PDF-faylidagi rasmiy manba
Oʻzbekiston Respublikasi Vazirlar Mahkamasining
qarori
QONUN HUJJATLARI BUZILGANLIGI UCHUN USHLANGAN TRANSPORT VOSITALARINI TOʻXTASH JOYLARIGA OLIB KELISH, JOYLASHTIRISH VA SAQLASH TARTIBINI TAKOMILLASHTIRISH TOʻGʻRISIDA
Qonun hujjatlari buzilganligi uchun ushlangan transport vositalarini toʻxtash joylariga olib kelish, joylashtirish va saqlashda qonuniylikni taʼminlash, sanitariya va yongʻinga qarshi qoidalarga rioya qilish, saqlash joylariga qoʻyiladigan talablarni belgilash, transport vositalari saqlanishi uchun javobgarlikni oshirish maqsadida Vazirlar Mahkamasi qaror qiladi:
Oldingi tahrirga qarang.
(1-band Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 17.08.2023-y., 09/23/358/0620-son)
2. Quyidagilar:
Qonun hujjatlari buzilganligi uchun ushlangan transport vositalarini toʻxtash joylariga olib kelish, joylashtirish va saqlash tartibi toʻgʻrisidagi nizom 1-ilovaga muvofiq;
Oldingi tahrirga qarang.
Qonun hujjatlari buzilganligi uchun ushlangan transport vositalarini saqlash xizmatlarini koʻrsatuvchi yuridik shaxslarni ochiq tanlov asosida elektron tarzda tanlab olish tartibi toʻgʻrisidagi nizom 2-ilovaga muvofiq;
(2-bandning uchinchi xatboshisi Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Qonun hujjatlari buzilganligi uchun ushlangan transport vositalarini saqlash xizmatlari koʻrsatish boʻyicha faoliyatni amalga oshirish tartibi toʻgʻrisidagi nizom 3-ilovaga muvofiq tasdiqlansin.
3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:
bir oy muddatda — Oʻzbekiston Respublikasi Moliya vazirligi bilan kelishgan holda transport vositalarini olib kelish (tashish) va saqlash boʻyicha koʻrsatiladigan xizmatlar uchun toʻlovning cheklangan miqdorini tasdiqlasinlar;
ikki oy muddatda — transport vositalarini saqlash boʻyicha xizmatlar koʻrsatuvchi yuridik shaxslar tanlovini oʻtkazsinlar;
ushbu qaror talablari bajarilishi toʻgʻrisida Oʻzbekiston Respublikasi Vazirlar Mahkamasiga 2012-yil 15-yanvarda axborot bersinlar.
4. Oʻzbekiston Respublikasi Ichki ishlar vazirligi Adliya vazirligi hamda boshqa manfaatdor vazirliklar va idoralar bilan birgalikda:
bir oy muddatda — qonun hujjatlariga ushbu qarordan kelib chiqadigan oʻzgartirishlar va qoʻshimchalar toʻgʻrisida;
ikki oy muddatda — Oʻzbekiston Respublikasining Maʼmuriy javobgarlik toʻgʻrisidagi kodeksiga toʻxtash va toʻxtab turish qoidalari buzilganligi uchun transport vositalarini ushlashni va toʻxtash joyiga majburiy olib kelishni nazarda tutadigan oʻzgartirishlar va qoʻshimchalar haqida takliflar kiritsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.A. Xoʻjayev va Oʻzbekiston Respublikasi Ichki ishlar vaziri B.A. Matlyubov zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2011-yil 25-may,
149-son
Vazirlar Mahkamasining 2011-yil 25-maydagi 149-son qaroriga
1-ILOVA
Qonun hujjatlari buzilganligi uchun ushlangan transport vositalarini toʻxtash joylariga olib kelish, joylashtirish va saqlash tartibi toʻgʻrisida
NIZOM
1. Ushbu Nizom qonun hujjatlari buzilganligi uchun ushlangan transport vositalarini (keyingi oʻrinlarda transport vositalari deb ataladi) toʻxtash joylariga olib kelish, joylashtirish va saqlash tartibini belgilaydi.
Oldingi tahrirga qarang.
2. Transport vositalarini toʻxtash joyiga joylashtirish toʻgʻrisida davlat organining transport vositalarini ushlash huquqiga ega boʻlgan vakolatli xodimi tomonidan qaror qabul qilinganda, bu toʻgʻrisida “Jarima maydonchasi” axborot tizimi orqali transport vositalarini olib kelish va saqlash xizmatlarini koʻrsatuvchi yuridik shaxslarga hamda tegishli davlat organlarining navbatchilik qismlariga xabar yuboriladi.
Transport vositalarini toʻxtash joylariga olib kelish, joylashtirish va saqlashning elektron hisobi “Jarima maydonchasi” axborot tizimida yuritiladi.
(2-band Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Oldingi tahrirga qarang.
3. Haydovchi hozir boʻlmaganda transport vositasi ushlanganligi toʻgʻrisida darhol ichki ishlar hududiy organining navbatchilik qismiga “Jarima maydonchasi” axborot tizimi orqali maʼlum qilinadi. Ichki ishlar organining tezkor navbatchisi transport vositasining egasini (egasining vakilini) aniqlash uchun oʻzining imkoni yetgan barcha choralarni koʻradi va imkoni boricha qisqa muddatda transport vositasi ushlanganligi toʻgʻrisida egasini (egasining vakilini) xabardor qiladi.
(3-band Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Oldingi tahrirga qarang.
4. Transport vositasi ushlangan joyga eng yaqin boʻlgan hududdagi transport vositalarini olib kelish va saqlash xizmatlarini koʻrsatuvchi yuridik shaxsga “Jarima maydonchasi” axborot tizimi orqali transport vositasini toʻxtash joyiga joylashtirish toʻgʻrisida xabar kelib tushgan hollarda, ushbu yuridik shaxsning vakili zarur maxsus texnik vosita (evakuator)ni ushlash joyiga darhol yuborish choralarini koʻradi.
(4-band Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Oldingi tahrirga qarang.
5. Transport vositasini ushlagan davlat organining vakolatli xodimi oʻz vakolatlari doirasida haydovchini transport vositasini boshqarishdan chetlatish yuzasidan zarur xatti-harakatlarni amalga oshiradi, maʼmuriy huquqbuzarlik toʻgʻrisidagi bayonnomani yoki transport vositasi ushlanganligi toʻgʻrisidagi qarorni rasmiylashtiradi, transport vositasi toʻxtash joyiga joylashtirilgan taqdirda undagi mol-mulk roʻyxatini oʻz ichiga oladigan tegishli dalolatnomani tuzadi.
