|
Hujjat kuchini yo‘qotgan " " 21.11.2022
|
Oʻzbekiston Respublikasi Prezidentining
Qarori
Toshqinlar, sel oqimlari, qor koʻchish va yer koʻchki hodisalari bilan bogʻliq favqulodda vaziyatlarning oldini olish hamda ularning oqibatlarini tugatish borasidagi chora-tadbirlar toʻgʻrisida
LexUZ sharhiMazkur qaror Oʻzbekiston Respublikasi Prezidentining 2022-yil 18-noyabrdagi PQ-426-sonli “Aholini va hududlarni xavfli gidrometeorologik hodisalar hamda geologik jarayonlar bilan bogʻliq favqulodda vaziyatlardan muhofaza qilish chora-tadbirlari toʻgʻrisida”gi qaroriga asosan oʻz kuchini yoʻqotgan.
Toshqinlar, sel oqimlari, qor koʻchish va yer koʻchki hodisalari bilan bogʻliq favqulodda vaziyatlardan aholi va hududlarni himoya qilish boʻyicha ishlarni oʻz vaqtida va samarali tashkil etish, shuningdek ularning ehtimol tutilgan oqibatlarini tezkorlik bilan tugatish maqsadida:
1. Quyidagilar:
Xavfli gidrometeorologiya va geologiya hodisalari bilan bogʻliq favqulodda vaziyatlarning oldini olish va ularning oqibatlarini tugatish boʻyicha ishlarni tashkil etish tartibi toʻgʻrisidagi nizom 1-ilovaga muvofiq;
toshqin suvlari va sel oqimlarini xavf-xatarsiz oʻtkazib yuborishni taʼminlash, qor koʻchish va yer koʻchki hodisalari xavfini kamaytirish boʻyicha Hukumat komissiyasi (keyingi oʻrinlarda — Toshqinga qarshi hukumat komissiyasi deb yuritiladi) tarkibi 2-ilovaga muvofiq tasdiqlansin.
Oʻzbekiston Respublikasi Favqulodda vaziyatlar vazirligi zimmasiga Toshqinga qarshi hukumat komissiyasining ishini tashkiliy-texnikaviy jihatdan taʼminlash vazifasi yuklatilsin.
2. Oʻzbekiston Respublikasi Vazirlar Mahkamasi:
har yilning 1-martigacha tasdiqlangan Nizomga muvofiq Oʻzbekiston Respublikasi Prezidenti Administratsiyasiga toshqinlar, sel oqimlari, qor koʻchish va yer koʻchki hodisalari bilan bogʻliq favqulodda vaziyatlardan aholi va hududlarni himoya qilish boʻyicha oʻtkazilayotgan ishlar hamda vujudga kelishi mumkin boʻlgan oqibatlarni tugatishga mavjud kuch va vositalarning tayyorligi toʻgʻrisida hisobot berib borsin;
(2-bandning birinchi va ikkinchi xatboshilari Oʻzbekiston Respublikasi Prezidentining 2019-yil 1-fevraldagi PF-5650-sonli Farmoni tahririda)
Qoraqalpogʻiston Respublikasi Vazirlar Kengashida, viloyatlar va Toshkent shahar hokimliklarida, vazirliklar va idoralarda gidrometeorologik va geologik xavf-xatar bilan bogʻliq boʻlgan favqulodda vaziyatlarning oldini olish, ularning kelib chiqishi mumkin boʻlgan oqibatlarini tezkorlik bilan tugatish boʻyicha ishlarning olib borilishi ustidan doimiy nazorat oʻrnatsin.
3. Oʻzbekiston Respublikasi Prezidentining “Aholi va hududlarni sel-toshqin va koʻchki hodisalari bilan bogʻliq favqulodda vaziyatlardan muhofaza qilish hamda ularning oqibatlarini bartaraf etish boʻyicha kechiktirib boʻlmaydigan chora-tadbirlar toʻgʻrisida” 2006-yil 9-fevraldagi PQ-279-sonli qarori oʻz kuchini yoʻqotgan deb hisoblansin.
4. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.
