Aholini muayyan ijtimoiy himoyalashga oid tadbirlarni roʻyobga chiqarishda kam taʼminlangan oilalarga davlat madadini, fuqarolar oʻz-oʻzini boshqaruv organlarining keng va faol ishtirokini kuchaytirish maqsadida:

1. Qoʻrgʻonlar, qishloqlar, ovullar va mahallalarning fuqarolar oʻz-oʻzini boshqaruv barcha organlarida kam taʼminlangan oilalarga moddiy yordam berish maxsus jamgʻarmalari tashkil etilsin.

Shu maqsadda Oʻzbekiston Respublikasi Moliya vazirligi, Oʻzjamgʻarmabank ikki hafta muddat ichida fuqarolar oʻz-oʻzini boshqaruv organlariga yuridik shaxs huquqi berib, jamgʻarma bankning tegishli boʻlimlarida maxsus hisobvaraqalari ochsinlar.

2. Quyidagilar kam taʼminlangan oilalarga moddiy yordam berish maxsus jamgʻarmalarini tashkil etishning asosiy manbalari qilib belgilansin:

— ilovaga muvofiq miqdorda 1994-yilning IV choragiga moʻljallangan respublika budjeti mablagʻlari;

— mahalliy budjetlarning mablagʻlari;

— budjetdan tashqari manbalar — jamoat va xayriya jamgʻarmalari, korxonalar va xoʻjaliklarning mablagʻlari, fuqarolarning ixtiyoriy xayr-ehsonlari va boshqalar.

3. Qoʻrgʻonlar, qishloqlar, ovullar, mahallalarning, fuqarolar oʻz-oʻzini boshqaruv organlari 1994-yilning 1-oktabridan boshlab kam taʼminlangan oilalarga moddiy yordamning ana shu jamgʻarmalari mablagʻlaridan har oylik toʻlovlar toʻlasinlar.

4. Belgilansinki, kam taʼminlangan oilalarga moddiy yordam qoʻrgʻon, qishloq, ovul, shaharlardagi mahallalar fuqarolar yigʻini, yigʻinni chaqirish imkoni boʻlmaganda esa qoʻrgʻonlar, qishloqlar, ovullar mahallalari, koʻchalar, turar joylar fuqarolari vakillari yigʻilishining qaroriga koʻra tayinlanadi.

kam taʼminlangan oilalarga moddiy yordam miqdorlari Oʻzbekiston Respublikasi Prezidenti qarorlari bilan belgilanadi;

Oʻz-oʻzini boshqaruv organlariga ajratilgan va foydalanilmagan budjet mablagʻlari olib qoʻyilmaydi va fuqarolar yigʻini (yigʻilishi)ning qaroriga binoan aholi turar joylarini obodonlashtirish, gazlashtirish va suv bilan taʼminlashga, shuningdek boshqa ijtimoiy muammolarni hal etishga sarflanishi mumkin.

5. Kam taʼminlangan oilaga moddiy yordam tayinlash va toʻlashga oid qaror qabul qilish chogʻida ijtimoiy adolat, roʻy-rostlik, keng oshkoralik qoidalariga rioya etilishi, ajratilgan mablagʻlar aniq maqsadni koʻzlab va samarali foydalanilishi uchun majburiy shartlar boʻlishi zarur.

Oʻzbekiston Respublikasining Vazirlar Mahkamasi bir hafta muddat ichida kam taʼminlangan oilalarga moddiy yordam berish uchun mablagʻ topish va undan foydalanish yoʻllari toʻgʻrisida, ana shu mablagʻni qaysi maqsadlar uchun ajratish va toʻlash tartibi haqida qaror qabul qilsin.

6. Qoraqalpogʻiston Respublikasi Vazirlar Kengashi, viloyatlar va Toshkent shahri hokimlari:

bir oy muddat davomida shaharlar, qoʻrgʻonlar, qishloqlar va ovullardagi mahallalarning joylashishini, ularning chegaralarini, shuningdek oilalar va aholi sonini aniqlasinlar;

shu yilning 1-dekabrida Oʻzbekiston Respublikasi Adliya vazirligiga kam taʼminlangan oilalarga moddiy yordam berish uchun ajratiladigan mablagʻlarni taqsimlash va ulardan samarali foydalanish amaliyotini takomillashtirishga doir takliflarni taqdim etsinlar.

7. Kam taʼminlangan oilalarga toʻlash uchun moʻljallangan budjet va budjetdan tashqari mablagʻlardan aniq maqsadni koʻzlab foydalanilishini nazorat qilish shaxsan Qoraqalpogʻiston Respublikasi Vazirlar Kengashining raisi, viloyatlar, shaharlar va tumanlarning hokimlari, shuningdek Oʻzbekiston Respublikasi Moliya vazirligining Nazorat-taftish bosh boshqarmasi zimmasiga yuklansin.

Oʻzbekiston Respublikasi Moliya vazirligi ajratilayotgan budjet va budjetdan tashqari mablagʻlar fuqarolar oʻz-oʻzini boshqaruv organlarining maxsus hisobvaraqalariga toʻliq va oʻz vaqtida oʻtkazilayotganligini, ana shu mablagʻlardan aniq maqsadni koʻzlab foydalanilayotganligini muntazam tekshirib, taftish qilsin va har chorakda Hukumatga maʼlum qilsin.

8. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, vazirliklar, idoralar, uyushmalar, konsernlar, korporatsiyalar, korxonalar va tashkilotlar, xayriya jamgʻarmalari va tadbirkorlik tuzilmalari mavjud imkoniyatlardan kelib chiqib, oʻz mablagʻlari hisobidan kam taʼminlangan oilalarga butun choralar bilan qoʻshimcha ijtimoiy yordam bersinlar.

Oʻzbekiston Respublikasi Moliya vazirligi bir hafta muddat ichida kam taʼminlangan oilalarga moddiy yordamning ana shu jamgʻarmalariga mablagʻ oʻtkazayotgan xoʻjalik tashkilotlari uchun imtiyozli soliq solish tartibini ishlab chiqsin.

9. Oʻzbekiston Respublikasi Moliya vazirligi Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda 1995-yilgi budjetning loyihasini tuzish chogʻida shu yilning IV choragida budjet mablagʻlarini taqsimlash tajribasini hisobga olgan holda kam taʼminlangan oilalarga yordam berish uchun zarur mablagʻlarni va ana shu mablagʻlarni topish manbalarini aniqlasinlar.

10. Ommaviy axborot vositalari kam taʼminlangan oilalarga har oylik moddiy yordam tayinlash va toʻlash tartibi toʻgʻrisida televideniye, radio orqali va matbuotda tushuntirish ishlarini faol olib borsinlar, fuqarolar oʻz-oʻzini boshqaruv organlarining aholini ijtimoiy jihatdan himoyalashga oid faoliyati haqida jamoatchilikni keng xabardor qilsinlar.