(5-bandning birinchi xatboshisi Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Dalolatnoma nusxasi unga nisbatan koʻrsatib oʻtilgan chora qoʻllanilgan shaxsga, shuningdek transport vositasini toʻxtash joyida saqlash uchun masʼul boʻlgan shaxsga topshiriladi.
Oldingi tahrirga qarang.
6. Ushlash joyiga kelgan yuridik shaxsning vakili:
transport vositasini toʻxtash joyiga joylashtirish maqsadida uni qabul qilish uchun yonida xizmat guvohnomasiga hamda yuridik shaxs tomonidan berilgan transport vositalarini tashish (evakuatsiya qilish) huquqini beruvchi ishonchnomaga ega boʻlishi kerak;
maʼmuriy huquqbuzarlik toʻgʻrisidagi bayonnoma yoki transport vositasini ushlash toʻgʻrisidagi qaror asosida qabul qilish-topshirish dalolatnomasini tuzgan va konstruksiyada kirish nazarda tutilgan joylarni (eshiklar, yukxona, kapot, benzin baki qopqogʻi va boshqalar) surgʻuchlagan holda ushlangan transport vositasini koʻzdan kechiradi va uni davlat organining transport vositalarini ushlash huquqiga ega boʻlgan vakolatli xodimidan qabul qilib oladi;
transport vositasini toʻxtash joyiga olib kelish (tashish) va unga joylashtirish choralarini koʻradi.
Qonunchilik hujjatlariga muvofiq transport vositalarini boshqarishdan chetlashtirish nazarda tutilgan huquqbuzarlikni sodir etgan shaxslarga tegishli transport vositalari davlat organining transport vositalarini ushlash huquqiga ega boʻlgan vakolatli xodimi tomonidan transport vositalarini toʻxtash joylariga olib borilishi mumkin.
(6-band Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
7. Transport vositalarini qabul qilish kechayu kunduz amalga oshiriladi.
8. Toʻxtash joyidagi transport vositasi oldiga haydovchining (egasining, egasining vakilining) kelishiga faqat transport vositasini toʻxtash joyiga joylashtirish toʻgʻrisida qaror qabul qilgan organning ruxsatidan keyin, uni saqlash toʻgʻrisidagi masʼul shaxs hozir boʻlganida yoʻl qoʻyiladi, bu haqda tashrif buyurganlarni hisobga olish jurnalida yozuv qayd etiladi.
Tashrif buyurganlarni hisobga olish jurnali ip oʻtkazib tikiladi va ichki ishlar organlari tomonidan roʻyxatga olinadi.
Oldingi tahrirga qarang.
9. Transport vositasini ushlash muddati maʼmuriy huquqbuzarlik toʻgʻrisida bayonnoma tuzilgan yoki transport vositasini ushlash toʻgʻrisida qaror chiqarilgan paytdan boshlab hisoblanadi.
(9-bandning birinchi xatboshisi Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Transport vositasini saqlash muddati u toʻxtash joyiga joylashtirilgan paytdan boshlab soatlarda hisoblanadi.
Oldingi tahrirga qarang.
10. Transport vositasini ushlab turish sabablari bartaraf etilgandan keyin transport vositasini toʻxtash joyidan olib chiqishga “Jarima maydonchasi” axborot tizimi orqali ruxsat beriladi.
Transport vositasini toʻxtash joyidan olib chiqishga ruxsat berish toʻgʻrisidagi xabar tegishli vakolatli davlat organining mansabdor shaxsi tomonidan transport vositasi haydovchisiga axborot tizimlari orqali elektron yoki mobil telefonga qisqa xabar (SMS) tarzida, shuningdek, transport vositalarini olib kelish va saqlash xizmatlarini koʻrsatuvchi yuridik shaxsga “Jarima maydonchasi” axborot tizimi orqali yuboriladi.
(10-band Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Oldingi tahrirga qarang.
11. Transport vositasi haydovchiga (egasiga, egasining vakiliga) transport vositalarini olib kelish va saqlash xizmatlarini koʻrsatuvchi yuridik shaxsga koʻrsatilgan xizmatlar uchun haq toʻlangandan keyin tegishli vakolatli davlat organining mansabdor shaxsi tomonidan “Jarima maydonchasi” axborot tizimi orqali berilgan ruxsatnoma asosida beriladi.
Transport vositalarini toʻxtash joylaridan berish kunu-tun amalga oshiriladi.
(11-band Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Oldingi tahrirga qarang.
12. Ushlangan transport vositalari hisobi, transport vositalarini olib kelish va saqlash boʻyicha koʻrsatilgan xizmatlar soni va amalga oshirilgan toʻlovlar miqdori “Jarima maydonchasi” axborot tizimi orqali yuritiladi.
(12-band Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
13. Transport vositasini tashish yoki saqlash paytida unga va uning ichidagi mol-mulkka yetkazilgan zarar qonun hujjatlariga muvofiq qoplanadi.
14. Transport vositasi qabul qilish-topshirish dalolatnomasi boʻyicha toʻxtash joyi vakiliga berilguniga qadar transport vositasining saqlanishi uchun transport vositasi egasi oldida qonun hujjatlariga muvofiq tegishli davlat organlari javob beradilar.
15. Transport vositasi toʻxtash joyiga joylashtirilgandan keyin uning saqlanishi uchun transport vositalarini toʻxtash joyiga olib kelish va saqlash boʻyicha xizmatlar koʻrsatuvchi yuridik shaxslar javob beradilar.
Keyingi tahrirga qarang.
16. Ushbu Nizom talablari buzilishida aybdor boʻlgan shaxslar qonun hujjatlariga muvofiq javob beradilar.
 LexUZ sharhi
Qarang: Oʻzbekiston Respublikasi Maʼmuriy javobgarlik toʻgʻrisidagi kodeksining XI bobi (Transportdagi, yoʻl xoʻjaligi va aloqa sohalaridagi huquqbuzarliklar uchun maʼmuriy javobgarlik).
Oldingi tahrirga qarang.
17. Ushbu Nizom talablariga rioya qilinishi ustidan nazorat qilish ishlarini umumiy muvofiqlashtirish Oʻzbekiston Respublikasi Ichki ishlar vazirligining Yoʻl harakati xavfsizligi xizmati tomonidan amalga oshiriladi.
(17-band Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Oldingi tahrirga qarang.
Vazirlar Mahkamasining 2011-yil 25-maydagi 149-son qaroriga
2-ILOVA
Qonun hujjatlari buzilganligi uchun ushlangan transport vositalarini saqlash xizmatlarini koʻrsatuvchi yuridik shaxslarni ochiq tanlov asosida elektron tarzda tanlab olish tartibi toʻgʻrisida
NIZOM
