Oʻzbekiston Respublikasi Prezidentining “Oʻzbekiston Respublikasi Bosh prokuraturasi huzuridagi Majburiy ijro byurosi faoliyatini tashkil etish toʻgʻrisida” 2017-yil 30-maydagi PQ-3016-son qarorini bajarish yuzasidan Vazirlar Mahkamasi qaror qiladi:

1. Quyidagilar:

Isteʼmolchilarni elektr energiyasi va gaz tarmoqlaridan uzib qoʻyish tartibi toʻgʻrisidagi nizom 2-ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

1. Ushbu Nizom shartnomaviy majburiyatlarni bajarmaganlik uchun, shuningdek ushbu Nizomda nazarda tutilgan boshqa holatlarda isteʼmolchilarni elektr va gaz tarmoqlaridan uzib qoʻyish tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

isteʼmolchi — elektr va gaz taʼminoti shartnomasiga muvofiq elektr energiyasi va tabiiy gazdan ishlab chiqarish va (yoki) maishiy ehtiyojlar uchun foydalanadigan yuridik yoki jismoniy shaxs;

energiya resurslari yetkazib beruvchilar — “Hududiy elektr tarmoqlari” AJ, “Hududgaztaʼminot” AJ va ularning boʻlinmalari, shuningdek, isteʼmolchilarga elektr energiyasi va tabiiy gazni yetkazib berishni taʼminlovchi, ishonchli boshqaruv toʻgʻrisidagi shartnoma asosida faoliyat yurituvchi boshqa tashkilotlar.

3. Isteʼmolchilarni elektr va gaz tarmoqlaridan uzib qoʻyish quyidagi holatlarda amalga oshiriladi:

shartnoma majburiyatlari bajarilmaganda, shu jumladan, hisob-kitoblar oʻz vaqtida amalga oshirilmaganligi oqibatida foydalanilgan elektr energiyasi va tabiiy gaz uchun qarzdorlik mavjud boʻlganda;

Energiya resurslari yetkazib beruvchilar talabnomalari bajarilmaganda, shu jumladan, uning vakillariga elektr energiyasi va tabiiy gaz isteʼmolini hisobga olish priborlaridan koʻrsatkichlarni olish uchun ruxsat etilmaganda;

elektr va gaz tarmoqlariga noqonuniy ulanish, ularni talon-toroj qilish yoki ulardan foydalanish qoidalarini buzishning boshqa holatlari aniqlanganda;

elektr energiyasi va tabiiy gaz isteʼmolini hisobga olish priborlari qasddan buzilganda, koʻrsatkichlarni oʻzgartirish maqsadida ularga tashqaridan aralashilganda.

4. Isteʼmolchilarni elektr va gaz tarmoqlaridan uzib qoʻyish hamda ularni qayta ulash energiya resurslarini yetkazib beruvchilar tomonidan amalga oshiriladi.

8. Energiya resurslarini yetkazib beruvchilar mutaxassislari isteʼmolchilarni elektr va gaz tarmoqlaridan uzib qoʻyish hamda ularni qayta ulash ishlarini oʻtkazishda zarur xavfsizlik choralarini koʻrishlari shart.

9. Oʻzbekiston Respublikasi Vazirlar Mahkamasining 2004-yil 5-fevraldagi 57-son qaroriga 5-ilovada, shuningdek Oʻzbekiston Respublikasi Vazirlar Mahkamasining 2004-yil 1-noyabrdagi 511-son qarori bilan tasdiqlangan Elektr energiyasi isteʼmolchilari va hududiy elektr tarmoqlari korxonalari oʻrtasidagi oʻzaro hisob-kitoblar tartibi toʻgʻrisidagi nizomning 18-bandida koʻrsatilgan korxonalar faqat sudning qarori boʻyicha uzib qoʻyilishi mumkin.

11. Isteʼmol qilingan elektr energiyasi va tabiiy gaz uchun qarzi mavjud boʻlgan isteʼmolchilarning roʻyxati energiya resurslari yetkazib beruvchilar tomonidan shakllantiriladi.

12. Energiya resurslari yetkazib beruvchilar isteʼmol qilingan elektr energiyasi va tabiiy gaz uchun qarzlari mavjud boʻlgan isteʼmolchilarning energiya resurslari yetkazib beruvchilar tomonidan shakllantirilgan va taqdim etilgan roʻyxatlari asosida isteʼmolchilarni qarzni besh kun muddatda toʻlash zarurligi toʻgʻrisida yozma xabardor qiladi.

13. Energiya resurslari yetkazib beruvchilar isteʼmolchilar xabardor qilingan paytdan boshlab besh kun muddat oʻtgandan keyin qarzlarni majburiy, shu jumladan qonun hujjatlarida belgilangan tartibda isteʼmolchilarni elektr va gaz tarmoqlaridan uzib qoʻyish yoʻli bilan undirish choralarini koʻradi.

