Xalq xo‘jaligini gidrometeorologik ta’minlashni yaxshilash, gidrometeorologiya xizmatining ilmiy-texnika bazasini mustahkamlash, tabiat hodisalari tufayli kelib chiqqan favqulodda vaziyatlarning oldini olish bo‘yicha o‘z vaqtida chora-tadbirlar ko‘rish maqsadida Vazirlar Mahkamasi qaror qiladi:

1. “Boshgidromet” boshqarmasi:

Qishloq xo‘jaligi vazirligi bilan tuzilgan shartnoma bo‘yicha agrometeorologik postlarni oqilona joylashtirish, ularni priborlar va asbob-uskunalar bilan jihozlash, ular ishiga uslubiy rahbarlik qilishni ta’minlash, texnik xodimlarni o‘rgatish ishlarini amalga oshirsin;

Qishloq xo‘jaligi vazirligi hamda Melioratsiya va suv xo‘jaligi vazirligi bilan birgalikda tezkor gidrometeorologik axborotning birlashgan tizimini yaratish haqidagi taklifni ishlab chiqsin va 1995-yil 1-iyulgacha Vazirlar Mahkamasiga kiritsin;

“O‘zistiqbolstat” davlat qo‘mitasi hamda Fan va texnika davlat qo‘mitasi bilan birgalikda gidrometeorologik kuzatishlarni amalga oshirish uchun zamonaviy priborlar va asbob-uskunalar yaratish va ularni respublikada ishlab chiqarish dasturi loyihasini tayyorlasin hamda 1995-yil 1-avgustgacha Vazirlar Mahkamasiga kiritsin.

2. O‘zbekiston Respublikasi Moliya vazirligi:

“Boshgidromet” boshqarmasiga 1995-yilda 1 va 2-ilovalarga muvofiq priborlar va asbob-uskunalar xarid qilish maqsadida O‘zbekiston respublika valyuta birjasi orqali sotib olinadigan 844 mln Rossiya rubli va 108 ming AQSh dollarini so‘m bilan qoplash uchun respublika budjetidan mablag‘ ajratsin;

har yili respublika budjetida “Boshgidromet” boshqarmasi tomonidan taqdim etiladigan hisob-kitoblarni hisobga olgan holda ko‘rsatib o‘tilgan maqsadlarga mablag‘larni nazarda tutsin.

3. O‘zbekiston Respublikasi Mudofaa vazirligi:

“Boshgidromet” boshqarmasini uning buyurtmanomalari bo‘yicha gidrometeorologik jarayonlarga faol ta’sir ko‘rsatish uchun zarur bo‘lgan moddalar bilan ta’minlasin;

“Boshgidromet” boshqarmasi bilan birgalikda bu moddalarni transportda tashish, saqlash va ulardan foydalanish tartibini ishlab chiqsin.

4. Mazkur qarorning bajarilishini nazorat qilish Vazirlar Mahkamasining dehqonchilik sanoati majmui bo‘limiga yuklansin.