Hujjat kuchini yo‘qotgan " " 27.10.2025

Oʻzbekiston Respublikasi Vazirlar Mahkamasining

qarori

Energiya servis xizmatlari koʻrsatish tartibi toʻgʻrisidagi Nizomni tasdiqlash haqida

LexUZ sharhi

Mazkur qaror Oʻzbekistan Respublikasi Vazirlar Mahkamasining 2025-yil 24-oktabrdagi 673-sonli “Energiya servis xizmatlari bozorini shakllantirish hamda aholi uy-joylarining energiya samaradorligi oshirilishini ragʻbatlantirish chora-tadbirlari toʻgʻrisida”gi qaroriga asosan oʻz kuchini yoʻqotgan.

Oʻzbekiston Respublikasi Prezidentining “Zamonaviy energiya samarador va energiya tejaydigan texnologiyalarni yanada joriy etish chora-tadbirlari toʻgʻrisida” 2017-yil 23-avgustdagi PQ-3238-son qaroriga muvofiq Vazirlar Mahkamasi qaror qiladi:

1. Energiya servis xizmatlari koʻrsatish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Uy-joy kommunal xizmat koʻrsatish vazirligi energiya resurslarini tejashni oʻlchash va verifikatsiyalash, shu jumladan, ularning isteʼmol hajmini hisob-kitob va oʻlchash usuli bilan aniqlash metodikasini bir oy muddatda tasdiqlasin.

3. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov va Oʻzbekiston Respublikasi Uy-joy kommunal xizmat koʻrsatish vaziri M.X. Saliyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 18-iyul,

551-son

Vazirlar Mahkamasining 2018-yil 18-iyuldagi 551-son qaroriga
ILOVA

Energiya servis xizmatlari koʻrsatish tartibi toʻgʻrisida

Nizom

1-bob. Umumiy qoidalar

1. Ushbu Nizom davlat organlari va tashkilotlarida energiya servis shartnomalari asosida energiya servis xizmatlarini koʻrsatish tartibini belgilab beradi.

2. Ushbu Nizomda quyidagi asosiy tushunchalar qoʻllaniladi:

buyurtmachi — zamonaviy energiya samarador va energiya tejaydigan texnologiyalar joriy etiladigan davlat organlari yoki tashkilotlari;

energiya servis xizmatlarini yetkazib beruvchi (keyingi oʻrinlarda yetkazib beruvchi deb ataladi) — davlat organlari va tashkilotlarida energiya samarador va energiya tejaydigan texnologiyalarni joriy etish (keyingi oʻrinlarda texnologiyalarni joriy etish deb ataladi) boʻyicha tovarlar (ishlar, xizmatlar)ning yagona yetkazib beruvchisi hisoblangan “Energiya tejash milliy kompaniyasi” AJ;

davlat organlari va tashkilotlari — davlat va xoʻjalik boshqaruvi organlari, davlat korxonalari, muassasalari va tashkilotlari;

energiya servis shartnomasi — buyurtmachining topshirigʻiga binoan buyurtmachining elektr va issiqlik energiyasi, tabiiy gaz, suvdan (keyingi oʻrinlarda energiya resurslari deb ataladi) foydalanishining energiya tejamkorligini va energiya samaradorligini oshirishga qaratilgan energiya servis xizmatlari koʻrsatish majburiyatini yetkazib beruvchi oladigan, buyurtmachi esa energiya resurslarining erishilgan tejash miqdorlaridan kelib chiqqan holda koʻrsatilgan xizmatlar toʻlovi amalga oshirilishi majburiyatini olishni nazarda tutadigan kelishuv;

oferta — buyurtmachiga yuborilgan, yetarli darajada aniq boʻlgan va taklifni kiritgan yetkazib beruvchining oʻzini taklif yoʻllangan va uni qabul qiladigan buyurtmachi bilan energiya servis shartnomasi tuzgan deb hisoblash niyatini ifoda etadigan taklif (energiya servis shartnomasi loyihasi);

aksept — oferta yuborilgan buyurtmachining uni qabul qilganligi haqidagi javobi.

3. Yetkazib beruvchi buyurtmachining energiya resurslardan foydalanishining energiya tejamkorligini va energiya samaradorligini oshirishga qaratilgan harakatlarni (tadbirlar) bajarish yoʻli bilan energiya servis xizmatlari koʻrsatadi.

