Yer osti boyliklaridagi foydali qazilmalar zaxiralarini tasdiqlashning yagona tartibini belgilash hamda yangi tahrirdagi “Yer osti boyliklari toʻgʻrisida”gi Oʻzbekiston Respublikasining Qonuniga va Oʻzbekiston Respublikasi Vazirlar Mahkamasining “Oʻzbekiston Respublikasi Davlat geologiya va mineral resurslar qoʻmitasi faoliyatini takomillashtirish chora-tadbirlari toʻgʻrisida” 2004-yil 25-martdagi 139-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Davlat geologiya va mineral resurslar qoʻmitasi huzurida Foydali qazilmalar zaxiralari boʻyicha davlat komissiyasi tashkil etilsin.

2. Quyidagilar Foydali qazilmalar zaxiralari boʻyicha davlat komissiyasining asosiy vazifalari etib belgilansin:

oqilona iqtisodiy va ekologik asosda konlar zaxiralarini eng toʻliq va kompleks qazib olish talablariga muvofiq boʻlgan, yer osti boyliklaridagi foydali qazilmalar zaxiralarini hisoblab chiqish uchun konditsiyalarni tasdiqlash;

respublika mineral-xomashyo bazasi rivojlanishini taʼminlovchi yer osti boyliklaridagi foydali qazilmalar barcha turlarining zaxiralarini tasdiqlash;

geologiya materiallarini davlat ekspertizasidan oʻtkazish;

foydali qazilmalar zaxiralarini klassifikatsiya qilish hamda hisoblab chiqish, ularni geologiya-iqtisodiy jihatdan baholash va sanoatdagi ahamiyatini aniqlash prinsiplarini belgilash sohasida yagona siyosatni oʻtkazish.

3. Quyidagilar:

Oʻzbekiston Respublikasi Davlat geologiya va mineral resurslar qoʻmitasi huzuridagi Foydali qazilmalar zaxiralari boʻyicha davlat komissiyasi toʻgʻrisidagi nizom 1-ilovaga muvofiq;

Oʻzbekiston Respublikasi Davlat geologiya va mineral resurslar qoʻmitasi huzuridagi Foydali qazilmalar zaxiralari boʻyicha davlat komissiyasi tarkibi 2-ilovaga muvofiq tasdiqlansin.

4. Oʻzbekiston Respublikasi Davlat geologiya va mineral resurslar qoʻmitasi 2005-yilning birinchi yarim yilligida manfaatdor vazirliklar, idoralar, tashkilotlar ishtirokida, xalqaro standartlarni hisobga olgan holda, foydali qazilmalar zaxiralarini klassifikatsiya qilish va baholashning yagona prinsiplarini belgilovchi normativ-metodik hujjatlarni ishlab chiqsin va belgilangan tartibda tasdiqlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Oʻ.T. Sultonov zimmasiga yuklansin.

1. Oʻzbekiston Respublikasi Davlat geologiya va mineral resurslar qoʻmitasi huzuridagi Foydali qazilmalar zaxiralari boʻyicha davlat komissiyasi (keyingi oʻrinlarda Foydali qazilmalar zaxiralari boʻyicha davlat komissiyasi deb ataladi) yer osti boyliklaridagi foydali qazilmalar zaxiralarini tasdiqlovchi va geologiya materiallarini ekspertizadan oʻtkazuvchi maxsus organ hisoblanadi.

2. Foydali qazilmalar zaxiralari boʻyicha davlat komissiyasi oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Davlat geologiya va mineral resurslar qoʻmitasining (keyingi oʻrinlarda Davlat geologiya qoʻmitasi deb ataladi) buyruqlariga, shuningdek ushbu Nizomga amal qiladi.

3. Foydali qazilmalar zaxiralari boʻyicha davlat komissiyasining oʻz vakolatlariga kiruvchi masalalar boʻyicha qarorlari yer osti boyliklarini geologiya jihatidan oʻrganish, kon-qazib olish korxonalarini loyihalashtirish va qurish, mineral xomashyoni qazib olish va qayta ishlashni amalga oshiruvchi barcha yuridik va jismoniy shaxslar uchun majburiy hisoblanadi.