Oʻzbekiston Respublikasi Prezidenti I. KARIMOV
Toshkent sh.,
2007-yil 19-fevral,
PQ-585-son
Oʻzbekiston Respublikasi Prezidentining 2007-yil 19-fevraldagi PQ-585-son qaroriga
1-ILOVA
1-ILOVA
Xavfli gidrometeorologiya va geologiya hodisalari bilan bogʻliq favqulodda vaziyatlarning oldini olish va ularning oqibatlarini tugatish boʻyicha ishlarni tashkil etish tartibi toʻgʻrisidagi
NIZOM
I. Umumiy qoidalar
1. Mazkur Nizom xavfli gidrometeorologiya va geologiya jarayonlari yuzaga kelishi xavfini oʻz vaqtida aniqlash, aholi va hududlarni, yer koʻchki, toshqin, sel va qor koʻchishlari bilan bogʻliq favqulodda holatlardan muhofaza qilish tadbirlarini samarali amalga oshirish, shuningdek ularning oqibatlarini tezkorlik bilan bartaraf etishni tashkil etish tartibini belgilaydi.
2. Xavfli gidrometeorologiya va geologiya hodisalari bilan bogʻliq favqulodda vaziyatlarning oldini olish va ularning oqibatlarini tugatish boʻyicha ishlarni tashkil etish Oʻzbekiston Respublikasi Konstitutsiyasi va qonunlari, Oʻzbekiston Respublikasi Prezidentining farmon, qaror va farmoyishlari, Oʻzbekiston Respublikasi vazirlar Mahkamasining qaror va farmoyishlari hamda mazkur Nizomga muvofiq amalga oshiriladi.
3. Xavfli gidrometeorologiya va geologiya hodisalari bilan bogʻliq favqulodda vaziyatlarning oldini olish va ularning oqibatlarini tugatish boʻyicha Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirlik va idoralar faoliyatini muvofiqlashtirish maqsadida toshqin suvlari va sel oqimlarini xavf-xatarsiz oʻtkazib yuborishni taʼminlash, qor koʻchish va yer koʻchki hodisalari xavfini kamaytirish boʻyicha Hukumat komissiyasi (keyingi oʻrinlarda — Toshqinga qarshi Hukumat komissiyasi) tuziladi.
Toshqinga qarshi Hukumat komissiyasi raisi Oʻzbekiston Respublikasi Bosh vaziri — Fuqaro muhofazasi boshligʻi hisoblanadi.
Toshqinga qarshi Hukumat komissiyasi tarkibiga vazirliklar, idoralar, viloyat hokimliklari, boshqa manfaatdor tashkilot va muassasalar rahbarlari kiritiladi.
Toshqinga qarshi hukumat komissiyasi tomonidan uning vakolatiga muvofiq qabul qilinadigan qarorlar barcha davlat hokimiyati va boshqaruv organlari, xoʻjalik yurituvchi subyektlar, jamoat tashkilotlari, muassasalar hamda fuqarolar uchun majburiy hisoblanadi.
4. Xavfli zonalar mavjud boʻlganda xavfli gidrometeorologiya va geologiya hodisalari bilan bogʻliq favqulodda vaziyatlar kelib chiqish xavfiga qarshi oʻz vaqtida chora koʻrish hamda aholi va hududlarni muhofaza qilish ishlarini tezkor boshqarishni tashkil etish uchun tegishli maʼmuriy-hududiy birliklarda viloyat va tuman shtablari tashkil etiladi, ular Toshqinga qarshi Hukumat komissiyasi qarorlari, mazkur Nizom talablari, sohaga oid boshqa normativ-huquqiy hujjatlarga muvofiq faoliyat olib boradi.