4. Energiya servis shartnomalarining namunaviy shakllari ularning predmetiga bogʻliq ravishda Oʻzbekiston Respublikasi Uy-joy kommunal xizmat koʻrsatish vazirligi tomonidan tasdiqlanadi.

2-bob. Energiya servis shartnomalarini tuzish tartibi

5. Energiya servis shartnomalarini tuzishda taraflar Oʻzbekiston Respublikasi fuqarolik kodeksi, Oʻzbekiston Respublikasining “Xoʻjalik yurituvchi subyektlar faoliyatining shartnomaviy-huquqiy bazasi toʻgʻrisida”gi Qonuni, mazkur Nizom va boshqa normativ-huquqiy hujjatlarga amal qiladilar.

Energiya servis shartnomasini tuzish mazkur Nizomga ilovadagi sxema boʻyicha amalga oshiriladi.

6. Buyurtmachi yetkazib beruvchining soʻrovnomasi boʻyicha, agar soʻrovnomada boshqa kechroq muddat koʻrsatilmagan boʻlsa, 10 kun mobaynida soʻrovnomada keltirilgan shaklda energiya servis shartnomasi tuzilishi moʻljallanayotgan obyektlar (keyingi oʻrinda obyektlar deb ataladi) toʻgʻrisida maʼlumotlarni taqdim qiladi hamda belgilangan tartibda ushbu obyektlarga yetkazib beruvchining vakillari kirishini taʼminlaydi.

7. Buyurtmachi yetkazib beruvchining soʻrovnomasiga asosan uni olgan kunidan boshlab 3 kun mobaynida obyektlarning amaldagi texnik holati va ish rejimlarini aniqlash uchun oʻz xodimlaridan iborat, uch kishidan kam boʻlmagan, shu jumladan rahbar yoki vakolatli shaxs hamda obyektning joriy saqlash va xizmat koʻrsatishiga masʼul shaxslardan iborat boʻlgan komissiya tuzadi. Komissiya qarori protokol shaklida rasmiylashtiriladi, uning nusxasi yetkazib beruvchiga soʻrovnomaning javobi bilan birga taqdim etiladi.

8. Yetkazib beruvchi obyektlar toʻgʻrisidagi maʼlumotlarni buyurtmachidan olgan kunidan boshlab 15 kun muddatda loyihaoldi va/yoki loyiha hujjatlarini va ofertani tayyorlab buyurtmachiga yuboradi.

9. Buyurtmachi oferta olingan kundan boshlab 30 kun mobaynida yetkazib beruvchiga aksept toʻgʻrisida yoki akseptdan bosh tortishi toʻgʻrisida yoxud ofertani boshqa shartlarda akseptlashi toʻgʻrisida (ofertaga kelishmovchiliklar protokoli) xabarnoma yoʻllaydi.

10. Aksept toʻgʻrisida yoki ofertani boshqa shartlarda akseptlash toʻgʻrisidagi xabarnomaga asosan ikki tomonning roziligi bilan buyurtmachi va yetkazib beruvchilar oʻrtasida energiya servis shartnomasi tuziladi.

3-bob. Energiya servis shartnomasi shartlari

11. Energiya servis shartnomasida uning predmeti bilan birga quyidagi shartlar nazarda tutiladi:

a) yetkazib beruvchining energiya resurslarini foydalanishda tejamkomkorlik va energiya samaradorlikni oshirish hisobiga buyurtmachining xarajatlarini qisqartirishga yoʻnaltirilgan loyihaoldi va/yoki loyiha hujjatlarining, shu jumladan yetkazib beruvchi tomonidan amalga oshiriladigan texnologiyalarni joriy etish boʻyicha har bir tadbirning aniq texnik tavsifi, uning bajarilish muddatlari koʻrsatilgan, qonun hujjatlari asosida tovar (ishlar, xizmatlar) xarid qilish doirasida yetkazib beruvchi tomonidan shakllantirilgan tadbirlar roʻyxatining (keyingi oʻrinda tadbirlar roʻyxati deb ataladi) mavjudligi. Tadbirlar roʻyxati yetkazib beruvchi tomonidan quyidagilar asosida shakllantiriladi:

buyurtmachi tomonidan taqdim etilgan obyektlar toʻgʻrisidagi maʼlumotlar;

obyektlarda oʻtkazilgan tekshiruvlar natijasida yetkazib beruvchi tomonidan olingan maʼlumotlar;

b) energiya servis shartnomasi tuzilishidan oldingi yilda buyurtmachining yillik energiya resurslari isteʼmolining natura ifodasidagi bazaviy hajmi va ularni yetkazib berish xarajatlarining puldagi ifodasi;

v) oferta yuborilgan kundagi energiya resursi birligi qiymati;

g) energiya servis shartnomasining bajarilishi natijasida uning amal qilish muddatida yetkazib beruvchi tomonidan energiya resurslarining natura ifodasidagi erishiladigan tejash miqdori;

d) agar energiya servis shartnomasi bajarilishi natijasida energiya resurslari yalpi xarajatlarining tejalishi bir energiya resursi isteʼmolidan boshqa energiya resursi isteʼmoliga toʻliq yoki qisman oʻtilishi hisobiga (energiya resurslarining natura ifodasini mazkur bandning “v” kichik bandida koʻrsatilgan energiya resursi birligi qiymatining koʻpaytmasi tariqasida aniqlanadi) taʼminlanishi lozim boʻlgan holda, yetkazib beruvchining energiya resurslarining pul ifodasidagi erishiladigan tejash miqdori;

e) energiya resurslarining natura ifodasidagi erishiladigan tejash miqdori (tejash miqdorining ulushi) shartnomada koʻrsatilgan energiya resurslarining tejash miqdoriga teng yoki undan ortiq boʻlgan taqdirda, yetkazib beruvchi tomonidan buyurtmachining energiya resurslarini yetkazib berish xarajatlarini tejash boʻyicha majburiyatlari bajarilgan deb hisoblanishini inobatga olgan qoidalarning mavjudligi. Agar yetkazib beruvchi tomonidan energiya resurslari yalpi xarajatlarining tejalishi bir energiya resursidan boshqa energiya resursiga toʻliq yoki qisman oʻtilishi hisobiga taʼminlanishi lozim boʻlgan taqdirda, erishilgan tejash miqdorining (tejash miqdori ulushining) puldagi ifodasi shartnomada koʻrsatilgan energiya resurslarining tejash miqdoriga teng yoki undan ortiq boʻlishi lozim;

j) shartnomaning bajarilishi natijasida energiya resurslarining natura ifodasidagi erishiladigan tejash miqdorini aniqlash. Bunda tejash miqdori tadbirlar roʻyxatining amalga oshirilishidan boshlab, shartnomada belgilangan tejash miqdorini erishish davriga teng boʻlgan kalendar davridagi buyurtmachining energiya resurslarining isteʼmol hajmi hamda energiya resurslarni isteʼmol hajmiga taʼsir etuvchi faktorlar oʻzgarishini inobatga olgan holda, tadbirlar roʻyxatining amalga oshirilishidan soʻng buyurtmachining energiya resurslarini isteʼmol hajmi oʻrtasidagi farqi sifatida aniqlanadi;

z) bir energiya resursi isteʼmolidan boshqa energiya resursi isteʼmoliga toʻliq yoki qisman oʻtilishi natijasida erishilgan energiya resurslarining tejash miqdorini qiymat ifodasida aniqlanishi. Bunda tejash miqdori tadbirlar roʻyxatining amalga oshirilishidan boshlab, energiya servis shartnomasida belgilangan tejash miqdorining erishish davriga teng boʻlgan kalendar davrdagi buyurtmachining energiya resurslarini isteʼmol hajmining qiymat ifodasi hamda energiya resurslarni isteʼmol hajmiga taʼsir etuvchi faktorlar oʻzgarishini inobatga olgan holda, tadbirlar roʻyxatining amalga oshirilishidan soʻng buyurtmachining energiya resurslari isteʼmol hajmining qiymat ifodasi oʻrtasidagi farqi sifatida aniqlanadi.