4. Quyidagilar Foydali qazilmalar zaxiralari boʻyicha davlat komissiyasining asosiy vazifalari hisoblanadi:

oqilona iqtisodiy va ekologik asosda konlar zaxiralarini eng toʻliq va kompleks qazib olish talablariga muvofiq boʻlgan, yer osti boyliklaridagi foydali qazilmalar zaxiralarini hisoblab chiqish uchun konditsiyalarni tasdiqlash;

respublika mineral-xomashyo bazasi rivojlanishini taʼminlovchi yer osti boyliklaridagi foydali qazilmalar barcha turlarining zaxiralarini tasdiqlash;

geologiya materiallarini davlat ekspertizasidan oʻtkazish;

foydali qazilmalar zaxiralarini klassifikatsiya qilish hamda hisoblab chiqish, ularni geologiya-iqtisodiy jihatdan baholash va sanoatdagi ahamiyatini aniqlash prinsiplarini belgilash sohasida yagona siyosatni oʻtkazish.

5. Foydali qazilmalar zaxiralari boʻyicha davlat komissiyasi oʻziga yuklangan vazifalarga muvofiq quyidagi funksiyalarni bajaradi:

razvedka qilish konditsiyalari loyihalarining texnik-iqtisodiy asoslari ekspertizasini tashkil qiladi va har bir kon boʻyicha yer osti boyliklaridagi foydali qazilmalar zaxiralarini hisoblab chiqish uchun ushbu konditsiyalar parametrlari (koʻrsatkichlari)ni tasdiqlaydi;

texnologik va texnik-iqtisodiy asoslashlari bilan taqdim etilgan geologiya materiallarini tahlil qilish asosida neft, gaz kondensati qazib olishning cheklangan koeffitsiyentlarini belgilaydi.;

foydali qazilmalar zaxiralarini hisoblab chiqqan holda geologiya materiallari ekspertizasini tashkil qiladi va yer osti boyliklaridagi foydali qazilmalarning hisoblab chiqilgan zaxiralarini tasdiqlaydi, mazkur zaxiralarning oʻrganilganlik va ishonchlilik darajasining foydali qazilmalar konlari zaxiralarining amaldagi klassifikatsiyalariga muvofiqligini, ularning sanoatdagi ahamiyatini hamda konlarning (yoki ular qismlarining) sanoat yoʻli bilan oʻzlashtirishga tayyorligini belgilaydi. Foydali qazilmalar zaxiralari konni geologik oʻrganishning barcha bosqichlarida foydali qazilmalar konining sanoat jihatidan qimmatini belgilovchi razvedka qilish konditsiyalari asosida tasdiqlanishi mumkin;

foydali qazilmalar konlari geologiya-qidiruv ishlarini qoʻshimcha ravishda oʻtkazishda, texnik-iqtisodiy hisob-kitoblar bilan asoslanadigan yangi razvedka qilish konditsiyalari aniqlanganda yoki boshqa sabablarga koʻra sezilarli oʻzgargan taqdirda ularni qayta tasdiqlaydi;

foydalanish konditsiyalarini va ular asosida hisoblab chiqilgan foydali qazilmalar zaxiralarini Vazirlar Mahkamasi tomonidan belgilanadigan tartibda tasdiqlaydi;

sanoat uchun ahamiyatini yoʻqotgan yoxud keyingi geologiya-qidiruv ishlari yoki konni qazib olish jarayonida tasdiqlanmagan foydali qazilmalar zaxiralarini yer osti boyliklaridan foydalanuvchining hisobidan belgilangan tartibda chiqarishni amalga oshiradi;

foydali qazilmalarni qazib olish bilan bogʻliq boʻlmagan qurilish va (yoki) yer osti inshootlaridan foydalanish uchun va chiqindilarni saqlash, koʻmish uchun foydalanishga beriladigan yer osti boyliklari uchastkalari boʻyicha geologiya materiallarini davlat ekspertizasidan oʻtkazishni tashkil qiladi, uchastkalarning sifat koʻrsatkichlarini baholash uchun konditsiyalarni belgilaydi va ulardan belgilangan maqsadga muvofiq foydalanish imkoniyati toʻgʻrisida xulosa beradi;