1-bob. Umumiy qoidalar
1. Ushbu Nizom qonun hujjatlari buzilganligi uchun ushlangan transport vositalarini (keyingi oʻrinlarda — transport vositalari) saqlash xizmatlarini koʻrsatuvchi yuridik shaxslarni ochiq tanlov asosida (keyingi oʻrinlarda — tanlov) elektron tarzda tanlab olish tartibini belgilaydi.
2. Transport vositalarini saqlash boʻyicha pulli xizmatlar koʻrsatish faoliyatini amalga oshirishda qonunchilik hujjatlari talablariga toʻliq rioya etilishini taʼminlashga qodir boʻlgan yuridik shaxslarni aniqlash tanlov oʻtkazishning maqsadi hisoblanadi.
Tanlov Oʻzbekiston Respublikasining har bir hududi (Qoraqalpogʻiston Respublikasi, viloyatlar va Toshkent shahri) boʻyicha alohida oʻtkaziladi.
Har bir hududda tanlov asosida hududning maʼmuriy-hududiy boʻlinishining joylashishidan kelib chiqqan holda, transport vositalarini saqlash xizmatlarini koʻrsatuvchi bir necha yuridik shaxslar aniqlanishi mumkin.
3. Ushbu Nizomda quyidagi tushunchalardan foydalaniladi:
affillanganlik xususiyatiga ega aloqalar — tadbirkorlik faoliyati bilan shugʻullanuvchi yuridik yoki jismoniy shaxslarning bir-birlari faoliyatiga taʼsir koʻrsatishi;
vakolatli vakil — tanlovda qatnashish uchun talabgor — tashkilot rahbari yoki u tomonidan ishonchnoma asosida vakil qilingan jismoniy shaxs;
vakolatli organ — Oʻzbekiston Respublikasi Ichki ishlar vazirligi va uning hududiy boʻlinmalari;
tanlov takliflari — tanlov qatnashchisining transport vositalarini saqlash boʻyicha pulli xizmatlar koʻrsatish faoliyatini amalga oshirishda qonunchilik hujjatlari talablariga muvofiqligini tasdiqlovchi hujjatlari;
tanlov predmeti — transport vositalarini saqlash boʻyicha xizmatlar koʻrsatishga boʻlgan huquq;
talabgor — taklif etilgan shartlarda tanlovda qatnashish niyatini maʼlum qilgan yuridik shaxs;
tanlov qatnashchisi — tanlovda qatnashishga qoʻyilgan talabgor;
tanlov gʻolibi — tanlov yakunlariga koʻra taklifi eng maqbul deb topilgan qatnashchi.
4. Tanlov Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining (keyingi oʻrinlarda — YHXX) Yagona avtomatlashtirilgan axborot tizimi (keyingi oʻrinlarda — axborot tizimi) orqali oʻtkaziladi.
YHXX va uning tegishli hududiy boʻlinmalari tanlovni tashkil etish va oʻtkazish boʻyicha masʼul hisoblanadi.
5. Tanlovni oʻtkazish quyidagi tamoyillarga asoslanadi:
transport vositalarini saqlash xizmatlarini koʻrsatish sohasida raqobat muhitini yaratish;
qonuniylik, ochiqlik, shaffoflik va baholashning xolisligi;
xizmat koʻrsatuvchilarning tanlov hujjatlarida qayd etilgan yagona talablar asosida raqobatlashishi;
sogʻlom raqobat uchun shart-sharoitlarning tengligi;
tanlovlarni faqat axborot tizimi orqali elektron tarzda oʻtkazish;
tanlovda belgilangan talablarga eng toʻliq javob beradigan xizmat koʻrsatuvchini gʻolib deb topish.
6. Tanlov ochiq hisoblanadi va unda Oʻzbekiston Respublikasida belgilangan tartibda roʻyxatdan oʻtkazilgan har qanday yuridik shaxs qatnashishi mumkin.
Bankrot deb eʼlon qilingan yoki tugatish bosqichida boʻlgan yoxud mol-mulki xatlangan talabgorlar tanlovda ishtirok etishga qoʻyilmaydi.
7. Vakolatli organning tanlovni tashkil etish va oʻtkazish doirasidagi asosiy vakolatlari quyidagilar hisoblanadi:
tegishliligi boʻyicha hududning maʼmuriy-hududiy boʻlinishining joylashishidan kelib chiqqan holda transport vositalarini saqlash xizmatlarini koʻrsatuvchilar sonini aniqlash boʻyicha qarorlar qabul qilish;
oʻtkaziladigan tanlov toʻgʻrisidagi eʼlonlarni axborot tizimiga hamda ommaviy axborot vositalariga joylashtirish;
tanlov gʻolibining tanlov takliflarida koʻrsatilgan maʼlumotlarining haqiqiyligini oʻrganish;
tanlov gʻolibiga transport vositalarini saqlash xizmatlarini koʻrsatish huquqini tasdiqlovchi QR-kod (matrik shtrixli kod) qoʻyilgan elektron guvohnomalar berish;
tanlov gʻolibi bilan shartnoma tuzish;
transport vositalarini saqlash xizmatlari koʻrsatilishini nazorat qilish;
shartnoma shartlariga amal qilinmaslik holatlari yuzasidan dalolatnomalarni rasmiylashtirish va belgilangan tartibda shartnomani bekor qilish choralarini koʻrish.
8. Hudud transport vositalarini saqlash xizmatlarini koʻrsatuvchisiz qolgan holatda navbatdagi tanlov natijalari eʼlon qilingunga qadar ushlangan transport vositalari YHXX boʻlinmalariga tegishli joylarda vaqtincha saqlanadi.
9. Hudud quyidagi hollarda transport vositalarini saqlash xizmatlarini koʻrsatuvchisiz qolgan deb hisoblanadi:
tuzilgan shartnoma muddatidan avval bekor qilinsa;
tanlovda talabgorlardan birorta ham taklif kelib tushmasa.
2-bob. Tanlovni tashkil etish
10. Transport vositalarini saqlash xizmatlarini koʻrsatish yuzasidan tanlov tashkil etish va hujjatlarni rasmiylashtirish jarayoni ushbu Nizomga ilovaga muvofiq sxema boʻyicha amalga oshiriladi.
11. Vakolatli organ tanlovga qoʻyiladigan hududlar roʻyxatini tayyorlaydi, tanlov predmetini va vaqtini tanlov oʻtkazilishidan kamida oʻttiz kun oldin axborot tizimiga kiritadi va bu haqda ommaviy axborot vositalari orqali eʼlon qiladi.
Keyingi tahrirga qarang.
12. Tanlovda qatnashish uchun takliflar tanlov qatnashchilari tomonidan axborot tizimi orqali taqdim etiladi va bu maʼlumotlar tanlov qatnashchilari haqidagi maʼlumotlar boʻlib, ular ochiq hisoblanadi.
13. Tanlov qatnashchilari tomonidan tanlov takliflarini taqdim etish muddati tanlov eʼlon qilingan kundan boshlanib, oʻn besh ish kunini tashkil etadi va axborot tizimida koʻrsatiladi.
Tanlov takliflari belgilangan muddat yakunlangandan keyin qabul qilinmaydi.
