Tojikiston Respublikasida ijtimoiy-siyosiy vaziyatning murakkabligi munosabati bilan, chegara rayonlarida jamoat tartibini ta’minlash, jinoyatchilikka qarshi kurashni kuchaytirish, respublikaga jinoiy-bandit unsurlarning suqilib kirishiga, qurol-yarog‘, o‘q-dorilar, narkotik moddalar olib kelinishiga yo‘l qo‘ymaslik hamda O‘zbekistondan moddiy vositalarning kontrabanda yo‘li bilan tashib ketilishining oldini olish maqsadida Vazirlar Mahkamasi qaror qiladi:

1. “O‘zbekiston Respublikasining davlat chegarasi to‘g‘risida” Qonun qabul qilingunga qadar chegarani buzuvchilar, jinoiy guruhlar va transportning ehtimol tutilgan harakati yo‘llarida Tojikiston Respublikasi bilan chegarani qo‘riqlash O‘zbekiston Respublikasi Ichki ishlar vazirligi zimmasiga yuklatilsin. Chegarani qo‘riqlash Milliy xavfsizlik kuchlari bilan birgalikda hamda Mudofaa vazirligi bilan o‘zaro hamkorlikda amalga oshirilsin.

2. Surxondaryo, Qashqadaryo, Samarqand, Farg‘ona va Toshkent viloyatlari hokimliklari IIV bo‘linmalarini joylashtirish va ularga yuklatilgan vazifalarning bajarilishi uchun zarur maishiy sharoitlar yaratsinlar.

3. Surxondaryo viloyatining Termiz shahrida alohida operativ batalon negizida operativ polk tashkil etilsin.

4. O‘zbekiston Respublikasi IIV ichki qo‘shinlarining Termiz shahridagi operativ polkining tuzilmasi va shtatlari soni tasdiqlansin (1, 2-ilovalar).

5. O‘zbekiston Respublikasi Moliya vazirligi, Istiqbolni belgilash va statistika davlat qo‘mitasi O‘zbekiston Respublikasi IIVning tuzilmasidagi o‘zgarishlar munosabati bilan uni mablag‘ bilan ta’minlasinlar, 1992-1993-yillarda Termiz shahrida ikkita 56 kvartirali uy qurilishiga zarur mablag‘lar, shuningdek, harbiy shaharchani qayta qurishga va 30 ta yengil avtomobil sotib olishga 37 mln so‘m ajratsinlar.