litsenziya bergan organning taqdimnomasiga koʻra geologiya materiallarini davlat ekspertizasidan oʻtkazadi va litsenziya berish vaqtida foydali qazilmalarning yangi turlari yoki qoʻshimcha komponentlar mavjudligi toʻgʻrisida, shuningdek foydali qazilmalarning yangi xossalari yoki sifatlari toʻgʻrisida maʼlum boʻlmagan maʼlumotlar aniqlangan taqdirda foydali qazilmalar zaxiralarini qayta tasdiqlaydi;

konditsiyalarning texnik-iqtisodiy asoslash materiallarini koʻrib chiqish, foydali qazilmalar zaxiralarini hisoblab chiqish natijalarini umumlashtiradi va tahlil qiladi hamda kamchiliklarni bartaraf etish, geologik va boshqa axborotlarning toʻliqligi va sifatini, zaxiralarni hisoblab chiqishning va konlarni geologik-iqtisodiy baholashning ishonchliligini oshirish boʻyicha tavsiyanomalar ishlab chiqadi; foydali qazilmalar zaxiralarini hisoblab chiqqan holda hisobotlarni koʻrib chiqish yakunlari boʻyicha obzorlar tuzadi;

Oʻzbekiston Respublikasi foydali qazilmalar zaxiralari davlat balansini tahlil qiladi hamda geologiya-qidiruv ishlari va konlardan foydalanish boʻyicha yangi maʼlumotlarni hisobga olgan holda unga tuzatishlar kiritish, shuningdek jadal hisoblab chiqishlar boʻyicha balansga qabul qilingan zaxiralarni Foydali qazilmalar zaxiralari boʻyicha davlat komissiyasiga taqdim etish yuzasidan tavsiyanomalar beradi;

konlar zaxiralari klassifikatsiyasini va foydali qazilmalarning prognoz resurslarini, zaxiralar klassifikatsiyalarini turli foydali qazilmalar konlariga tatbiq etish boʻyicha yoʻriqnomalarni, yer osti boyliklaridagi foydali qazilmalar zaxiralari konditsiyasini va hisoblab chiqilishini asoslovchi materiallarning mazmuni, ularni rasmiylashtirish va Foydali qazilmalar zaxiralari boʻyicha davlat komissiyasiga taqdim etish tartibi toʻgʻrisidagi yoʻriqnomalarni ishlab chiqish boʻyicha metodik rahbarlikni amalga oshiradi;

geologiya-qidiruv ishlarining alohida bosqichlarini oʻtkazish boʻyicha kelishishga taqdim etiladigan metodik koʻrsatmalar yuzasidan, foydali qazilmalarga konditsiyalarni, neft va gaz kondensatini qazib olish koeffitsiyentlarini, konlarni geologik-iqtisodiy baholashni asoslash va hisoblab chiqish yuzasidan, boshqa metodik hujjatlar, shuningdek turli tashkilotlar tomonidan kiritiladigan geologiya-qidiruv ishlari metodikasini yanada takomillashtirishga va foydali qazilmalar zaxiralarini hisoblab chiqishga taalluqli takliflar yuzasidan xulosalar beradi.

6. Foydali qazilmalar zaxiralari boʻyicha davlat komissiyasi quyidagi huquqlarga ega:

geologiya-qidiruv ishlarini olib boruvchi korxonalar va tashkilotlardan Foydali qazilmalar zaxiralari boʻyicha davlat komissiyasiga taqdim etilgan konditsiyalarning texnik-iqtisodiy asoslashlarini, neft va gaz kondensatini, foydali qazilmalar zaxiralarini qazib olish koeffitsiyentlarini, Foydali qazilmalar zaxiralari boʻyicha davlat komissiyasining koʻrib chiqishi uchun konditsiyalar, zaxiralar toʻgʻrisidagi maʼlumotlar bilan birga hisobotlar loyihalarini taqdim etish yillik rejalarini tekshirish uchun zarur boʻlgan geologiya axborotlari va boshqa maʼlumotlarni soʻrash va belgilangan tartibda olish;

yigʻilishlar, seminarlar oʻtkazish, Foydali qazilmalar zaxiralari boʻyicha davlat komissiyasi vakolatiga kiradigan masalalar boʻyicha xorijiy mamlakatlarning shunga oʻxshash organlari bilan ilmiy-texnik aloqalar oʻrnatish.