14. Tanlov qatnashchisi tanlov takliflarini berish muddati tugaguniga qadar berilgan tanlov taklifini qaytarib olishga yoki unga oʻzgartirishlar kiritishga haqli.
15. Tanlov qatnashchilari tanlov boʻyicha belgilangan talablarni axborot tizimi orqali elektron tarzda yuklab olishlari mumkin.
16. Axborot tizimida tanlov oʻtkazilgunga qadar tanlov qatnashchilari tomonidan yuborilgan takliflarni koʻrish imkoniyati boʻlmasligi lozim.
17. Transport vositalarini saqlash xizmatlarini koʻrsatuvchi yuridik shaxslar toʻgʻrisidagi maʼlumotlar ochiq maʼlumot hisoblanadi.
3-bob. Tanlov boʻyicha takliflar mazmuni
18. Tanlov takliflarida quyidagi talablar va maʼlumotlar boʻlishi kerak:
bitta transport vositasining toʻxtash joyi uchun tavsiya etilayotgan maydon;
xizmatlar koʻrsatish vaqtida transport vositalarini saqlash va yongʻin xavfsizligini taʼminlash boʻyicha tadbirlar;
xizmatlar koʻrsatish qiymati;
transport vositasining saqlash joyiga oʻz vaqtida yetkazib berilishini taʼminlash uchun maxsus texnika vositalarining (evakuatorlar, tirkash troslarining) mavjudligi;
toʻxtash joyining shakli (yopiq binoda, ochiq holda);
transport vositalarini saqlash xizmatlarini koʻrsatish faoliyatiga qoʻyiladigan talablarga rioya etish uchun talabgorda imkoniyatlar mavjudligi toʻgʻrisida dalolat beruvchi boshqa qoʻshimcha maʼlumotlar.
19. Tanlov qatnashchilari tanlov boʻyicha takliflarning barcha bandlariga doir haqqoniy, toʻliq va batafsil axborotlarni yuborishlari shart.
4-bob. Tanlov takliflarini baholash va gʻolibni aniqlash
20. Tanlov qatnashchilari tomonidan tanlov boʻyicha kelib tushgan takliflar axborot tizimi orqali baholanadi.
21. Tanlov takliflarini baholash va gʻolibni aniqlash quyidagi tartibda amalga oshiriladi:
a) bitta transport vositasining toʻxtash joyi uchun tavsiya etilayotgan maydon uchun — hisoblangan darajadagidan (25 kv metr) ortiq boʻlgan har bir punkt uchun ortib boruvchi koeffitsiyent qoʻllangan holda, besh balli tizim boʻyicha;
b) saqlash va yongʻin xavfsizligini taʼminlash boʻyicha tadbirlar uchun — oʻn balli tizim boʻyicha. Baholash quyidagi tarzda amalga oshiriladi:
binolar bilan toʻxtab turishga qoʻyilgan transport vositasi oraligʻidagi normativ boʻyicha yongʻin xavfsizligi masofasini (6 m) taʼminlaganlik uchun — 5 ball. Yongʻinga qarshi normativdan ortiq masofa (6 metrdan ortiq) taʼminlangan taqdirda, yongʻinga qarshi masofaning oshirilgan har bir metri uchun ortib boruvchi koeffitsiyent qoʻllanadi;
toʻxtash joyidan yongʻin gidrantigacha 150 metr masofada tashqi yongʻinga qarshi suv taʼminoti tizimi taʼminlaganligi uchun — 5 ball. Toʻxtash joyidan yongʻin gidrantigacha boʻlgan masofa kamaytirilgan taqdirda masofaning har bir metri uchun ortib boruvchi koeffitsiyent qoʻllanadi;
v) transport vositalarini olib kelish va saqlash xizmatlarini koʻrsatish qiymati uchun — Oʻzbekiston Respublikasi Iqtisodiyot va moliya vazirligi bilan kelishgan holda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan belgilanadigan cheklangan miqdor darajasiga nisbatan kamaytirilgan har bir punkt uchun ortib boruvchi koeffitsiyent qoʻllangan holda, oʻn balli tizim boʻyicha;
g) maxsus texnika vositalarining (evakuatorlar, tirkash troslarining) mavjudligi uchun — tabaqalashtirilgan ballar boʻyicha (har bir evakuator uchun — 5 balldan va har bir tirkash trosi uchun — 3 balldan);
d) yopiq binodagi toʻxtash joyi uchun — 15 ball, ochiq joydagi toʻxtash joyi uchun — 5 ball.
Qatnashchi tanlov takliflarining yakuniy bahosi yuqorida sanab oʻtilgan koʻrsatkichlar boʻyicha ballarni qoʻshish yoʻli bilan aniqlanadi.
Takliflari eng yuqori ballar sonini olgan qatnashchi tanlov gʻolibi deb eʼtirof etiladi.
Baholash natijalariga koʻra bir nechta qatnashchi teng ballar olgan boʻlsa, u holda gʻolib teng ballar olgan qatnashchilarning tanlov takliflaridagi quyidagi mezonlardan kelib chiqib aniqlanadi:
belgilangan talablardan qoʻshimcha jihozlar va transport vositalarini saqlash uchun sharoitlar (transport vositalarini quyosh, yomgʻir-qordan saqlash uchun sharoit yaratilgan holatiga qarab) yaratilganligiga qarab;
ushlangan transport vositalarini saqlash joylarida maxsus transport vositalarining (evakuatorning) ishlab chiqarilgan yiliga qarab;
ushlangan transport vositalarini saqlash joylarining sigʻimiga qarab;
katta gabaritli transport vositalarini saqlash uchun imkoniyatning mavjudligiga qarab takliflar qayta koʻrib chiqilib, gʻolib aniqlanadi.
22. Tanlov yakunlari, xususan, qatnashchilardan kelib tushgan takliflar mazmuni, hisoblangan ballar, qatnashchilar toʻgʻrisidagi maʼlumotlar, takliflarda koʻrsatilgan maʼlumotlarning haqiqiyligini oʻrganish natijalari axborot tizimida saqlanadi.
23. Agar tanlov davomida faqat bir nafar qatnashchidan taklif kelib tushsa, uning tanlov takliflari qoʻyilayotgan talablarga muvofiq boʻlganda mazkur qatnashchi gʻolib deb hisoblanadi.
Agar qatnashchining takliflari qoʻyilayotgan talablarga muvofiq boʻlmasa, axborot tizimi tomonidan rad etiladi va takroriy tanlov tashkil etiladi.
24. Tanlov natijalari boʻyicha maʼlumotlar vakolatli organning rasmiy veb-saytiga tanlov oʻtkazilib, baholangandan keyin darhol joylashtiriladi.
5-bob. Tanlov gʻolibining takliflarida koʻrsatilgan maʼlumotlarning haqiqiyligini oʻrganish
25. Tanlov gʻolibining takliflari vakolatli organ hamda Oʻzbekiston Respublikasi Transport vazirligi hamda Iqtisodiyot va moliya vazirligi huzuridagi Kadastr agentligining masʼul xodimlari tomonidan transport vositalarini saqlash uchun tashkil etilgan joyga chiqqan holda oʻrganiladi.