II. Toshqinga qarshi Hukumat komissiyasining asosiy vazifalari va komissiya ishini tashkil etish
5. Toshqinga qarshi Hukumat komissiyasining asosiy vazifalari quyidagilar hisoblanadi:
gidrometeorologiya va geologiya hodisalari bilan bogʻliq favqulodda vaziyatlarning oldini olish va tugatish, ulardan aholi va hududlarni muhofaza qilish darajasini oshirish borasida yagona davlat siyosatini shakllantirish va olib borish;
aholi va hududlarni xavfli gidrometeorologik va geologik jarayonlar bilan bogʻliq favqulodda vaziyatlardan muhofaza qilish boʻyicha chora-tadbirlarni amalga oshirishda mahalliy davlat hokimiyati va boshqaruvi organlari, muassasa va tashkilotlarning, manfaatdor vazirlik va idoralarning faoliyatini va ularning samarali hamkorlik qilishini muvofiqlashtirishni taʼminlash;
xoʻjaliklari sel oqimlari, qor koʻchishi va koʻchki hodisalari xavfi boʻlgan zonalarda (Oʻzbekiston Respublikasi Gidrometeorologiya xizmati markazining (keyingi oʻrinlarda — Oʻzgidromet) va Davlat geologiya qoʻmitasining tegishli xizmatlari prognoz maʼlumotlari asosida) joylashgan aholini vaqtincha koʻchirish (zarurat boʻlsa) va keyinchalik xavfsiz hududlarga bosqichma-bosqich koʻchirish boʻyicha chora-tadbirlar majmuini ishlab chiqish va amalga oshirish;
xavfli gidrometeorologiya va geologiya hodisalari bilan bogʻliq yuz berishi ehtimoli mavjud boʻlgan yirik favqulodda vaziyatlar oqibatlarini tugatish boʻyicha ishlarni boshqarish;
xavfli tabiat hodisalari bilan bogʻliq favqulodda vaziyatlarning oldini olish va ularning oqibatlarini tugatish boʻyicha ishlarning holatini joylarda, vazirlik va idoralarda tekshirib borish, shuningdek mansabdor shaxslarning ushbu masalalar boʻyicha hisobotlarini eshitib borish.
6. Toshqinga qarshi kurash hukumat komissiyasi oʻz faoliyatini komissiya majlisida koʻrib chiqiladigan va uning raisi tomonidan tasdiqlanadigan rejaga muvofiq doimiy asosda olib boradi.
7. Toshqinga qarshi kurash hukumat komissiyasining majlislari zaruratga koʻra, lekin bir yilda kamida ikki marta boʻlib oʻtadi va majlis qarorlari bayonnoma bilan rasmiylashtiriladi.
8. Toshqinga qarshi kurash hukumat komissiyasi har yili 15-fevralgacha Toshqinlar, sel oqimlari, qor koʻchishi va yer koʻchki hodisalari bilan bogʻliq favqulodda vaziyatlarni oldini olish va ularning oqibatlarini tugatish boʻyicha asosiy tadbirlar dasturini joriy yil uchun ishlab chiqishni tashkillashtiradi, oʻz majlisida koʻrib chiqadi va tasdiqlaydi.
9. Toshqinga qarshi kurash hukumat komissiyasi har yili 1-martgacha, shuningdek toshqinlar, sel oqimlari, qor koʻchishi va yer koʻchki hodisalari bilan bogʻliq aniq xavf-xatar yuzaga kelganda aholi va hududlarni favqulodda vaziyatlardan muhofaza qilish boʻyicha olib borilayotgan ishlar va mavjud kuch va vositalarning tayyorligi toʻgʻrisida oʻz vaqtida Oʻzbekiston Respublikasi Prezidenti Administratsiyaga axborot kiritadi.
10. Mazkur Nizom bilan koʻzda tutilgan ishlarni bajarish uchun zarur hollarda Toshqinga qarshi kurash hukumat komissiyasi vazirlik, idoralar, mahalliy davlat hokimiyati va boshqaruvi organlari, muassasa va tashkilotlar vakillarini jalb qilgan holda ishchi guruhlar tuzadi.
11. Toshqinga qarshi kurash hukumat komissiyasini tugatish yoki qayta tashkil etish qonunchilikda belgilangan tartibda amalga oshiriladi.
