Oʻzbekiston Respublikasining “Shahar yoʻlovchilar transporti toʻgʻrisida”gi qonuni, Oʻzbekiston Respublikasi Prezidentining 2024-yil 25-martdagi “Jamoat transportini moliyalashtirish tizimini takomillashtirish boʻyicha qoʻshimcha chora-tadbirlar toʻgʻrisida”gi PQ-139-sonli qarori hamda Oʻzbekiston Respublikasi Vazirlar Mahkamasining 2025-yil 15-avgustdagi “Raqamli Oʻzbekiston — 2030” strategiyasini amalga oshirish boʻyicha muvofiqlashtirish komissiyasi majlisining 71-sonli bayoni 38-bandiga muvofiq umumiy foydalaniladigan jamoat transportida koʻrsatilayotgan xizmatlarning sifatini oshirish, jamoat transportida toʻlovlar shaffofligini taʼminlash, sohaga raqamli texnologiyalarni keng joriy etish orqali yashirin iqtisodiyotni bartaraf etish, yoʻlkira haqini toʻlashda elektron toʻlov tizimlaridan foydalanishni ragʻbatlantirish maqsadida “Mahalliy davlat hokimiyati toʻgʻrisida”gi Oʻzbekiston Respublikasi qonunining 6 va 21¹-moddalariga asosan qaror qilaman:

1. Oʻzbekiston Respublikasi Prezidentining 2024-yil 25-martdagi “Jamoat transportini moliyalashtirish tizimini takomillashtirish boʻyicha qoʻshimcha chora-tadbirlar toʻgʻrisida”gi PQ-139-sonli qarori bilan:

jamoat transportida yoʻlkira haqini toʻlashda elektron toʻlov tizimidan foydalanishni ragʻbatlantiruvchi tariflar joriy etilishi belgilanganligi;

Oʻzbekiston Respublikasining “Shahar yoʻlovchilar transporti toʻgʻrisida”gi qonuniga muvofiq shahar yoʻlovchilar transportida yoʻlovchilar va bagaj tashish haqini toʻlash Qoraqalpogʻiston Respublikasi Vazirlar Kengashi, viloyatlar va Toshkent shahar davlat hokimiyati organlari tomonidan belgilangan tariflar boʻyicha amalga oshirilishi qayd etilganligi maʼlumot uchun qabul qilinsin.

2. Quyidagilar:

bir yoʻlovchi ogʻirligi 20 kilogrammdan ortiq boʻlgan bagajini tashish xizmati uchun bir martalik toʻlov tarifi 4 000 (toʻrt ming) soʻm;

Trolleybus yoʻnalishlarida yoʻlkira haqi bir yoʻlovchi uchun 3 000 (uch ming) soʻm (QQS bilan) qilib belgilansin.

3. Aholiga koʻrsatilayotgan xizmatlar jozibadorligini oshirish hamda avtobus va trolleybus yoʻnalishlarida yoʻlovchilarga qoʻshimcha qulayliklar yaratish maqsadida:

1-bosqichda 2026-yil 1-iyuldan SHI-4, SHI-5, SHI-7, SHI-13, SHI-18, SHI-19 va SHI-28-sonli avtobus yoʻnalishlari hamda T1-sonli “Urganch shahri — Xiva shahri” trolleybus yoʻnalishida;

2-bosqichda qolgan avtobus hamda trolleybus yoʻnalishlarida belgilangan tartibda brutto-shartnomasi rasmiylashtirilgandan keyin yoʻlkira haqini toʻlashda naqd pulsiz toʻlov tizimi amaliyoti joriy etilsin va toʻlovlar faqat elektron tarzda qabul qilinishi yoʻlga qoʻyilsin.

4. Urganch shahar hokimligi (B. Radjapov), Urganch tumani hokimligi (Gʻ. Sultanov), Qoʻshkoʻpir tumani hokimligi (Sh. Axmedov), Xiva tumani hokimligi (S. Palvanov), Xiva shahar hokimligi (T. Davletov):

2026-yil 1-iyulga qadar yoʻlkira haqini toʻlash naqd pulsiz faqat elektron tarzda amalga oshirilishi yoʻlga qoʻyilishi munosabati bilan D215 “Urganch — Xiva” avtomobil yoʻlining tegishliligicha oʻz hududida naqd pulsiz toʻlov tizimi uchun infratuzilma obyektlari (zarur bekatlarni qurish hamda barcha bekatlarda va mavjud bekatga yaqin joylarda (radiusi: shaharlarda — 150 — 200 metr, tumanlarda — 500 — 600 metr) chipta olishga moʻljallangan infokiosklar) bilan taʼminlasin.

“Xorazm hududiy elektr tarmoqlari” AJ (S. Beregin) bilan birgalikda infokiosklar oʻrnatiladigan bekatlarning manzilli roʻyxatiga muvofiq bosqichma-bosqich elektr quvvatiga (50 metr radius atrofida) ulash choralarini koʻrsin.

5. Viloyat transport boshqarmasi (T. Satimov):

mazkur qaror talablaridan kelib chiqib, ikki kun muddatda qonunchilik hujjatlariga muvofiq yoʻlovchi tashuvchi korxonalar bilan tuzilgan ommaviy oferta shartnomalariga tegishli qoʻshimcha va oʻzgartirishlar kiritish;

yoʻlovchi tashuvchi korxonalarga tegishli har bir yoʻnalish boʻyicha harakatlanayotgan avtobus hamda trolleybuslar salonida validatorlarning uzluksiz va sifatli ishlashini taʼminlash hamda yoʻlovchilarning ushbu qurilmadan foydalanishda qoʻshimcha imkoniyatlar yaratish;

yoʻlkira haqini toʻlash naqd pulsiz faqat elektron tarzda amalga oshirilishi yoʻlga qoʻyilishi munosabati bilan naqd pulsiz toʻlov tizimining yoʻlovchilar uchun qulayligi va afzalliklari yuzasidan ommaviy axborot vositalari orqali keng ommaga yetkazish choralarini koʻrsin.

6. Transport nazorati inspeksiyasi viloyat hududiy boʻlimi (M. Anyozov) “Xorazm yoʻlovchi tashishni monitoring va nazorat qilish” davlat muassasasi (U. Tajiyev) bilan birgalikda:

Urganch shahrida barcha yoʻnalishlarda harakatlanayotgan avtobuslar hamda trolleybus yoʻnalishlaridagi trolleybuslarning validatorlar bilan jihozlanishini taʼminlasin hamda yoʻlkira haqini avtomatlashtirilgan toʻlov tizimi ATTO orqali toʻlanishini doimiy nazoratga olsin;

validator oʻrnatilmagan yoʻlovchi tashuvchi avtobus hamda trolleybus korxonalariga nisbatan qonunchilikda belgilangan tartibda choralar koʻrsin.

7. Viloyat hokimining 2025-yil 11-iyundagi “Urganch va Xiva shaharlari hududida yoʻlovchilar tashish transporti xizmatlariga yangi tariflarning joriy qilinishi toʻgʻrisida”gi 263-12-0-Q/25-sonli qarorining 2-bandi “a” va “b” kichik xatboshilari “soʻm” soʻzlaridan keyin “QQS bilan” soʻzlari bilan toʻldirilsin.

8. Mazkur qaror “Xorazm haqiqati” gazetasida rasmiy eʼlon qilingan kundan boshlab kuchga kiradi.

9. Ushbu qarorning bajarilishini nazorat qilish viloyat hokimining birinchi oʻrinbosari A. Davletov zimmasiga yuklansin.