7. Foydali qazilmalar zaxiralari boʻyicha davlat komissiyasi qabul qilingan konditsiyalarning, neft va gaz kondensati qazib olish koeffitsiyentlarining, tasdiqlanayotgan zaxiralar miqdori va sifatining, sanoat maqsadida oʻzlashtirish uchun konlarning (yoki ular qismlarining) tayyorligi baholarining asoslanganligi uchun qonun hujjatlariga muvofiq javob beradi.

8. Foydali qazilmalar zaxiralari boʻyicha davlat komissiyasini komissiyaning raisi hisoblanadigan Davlat geologiya qoʻmitasi raisi boshqaradi.

9. Foydali qazilmalar zaxiralari boʻyicha davlat komissiyasining raisi:

Foydali qazilmalar zaxiralari boʻyicha davlat komissiyasi faoliyatiga umumiy rahbarlikni amalga oshiradi va unga yuklangan vazifalarning bajarilishi uchun shaxsan javob beradi;

ishchi guruh vazifalarini belgilaydi;

Foydali qazilmalar zaxiralari boʻyicha davlat komissiyasi ish rejalarini, Foydali qazilmalar zaxiralari boʻyicha davlat komissiyasiga tushgan materiallarni koʻrib chiqish jadvallarini tasdiqlaydi;

Foydali qazilmalar zaxiralari boʻyicha davlat komissiyasining yalpi majlislarini oʻtkazadi.

10. Foydali qazilmalar zaxiralari boʻyicha davlat komissiyasi aʼzolari tarkibiga, kelishilgan holda vazirliklar, davlat qoʻmitalari, idoralar, ilmiy-tadqiqot institutlarining, yetakchi kon qazish korxonalarining foydali qazilmalar konlarini qazib olish, zaxiralarini hisoblab chiqish va ularni geologik-iqtisodiy baholash boʻyicha ish tajribasiga ega boʻlgan yuqori malakali mutaxassislari kiritiladi.

Foydali qazilmalar zaxiralari boʻyicha davlat komissiyasi aʼzolarining kamida 50 foizi Davlat geologiya qoʻmitasi tizimida ishlamaydigan mutaxassislardan iborat boʻlishi kerak.

Foydali qazilmalar zaxiralari boʻyicha davlat komissiyasi aʼzolarining shaxsiy tarkibi Davlat geologiya qoʻmitasi taqdimnomasi boʻyicha Oʻzbekiston Respublikasi Vazirlar Mahkamasi tomonidan tasdiqlanadi.

Foydali qazilmalar zaxiralari boʻyicha davlat komissiyasi aʼzolariga ularning komissiya ishida qatnashgan vaqti uchun Davlat geologiya qoʻmitasi raisi tomonidan tasdiqlanadigan nizomga muvofiq mehnat haqi toʻlanadi.

11. Ishchi guruh Foydali qazilmalar zaxiralari boʻyicha davlat komissiyasining ishchi organi hisoblanadi, ishchi guruh foydali qazilmalar zaxiralari konditsiyalarini asoslash va hisoblab chiqish boʻyicha materiallarni ekspertizadan oʻtkazishni, komissiya majlislariga materiallarni tayyorlashni, ularni rasmiylashtirishni, shuningdek Foydali qazilmalar zaxiralari boʻyicha davlat komissiyasi faoliyati bilan bogʻliq boʻlgan boshqa masalalarni hal etishni taʼminlaydi.

Ishchi guruh shtat jadvali Davlat geologiya qoʻmitasi raisi tomonidan tasdiqlanadi.

12. Foydali qazilmalarga konditsiyalar loyihalarini, foydali qazilmalar zaxiralarini hisoblab chiqish materiallarini va koʻrib chiqish uchun tushadigan boshqa geologiya materiallarini ekspertizadan oʻtkazish Foydali qazilmalar zaxiralari boʻyicha davlat komissiyasi ekspertlari tomonidan amalga oshiriladi.