Zarurat boʻlganda, takliflardagi maʼlumotlarning haqiqiyligini oʻrganish jarayoniga boshqa manfaatdor vazirlik va idoralar vakillari jalb etiladi.
26. Takliflardagi maʼlumotlarning haqiqiyligini oʻrganish vaqti va manzili oldindan kelishiladi hamda tanlov gʻolibi aniqlangandan keyin besh kun ichida amalga oshiriladi.
Takliflardagi maʼlumotlarning haqiqiyligini oʻrganish jarayonini ochiq va shaffof tashkil etish maqsadida ushbu xizmatlarni koʻrsatuvchilar kuzatuvchi sifatida ishtirok etishlari mumkin.
27. Vakolatli organning masʼul xodimi maʼlumotlarning haqiqiyligini oʻrganishdan oldin tanlovning barcha ishtirokchilari bilan affillanganlik xususiyatiga ega aloqalari mavjudligi toʻgʻrisidagi maʼlumotni axborot tizimiga kiritishi kerak.
Ishtirokchi va uning affillangan shaxsi tanlov boʻyicha ayni bitta lotda ishtirok etish huquqiga ega emas.
28. Tanlov ishtirokchilari bilan affillanganlik xususiyatga ega aloqalari boʻlgan vakolatli organning masʼul xodimlari keltirilgan maʼlumotlarning haqiqiyligini oʻrganishda ishtirok etmasligi lozim.
Uning oʻrniga boshqa xodim keltirilgan maʼlumotlarning haqiqiyligini oʻrganish uchun tayinlanadi. Masʼul xodim tomonidan affillanganlik toʻgʻrisida kiritilgan maʼlumotlar axborot tizimida yopiq saqlanadi.
29. Vakolatli organ tanlov gʻolibining axborot tizimi orqali yuborgan takliflardagi maʼlumotlarning haqiqiyligiga shubha yuzaga kelsa, ularni tasdiqlovchi hujjatlarni soʻrab olishga haqli.
30. Oʻrganish natijalari va tegishli fototasvirlar vakolatli organ tomonidan axborot tizimiga yuklanadi. Yuklangan maʼlumotlar shartnomaning amal qilish muddati yakunlanishiga qadar saqlanadi.
31. Vakolatli organ tomonidan oʻtkazilgan oʻrganish natijalari yuzasidan tanlov qatnashchilariga tushuntirishlar beriladi.
6-bob. Tanlov gʻolibi bilan hujjatlarni rasmiylashtirish va bekor qilish
32. Vakolatli organ bilan tanlov gʻolibi oʻrtasidagi oʻzaro huquq va majburiyatlarni belgilovchi shartnoma ommaviy oferta shaklida axborot tizimiga tanlov eʼlon qilingan paytda joylashtiriladi.
Tanlov gʻolibi aniqlangandan soʻng besh kun ichida joylashtirilgan shartnomani akseptlaydi (taklifni qabul qiladi).
33. Quyidagi hollarda tanlov qatnashchisining gʻolibligi bekor qilinadi:
taklif qilingan maʼlumotlar vakolatli organga (oldindan kelishilgan vaqt va manzilga) ularning haqiqatda mavjudligini oʻrganish uchun taqdim qilinmasa;
axborot tizimiga joylashtirilgan shartnoma belgilangan muddatda sababsiz akseptlanmasa;
takliflardagi maʼlumotlarning haqiqiyligi tasdiqlanmaganligi oqibatida toʻplangan ballar keyingi qatnashchi toʻplagan ballardan kamayib ketsa.
Tanlov qatnashchisining gʻolibligi bekor qilingan taqdirda, eng koʻp ballar miqdori boʻyicha keyingi qatnashchi tanlov gʻolibi deb eʼtirof etiladi. Keyingi qatnashchining tanlov takliflaridagi maʼlumotlarning haqiqiyligi belgilangan tartibda oʻrganiladi.
34. Quyidagilar transport vositalarini saqlash xizmatlarini koʻrsatish huquqini bekor qilish uchun asoslar hisoblanadi:
yuridik shaxsning transport vositalarini saqlash boʻyicha faoliyatni amalga oshirish imkoni yoʻqligi toʻgʻrisida komissiyaga yuborgan yozma bildirishnomasi;
transport vositalarini saqlash xizmatlarini koʻrsatish yuzasidan shartnomaning unda koʻrsatilgan asoslar boʻyicha bekor qilinishi yoki amal qilish muddatining tugashi;
yuridik shaxsning bankrot deb eʼlon qilinishi yoki uni tugatish amaliyotining boshlanishi.
35. Taklif yuborgan yagona qatnashchining yoki barcha qatnashchilarning tanlov gʻolibligi bekor qilingan taqdirda, mazkur hudud boʻyicha darhol qayta tanlov eʼlon qilinadi.
36. Elektron axborot tizimidagi tanlov yakunlari asosida tanlov gʻolibi bilan shartnomalar tuzish hamda ularning talab va shartlariga rioya etilishi ustidan nazorat qonunchilik hujjatlariga muvofiq amalga oshiriladi.
Keyingi tahrirga qarang.
37. Tanlov gʻolibi bilan vakolatli organ oʻrtasida 10 yil muddatga transport vositalarini saqlash xizmatlarini koʻrsatish yuzasidan shartnoma tuziladi.
Keyingi tahrirga qarang.
38. Shartnomaning amal qilish muddati tugashidan kamida oltmish kun avval hudud boʻyicha qayta eʼlon beriladi.
39. Transport vositalarini saqlash xizmatlarini koʻrsatuvchi tomonidan shartnoma talab va shartlariga rioya qilmaslik holati aniqlansa, vakolatli organning masʼul xodimlari tomonidan dalolatnoma rasmiylashtiriladi.
40. Tanlov gʻolibi taklif etgan taʼrif darajasi boʻyicha kamida ikki yil transport vositalarini saqlash boʻyicha xizmatlarni koʻrsatish majburiyatini oladi.
41. Shartnoma shartlariga qoʻshimcha yoki oʻzgartirishlar tomonlarning qoʻshimcha kelishuviga asosan kiritiladi.
7-bob. Yakunlovchi qoidalar
42. Tanlov ishtirokchilari tanlov natijalaridan norozi boʻlgan hollarda, belgilangan tartibda sudga yoki yuqori turuvchi organlarga murojaat qilishga haqli.
43. Ushbu Nizom talablarining buzilishida aybdor boʻlgan shaxslar qonunchilikda belgilangan tartibda javob beradilar.
 LexUZ sharhi
Qarang: Oʻzbekiston Respublikasi Maʼmuriy javobgarlik toʻgʻrisidagi kodeksining XI bobi (Transportdagi, yoʻl xoʻjaligi va aloqa sohalaridagi huquqbuzarliklar uchun maʼmuriy javobgarlik).
Qonun hujjatlari buzilganligi uchun ushlangan transport vositalarini saqlash xizmatlarini koʻrsatuvchi yuridik shaxslar tanlovini ochiq tanlov jarayonlari orqali elektron tarzda tashkil etish va oʻtkazish tartibi toʻgʻrisidagi nizomga
ILOVA
Qonun hujjatlari buzilganligi uchun ushlangan transport vositalarini saqlash xizmatlarini koʻrsatuvchi yuridik shaxslar uchun tanlov tashkil etish va hujjatlarni rasmiylashtirish jarayoni
SXEMASI

