Xitoy Xalq Respublikasi (XXR) Hukumati tomonidan beriladigan grant mablagʻlaridan samarali foydalanishni taʼminlash maqsadida:

1. Oʻzbekiston Respublikasi Hukumati bilan Xitoy Xalq Respublikasi Hukumati oʻrtasida 2007-yilning 3-noyabrida imzolangan bitimga muvofiq, XXR Hukumati tomonidan 60 mln. yuan (8,2 mln. AQSH dollari) miqdorida grant berilgani maʼlumot uchun qabul qilinsin.

2. Oʻzbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi, Sogʻliqni saqlash vazirligining XXR Hukumati grant mablagʻlari hisobidan amalga oshirilishi taklif qilinayotgan ilovaga* muvofiq loyihalar roʻyxati toʻgʻrisidagi taklifiga rozilik berilsin.

3. Oʻzbekiston Respublikasi Sogʻliqni saqlash vazirligi, Tashqi ishlar vazirligi hamda Tashqi iqtisodiy aloqalar, investitsiyalar va savdo vazirligi Xitoy tomoni bilan kelishilgan mazkur grant mablagʻlarini olish va xizmat koʻrsatish bilan bogʻliq tartib-qoidalarning oʻz vaqtida rasmiylashtirilishini taʼminlasin.

4. Oʻzbekiston Respublikasi Sogʻliqni saqlash vazirligi:

ilovaga muvofiq loyihalarni amalga oshirish boʻyicha asosiy tadbirlarni ishlab chiqish, tasdiqlash va ishlarni umumiy muvofiqlashtirishni;

XXR Hukumatining grant mablagʻlari hisobiga xarid qilinadigan tibbiy uskunalarning saqlanishi, maqsadli va samarali ishlatilishini taʼminlasin.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Sogʻliqni saqlash vazirligi bilan birgalikda grant mablagʻlari hisobidan xarid qilinadigan tibbiy uskunalarni oʻrnatish uchun tuman tibbiyot birlashmalarida xonalarni tayyorlash va ularning saqlanishi hamda qatʼiyan maqsadli va samarali ishlatilishini taʼminlash boʻyicha zarur tadbirlarni amalga oshirsin.

6. Oʻzbekiston Respublikasi Tashqi iqtisodiy faoliyat milliy banki ushbu grantga hisob-kitob xizmati koʻrsatish boʻyicha XXRning vakolatli banki bilan banklararo bitimni imzolashga vakil qilinsin.

7. Quyidagilar:

Oʻzbekiston Respublikasi Sogʻliqni saqlash vazirligi loyihalarni XXR Hukumatining grant mablagʻlari hisobidan amalga oshirish doirasida Oʻzbekiston Respublikasi hududiga olib kelinadigan uskunalar va moddiy resurslar uchun bojxona toʻlovlari va yigʻimlar toʻlashdan;

Oʻzbekiston Respublikasi Sogʻliqni saqlash vazirligi talabnomalariga koʻra, loyihalarni amalga oshirishda ishtirok etayotgan xorijiy mutaxassislar vizalarni hamda vaqtincha roʻyxatda turishni rasmiylashtirishda konsullik yigʻimlari va davlat boji toʻlashdan ozod qilinsin.

8. Mazkur Qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari R.S. Qosimov zimmalariga yuklansin.