Ekspertizalarni oʻtkazish uchun turli tashkilotlarning ekspertizaning mazkur turi boʻyicha ish tajribasiga ega boʻlgan malakali mutaxassislari mazkur tashkilotlarning rahbarlari bilan kelishgan holda jalb etiladi.

Foydali qazilmalar zaxiralari boʻyicha davlat komissiyasi eksperti toʻgʻrisidagi nizom, ekspertlarning shaxsiy tarkibi va ularning mehnatiga haq toʻlash tartibi Davlat geologiya qoʻmitasi raisi tomonidan tasdiqlanadi.

Foydali qazilmalar zaxiralari boʻyicha davlat komissiyasi bilan materiallarni taqdim etgan tashkilotlar oʻrtasida kelishmovchiliklar paydo boʻlgan taqdirda tashkilotlar mustaqil ekspertiza oʻtkazish huquqiga ega boʻladilar.

13. Buyurtmachi tomonidan taqdim etilgan materiallarni va ekspertlarning shaxsiy xulosalarini dastlabki koʻrib chiqish uchun foydali qazilmalarning turlari boʻyicha tarmoq kichik ekspert komissiyalari tashkil qilinadi.

Tarmoq kichik ekspert komissiyalari turli ixtisosdagi jalb etilgan ekspertlardan, manfaatdor tashkilotlar vakillaridan va Foydali qazilmalar zaxiralari boʻyicha davlat komissiyasining ishchi guruhi aʼzolaridan tuziladi.

Kichik ekspert komissiyalari toʻgʻrisidagi nizom va ularning tarkibi Davlat geologiya qoʻmitasi raisi tomonidan tasdiqlanadi.

14. Tarmoq kichik ekspert komissiyalari oʻzining ishchi majlislarida buyurtmachi ishtirokida ekspertlarning shaxsiy xulosalarini koʻrib chiqadi, taqdim etilgan materiallar boʻyicha kelishilgan xulosalarni ishlab chiqadi va Foydali qazilmalar zaxiralari boʻyicha davlat komissiyasi qarori loyihasini tayyorlaydi.

15. Foydali qazilmalar zaxiralari boʻyicha davlat komissiyasining foydali qazilmalar zaxiralarini hisoblab chiqish uchun konditsiyalarni, neft va gaz kondensatini qazib olish koeffitsiyentlarini hamda yer osti boyliklaridagi foydali qazilmalarning hisoblab chiqilgan zaxiralarini, shuningdek geologiya materiallarining oʻtkazilgan davlat ekspertizasini tasdiqlash toʻgʻrisidagi yakuniy qarori komissiyaning yalpi majlisida, taqdim etilgan materiallar mualliflari, ekspertlar, manfaatdor vazirliklar, davlat qoʻmitalari, idoralar, korxonalar va boshqa tashkilotlar vakillari ishtirokida qabul qilinadi.

Foydali qazilmalar zaxiralari boʻyicha davlat komissiyasi majlislari komissiya aʼzolari roʻyxatdagi tarkibining kamida uchdan ikki qismi qatnashgan taqdirda oʻtkaziladi.

16. Foydali qazilmalar zaxiralari boʻyicha davlat komissiyasi qarorlari uning majlisda qatnashayotgan aʼzolarining koʻpchilik ovozi bilan qabul qilinadi. Komissiyaning ayrim aʼzolari qabul qilingan qarorga rozi boʻlishmagan taqdirda ular oʻzining alohida fikrini Foydali qazilmalar zaxiralari boʻyicha davlat komissiyasi raisi nomiga yozma ravishda yuborishlari mumkin. Uzil-kesil qaror qabul qilish uchun materiallar mustaqil ekspertiza oʻtkazishga yuboriladi, shundan keyin Foydali qazilmalar zaxiralari boʻyicha davlat komissiyasining kengaytirilgan majlisiga koʻrib chiqish uchun kiritiladi.

17. Zarur hollarda foydali qazilmalar zaxiralari konditsiyalarini tasdiqlash va hisoblab chiqish masalalari koʻchma majlislarda, bevosita ish obyektlarida koʻrib chiqilishi mumkin.