III. Gidrometeorologiya va geologiya hodisalari bilan bogʻliq favqulodda vaziyatlar oqibatlarini oldini olish va tugatish boʻyicha vazirliklar, idoralar va mahalliy hokimiyat organlarining vazifalari
12. Oʻzgidromet va Davlat geologiya qoʻmitasi:
har yili 20-fevralgacha Toshqinga qarshi kurash hukumat komissiyasiga, Favqulodda vaziyatlar vazirligiga, Qoraqalpogʻiston Respublikasi Vazirlar Kengashi, viloyatlar va shahar hokimliklariga xavfli gidrometeorologiya va geologiya hodisalarining faollashish ehtimoli boʻlgan zonalar toʻgʻrisida, ushbu zonalarda joylashgan aholi punktlari va obyektlar toʻgʻrisida, aholisi xavfsiz joylarga vaqtinchalik yoki doimiy yashash uchun koʻchirilishi kerak boʻlgan xoʻjaliklar roʻyxati toʻgʻrisida maʼlumotlar taqdim etadi, shuningdek aholi va hududlarning muhofazasini taʼminlovchi muhandislik-texnikaviy va boshqa tadbirlarni oʻtkazish boʻyicha takliflar beradi;
Favqulodda vaziyatlar vazirligi va Qishloq va suv xoʻjaligi vazirligi bilan birgalikda toʻplangan qorning hajmi, sel va koʻchki xavfi mavjud zonalarning xususiyatini aniqlash, oʻpirilish xavfi boʻlgan togʻ koʻllarining holatini baholash hamda bu joylarda gidrometeorologik vaziyat va geologik jarayonlarning rivojlanish surʼatini doimiy kuzatish va prognoz qilish boʻyicha ishlarni amalga oshirish maqsadida togʻli va togʻoldi tumanlarda, shu jumladan, zarurat boʻlganda, chegaradosh davlatlar hududida (Oʻzbekiston Respublikasi Tashqi ishlar vazirligi bilan kelishilgan holda) muntazam aerovizual rekognossirovka olib boradi;
xavfli gidrometeorologiya va geologiya hodisalari faollashish ehtimoli boʻlgan hududlarda gidrometeorologik vaziyatning, geologik jarayonlarning uzluksiz monitoringini tashkil etilishi va amalga oshirilishini taʼminlaydi;
Favqulodda vaziyatlar vazirligi bilan birgalikda obyektlari va xoʻjaliklari xavfli hududlarda joylashgan mahalliy davlat hokimiyati va boshqaruvi organlari, korxona va tashkilotlar rahbarlari hamda fuqarolar tomonidan aholi va hududlarni favqulodda vaziyatlardan muhofaza qilish boʻyicha zarur choralar koʻrish toʻgʻrisidagi tegishli ogohlantirish va koʻrsatmalar talablarining oʻz vaqtida bajarilishini nazorat qiladilar;
yozgi taʼtillar va maktab taʼtillari mavsumi boshlanishidan oldin bolalar sogʻlomlashtirish lagerlari, sanatoriylar, dam olish uylari, sayyohlik bazalari va pansionatlar joylashgan hududlarni gidrologik va muhandislik-geologik tekshiruvdan oʻtkazadi. Zarur boʻlganda, obyektlarni vaqtincha yopish yoki kerakli muhofaza choralarini amalga oshirish toʻgʻrisida yozma ravishda koʻrsatmalar kiritadi.
13. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:
jalb etilgan vazirliklar, idoralar va tashkilotlar bilan birgalikda toshqin oldi davrida bahor-yozgi toshqin suvlarini xatarsiz oʻtkazib yuborish maqsadida xavfli uchastkalarni aniqlash uchun gidrotexnik inshootlar, koʻpriklar, qirgʻoqlar, daryo oʻzanlari va soylarning holatini oʻrganib chiqadi, kechiktirib boʻlmaydigan muhofaza choralari va avariya-tiklash ishlari bajarilishini taʼminlaydi;
ruxsatsiz qurilish va noruda materiallar qazib olish, daryolar qayirlarida boshqa xoʻjalik faoliyatini olib borish oqibatida daryolar, kanallar va soylarning suv oʻtkazish imkoniyatlari kamayishi holatlariga yoʻl qoʻymaydi va buning qatʼiy oldini oladi;
xavfli gidrometeorologik va geologik hodisalar bilan bogʻliq favqulodda vaziyatlar paydo boʻlishi xavfiga qarshi oʻz vaqtida chora koʻrish hamda aholi va hududlarni muhofaza qilish boʻyicha ishlarni tezkor boshqarishni tashkil etish uchun tegishli maʼmuriy-hududiy birliklarda viloyat va tuman shtablarini tashkil etadi. Mazkur shtablarni zarur miqdorda transport vositalari, yonilgʻi-moylash materiallari va aloqa vositalari bilan taʼminlaydi;
Davlat geologiya qoʻmitasi va Oʻzgidromet koʻrsatmalari asosida xavfli hududlardan koʻchirilishi zarur boʻlgan xoʻjaliklar aholisining oʻz vaqtida va bexatar koʻchirilishini taʼminlaydi. Xavfsiz joylarga koʻchirilayotgan kishilarning hayot kechirishi va munosib turmushi uchun zarur barcha sharoitlarni yaratadi, ular orasida tegishli tushuntirish ishlarini olib boradi;
mahalliy davlat hokimiyati organlari balansidagi daryo oʻzanlari va soylar qirgʻoqlarini mustahkamlash va boshqa muhofaza qilish ishlari bilan bogʻliq xarajatlarni moliyalashtirish asoslangan hisob-kitoblar boʻyicha mahalliy budjetlarning zaxira fondi mablagʻlari hisobidan amalga oshiradi.
