda Adliya vazirligida davlat ro‘yxatdan o‘tkaziladi, bunda davlat tiliga tarjima qilingan MHXS hujjatining matni Adliya vazirligi tomonidan huquqiy ekspertizadan o‘tkazish predmeti hisoblanmaydi.
(15-bandning ikkinchi xatboshisi O‘zbekiston Respublikasi Vazirlar Mahkamasining 2022-yil 11-apreldagi 171-sonli qarori tahririda — Qonunchilik ma’lumotlari milliy bazasi, 12.04.2022-y., 09/22/171/0293-son)
Oldingi tahrirga qarang.
16. Moliya vazirligining MHXS hujjatlarini O‘zbekiston Respublikasi hududida qo‘llash uchun tan olish to‘g‘risidagi buyrug‘i hamda O‘zbekiston Respublikasi hududida qo‘llash uchun tan olingan MHXS hujjatlari matni ushbu Nizomning 3-bandi yettinchi xatboshida belgilangan tartibda rasmiy e’lon qilingandan so‘ng kuchga kiradi.
(16-bandning birinchi xatboshisi O‘zbekiston Respublikasi Vazirlar Mahkamasining 2022-yil 11-apreldagi 171-sonli qarori tahririda — Qonunchilik ma’lumotlari milliy bazasi, 12.04.2022-y., 09/22/171/0293-son)
Bunda MHXS hujjatlarining o‘zida boshqacha muddat belgilangan bo‘lsa, O‘zbekiston Respublikasi hududida qo‘llash uchun tan olingan MHXS hujjatlari matni hujjatning o‘zida belgilangan vaqtdan boshlab kuchga kiradi.
Oldingi tahrirga qarang.
Agar MHXS hujjatining kuchga kirish sanasi ushbu Nizomning 3-bandi yettinchi xatboshida belgilangan tartibda rasmiy e’lon qilingan sanadan keyin bo‘lsa va MHXS fondi tomonidan ushbu MHXS hujjatini uning kuchga kirish sanasigacha ixtiyoriy qo‘llash ruxsat etilgan bo‘lsa, tashkilotlar ushbu MHXS hujjatini rasmiy e’lon qilingan sanadan kuchga kirgunga qadar ixtiyoriy qo‘llashi mumkin.
(16-band O‘zbekiston Respublikasi Vazirlar Mahkamasining 2022-yil 11-apreldagi 171-sonli qaroriga asosan uchinchi xatboshi bilan to‘ldirilgan — Qonunchilik ma’lumotlari milliy bazasi, 12.04.2022-y., 09/22/171/0293-son)
17. O‘zbekiston Respublikasi hududida qo‘llash uchun tan olingan MHXS hujjatlarining O‘zbekiston Respublikasi hududida amal qilishini tugatish O‘zbekiston Respublikasi moliya vazirining buyrug‘i bilan rasmiylashtiriladi. Mazkur buyruq belgilangan tartibda Adliya vazirligida davlat ro‘yxatdan o‘tkaziladi.
 LexUZ sharhi
Qarang: O‘zbekiston Respublikasi adliya vazirining 2025-yil 9-oktabrdagi 23-mh-sonli “Idoraviy normativ-huquqiy hujjatlarni tayyorlash, qabul qilish, huquqiy ekspertiza va davlat ro‘yxatidan o‘tkazish qoidalarini tasdiqlash to‘g‘risida”gi buyrug‘i (ro‘yxat raqami 3686, 09.10.2025-y.)
Oldingi tahrirga qarang.
O‘zbekiston Respublikasi hududida qo‘llash uchun tan olingan MHXS hujjatlarining O‘zbekiston Respublikasi hududida amal qilishini tugatish ushbu Nizomning 3-band yettinchi xatboshida belgilangan tartibda rasmiy e’lon qilingandan so‘ng kuchga kiradi.
(17-bandning ikkinchi xatboshisi O‘zbekiston Respublikasi Vazirlar Mahkamasining 2022-yil 11-apreldagi 171-sonli qarori tahririda — Qonunchilik ma’lumotlari milliy bazasi, 12.04.2022-y., 09/22/171/0293-son)
4-bob. Yakunlovchi qoidalar
18. Agar MHXS hujjatlarining davlat tilidagi matni bilan ushbu hujjatlarning ingliz tilidagi matni o‘rtasida farq aniqlansa, manfaatdor shaxslar davlat tilidagi matnga aniqlik kiritish uchun Moliya vazirligiga murojaat qilishi mumkin. Moliya vazirligi MHXS hujjatlarini ularning davlat tilidagi matni bilan ushbu hujjatlarning ingliz tilidagi matni o‘rtasidagi muvofiqligi yuzasidan ekspertiza o‘tkazish uchun ekspertiza komissiyasiga taqdim etadi.
Oldingi tahrirga qarang.
Ekspertiza komissiyasi ushbu farq tasdiqlangandan so‘ng belgilangan tartibda MHXS hujjatlarining davlat tilidagi matniga tegishli tushuntirish berish uchun Moliya vazirligiga xulosa yuboradi.
(18-bandning ikkinchi xatboshisi O‘zbekiston Respublikasi Vazirlar Mahkamasining 2022-yil 11-apreldagi 171-sonli qarori tahririda — Qonunchilik ma’lumotlari milliy bazasi, 12.04.2022-y., 09/22/171/0293-son)
19. MHXS hujjatlari rasmiy e’lon qilingandan so‘ng Moliya vazirligi veb-saytida joylashtiriladi.
Moliyaviy hisobotning xalqaro standartlari va unga tushuntirishlar matnini tan olish tartibi to‘g‘risidagi nizomga
ILOVA
Moliyaviy hisobotning xalqaro standartlari va unga tushuntirishlar matnini tan olish tartibining
SXEMASI
Oldingi tahrirga qarang.