Bosqichlar

Subyektlar

Tadbirlar

Muddatlar


1-bosqich

Yoʻl harakati xavfsizligi xizmati boʻlinmalari

Tanlovga qoʻyiladigan hududlar roʻyxatini shakllantiradi, lot talablari, tanlov predmetini axborot tizimiga kiritadi va bu haqda ommaviy axborot vositalari orqali eʼlon beradi.

Tanlov oʻtkazilishidan kamida 30 kun oldin


2-bosqich

Ariza beruvchi

1. Yoʻl harakati xavfsizligi xizmatining Yagona avtomatlashtirilgan axborot tizimi orqali roʻyxatdan oʻtadi.

2. Elektron shakldagi soʻrovnomani toʻldiradi (zarur hujjatlarning elektron shaklini ilova qilgan holda) hamda oʻz elektron raqamli imzosi bilan tasdiqlaydi.

Tanlov eʼlon qilingandan soʻng 15 kun ichida


3-bosqich

Yagona avtomatlashtirilgan axborot tizimi

Soʻrovnomani tegishli Yoʻl harakati xavfsizligi xizmatiga joʻnatiladi.

Avtomatik ravishda


4-bosqich

Yagona avtomatlashtirilgan axborot tizimi

1. Tanlov qatnashchilari tomonidan tanlov boʻyicha kelib tushgan takliflar axborot tizimi orqali baholanadi.

2. Tanlov boʻyicha takliflarni baholash har bir qatnashchi boʻyicha aniqlanadi. Eng koʻp ball toʻplagan qatnashchi tanlov gʻolibi deb eʼtirof etiladi.

15 kun ichida


5-bosqich

Yagona avtomatlashtirilgan axborot tizimi

Tanlov natijalari boʻyicha maʼlumotlar tanlov oʻtkazilgan kuniyoq vakolatli organning rasmiy veb-saytida eʼlon qilinadi.

Darhol


6-bosqich

?zbekiston Respublikasi Ichki ishlar vazirligi

Tanlov gʻolibi bilan transport vositalarini saqlash xizmatlarini koʻrsatish yuzasidan shartnoma tuzadi.

10 yil muddatga


Shartnomaning amal qilish muddati tugashidan kamida oltmish kun oldin hudud boʻyicha qayta eʼlon beradi.

