Oʻzbekiston Respublikasiga insonparvarlik yordami hamda texnik koʻmaklashish vositalarini jalb etish faoliyati muvofiqlashtirilishini yanada takomillashtirish, ularni hisobga olish hamda maqsadli va samarali foydalanilishi ustidan qatʼiy nazorat oʻrnatishning yagona tizimini taʼminlash maqsadida:

1. Oʻzbekiston Respublikasi Moliya vazirligi zimmasiga insonparvarlik yordami hamda texnik koʻmaklashish vositalarini respublikaga jalb etishni muvofiqlashtirish va oʻz vaqtida rasmiylashtirish, shuningdek, ularni hisobga olish va maqsadli foydalanilishi ustidan nazorat oʻrnatishni tashkil etish vazifalari yuklatilsin.

2. Oʻzbekiston Respublikasi Moliya vazirligi markaziy apparati tuzilmasida Insonparvarlik yordami hamda texnik koʻmaklashish vositalaridan maqsadli foydalanishni muvofiqlashtirish, hisobga olish va nazorat qilish departamenti tashkil etilsin.

Quyidagilar Departamentning asosiy vazifalari etib belgilansin:

respublikaga insonparvarlik yordami hamda texnik koʻmaklashish vositalarini jalb etish masalalari boʻyicha donorlar bilan hamkorlikni rivojlantirish takliflarini tayyorlash;

insonparvarlik yordami hamda texnik koʻmaklashish vositalariga oid loyihalarni ishlab chiqish va amalga oshirish jarayonlarini muvofiqlashtirish;

insonparvarlik yordami hamda texnik koʻmaklashish vositalarini oluvchilarga ularni rasmiylashtirish va yetkazib berish muddatlarini qisqartirish chora-tadbirlarini ishlab chiqish hamda amalga oshirish;

Oʻzbekiston Respublikasiga jalb etilayotgan insonparvarlik yordami hamda texnik koʻmaklashish vositalari toʻliq va tizimli hisobga olinishini taʼminlash;

respublika vazirliklari, idoralari, xoʻjalik birlashmalari, tashkilot va muassasalari oladigan insonparvarlik yordami hamda texnik koʻmaklashish vositalarini oʻzlashtirish, maqsadli va samarali foydalanishning doimiy monitoringini amalga oshirish;

insonparvarlik yordami hamda texnik koʻmaklashish vositalarining kelib tushishi va oʻzlashtirilishi toʻgʻrisidagi hisobotlar hamda tahliliy materiallarni tayyorlash va ularni tizimli asosda Oʻzbekiston Respublikasi Prezidenti Administratsiyasi va Oʻzbekiston Respublikasi Vazirlar Mahkamasiga taqdim etib turish.

3. Quyidagilar:

Oʻzbekiston Respublikasi Moliya vazirligi markaziy apparati boshqaruv xodimlarining tasdiqlangan cheklangan soni doirasida umumiy soni 5 nafar xodimdan iborat boʻlgan Departament tuzilmasi 1-ilovaga* muvofiq;

Oʻzbekiston Respublikasi Moliya vazirligining Insonparvarlik yordami hamda texnik koʻmaklashish vositalaridan maqsadli foydalanishni muvofiqlashtirish, hisobga olish va nazorat qilish departamenti toʻgʻrisidagi nizom 2-ilovaga* muvofiq tasdiqlansin.

Moliya vaziriga zarur hollarda Departamentning tuzilmasiga xodimlarning tasdiqlangan umumiy soni doirasida oʻzgartirishlar kiritishga ruxsat etilsin.

4. Quyidagilar:

Oʻzbekiston Respublikasi Moliya vazirligining gʻaznachiligi zimmasiga Oʻzbekiston Respublikasiga kelayotgan barcha turdagi, shu jumladan nomoddiy shakldagi insonparvarlik yordami hamda texnik koʻmaklashish vositalarini toʻliq va tizimli hisobga olish vazifasi;

Oʻzbekiston Respublikasi Moliya vazirligining Bosh nazorat-taftish boshqarmasi zimmasiga mablagʻlardan maqsadli foydalanilishi, insonparvarlik yordami hamda texnik koʻmaklashish vositalarini jalb etish va oʻzlashtirishda moliyaviy qoidabuzarliklarga yoʻl qoʻyilmasligini taftish hamda nazorat qilish vazifalari yuklatilsin. Mazkur vazifalarni bajarish uchun Moliya vazirligining Bosh nazorat-taftish boshqarmasi tuzilmasida Oʻzbekiston Respublikasi Moliya vazirligi markaziy apparati xodimlarining cheklangan soniga qoʻshimcha kiritiladigan 3 nafar xodimdan iborat shoʻba tashkil etilsin.

5. Shunday tartib oʻrnatilsinki, unga muvofiq insonparvarlik yordami hamda texnik koʻmaklashish vositalarini oluvchilar Oʻzbekiston Respublikasi Moliya vazirligining gʻaznachiligiga oʻzlarining shaxsiy bank hisobvaraqlaridan koʻchirmalar, shuningdek, Oʻzbekiston Respublikasi Moliya vazirligi tomonidan belgilangan shakl va muddatlarda, jumladan, nomoddiy shakldagi insonparvarlik yordami hamda texnik koʻmaklashish vositalari toʻgʻrisida axborot berib boradilar.

Oʻzbekiston Respublikasi Moliya vazirligi Oʻzbekiston Respublikasi Markaziy banki, Davlat statistika qoʻmitasi, Tashqi iqtisodiy aloqalar, investitsiyalar va savdo vazirligi, Davlat bojxona qoʻmitasi bilan birgalikda ikki hafta muddatda insonparvarlik yordami hamda texnik koʻmaklashish vositalarini oluvchilar Moliya vazirligining gʻaznachiligiga taqdim etadigan hisobot shakllarini ishlab chiqsin va tasdiqlasin.

6. Oʻzbekiston Respublikasi Moliya vazirligi va Adliya vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

7. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.