Energiya servis shartnomasining bajarilishi natijasida erishilgan tejash miqdorini aniqlashda ushbu shartnomada belgilangan tejash miqdorini erishish davriga teng boʻlgan kalendar davridagi tadbirlar roʻyxatining amalga oshirilishigacha boʻlgan va yetkazib beruvchining tadbirlar roʻyxatini amalga oshirgandan soʻnggi energiya resurslari isteʼmol hajmi qoʻllaniladi;

i) yetkazib beruvchining tadbirlar roʻyxati amalga oshirilishigacha boʻlgan energiya resurslari isteʼmol hajmini quyidagi usullardan birini qoʻllagan holda aniqlash:

foydalanilayotgan energiya resurslarini hisobga olish priborlari yordamida aniqlangan energiya resurslarining isteʼmol hajmi toʻgʻrisida maʼlumotlar mavjudligida, — tadbirlar roʻyxatini yetkazib beruvchi tomonidan amalga oshirish davrigacha buyurtmachi tomonidan energiya resurslarning hisobga olish priborlari yordamida aniqlangan haqiqiy isteʼmol hajmi maʼlumotlari boʻyicha shakllantirilgan energiya resurslarining rejalashtirilgan isteʼmol hajmi asosida;

foydalanilayotgan energiya resurslarini hisobga olish priborlari yordamida aniqlangan energiya resurslarining isteʼmol hajmi toʻgʻrisida maʼlumotlar yoʻqligida;

yetkazib beruvchi tomonidan foydalanilayotgan energiya resurslarini hisobga olish pribori oʻrnatilganda va tadbirlar roʻyxati amalga oshirilishigacha bir oydan kam boʻlmagan davr uchun ushbu pribor yordamida buyurtmachining energiya resurslari isteʼmol hajmi (hajm ulushi) toʻgʻrisidagi olingan maʼlumotlarni taraflar qayd qilingan holda, hisobga olish pribori yordamida olingan maʼlumotlar mazkur bandning “k” kichik bandi talablarini hisobga olgan holda isteʼmol hajmi sifatida qabul qilinadi;

Oʻzbekiston Respublikasi Uy-joy kommunal xizmat koʻrsatish vazirligi tomonidan tasdiqlangan energiya resurslarini tejashni oʻlchash va verifikatsiyalash, shu jumladan, ularning isteʼmol hajmini hisob-kitob va oʻlchash usuli bilan aniqlash metodikasiga (keyingi oʻrinlarda Metodika deb yuritiladi) muvofiq hisob-kitob va oʻlchash usuli orqali.

Tadbirlar roʻyxati amalga oshirilgandan soʻng energiya resurslarining isteʼmol hajmini natura ifodasida aniqlash tartibining tanlovi quyidagi usullardan birini qoʻllagan holda amalga oshiriladi:

bir oydan kam boʻlmagan, taraflar belgilagan davr mobaynida foydalanayotgan energiya resurslarini hisobga olish pribori bilan qayd qilingan hajmlar asosida;

Metodikaga muvofiq hisob-kitob va oʻlchash usuli orqali;

k) energiya servis shartnomalarining bajarilishi natijasida erishilgan tejash miqdorini aniqlashda energiya resurslari isteʼmol hajmiga taʼsir etuvchi faktorlar hisobi (energiyani isteʼmol qiladigan qurilmalarning ishlash rejimi va funksional vazifasining oʻzgarishi, energiya isteʼmolchilarining soni, xona yuzasi va hajmining oʻzgarishi, ob-havo sharoitlarining keskin oʻzgarishi — tashqi havoning oʻrtacha sutkalik darajasi, isitish mavsumida tashqi havoning oʻrtacha sutkalik darajasi, isitish mavsumining davomiyligi, energiya va resurs taʼminoti rejimlari, energiyani isteʼmol qiladigan qurilmalarning ishlash rejimi va parametrlari, obyekt va xonalarni ularni funksional vazifalarini hisobga olgan holda foydalanish rejimi va parametrlari boʻyicha barcha belgilangan sanitariya-gigiyenik va texnik talablarga rioya qilinishini taʼminlash);

l) Metodikaga muvofiq ishlab chiqilgan energiya samaradorligini oʻlchash va verifikatsiyalash rejasining mavjudligi;

m) shartnomada nazarda tutilgan tejash miqdoriga erishilishining boshlangʻich va yakuniy muddatlarining hamda davomiyligi bir oydan kam va bir yildan ortiq boʻlishi mumkin boʻlmagan tejash miqdori ulushlari erishilish davrining koʻrsatilishi;