14. Oʻzbekiston Respublikasi Suv xoʻjaligi vazirligi:
toshqin oldi davrida gidrotexnik inshootlarning (kanallar, dambalar, sel suvlari toʻplanadigan joylar va sel yoʻllari) sel va toshqin suvlarini xatarsiz oʻtkazib yuborishga tayyorligini tekshiradi;
Favqulodda vaziyatlar vazirligi, Ichki ishlar vazirligi va “Oʻzbekenergo” DAK bilan hamkorlikda oʻzanli suv omborlarini tekshiradi va sel hamda toshqin suvlarini xavfsiz qabul qilish va xatarsiz oʻtkazib yuborishga doimiy tayyorligini kafolatlovchi ish tartibini taʼminlash ustidan nazorat oʻrnatadi;
sel va toshqinlar paytida joylardagi barcha boʻlinmalarda rahbar xodimlarning tunu kun navbatchiligini va suv xoʻjaligi obyektlarining xavfsiz ishlashini nazorat qilishni taʼminlaydi.
15. Oʻzbekiston Respublikasi Favqulodda vaziyatlar vazirligi:
qor koʻchishi, sel, suv toshqini va yer koʻchishlari yuz beradigan davr mobaynida vazirlik hududiy boshqarmalarining qidiruv-qutqaruv boʻlinmalari va tezkor guruhlarining shaxsiy tarkibini kuchaytirilgan ish tartibiga oʻtkazadi, xavf yoki favqulodda vaziyatlar yuzaga kelgan holatlarda belgilangan vazifalarni bajarishga doim tayyorligini taʼminlaydi;
xavfli gidrometeorologik va geologik jarayonlar bilan bogʻliq vaziyatlarni kuzatish boʻyicha maʼlumotlarni toʻplaydi va tahlil qiladi, Toshqinga qarshi hukumat komissiyasiga favqulodda vaziyatlar yuzaga kelish xavfiga qarshi samarali kurashish va ularning keltirib chiqarishi mumkin boʻlgan oqibatlarini minimallashtirish va bartaraf etish boʻyicha zarur chora-tadbirlar yuzasidan takliflarni oʻz vaqtida taqdim etadi;
Ichki ishlar vazirligi va Oʻzgidromet bilan birgalikda favqulodda vaziyatlar yuzaga kelishining monitoringini amalga oshirish va bundan oʻz vaqtida xabardor qilish maqsadida oʻpirilish xavfi mavjud boʻlgan togʻ koʻllarini kuzatish uchun tegishli texnika va ishonchli aloqa vositalari bilan jihozlangan muvaqqat postlarni oʻz vaqtida tashkil etishni taʼminlaydi;
Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan hamkorlikda xabardor qilish va aloqa tizimining puxta ishlashini, tegishli vazirliklar, idoralar, mahalliy davlat hokimiyati va boshqaruvi organlari hamda aholini favqulodda vaziyatlar xavfi toʻgʻrisidagi axborot va xabarlarning oʻz vaqtida yetkazilishini taʼminlaydi;
bahor-yoz mavsumida qor koʻchishi, sel, toshqin va koʻchki xavfi mavjud boʻlgan uchastkalarda tegishli koʻnikmalarni mashq qilish va zarur himoya ishlarini amaliy bajarish maqsadida kompleks maxsus taktika mashqlarini oʻtkazadi;
Toshqinga qarshi hukumat komissiyasi qarorlarining bajarilishini samarali muvofiqlashtirish va qatʼiy nazorat qilishni hamda ish faoliyatini tashkiliy-texnik jihatdan taʼminlaydi.