Bosqichlar

Subyektlar

Tadbirlar

Ijro muddati


1-bosqich

Moliya vazirligi

MHXS hujjatlarini MHXS fondidan rasmiy ravishda qabul qilish.

Belgilangan muddatlarda


2-bosqich

Moliya vazirligi

MHXS fondidan olingan MHXS hujjatlarining davlat tilidagi matnini ekspertiza komissiyasiga taqdim etish.

Hujjatlar olingandan so‘ng

10 kun muddatda


3-bosqich

Ekspertiza komissiyasi

(tarkibi Moliya vazirligining buyrug‘i bilan tasdiqlanadi)

O‘zbekiston Respublikasi hududida qo‘llash mumkinligini tasdiqlash maqsadida MHXS hujjatlarini har tomonlama ko‘rib chiqish va natijasi bo‘yicha ekspertiza xulosasini taqdim etish.

Hujjatlar taqdim etilgandan so‘ng bir kalendar

oy muddatda


4-bosqich

Moliya vazirligi

Ekspertiza komissiyasining xulosasi asosida MHXS hujjatlarini O‘zbekiston Respublikasi hududida amalga kiritish yoki tugatish to‘g‘risida Moliya vazirligining buyrug‘ini qabul qilish va Adliya vazirligida davlat ro‘yxatidan o‘tkazish uchun taqdim etish.

Ekspertiza komissiyasi xulosasi taqdim etilgandan so‘ng bir hafta muddatda


5-bosqich

Adliya vazirligi

1. Moliya vazirligining MHXS hujjatlarini O‘zbekiston Respublikasi hududida amalga kiritish yoki tugatish to‘g‘risidabuyrug‘ini belgilangan tartibda davlat ro‘yxatidan o‘tkazish.

2. Moliya vazirligining MHXS hujjatlarini O‘zbekiston Respublikasi hududida qo‘llash uchun tan olish to‘g‘risidagi buyrug‘ini hamda MHXS hujjatlari matnini “O‘zbekiston Respublikasi qonunchilik hujjatlari to‘plami” va O‘zbekiston Respublikasi qonunsilik hujjatlari ma’lumotlari milliy bazasida e’lon qilish.

Moliya vazirligining buyrug‘i taqdim etilgandan so‘ng o‘ttiz kun muddatda


6-bosqich

Moliya vazirligi

MHXS hujjatlari rasmiye’lon qilingandan so‘ng veb-saytda joylashtirish.

Davlat ro‘yxatidan o‘tgandan so‘ng

uch kun muddatda

(ilova O‘zbekiston Respublikasi Vazirlar Mahkamasining 2022-yil 11-apreldagi 171-sonli qarori tahririda — Qonunchilik ma’lumotlari milliy bazasi, 12.04.2022-y., 09/22/171/0293-son)
(Qonun hujjatlari ma’lumotlari milliy bazasi, 25.08.2020-y., 09/20/507/1211-son; Qonunchilik ma’lumotlari milliy bazasi, 05.04.2022-y., 09/22/153/0266-son; 12.04.2022-y., 09/22/171/0293-son)