n) shartnomada nazarda tutilgan buyurtmachining energiya resurslari yetkazib berilishi uchun tegishli xarajatlarining natura ifodasidagi tejash miqdoridan, hamda shartnoma bajarilishi davrida tegishli energiya resurslarining haqiqatda yuzaga kelgan narx (tarif)lari boʻyicha aniqlangan tejash foizidan hamda energiya resurslarining isteʼmoli va ish haqi bilan bogʻliq boʻlgan saqlash, foydalaniladigan asbob va uskunalarni joriy taʼmirlash va xizmat koʻrsatish xarajatlarining tejalgan hisob-kitob miqdoridan kelib chiqqan holdagi energiya servis xizmatlarining toʻlovi.

Agar shartnoma bajarilishi davrida tegishli energiya resurslarining haqiqatda yuzaga kelgan narx (tarif)lari taklif yuborilgan kunda amal qilgan energiya resursi birligi qiymatidan kam boʻlsa, unda shartnoma bajarilishi davrida tegishli energiya resurslarining haqiqatda yuzaga kelgan narx (tarif)lari taklif yuborilgan kunda amalda boʻlgan energiya resursi birligi qiymatiga tenglashtirib qabul qilinadi;

o) shartnoma tuzilgan sanaga qadar buyurtmachi, mulkdor yoki ekspluatatsiya qiluvchi tegishli tashkilot tomonidan energiya va resurs taʼminoti rejimlari, energiyani isteʼmol qiladigan qurilmalarning ishlash rejimi va parametrlari, obyekt va xonalarni ularning funksional vazifalarini hisobga olgan holda foydalanish rejimi va parametrlari boʻyicha barcha belgilangan sanitariya-gigiyenik va texnik talablarga rioya qilinishi taʼminlangan obyektga nisbatan shartnoma tuzish.

Koʻrsatilgan talab va normalar bajarilmagan taqdirda, bu haqda maʼlumotlar energiya servis shartnomasida koʻrsatib oʻtiladi va ularni bajarilishini taʼminlash boʻyicha chora-tadbirlar roʻyxatiga qoʻshiladi. Mazkur bandning “b” kichik bandiga muvofiq, energiya resurslarining isteʼmol hajmiga taʼsir etuvchi faktorlarni hisobga olgan holda buyurtmachining energiya resurslari isteʼmolining bazaviy hajmi koʻrsatkichlari natura ifodasi va ularning yetkazib berilishi xarajatlarining qiymat ifodasini aniqlash amalga oshiriladi;

p) yetkazib beruvchining majburiyatlari, jumladan:

xoʻjalik shartnomalarini bajarish, oʻzgartirish va bekor qilish boʻyicha qonun talablariga rioya etish;

buyurtmachining joriy faoliyatini qonun hujjatlariga muvofiq, jumladan texnik reglament talablari, davlat standartlari, shaharsozlik norma va qoidalari, sanitariya norma va qoidalari, gigiyenik va boshqa normativlarni amalga oshirishi uchun zarur sharoitlarni taʼminlash;

taraflar bilan kelishilgan energiya resurslaridan foydalanish rejimi va shartlarini taʼminlash;

tuzilgan shartnoma boʻyicha olingan majburiyatlarni oʻz vaqtida va zarur darajada (sifatli) bajarish;

texnologiyalarni joriy etishga doir tadbirlarni bajarishda qonun hujjatlarida belgilangan buyurtmachining faoliyati shart-sharoitlari parametrlariga, jumladan texnik reglament talablari, davlat standartlari, shaharsozlik norma va qoidalari, sanitariya norma va qoidalari, gigiyenik va boshqa normativlarga rioya qilish boʻyicha oʻz majburiyatlarini zarur darajada bajarmaganligi sababli aniqlangan kamchiliklarni tekin bartaraf etish;

r) buyurtmachining majburiyatlari, jumladan:

xoʻjalik shartnomalarini bajarish, oʻzgartirish va bekor qilish boʻyicha qonun talablariga rioya etish;

yetkazib beruvchiga tadbirlar roʻyxatiga kiritilgan, texnologiyalarni joriy etishga doir tadbirlar amalga oshirilishi rejalashtirilgan obyekt toʻgʻrisida dolzarb maʼlumotlarni taqdim etish, shu jumladan obyekt (inshoot)lar soni, qurilgan sanasi, toʻsiq konstruksiyalari tipi, mukammal taʼmirlash sanasi, energiya resurslarini isteʼmol qiluvchi asbob-uskunalarning texnik xususiyatlari toʻgʻrisida;