16. Oʻzbekiston Respublikasi Ichki ishlar vazirligi, Mudofaa vazirligi va Milliy gvardiya mahalliy davlat hokimiyati organlari, aloqador vazirlik va idoralar bilan hamkorlikda favqulodda vaziyatlar yuzaga kelganda toifalangan gidrotexnik inshootlarni himoya qilishni kuchaytirish va aholi, transport vositalari va texnikani xavfli uchastka va hududlarga qoʻymaslik (jumladan, koʻchirilgan shaxslarning muddatdan oldin qaytishiga yoʻl qoʻymaslik) maqsadida yoʻllar, transport kommunikatsiyalarida qoʻshimcha postlar va ogohlantiruvchi belgilar oʻrnatilishini taʼminlaydi.
17. Oʻzbekiston Respublikasi Tashqi ishlar vazirligi chegaradosh davlatlar hukumatlaridan Oʻzgidromet va Davlat geologiya qoʻmitasi boʻlinmalari tomonidan ushbu mamlakatlar hududidagi togʻoldi, togʻli va boshqa tumanlarda qor zaxirasi hajmini aniqlash, togʻ koʻllari holatini baholash va Oʻzbekiston Respublikasi hududidagi uchastkalarga xavf tugʻdiruvchi toshqin, sel va koʻchki xavfi boʻlgan zonalarni aniqlash maqsadida aerovizual tekshirishlarni oʻtkazish uchun ruxsat olish hamda ularning holatini birgalikda monitoring qilishni tashkil etishni belgilangan tartibda taʼminlaydi.
18. Oʻzbekiston Respublikasi Moliya vazirligi:
taqdim etilgan hisob-kitoblarga muvofiq belgilangan tartibda Oʻzgidrometga respublika va chegaradosh davlatlar hududidagi togʻoldi, togʻli va boshqa suv toshqini, sel, yer koʻchish xavfi boʻlgan tumanlarda aerovizual tekshirish ishlarini oʻtkazish uchun maqsadli yoʻnaltirilgan mablagʻ ajratadi;
ayrim holatlarda, yuzaga kelgan favqulodda vaziyatni bartaraf etishga yetarli mablagʻ boʻlmasa Favqulodda vaziyatlar vazirligi bilan kelishgan holda ushbu maqsadlar uchun Oʻzbekiston Respublikasi Vazirlar Mahkamasining zaxira fondidan qoʻshimcha mablagʻlar ajratish toʻgʻrisida belgilangan tartibda takliflar kiritadi.
19. Sogʻliqni saqlash vazirligi vaqtinchalik va doimiy yashash joylariga koʻchirilgan aholiga sifatli tibbiy xizmat koʻrsatishni va sanitariya-epidemiologiya nazoratini hamda favqulodda vaziyatlar yuzaga kelishi mumkinligini hisobga olgan holda dori-darmon, sanitariya-gigiyena va epidemiyaga qarshi va boshqa dori vositalarning zaxirasini yetarli darajada boʻlishini taʼminlaydi.
20. Oʻzbekiston Respublikasi Transport vazirligi huzuridagi Avtomobil yoʻllari qoʻmitasi manfaatdor vazirlik va idoralar bilan birgalikda respublika avtoyoʻllari tabiiy hodisalar oqibatida buzilgan hollarda ularni qayta tiklash uchun zarur kuch va vositalar tayyor turishini taʼminlaydi. Mavjud strategik transport kommunikatsiyalarda, shu jumladan A-373 “Toshkent-Oʻsh” avtoyoʻlining “Qamchiq” dovoni aylanma (zaxira) uchastkasida odamlar va transport vositalari harakati xavfsizligini tashkil etish maqsadida muhandislik-texnik muhofaza tadbirlarini oʻz vaqtida bajarish boʻyicha choralarni amalga oshiradi.
LexUZ sharhi1-ilova norasmiy tarjima.
