“Mahalliy davlat hokimiyati toʻgʻrisida”gi Oʻzbekiston Respublikasi Qonunining 6-moddasi, “Taʼlim toʻgʻrisida”gi Qonunning 27-moddasi hamda Oʻzbekiston Respublikasi Vazirlar Mahkamasining 2017-yil 15-martdagi 140-son qarori bilan tasdiqlangan “Umumiy oʻrta taʼlim toʻgʻrisida”gi nizomning 39-bandiga asosan, tumanda maktab yoshidagi bolalarni umumiy oʻrta taʼlimga toʻliq qamrab olish jarayonida umumtaʼlim muassasalariga biriktirilgan hududlarni (mikrohududlarni) aniq belgilash maqsadida, qaror qilaman:

1. Hazorasp tumanida maktab yoshidagi bolalarni umumiy oʻrta taʼlimga toʻliq qamrab olish boʻyicha umumtaʼlim muassasalariga biriktirilgan hududlar (mikrohududlar) roʻyxati ilovaga muvofiq tasdiqlansin.

2. Tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari B. Sabirov, tuman maktabgacha va maktab taʼlimi boʻlimi boshligʻi Sh. Axmedov hamda tumandagi umumtaʼlim muassasalari rahbarlari zimmasiga:

maktab yoshidagi bolalarni umumiy oʻrta taʼlimga toʻliq qamrab olish;

oʻquvchilarning darslarga qatnashish holati yuzasidan muntazam monitoring olib borish;

monitoring natijasida aniqlangan muammolarni bartaraf etish boʻyicha zarur choralar koʻrish vazifalari yuklatilsin.

3. Belgilansinki, tumandagi umumtaʼlim muassasalari rahbarlari oʻzlari rahbarlik qilayotgan muassasaga biriktirilgan hududdagi maktab yoshidagi bolalarni oʻz vaqtida umumtaʼlim muassasalariga jalb etish uchun masʼul hisoblanadi.

4. Oʻzbekiston Mahallalari uyushmasi Hazorasp tumani boʻlimi boshligʻi Q. Qurbonboyevga mahalla fuqarolar yigʻinlari raislari tomonidan maktab yoshidagi bolalarni umumtaʼlim muassasalariga jalb etish jarayonida tuman maktabgacha va maktab taʼlimi boʻlimi hamda umumtaʼlim muassasalariga amaliy yordam koʻrsatish tavsiya etilsin.

5. Ushbu qaror tuman hokimligining rasmiy nashri hisoblangan “Hazoraspnoma” gazetasi hamda rasmiy veb-saytida eʼlon qilingan kundan eʼtiboran kuchga kiradi.

6. Ushbu qarorning bajarilishini nazorat qilish tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari B. Sabirov zimmasiga yuklatilsin.