60 kun oldin

(2-ilova Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Vazirlar Mahkamasining 2011-yil 25-maydagi 149-son qaroriga
3-ILOVA
Qonun hujjatlari buzilganligi uchun ushlangan transport vositalarini saqlash xizmatlari koʻrsatish boʻyicha faoliyatni amalga oshirish tartibi toʻgʻrisida
NIZOM
I. Umumiy qoidalar
1. Ushbu Nizom yuridik shaxslar tomonidan qonun hujjatlari buzilganligi uchun ushlangan transport vositalarini (keyingi oʻrinlarda transport vositalari deb ataladi) saqlash xizmatlari koʻrsatish boʻyicha faoliyatni belgilangan tartibda amalga oshirish tartibini belgilaydi.
II. Transport vositalarini saqlash xizmatlari koʻrsatish boʻyicha faoliyatni tashkil etish va amalga oshirish tartibi
Oldingi tahrirga qarang.
2. Transport vositalarini saqlash xizmatlari transport vositalarini saqlash xizmatlarini koʻrsatish uchun qonunchilikda berilgan yer uchastkasini olgan va belgilangan tartibda tanlab olingan yuridik shaxslar tomonidan koʻrsatiladi.
(2-band Oʻzbekiston Respublikasi Vazirlar Mahkamasining 2022-yil 8-iyuldagi 375-sonli qarori tahririda — Qonunchilik maʼlumotlari milliy bazasi, 08.07.2022-y., 09/22/375/0618-son)
3. Ushbu Nizomning 2-bandida koʻrsatilgan masalalar boʻyicha qarorlar ushbu Nizom talablari hisobga olingan holda yuridik shaxsning arizasi asosida mahalliy davlat hokimiyati organlari tomonidan qonun hujjatlarida belgilangan tartibda qabul qilinadi.
Oldingi tahrirga qarang.
(4-band Oʻzbekiston Respublikasi Vazirlar Mahkamasining 2022-yil 8-iyuldagi 375-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 08.07.2022-y., 09/22/375/0618-son)
5. Transport vositalarini saqlash joylari transport vositalarini saqlash uchun moʻljallangan toʻxtash joylarini joylashtirish va jihozlashga qoʻyiladigan texnik shartlar talablariga, shu jumladan quyidagi talablarga javob berishi kerak:
Oldingi tahrirga qarang.
a) qattiq qoplama, kuzatuv kameralari, yoritish, axlat toʻplash uchun konteynerlar, suvni tindiradigan yomgʻir kanalizatsiyasi, yongʻinga qarshi vositalar mavjudligi;
(5-bandning “a” kichik bandi Oʻzbekiston Respublikasi Vazirlar Mahkamasining 2023-yil 11-avgustdagi 358-sonli qarori tahririda — Qonunchilik maʼlumotlari milliy bazasi, 17.08.2023-y., 09/23/358/0620-son)
Keyingi tahrirga qarang.
b) hududga kirish va undan chiqish uchun maxsus ajratilgan joylar mavjudligi. Kirish (chiqish) joylari yoʻl harakati xavfsizligi talablarini taʼminlash hisobga olingan holda ajratilishi kerak;
v) hudud 2 metrdan past boʻlmagan temir-beton (metall, gʻisht, shlakoblok) devor bilan oʻralgan boʻlishi kerak. Oʻralgan hududda 50 ta va undan ortiq transport vositasini saqlash nazarda tutilgan toʻxtash joyi, kamida ikkita kirish (chiqish) yoʻllari boʻlishi kerak. Oʻralgan devorda darvozalarning kengligi kamida 4,5 metr boʻlishi kerak;
g) agar hudud bir necha qatorga joylashtiriladigan transport vositalarini saqlash imkonini bersa, u holda hudud ichida transport vositalarining xavfsiz harakatlanishi uchun polosalar ajratilishi kerak;
d) kirish (chiqish)ning ajratilgan joyiga nazoratchi kassirning xonasi tutashgan boʻlishi kerak, u yerda koʻrinarli joyda tashqi tomonga ushlangan transport vositalarini saqlash xizmatlari koʻrsatishning tariflari va shartlari toʻgʻrisida yirik harflarda (harflarning kattaligi kamida 3 sm boʻlishi kerak) maʼlumot joylashtiriladi;
Oldingi tahrirga qarang.
e) nogironligi boʻlgan shaxslar uchun maxsus jihozlangan transport vositalari uchun kamida ikkita toʻxtash joyi mavjudligi;
(5-bandning “e” kichik bandi Oʻzbekiston Respublikasi Vazirlar Mahkamasining 2022-yil 8-fevraldagi 62-sonli qarori tahririda — Qonunchilik maʼlumotlari milliy bazasi, 08.02.2022-y., 09/22/62/0111-son)
j) bitta transport vositasining toʻxtash joyi uchun hisoblangan maydon 20 kv metrga teng deb qabul qilinadi;
z) toʻxtash joyi hududida xizmat koʻrsatuvchi xodimlar, qoʻriqlash xodimlari uchun xonalar boʻlishi va u begona shaxslarning kirishiga imkon bermaydigan holda toʻsilishi kerak;
i) binolar va saqlanayotgan transport vositalari oʻrtasidagi yongʻinga qarshi oraliq loyihalashtirish normalari talablariga muvofiq, biroq kamida 6 metr boʻlishi kerak;
k) ushlangan transport vositalarini toʻxtash joyi hududida joylashtirish har bir saqlanayotgan transport vositasiga maxsus texnikaning kirib borishi va yongʻin gidrantlariga yongʻin avtomobillarining yaqinlashishi imkoniyati hisobga olingan holda amalga oshiriladi, bunda asosiy oʻtish joylarining kengligi kamida 4 metr boʻlishi kerak. Boshi berk yoʻllarning oxirida 12 x 12 metr oʻlchamli aylanib olish maydonchasi boʻlishi kerak;
l) yongʻinga qarshi tashqi suv taʼminoti tizimi bilan taʼminlangan aholi punktlarida toʻxtash joyidan yongʻin gidrantigacha boʻlgan eng uzoq masofa 150 metrdan ortiq boʻlmasligi kerak. Toʻxtash joyi suvsiz tumanda joylashtirilgan taqdirda uning hududida kamida 54 kub metr hajmli yongʻinga qarshi hovuz boʻlishi kerak. Yongʻinga qarshi shchitlar va yongʻin oʻchirishning birlamchi vositalari soni yongʻin xavfsizligi qoidalariga muvofiq boʻlishi kerak;