18. Foydali qazilmalar zaxiralari boʻyicha davlat komissiyasi majlislarida qabul qilingan qarorlar protokollar bilan rasmiylashtiriladi, ularning nusxalari ekspertiza materiallari bilan birga ikki hafta muddatda materiallarni taqdim etgan tashkilotga yuboriladi.

19. Foydali qazilmalarning hisoblab chiqilgan zaxiralari konditsiyalarining loyihalari yetarli asoslanmaganda, yer osti boyliklari uchastkalarining foydali qazilmalarni qazib olish bilan bogʻliq boʻlmagan maqsadlarda foydalanish uchun yaroqliligi toʻgʻrisidagi maʼlumotlar yetarli boʻlmaganda taqdim etilgan materiallar Foydali qazilmalar zaxiralari boʻyicha davlat komissiyasi protokoli va ekspertlar xulosalari bilan birga buyurtmachi tashkilotga qaytariladi.

Materiallar Foydali qazilmalar zaxiralari boʻyicha davlat komissiyasi protokolida bayon qilingan mulohazalar va tavsiyanomalarga muvofiq puxta ishlab chiqilgan taqdirda ular Foydali qazilmalar zaxiralari boʻyicha davlat komissiyasiga takroran koʻrib chiqish uchun taqdim etilishi mumkin.

20. Foydali qazilmalar zaxiralari boʻyicha davlat komissiyasining foydali qazilmalar zaxiralarini tasdiqlash toʻgʻrisidagi ijobiy qarori ularni Oʻzbekiston Respublikasi foydali qazilmalar davlat balansi tomonidan hisobga olish uchun asos hamda konni sanoat yoʻli bilan oʻzlashtirishga jalb etishning sharti hisoblanadi.

21. Foydali qazilmalar zaxiralari boʻyicha davlat komissiyasining qarorlari yuzasidan qonun hujjatlarida belgilangan tartibda shikoyat qilinishi mumkin.

22. Foydali qazilmalar zaxiralari boʻyicha davlat komissiyasiga taqdim etilgan materiallarni koʻrib chiqish muddati tashkilot bilan tuzilgan shartnomada belgilanadi, biroq u 3 oydan oshmasligi kerak.

23. Foydali qazilmalar zaxiralari boʻyicha konditsiyalarning texnik-iqtisodiy asoslashlari hamda foydali qazilmalar zaxiralarini hisoblab chiqish materiallarining mundarijasini, ularni rasmiylashtirish hamda ularni koʻrib chiqish uchun Foydali qazilmalar zaxiralari boʻyicha davlat komissiyasiga taqdim etish tartibi Foydali qazilmalar zaxiralari boʻyicha davlat komissiyasi ish tartibida belgilanadi.

24. Foydali qazilmalar zaxiralari boʻyicha davlat komissiyasi majlislarida komissiya faoliyatiga taalluqli normativ-metodik hujjatlar loyihalari va uning vakolatiga kiradigan boshqa muhim masalalar ham koʻrib chiqiladi.

25. Foydali qazilmalar zaxiralari boʻyicha davlat komissiyasiga taqdim etilgan foydali qazilmalar zaxiralari konditsiyalari loyihalarini va zaxiralarni hisoblab chiqish materiallarini koʻrib chiqish, geologiya materiallarini davlat ekspertizasidan oʻtkazish shartnoma asosida, tuzilgan shartnoma shartlariga muvofiq amalga oshiriladi.

Koʻrsatib oʻtilgan ishlar va xizmatlar turlari narxlari Oʻzbekiston Respublikasi Moliya vazirligi bilan kelishgan holda Davlat geologiya qoʻmitasi tomonidan tasdiqlanadi.

Foydali qazilmalar zaxiralari boʻyicha davlat komissiyasi ishchi guruhining taʼminoti Davlat geologiya qoʻmitasi tomonidan tasdiqlangan va Oʻzbekiston Respublikasi Moliya vazirligi bilan kelishilgan xarajatlar smetasiga muvofiq amalga oshiriladi.

26. Foydali qazilmalar zaxiralari boʻyicha davlat komissiyasi oʻz nomi yozilgan, belgilangan namunadagi blankalarga ega boʻladi va Davlat geologiya qoʻmitasi muhridan foydalanadi.