Oʻzbekiston Respublikasi Prezidentining 2025-yil 26-dekabrdagi “Mahalliy budjetlar va budjet tashkilotlarining moliyaviy barqarorligini oshirish, budjet intizomini kuchaytirishga doir qoʻshimcha chora-tadbirlar toʻgʻrisida”gi PQ-387-sonli qarorining 8.a-bandida 2026-yil 1-yanvardan boshlab obodonlashtirish boshqarmalari tomonidan tuman (shahar)lar markaziy koʻchalari boʻyidagi tadbirkorlik subyektlari bilan tuzilgan shartnoma asosida chiqindilarni olib chiqish va hududlarni obodonlashtirish xizmatini koʻrsatishga ruxsat beriladi. Bunda chiqindilarni olib chiqish va hududlarni obodonlashtirish xizmatini koʻrsatganlik boʻyicha tariflar tuman (shahar)lar hokimliklari tomonidan xalq deputatlari tuman (shahar)lar kengashlariga koʻrib chiqish va tasdiqlash uchun kiritilishi belgilangan.

Yuqoridagilarga asosan, kun tartibidagi masalalarni atroflicha muhokama qilib, Oʻzbekiston Respublikasi “Mahalliy davlat hokimiyati toʻgʻrisida”gi qonunining 6 va 24-moddalariga muvofiq xalq deputatlari tuman kengashi qaror qiladi:

1. Qoʻshkoʻpir tumani hokimi oʻrinbosari — tuman obodonlashtirish boshqarmasi boshligʻi R.Matyaqubovning tuman hududida koʻrsatiladigan obodonlashtirish va maishiy chiqindi xizmatlari uchun toʻlov tariflarini miqdorini tasdiqlash toʻgʻrisidagi axboroti maʼlumot uchun qabul qilinsin.

2. Oʻzbekiston Respublikasi Prezidentining 2025-yil 26-dekabrdagi PQ-387-sonli qarori 8.a-bandida belgilangan topshiriqlar ijrosini taʼminlash maqsadida obodonlashtirish boshqarmasi tomonidan tadbirkorlik subyektlari va budjet tashkilotlariga koʻrsatiladigan chiqindilarni olib chiqish va koʻrsatiladigan obodonlashtirish xizmati narxlari ilovaga muvofiq tasdiqlansin.

3. Qoʻshkoʻpir tumani hokimligi axborot xizmati rahbari (M. Matyaqubov)ga mazkur qarorni ommaviy axborot vositalarida keng yoritib borish tavsiya etilsin.

4. Mazkur qarorning ijrosini nazorat qilish tuman kengashining agrar, suv xoʻjaligi va ekologiya masalalari boʻyicha doimiy komissiya raisi A. Erkinov zimmasiga yuklatilsin.