O‘zbekiston Respublikasi Prezidentining 2010-yil 24-dekabrdagi PQ-1449-son “O‘zbekiston Respublikasining 2011-yilgi asosiy makroiqtisodiy ko‘rsatkichlari prognozi va Davlat budjeti parametrlari to‘g‘risida”gi qaroriga muvofiq O‘zbekiston Respublikasi Xalq ta’limi vazirligi va Moliya vazirligi qaror qiladi:

1. Umumiy o‘rta ta’lim muassasalarining uzaytirilgan kun guruhlarida bolalar ta’minoti uchun ota-onalar to‘lovini undirish va undan foydalanish tartibi to‘g‘risidagi nizom ilovaga muvofiq tasdiqlansin.

2. Mazkur qaror rasmiy e’lon qilingan kundan e’tiboran kuchga kiradi.

Mazkur Nizom O‘zbekiston Respublikasi Prezidentining 2010-yil 24-dekabrdagi PQ-1449-son “O‘zbekiston Respublikasining 2011-yilgi asosiy makroiqtisodiy ko‘rsatkichlari prognozi va Davlat budjeti parametrlari to‘g‘risida”gi qaroriga muvofiq, umumiy o‘rta ta’lim muassasalarining uzaytirilgan kun guruhlarida bolalar ta’minoti uchun ota-onalar to‘lovini (bundan buyon matnda to‘lov deb yuritiladi) undirish va undan foydalanish tartibini belgilaydi.

1. Mazkur Nizom talablari O‘zbekiston Respublikasining Davlat budjeti mablag‘lari hisobiga moliyalashtiriladigan umumiy o‘rta ta’lim muassasalari va ayrim fanlar chuqur o‘rganiladigan davlat ixtisoslashtirilgan umumta’lim muassasalariga (bundan buyon matnda umumiy o‘rta ta’lim muassasalari deb yuritiladi) tatbiq etiladi.

2. Jismoniy, aqliy, sensor yoki ruhiy nuqsonlari bo‘lgan bolalar uchun davlat ixtisoslashtirilgan ta’lim muassasalarining (maktablar, maktab-internatlar) uzaytirilgan kun guruhlari Vazirlar Mahkamasining 2021-yil 12-oktabrdagi 638-son qarori bilan tasdiqlangan Jismoniy, aqliy, sensor yoki ruhiy nuqsonlari bo‘lgan bolalar uchun davlat ixtisoslashtirilgan ta’lim muassasalari to‘g‘risida nizomga muvofiq faoliyat yuritadi.

3. Umumiy o‘rta ta’lim muassasalarining uzaytirilgan kun guruhlarida to‘lov har bir oy uchun bazaviy hisoblash miqdorining 25 foizi miqdorida undiriladi.

4. Umumiy o‘rta ta’lim muassasalarining uzaytirilgan kun guruhidagi bolalar soni 25 — 30 nafar etib belgilanadi.

5. To‘lov ota-onalar yoki ularning o‘rnini bosuvchi shaxslar (bundan buyon matnda ota-onalar deb yuritiladi) bilan umumiy o‘rta ta’lim muassasasi o‘rtasida tuzilgan shartnoma asosida amalga oshiriladi.

6. Ota-onalar tomonidan shartnoma shartlarining lozim darajada bajarilmasligi, shu jumladan to‘lovning shartnomada belgilangan miqdorda uzrli sabablarsiz to‘lanmasligi bolaning umumiy o‘rta ta’lim muassasasi uzaytirilgan kun guruhlarida bo‘lishini to‘xtatish uchun asos bo‘ladi.

7. Umumiy o‘rta ta’lim muassasasi uzaytirilgan kun guruhlari uchun to‘lanadigan to‘lov o‘quv yili (sentabr — may oylari) davomida oyma-oy to‘lab boriladi. Joriy oy uchun to‘lov shu oyning o‘ninchi sanasidan kechiktirmasdan amalga oshiriladi.