tadbirlar roʻyxatiga kiritilgan, unga nisbatdan texnologiyalarni joriy etishga doir tadbirlar amalga oshirilayotgan obyektni hamda ushbu tadbirlarni amalga oshirish jarayonida oʻrnatilgan asbob-uskunalarni zarur darajada saqlash va xizmat koʻrsatish, agar ushbu majburiyatlar shartnoma shartlarida yetkazib beruvchiga yuklanmagan boʻlsa;

taraflar bilan kelishilgan energiya resurslaridan foydalanish rejimi va shartlarini taʼminlash;

yetkazib beruvchi vakillarini unga nisbatan shartnoma tuzilgan obyektga kirishini amalga oshirish;

shartnomada belgilangan muddatda, ammo shartnomada nazarda tutilgan tejash miqdoriga erishish muddati tugagan kundan boshlab 30 kundan kechikmay, yetkazib beruvchiga energiya resurslari isteʼmoli toʻgʻrisida maʼlumot taqdim etish;

yetkazib beruvchi tomonidan shartnomaning bajarilishi natijasida tejash taʼminlanishi lozim boʻlgan energiya resurslari yetkazib berish shartnomasining shartlari oʻzgarganligi toʻgʻrisidagi maʼlumotni yetkazib beruvchiga taqdim etish;

taraflar bilan kelishilgan energiya resurslaridan foydalanish rejimi va shartlariga rioya qilish boʻyicha majburiyatlarini bajarish davomida uning tomonidan yoʻl qoʻyilganligi sababli aniqlangan kamchiliklarni tekin bartaraf etish hamda koʻrsatilgan majburiyatlarni buyurtmachi tomonidan bajarmaganligi yoki zarur darajada bajarmaganligi oqibatida yetkazib beruvchida vujudga kelgan zararlarni qoplash;

s) oʻz shartnomaviy majburiyatlarini bajarmaganligi yoki zarur darajada bajarmaganligi uchun taraflarning javobgarligi;

t) texnologiyalarni joriy etishga doir tadbirlarni amalga oshirish jarayonida yetkazib beruvchi tomonidan buyurtmachiga oʻrnatilgan asbob-uskunalarga egalik huquqini qonun hujjatlariga muvofiq yetkazib beruvchidan qonuniy huquqqa ega boʻlgan shaxslarga oʻtkazish tartibi;

u) qonun hujjatlariga zid boʻlmagan hollarda, energiya servis shartnomasi boʻyicha toʻlov talabi huquqini boshqa shaxs foydasiga toʻliq yoki qisman voz kechish mumkinligi shartining mavjudligi;

f) qonun hujjatlariga muvofiq boshqa shartlar.

4-bob. Yakunlovchi qoidalar

12. Energiya servis shartnomalari doirasida texnologiyalarni joriy etish boʻyicha tovarlar (ishlar, xizmatlar) qonun hujjatlariga muvofiq majburiy sertifikatlashtirilishi shart, sertifikatlashtirish talabi belgilanmagan tovarlar (ishlar, xizmatlar) bundan mustasno.

LexUZ sharhi

Qarang: Oʻzbekiston Respublikasining “Texnik jihatdan tartibga solish toʻgʻrisida”gi Qonuni.

13. Energiya servis shartnomalarini tayyorlash va amalga oshirish maqsadida yetkazib beruvchi energiya servis shartnomalarini bajarish uchun zarur boʻlgan tovarlar (ishlar, xizmatlar)ni qonun hujjatlariga muvofiq xarid qiladi.

14. Yetkazib beruvchi har bir energiya servis shartnomasi tuzilgandan soʻng oʻzining xarid rejasiga oʻzgartirish kiritishga haqlidir. Buyurtmachining xarid rejasi va xarid grafik rejasiga energiya resurslarini yetkazish hamda foydalanilayotgan energiya isteʼmoli bilan bogʻliq pribor va uskunalarni saqlash va joriy taʼmirlash bilan bogʻliq buyurtmachining tegishli xarajatlar qismi boʻyicha oʻzgartirishlar kiritish buyurtmachining energiya resurslarini yetkazib berish uchun xarajatlarining erishilgan tejash samarasini tasdiqlaydigan dalolatnomani taraflar imzolagan kundan soʻng, ammo oʻn kundan kechikmay buyurtmachi tomonidan amalga oshiriladi.