Oʻzbekiston Respublikasi Prezidentining 2007-yil 19-fevraldagi PQ-585-son qaroriga
2-ILOVA
2-ILOVA
Toshqin suvlari va sel oqimlarini xavf-xatarsiz oʻtkazib yuborishni taʼminlash, qor koʻchish va yer koʻchki hodisalari xavfini kamaytirish boʻyicha Hukumat komissiyasi
TARKIBI
|
1. |
A.N. Aripov |
— |
Oʻzbekiston Respublikasi Bosh vaziri, komissiya raisi |
|
2. |
A.J. Ramatov |
— |
Oʻzbekiston Respublikasi Bosh vazirining birinchi oʻrinbosari — transport vaziri, komissiya raisi oʻrinbosari |
|
3. |
T.A. Xudaybergenov |
— |
favqulodda vaziyatlar vaziri v.b., komissiya raisi oʻrinbosari |
|
4. |
Sh.R. Hamrayev |
— |
suv xoʻjaligi vaziri, komissiya raisi oʻrinbosari |
|
Komissiya aʼzolari: | |||
|
5. |
A.K. Shodmonov |
— |
sogʻliqni saqlash vaziri |
|
6. |
M.X. Saliyev |
— |
uy-joy kommunal xizmat koʻrsatish vaziri |
|
7. |
S.X. Bekenov |
— |
investitsiyalar va tashqi savdo vazirining birinchi oʻrinbosari |
|
8. |
I.T. Neʼmatov |
— |
tashqi ishlar vazirining birinchi oʻrinbosari |
|
9. |
O.M. Umarov |
— |
axborot texnologiyalari va kommunikatsiyalarini rivojlantirish vazirining birinchi oʻrinbosari |
|
10. |
P.I. Ergashev |
— |
mudofaa vazirining birinchi oʻrinbosari — Qurolli Kuchlar Bosh shtabi boshligʻi |
|
11. |
B.R. Tursunov |
— |
Milliy gvardiya qoʻmondonining birinchi oʻrinbosari |
|
12. |
M.U. Joʻrayev |
— |
ichki ishlar vaziri oʻrinbosari |
|
13. |
Y.E. Tursunov |
— |
moliya vaziri oʻrinbosari |
|
14. |
A.A. Abduvaliyev |
— |
Transport vazirligi huzuridagi Avtomobil yoʻllari qoʻmitasi raisi |
|
15. |
B.F. Islomov |
— |
Davlat geologiya va mineral resurslar qoʻmitasi raisi |
|
16. |
B.T. Qoʻchqorov |
— |
Ekologiya va atrof muhitni muhofaza qilish davlat qoʻmitasi raisi |
|
17. |
Lavozimi boʻyicha |
— |
“Oʻzgidromet” bosh direktori |
|
18. |
N.Sh. Ernazarov |
— |
Suv xoʻjaligi vazirligi “Davsuvxoʻjaliknazorat” davlat inspeksiyasi boshligʻi |
|
19. |
B.B. Sidiqov |
— |
“Oʻzbekneftgaz” AJ boshqaruvi raisi |
|
20. |
U.M. Mustafoyev |
— |
“Oʻzbekenergo” AJ boshqaruvi raisi |
|
21. |
X.N. Xosilov |
— |
“Oʻzbekiston temir yoʻllari” AJ boshqaruvi raisi v.b. |
|
22. |
Sh.K. Abdurahmanov |
— |
Andijon viloyati hokimi |
|
23. |
E.A. Saliyev |
— |
Jizzax viloyati hokimi |
|
24. |
Z.Sh. Roʻziyev |
— |
Qashqadaryo viloyati hokimi |
|
25. |
K.B. Tursunov |
— |
Navoiy viloyati hokimi |
|
26. |
X.X. Bozarov |
— |
Namangan viloyati hokimi |
|
27. |
E.O. Turdimov |
— |
Samarqand viloyati hokimi |
|
28. |
T.A. Bobolov |
— |
Surxondaryo viloyati hokimi |
|
29. |
G.G. Mirzayev |
— |
Sirdaryo viloyati hokimi |
|
30. |
G.I. Ibragimov |
— |
Toshkent viloyati hokimi |
|
31. |
Sh.M. Gʻaniyev |
— |
Fargʻona viloyati hokimi |
Izoh. Komissiya aʼzolari boshqa ishga oʻtgan taqdirda uning tarkibiga ularning lavozimiga qaytadan tayinlangan yoki zimmasiga tegishli funksiyalar yuklatilgan shaxslar kiritiladi.
LexUZ sharhi2-ilova norasmiy tarjima.
(Oʻzbekiston Respublikasi qonun hujjatlari toʻplami, 2007-y., 7-8-son, 61-modda, 35-son, 917-modda; Qonun hujjatlari maʼlumotlari milliy bazasi, 24.02.2021-y., 06/21/6176/0156-son)
