Yakka tartibdagi tadbirkorlar tomonidan faoliyatning ayrim turlari amalga oshirilishini tartibga solish maqsadida Vazirlar Mahkamasi qaror qiladi:

1. 2003-yil 1-yanvardan boshlab qonun hujjatlarida belgilangan tartibda faqat yuridik shaxs shaklida tashkil etilgan tadbirkorlik subyektlari tomonidan amalga oshiriladigan faoliyatning ayrim turlari ro‘yxatiga ulgurji savdo faoliyati kiritilsin.

2. Qonun hujjatlarida belgilangan tartibda faqat yuridik shaxs shaklida tashkil etilgan tadbirkorlik subyektlari tomonidan amalga oshiriladigan faoliyatning ayrim turlari ro‘yxati ilovaga muvofiq tasdiqlansin.

3. Vazirlar Mahkamasining “Tadbirkorlik faoliyatining ayrim turlari bilan shug‘ullanishni tartibga solish to‘g‘risida” 2002-yil 4-iyundagi 197-son qarorida (O‘zbekiston Respublikasi QT, 2002-y., 6-son, 30-modda):

1-bandning birinchi xatboshi o‘z kuchini yo‘qotgan deb hisoblansin;

1-bandning ikkinchi xatboshidagi “ilova qilinayotgan ro‘yxatga” so‘zlari “Tadbirkorlik subyektlari — faqat yuridik shaxslar tomonidan qonun hujjatlarida belgilangan tartibda amalga oshiriladigan faoliyatning ayrim turlari ro‘yxatiga” so‘zlari bilan almashtirilsin.

4. O‘zbekiston Respublikasi Adliya vazirligi, Moliya vazirligi, Davlat bojxona qo‘mitasi, Davlat soliq qo‘mitasi boshqa manfaatdor idoralar bilan birgalikda amaldagi qonun hujjatlariga mazkur qarordan kelib chiquvchi tegishli o‘zgartirish va qo‘shimchalar kiritsinlar.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.

1. Qimmatbaho metallar va qimmatbaho toshlardan yasalgan buyumlarni yoxud bunday materiallar qo‘llanilgan buyumlarni sotib olish va sotish

2. Muhr va shtamplar tayyorlash

3. Mehmonxonalar, otellar va kempinglar tashkil etish

4. Yuridik shaxslarga kapital qurilish, qurilish-montaj ishlari bo‘yicha xizmatlar ko‘rsatish

5. Loyiha, loyiha-konstruktorlik faoliyati hamda loyihalar va smetalarni ekspertizadan o‘tkazish

6. Neft mahsulotlarining barcha turlarini sotish

7. Ulgurji savdo

8. Umumiy ovqatlanish sohasida xizmatlar ko‘rsatish (uy sharoitlarida yoki joylardagi davlat hokimiyati organlari qarori bilan maxsus ajratilgan joylarda o‘tirish o‘rinlari tashkil etmasdan donali taomlarning ayrim turlarini tayyorlash va sotish bo‘yicha xizmatlar bundan mustasno).

9. Texnologiya jarayonlari va ishlab chiqarishni boshqarishning avtomatlashtirilgan tizimlariga, raqamli dastur bilan boshqariladigan pretsizion va dastgoh asbob-uskunalarining radioelektron apparatlariga texnik xizmat ko‘rsatish va ta’mirlash.

10. Teleko‘rsatuvlarni tarqatish (translatsiya qilish) — kabel tarmog‘i bo‘yicha teleradiodasturlarni qayta translatsiya qilish tarmoqlariga xizmatlar ko‘rsatish, shuningdek telekommunikatsiyalar tarmoqlaridan foydalanish va telekommunikatsiyalar xizmatlari ko‘rsatish.

11. Birjalarda brokerlik faoliyati.

12. Avtomobil transportida tijorat asosida shaharda, shahar atrofida, shaharlararo va xalqaro yo‘lovchilar tashish faoliyati.

13. Tamaki xomashyosini fermentlash va tamaki mahsulotlari ishlab chiqarish.

14. O‘simlik yog‘i ishlab chiqarish va sotish

15. Alkogolli mahsulotlarni sotish.

16. Baholash faoliyati.

17. Go‘shtli yarimfabrikatlarni sanoat yo‘li bilan qayta ishlash va ishlab chiqarish, shuningdek kolbasa mahsulotlari, go‘sht va baliq konservalarini sanoat yo‘li bilan ishlab chiqarish.

18. Xom sutni sanoat yo‘li bilan qayta ishlash va sut mahsulotlari (pasterizatsiya qilingan sut, slivka, qaymoq, tvorog, qatiq mahsulotlari), shu jumladan pishloq, brinza, mol yog‘i, bolalar oziq-ovqat mahsulotlari (O‘zbekiston Respublikasi Sog‘liqni saqlash vazirligi tomonidan ma’qullangan barcha turlari), quruq sut, muzqaymoq va quyiltirilgan sut ishlab chiqarish.

19. Quyidagilar:

margarin va mayonez mahsulotlari;

konfet va shokolad (milliy shirinliklardan tashqari);

tuxum kukuni;

mineral suvlar, sharbatlar va salqin ichimliklarning boshqa turlari (shisha idishda, plastik, aseptik va noaseptik o‘ramlarda);

shaxsiy gigiyena buyumlari;

qurilish materiallari (qo‘lda va qo‘l asboblari hamda kichik mexanizatsiya vositalaridan foydalangan holda tayyorlanadigan materiallardan tashqari);

mebellar (badiiy xalq hunarmandchiligi va amaliy-dekorativ san’at buyumlaridan tashqari) ishlab chiqarish.

20. Polietilen xomashyosini sanoat yo‘li bilan qayta ishlash va undan tayyor mahsulot ishlab chiqarish.

21. Kinovideomahsulotlarni ishlab chiqarish, ko‘paytirish, dublyaj qilish, sotish va ularning prokati.

22. Yangi import avtomobillarni chakana savdoda sotish.