15. Qonun hujjatlarida koʻrsatib oʻtilgan tartibda buyurtmachi yetkazib beruvchi bilan texnologiyalarni joriy etish boʻyicha tovarlar (ishlar, xizmatlar)ning yagona yetkazib beruvchisi sifatida energiya servis shartnomalari boʻyicha oʻrnatilgan, unga nisbatan texnologiyalarni joriy etish boʻyicha tadbirlar oʻtkazilgan asbob-uskunalardan foydalanish yuzasidan shartnoma tuzishga haqli.

16. Ushbu Nizom talablari buzilishida aybdor boʻlgan shaxslar qonun hujjatlariga muvofiq tartibda javob beradilar.

Energiya servis xizmatlari koʻrsatish tartibi toʻgʻrisidagi nizomga
ILOVA

Energiya servis xizmatlari yetkazib beruvchi va buyurtmachi oʻrtasida energiya servis shartnomasini tuzish va roʻyxatga olish

SXEMASI

Bosqichlar	Ishtirokchilar	Tadbirlar	Bajarish muddatlari*
Bosqichlar	Ishtirokchilar	Tadbirlar	Bajarish muddatlari*

1-bosqich	Yetkazib beruvchi	Energiya servis shartnomasi tuzilishi moʻljallanayotgan obyektlar toʻgʻrisida maʼlumotlarni taqdim etish haqidagi soʻrovnomani buyurtmachiga yuborish	yetkazib beruvchi tashabbusi bilan
1-bosqich	Yetkazib beruvchi		yetkazib beruvchi tashabbusi bilan

2-bosqich	Buyurtmachi	Energiya servis shartnomasi tuzilishi moʻljallanayotgan obyektlarning amaldagi texnik holati va ish rejimlarini aniqlash uchun komissiya tuzish	3 kun mobaynida
2-bosqich	Buyurtmachi		3 kun mobaynida

3-bosqich	Buyurtmachi	Soʻralgan maʼlumotlarni yetkazib beruvchiga taqdim etish. Yetkazib beruvchining vakillarining obyektga kirishini taʼminlash	agar soʻrovnomada boshqa kechroq muddat koʻrsatilmagan boʻlsa, 10 kun mobaynida
3-bosqich	Buyurtmachi

4-bosqich	Yetkazib beruvchi	Obyektlar toʻgʻrisidagi maʼlumotlarni koʻrib chiqish. Loyihaoldi/loyiha hujjatlarini va ofertani tayyorlash, ularni buyurtmachiga yuborish	15 kun mobaynida
4-bosqich	Yetkazib beruvchi		15 kun mobaynida

5-bosqich	Buyurtmachi	Ofertani koʻrib chiqish va yetkazib beruvchiga aksept toʻgʻrisida yoki akseptdan bosh tortishi toʻgʻrisida yoxud ofertani boshqa shartlarda akseptlashi toʻgʻrisida xabarnoma yuborish	30 kun mobaynida
5-bosqich	Buyurtmachi		30 kun mobaynida

6 bosqich	Yetkazib beruvchi	Akseptdan bosh tortishi toʻgʻrisida yoxud ofertani boshqa shartlarda akseptlashi toʻgʻrisidagi buyurtmachining xabarnomasini koʻrib chiqish	5 kun mobaynida
6 bosqich	Yetkazib beruvchi		5 kun mobaynida

7-bosqich	Buyurtmachi/Yetkazib beruvchi	Akseptni koʻrib chiqish natijasi boʻyicha ikki tomonning roziligi bilan energiya servis shartnomasi tuzish	5 kun mobaynida
7-bosqich	Buyurtmachi/Yetkazib beruvchi		5 kun mobaynida

* Tadbirlarni bajarish muddatlari bajariladigan ishlarning shartlari va hajmlariga koʻra oʻzgartirilishi mumkin.

(Qonun hujjatlari maʼlumotlari milliy bazasi, 19.07.2018-y., 09/18/551/1536-son)