8. To‘lov tijorat banki orqali istalgan shaklda (naqd pul yoki naqd pulsiz shaklda, shu jumladan bank plastik kartochkalari orqali va pul o‘tkazish yo‘li bilan) to‘lanadi. Bunda to‘lovning amalga oshirilganligini tasdiqlovchi hujjat nusxasi umumiy o‘rta ta’lim muassasasiga taqdim etiladi.

9. To‘lov umumiy o‘rta ta’lim muassasasining shaxsiy g‘azna hisobvarag‘iga o‘tkaziladi.

10. Ota-onaning yozma arizasiga asosan, bolaning uzaytirilgan kun guruhiga qatnashi vaqtinchalik yoki butunlay to‘xtatiladigan taqdirda, to‘lov to‘liq bo‘lmagan oy uchun, ya’ni bola amalda uzaytirilgan kun guruhiga qatnashadigan kunlar uchun to‘lanadi.

11. Bolaning o‘zi yoki oila a’zolarining kasalligi, karantin, shuningdek ota-onalarning mehnat ta’tili paytida yoki boshqa sabablarga ko‘ra bola uzaytirilgan kun guruhiga ketma-ket uch kundan ortiq kelmagan taqdirda, ota-onaning yozma arizasiga asosan, ushbu kunlar uchun oldindan amalga oshirilgan to‘lov keyingi oylar uchun to‘lovni amalga oshirishda hisobga olinadi.

Bunda bolaning uzaytirilgan kun guruhiga kelmagan kunlari soni bir kunlik to‘lov miqdoriga ko‘paytirilib, keyingi oy uchun to‘lov summasi chiqqan summaga kamaytiriladi.

12. Bir kunlik to‘lov miqdori oylik to‘lov miqdorini uzaytirilgan kun guruhi ish kunlarining rejadagi soniga bo‘lish yo‘li bilan aniqlanadi.

13. Bolaning uzaytirilgan kun guruhiga qatnashi vaqtincha yoki butunlay to‘xtatilishi to‘g‘risida ota-onaning yozma arizasi bo‘lmagan hollarda to‘lov to‘liq oy uchun hisoblanadi va umumiy asoslarda undiriladi.

14. To‘lanishi belgilangan oxirgi kundan boshlab ikki hafta mobaynida to‘lov belgilangan miqdorda va uzrli sabablarsiz to‘lanmagan taqdirda, bolaning umumiy o‘rta ta’lim muassasasi uzaytirilgan kun guruhida bo‘lishi to‘xtatiladi.

15. To‘lov amalga oshirilmaganligi oqibatida kelib chiqqan qarzdorlik to‘liq bartaraf etilmagunga qadar bolaning umumiy o‘rta ta’lim muassasasi uzaytirilgan kun guruhiga qatnashiga ruxsat berilmaydi hamda qarzdorlik qonunchilik hujjatlarida belgilangan tartibda undiriladi.

16. O‘zbekiston Respublikasi Prezidentining Farmoni asosida bazaviy hisoblash miqdori o‘zgargan hollarda, bazaviy hisoblash miqdori o‘zgargan sanadan boshlab to‘lov qayta hisob-kitob qilinadi.

17. Umumiy o‘rta ta’lim muassasasining uzaytirilgan kun guruhlariga qatnaydigan bolalar umumiy sonining 15 foizi doirasida Ijtimoiy reyestrdagi oilalar farzandlari to‘lovdan ozod qilinadi. Bunda birinchi navbatda davlat ta’minotidagi oila va kambag‘al oila farzandlariga, shundan so‘ng kambag‘allik chegarasidagi oila farzandlariga imtiyoz beriladi.

18. To‘lovdan ozod qilinadigan o‘quvchilar ro‘yxati ular Ijtimoiy reyestrga kiritilgan oilaning a’zosi ekani haqidagi ma’lumot asosida shakllantiriladi.

