Пахта толасини хорижий сармоя иштирокидаги корхоналарга сотиш механизмини такомиллаштириш, шунингдек хорижий инвестицияларни республика енгил саноатига жалб этишни янада кенгайтириш мақсадида Вазирлар Маҳкамаси қарор қилади:

1. Вазирлар Маҳкамасининг 2003 йил 16 октябрдаги 447-сон қарорига мувофиқ пахта толасини хорижий инвестициялар иштирокидаги корхоналарга етказиб бериш улар билан ташқи савдо компаниялари ўртасида имзоланган шартномаларга қатъий мувофиқ ҳолда, «Коттон Оутлук»да эълон қилинадиган «А» индекси ва унинг Ўзбекистондаги компоненти котировкаларига мувофиқ юклаб жўнатиш санасида вужудга келадиган жаҳон нархлари бўйича, 15 фоиз миқдоридаги чегирма билан амалга оширилиши маълумот учун қабул қилинсин.

Белгилансинки, 2005 йили ҳосилидан бошлаб пахта толасини хорижий инвестициялар иштирокидаги корхоналарга сотиш банклар, Ўзбекистон «Сифат» маркази, пахта терминаллари томонидан кўрсатилган хизматлар бўйича қўшимча тўловларни, шу жумладан тўлови ташқи савдо компаниялари ихтиёрида қоладиган маблағлар ҳисобига амалга ошириладиган терминалларда пахта толасини сақлаш ва суғурта қилиш харажатларини ундирмасдан амалга оширилади.

2. Белгилаб қўйилсинки, пахта толасини хорижий инвестициялар иштирокидаги корхоналарга Ўзбекистон Республикаси Ташқи иқтисодий алоқалар, инвестициялар ва савдо вазирлигининг ташқи савдо компаниялари орқали сотиш 2005 йил пахта хом ашёси ҳосилидан бошлаб счёт-фактураларда қўшилган қиймат солиғи суммасини пахта толасининг улгуржи сотиш нархида ажратиб кўрсатган ҳолда амалга оширилади.

Ўзбекистон Республикаси Молия вазирлиги Давлат солиқ қўмитаси билан биргаликда Пахта толасини эркин алмаштириладиган валютага хорижий инвестициялар иштирокидаги корхоналарга сотишда қўшилган қиймат солиғини ҳисоблаб чиқариш ва тўлаш тўғрисидаги низомни бир ҳафта муддатда ишлаб чиқсин ва белгиланган тартибда тасдиқласин.

3. Ўзбекистон Республикаси Адлия вазирлиги манфаатдор вазирликлар ва идоралар билан биргаликда бир ой муддатда Ўзбекистон Республикаси Вазирлар Маҳкамасига ушбу қарорнинг қабул қилиниши муносабати билан амалдаги қонун ҳужжатларига ўзгартириш ва қўшимчалар тўғрисида таклифлар киритсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари В.А. Голишев зиммасига юклансин.