Oʻzbekiston Respublikasi Vazirlar Mahkamasining 2012-yil 16-oktabrdagi “Geografik obyektlarning nomlari toʻgʻrisida”gi Oʻzbekiston Respublikasi qonuniga muvofiq geografik obyektlarning nomlari sohasidagi ishlarni tartibga solish chora-tadbirlari haqida”gi 295-son qarori asosida shahardagi 33 ta mahalladagi aholi punktlarining tarkibiy qismlari boʻlgan 419 ta koʻcha, tor koʻcha va berk koʻchalar toifalarga ajratilib, xatlov ishlari toʻliq yakunlandi.

Xatlov yakunlari boʻyicha 10 ta koʻchaga nom berilmaganligi aniqlandi. Toshkent viloyati Geografik obyektlarni nomlash va qayta nomlash masalalari boʻyicha komissiyasining 2026-yil 12-iyundagi 95-son yigʻilish bayoni asosida Bekobod shahar komissiyasining 2026-yil 13-martdagi yigʻilish bayoni koʻrib chiqildi hamda 10 ta geografik obyekt nomining qonunchilik talablariga muvofiqligi toʻgʻrisida xulosa olindi.

Shuningdek, Respublika ekspert komissiyasi tomonidan mazkur 10 ta geografik obyektni nomlash va qayta nomlash boʻyicha kiritilgan takliflarning barchasi Oʻzbekiston Respublikasining “Geografik obyektlarning nomlari toʻgʻrisida”gi 303-sonli qonun hujjatlari talablariga muvofiq ekanligi yuzasidan ekspert xulosasi berildi.

Oʻzbekiston Respublikasining “Geografik obyektlarning nomlari toʻgʻrisida”gi qonunining 10-moddasi, Oʻzbekiston Respublikasi Vazirlar Mahkamasining 2012-yil 16-oktabrdagi 295-son qarori hamda Toshkent viloyati Geografik obyektlarni nomlash va qayta nomlash masalalari boʻyicha komissiyasining 2026-yil 12-iyundagi 95-son yigʻilish bayonini inobatga olib, Oʻzbekiston Respublikasining “Mahalliy davlat hokimiyati toʻgʻrisida”gi qonunining 6- va 24-moddalariga asosan Xalq deputatlari Bekobod shahar kengashi qaror qiladi:

1. Geografik obyektlarni nomlash va ularni qayta nomlash masalalari boʻyicha shahar komissiyasi kotibi G. Mirzaaxmedovaning hisoboti maʼlumot uchun qabul qilinsin.

2. Bekobod shahar komissiyasining 2026-yil 13-martdagi yigʻilish bayonida berilgan 10 ta geografik obyektni (koʻcha, tor koʻcha va berk koʻcha) nomlash hamda qayta nomlash boʻyicha xulosasi ilovaga muvofiq tasdiqlansin.

3. Bekobod shahar Soliq inspeksiyasi, shahar Statistika boʻlimi, Davlat xizmatlari markazi, Iqtisodiyot va moliya boʻlimi, Ichki ishlar boʻlimi, Oʻzbekiston Mahallalari uyushmasining shahar boʻlimi, Davlat kadastrlari palatasi agentligining shahar boʻlimi hamda boshqa tegishli tashkilotlar rahbarlari mazkur qaror bilan nom berilgan va qayta nomlangan 10 ta geografik obyekt boʻyicha nomlarni davlat roʻyxatidan oʻtkazish, ish yuritish hujjatlariga tegishli oʻzgartirish va qoʻshimchalar kiritish hamda boshqa zarur tadbirlarni amalga oshirsinlar.

4. Mazkur qaror “Bekobod yangiliklari” — “Novosti Bekabada” gazetalarida rasman eʼlon qilinsin hamda hokimlikning rasmiy veb-saytiga joylashtirilsin.

5. Geografik obyektlarni nomlash va qayta nomlash masalalari boʻyicha shahar komissiyasi kotibi G.Mirzaaxmedova geografik obyektlarga nom berilganligi toʻgʻrisidagi tegishli hujjatlarni Geografik obyektlar nomlarining davlat reyestriga kiritish uchun oʻn kun muddatda Oʻzbekiston Respublikasi Iqtisodiyot va moliya vazirligi huzuridagi Kadastr agentligiga taqdim etsin.

6. Ushbu qaror rasman imzolangan kundan eʼtiboran kuchga kiradi.

7. Mazkur qaror ijrosini nazorat qilish Xalq deputatlari shahar kengashining ijtimoiy soha, yoshlar siyosati, madaniyat va sport masalalari boʻyicha doimiy komissiyasi zimmasiga yuklatilsin.