Bunda ma’lumot umumiy o‘rta ta’lim muassasalari tomonidan “Elektron hukumat” tizimi idoralararo integratsiyalashuv platformasi orqali tekshiriladi.

19. To‘lovdan ozod qilinadigan Ijtimoiy reyestrdagi oila farzandlari ro‘yxati o‘quv yilining 25-sentabr sanasiga qadar umumiy o‘rta ta’lim muassasasi direktorining buyrug‘i bilan tasdiqlanadi.

20. To‘lovdan ozod qilingan bolalarning umumiy o‘rta ta’lim muassasasi uzaytirilgan kun guruhlariga qatnashi to‘xtatilishi natijasida bo‘shab qolgan o‘rinlar to‘lovdan ozod qilingan bolalar ro‘yxatiga kirmay qolgan Ijtimoiy reyestrdagi oilalar farzandlari hisobiga to‘ldiriladi.

21. To‘lovdan tushgan mablag‘lar umumiy o‘rta ta’lim muassasasi uzaytirilgan kun guruhlarining tarbiyachilari (bundan buyon matnda tarbiyachi deb yuritiladi) mehnatiga haq to‘lash xarajatlariga maqsadli tartibda yo‘naltiriladi.

22. Tarbiyachilarning oylik ish haqi miqdori pedagog xodimlar uchun qonunchilik hujjatlarida belgilangan bazaviy tarif stavkalaridan kelib chiqib hisoblanadi.

23. Tarbiyachilarga mehnat ta’tili berish mehnat to‘g‘risidagi qonunchilik hujjatlariga muvofiq amalga oshiriladi. Mehnat ta’tili muddati belgilangan tartibda ishlangan vaqtga mutanosib ravishda hisoblab chiqariladi.

24. Tarbiyachilarning mehnat haqi va mehnat ta’tili haqiga to‘lovlar amalga oshirilganidan keyin bo‘shab qolgan mablag‘lar ularni moddiy rag‘batlantirish xarajatlariga, shuningdek kuzatuv kengashining roziligi bilan qonunchilik hujjatlariga muvofiq boshqa xarajatlarga erkin yo‘naltirilishi mumkin.

25. Uzaytirilgan kun guruhlarining buxgalteriya hisobini yuritish umumiy o‘rta ta’lim muassasasining buxgalteri yoki maktabgacha va maktab ta’limi tuman (shahar) bo‘limlarida markazlashtirilgan moliya-buxgalteriya xizmatlari tomonidan amalga oshiriladi.

26. Buxgalteriya hisobini yuritish, shuningdek to‘lovlardan tushadigan mablag‘larning kirim qilinishi va sarflanishi hisobotlarini tuzish qonunchilik hujjatlarida belgilangan tartibda amalga oshiriladi.

27. Umumiy o‘rta ta’lim muassasasining direktori va buxgalteri yoki maktabgacha va maktab ta’limi tuman (shahar) bo‘limlarida markazlashtirilgan moliya-buxgalteriya xizmatining bosh buxgalteri to‘lovlarning maqsadli sarflanishi uchun javobgar hisoblanadi.

28. To‘lovlardan tushgan mablag‘larning o‘z vaqtida qabul qilinishi hamda maqsadli sarflanishi ustidan nazorat O‘zbekiston Respublikasi Maktabgacha va maktab ta’limi vazirligining Ichki audit va moliyaviy nazorat departamenti tomonidan olib boriladi.

O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasi va uning hududiy bo‘linmalari maktabgacha va maktab ta’limi muassasalarining budjetdan tashqari jamg‘arma mablag‘lari bo‘yicha xarajatlar smetalarida nazarda tutilgan mablag‘lardan maqsadli va oqilona foydalanish yuzasidan dastlabki va joriy nazoratni amalga oshiradi.

29. Mazkur Nizom talablari buzilishida aybdor bo‘lgan shaxslar qonunchilik hujjatlariga muvofiq javobgar bo‘ladi.