14. Elektr energiyasi va tabiiy gazdan foydalanish qoidalarini buzish holatlari aniqlangan taqdirda, energiya resurslari yetkazib beruvchilar ularni elektr va gaz tarmoqlaridan guvohlar ishtirokida darhol uzib qoʻyish hamda foydalanish qoidalarini buzgan shaxslarni qonun hujjatlarida belgilangan javobgarlikka tortish choralarini koʻradi.

15. Elektr energiyasi va tabiiy gaz isteʼmolchilari uzib qoʻyiladigan elektr va gaz tarmoqlarining nuqtalari energiya resurslari yetkazib beruvchilar xodimlari tomonidan nazorat tartibida majburiy plombalanishi shart.

16. Energiya resurslari yetkazib beruvchilar tomonidan isteʼmolchi elektr va gaz tarmoqlaridan uzib qoʻyilganda, tarmoqdan uzib qoʻyish haqida ikki nusxada dalolatnoma rasmiylashtiriladi, uning bir nusxasi isteʼmolchiga beriladi.

17. Isteʼmolchi dalolatnomani imzolashdan bosh tortgan taqdirda dalolatnomaga bu haqda tegishli yozuv kiritiladi. Bosh tortish ikki nafar guvoh yoki fuqarolarning oʻzini oʻzi boshqarish organi vakili tomonidan tasdiqlanishi lozim. Bunda isteʼmolchi dalolatnomada uning mazmuni boʻyicha tushuntirish va eʼtirozlarni, shuningdek imzolashdan bosh tortish sabablarini bayon etish huquqiga ega.

18. Elektr va gaz tarmoqlaridan uzib qoʻyilgan isteʼmolchilar haqidagi maʼlumotlar energiya resurslari yetkazib beruvchilar xodimi tomonidan elektron maʼlumotlar tizimiga kiritiladi.

19. Isteʼmolchilar quyidagi hollarda elektr va gaz tarmoqlariga qayta ulanadi:

elektr energiyasi va tabiiy gazdan foydalanishda yoʻl qoʻyilgan qoidabuzarliklar bartaraf etilganda;

isteʼmol qilingan elektr energiyasi va tabiiy gaz uchun qarzlar toʻlanganda;

elektr va gaz tarmoqlariga qayta ulanish uchun ushbu Nizomning 23-bandida belgilangan miqdordagi summa toʻlanganda.

20. Isteʼmolchilar energiya resurslari yetkazib beruvchilarga, jumladan, axborot-kommunikatsiya texnologiyalaridan foydalanish orqali murojaat qilganda elektr va gaz tarmoqlariga qayta ulanadi.

Isteʼmolchilar elektr va gaz tarmoqlariga aniqlangan qoidabuzarliklar bartaraf etilgandan keyingi kundan kechiktirmay energiya resurslari yetkazib beruvchilar tomonidan qayta ulanadi.

21. Elektr energiyasi va tabiiy gaz xizmatlaridan foydalanish qoidalari buzilganligi uchun isteʼmolchilar tarmoqdan uzilganda, ularni tarmoqqa qayta ulash energiya resurslari yetkazib beruvchilar tomonidan elektr energiyasi va tabiiy gaz xizmatlaridan foydalanish qoidalarini buzish sabablari hamda sharoitlari bartaraf etilganligi nuqtai nazaridan isteʼmolchilarning binolari koʻzdan kechirilgandan keyin amalga oshiriladi.

22. Qayta ulash yakuni boʻyicha ikki nusxada dalolatnoma tuziladi, uning bir nusxasi isteʼmolchiga beriladi.

23. Elektr va gaz tarmoqlaridan ilgari uzib qoʻyilgan shaxslarni qayta ulashda isteʼmolchi — jismoniy shaxslardan bazaviy hisoblash miqdorining ikki baravari miqdorida, isteʼmolchi — yuridik shaxslardan eng kam oylik ish haqining oʻn baravari miqdorida toʻlov undiriladi, ushbu mablagʻlar qayta ulashni amalga oshirgan energiya resurslarini yetkazib beruvchilar hisob raqamiga oʻtkaziladi.

24. Avariya holatida yoki isteʼmolchining arizasiga asosan elektr energiyasi va gaz tarmoqlaridan uzib qoʻyilgan, shuningdek, elektr energiyasi va tabiiy gaz isteʼmolini nazorat qilish va hisobga olishning avtomatlashtirilgan tizimlariga ulangan isteʼmolchilarni elektr va gaz tarmoqlariga qayta ulash uchun toʻlov undirilmaydi.

25. Ushbu Nizom talablari buzilishida aybdor boʻlgan shaxslar belgilangan tartibda javob beradi.