m) toʻxtash joylari hududida joylashgan va qoʻriqlash postlarini joylashtirish, keluvchilarni qabul qilish, hujjatlarni rasmiylashtirish va toʻlov uchun moʻljallangan binolar va inshootlar telefon aloqasi, ichki ishlar organlari naryadlarini tez chaqirish knopkasi bilan taʼminlangan, yongʻinni oʻchirishning birlamchi vositalari normativ soni bilan jihozlangan, sunʼiy yoritilgan boʻlishi kerak;
n) toʻxtash joylari hududida yongʻin gidrantlarining joylashish joyi OʻzDS boʻyicha yorituvchi koʻrsatkichlar bilan taʼminlanadi va transport vositasini quduq oldida va quduqning har ikki tomonida 1,5 metr masofada yongʻin gidranti qudugʻi lyuki ustida joylashtirishga toʻsqinlik qiladigan 15 sm balandlikdagi bordyur bilan toʻsiladi;
o) toʻxtash joyi har bir 10 transport vositasiga 1 tros (buksir) hisobidan evakuatorlar, tortish troslari (yuk transport vositalari saqlangan taqdirda qattiq shataklar) bilan jihozlanadi.
6. Toʻxtash joyida:
hududga begona shaxslarni qoʻyish;
transport vositalarini ularni joylashtirish rejasini buzgan holda toʻxtash joylarining hisoblangan sonidan ortiqcha qabul qilish va joylashtirish, transport vositalari oʻrtasidagi masofani kamaytirish;
chiqish darvozalarini va oʻtish yoʻllarini tiqilinch qilib qoʻyish;
biror-bir oʻt oladigan va taʼmirlash ishlarini bajarish, eshiklar va dvigatellarni muzdan tozalash uchun ochiq olovdan foydalanish, yengil alangalanadigan va yonuvchi suyuqliklarni saqlash va ulardan foydalanish;
transport vositalarini yonilgʻi baklarini ogʻzi ochiq holda saqlash taqiqlanadi.
7. Transport vositalarini saqlash xizmatlari koʻrsatuvchi yuridik shaxslar ushlangan transport vositasini saqlash joyiga oʻz vaqtida olib kelishni taʼminlash uchun maxsus texnik vositalar (evakuatorlar, shatakka tortish troslari, qattiq shataklar)ning yetarlicha soniga ega boʻlishi kerak.
8. Transport vositalarini saqlash xizmatlari koʻrsatuvchi yuridik shaxslar fiskal xotiraga ega boʻlgan nazorat-kassa mashinasiga va plastik kartochkalardan toʻlovlarni qabul qiladigan hisob-kitob terminaliga ega boʻlishi kerak.
Transport vositalarini saqlash boʻyicha koʻrsatiladigan xizmatlar, shuningdek ularni tashish (evakuatsiya qilish) xarajatlari uchun haq toʻlash koʻrsatilgan xizmatlarni koʻrsatuvchi yuridik shaxs tomonidan tasdiqlangan, biroq Oʻzbekiston Respublikasi Moliya vazirligi bilan kelishgan holda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan belgilanadigan cheklangan miqdorlardan yuqori boʻlmagan tariflar boʻyicha amalga oshiriladi.
9. Transport vositalarini saqlash boʻyicha koʻrsatilgan xizmatlar, shuningdek ularni tashish (evakuatsiya qilish) xarajatlari hisob-kitobi har bir toʻliq soat uchun amalda saqlangan muddatdan va tashish (evakuatsiya qilish) boʻyicha sarflangan xarajatlardan kelib chiqib nazorat-kassa mashinasi yoki hisob-kitob terminali cheki majburiy berilgan holda transport vositasi hududdan chiqayotganda amalga oshiriladi.
10. Transport vositalarini saqlash boʻyicha koʻrsatilgan xizmatlar uchun, shuningdek ularni tashish (evakuatsiya qilish) sarflari uchun haq toʻlash ham naqd pul bilan, ham plastik kartochkalardan foydalangan holda naqd pulsiz hisob-kitob shaklida amalga oshiriladi.
III. Yakunlovchi qoidalar
11. Transport vositalarini saqlash xizmatlari koʻrsatish bilan shugʻullanuvchi yuridik shaxslarga soliq solish Oʻzbekiston Respublikasining Soliq kodeksida belgilangan tartibda amalga oshiriladi.
Keyingi tahrirga qarang.
12. Transport vositalarini toʻxtash joyiga olib kelish va saqlash boʻyicha xizmatlar koʻrsatuvchi yuridik shaxslar sanitariya va yongʻinga qarshi qoidalarga rioya qilinishi, transport vositalari toʻxtash joyiga va saqlash uchun olib kelinishi vaqtida saqlanishi (oʻgʻirlik, komplektlarning but boʻlmasligi va shikastlanishi), shuningdek transport vositasi salonidagi shaxsiy buyumlar saqlanishi uchun qonun hujjatlarida belgilangan tartibda javob beradilar.
13. Transport vositalarini olib kelish va saqlash boʻyicha xizmatlar koʻrsatuvchi yuridik shaxs:
tabiiy ofatlar (zilzila, dovul, suv toshqini va hokazolar) vaqtida transport vositalari shikastlanganligi;
transport vositalari ularni saqlash boʻyicha xizmatlar koʻrsatiladigan hududdan chiqqandan keyin berilgan transport vositalarini saqlashga tegishli daʼvolar uchun javob bermaydi.
14. Ushbu Nizom talablarini buzishda aybdor boʻlgan shaxslar qonun hujjatlariga muvofiq javob beradilar.
 LexUZ sharhi
Qarang: Oʻzbekiston Respublikasining Maʼmuriy javobgarlik toʻgʻrisidagi kodeksining XI-bobi (Transportdagi, yoʻl xoʻjaligi va aloqa sohalaridagi huquqbuzarliklar uchun maʼmuriy javobgarlik).
15. Ushbu Nizom talablariga rioya qilinishi ustidan nazorat qilish ishlarini umumiy muvofiqlashtirish Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan amalga oshiriladi.
(Oʻzbekiston Respublikasi qonun hujjatlari toʻplami, 2011-y., 20-21-son, 207-modda; 2013-y., 37-son, 485-modda; 2017-y., 33-son, 863-modda; Qonun hujjatlari maʼlumotlari milliy bazasi, 20.06.2019-y., 09/19/498/3310-son, 11.08.2019-y., 09/19/661/3571-son, 20.12.2019-y., 09/19/1014/4173-son; Qonunchilik maʼlumotlari milliy bazasi, 08.02.2022-y., 09/22/62/0111-son; 08.07.2022-y., 09/22/375/0618-son; 17.08.2023-y., 09/23/358/0620-son; 06.07.2026-y., 09/26/358/0693-son)