Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish toʻgʻrisida”gi 5-sonli qarori ijrosini taʼminlash maqsadida tuman hokimining qishloq va suv xoʻjaligi masalalari boʻyicha oʻrinbosari T.Salayevning axboroti atroflicha muhokama qilinib, Oʻzbekiston Respublikasining “Mahalliy davlat hokimiyati toʻgʻrisida”gi Qonunining 6 va 24-moddalariga muvofiq xalq deputatlari Hazorasp tumani Kengashi qaror qiladi:

1. Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish toʻgʻrisida”gi 5-sonli qarori rahbarlik va ijro uchun qabul qilinsin.

2. Hazorasp tumani suv yetkazib berish xizmati davlat muassasasining suv manbalari, iqtisodiyot tarmoqlari hamda hududlar boʻyicha 2026-yil yozgi sugʻorish davri uchun cheklangan suv miqdori (limit) 1 va 2-ilovalarga muvofiq tasdiqlansin.

3. Tuman hokimining qishloq va suv xoʻjaligi masalalari boʻyicha oʻrinbosari T. Salayev hamda tuman suv yetkazib berish xizmati davlat muassasasi direktori S. Matqurbonovga:

besh kun muddatda suv manbalari, iqtisodiyot tarmoqlari va hududlar boʻyicha ishlab chiqilgan suv olish limitlarini barcha suv isteʼmolchilariga yetkazish;

suv isteʼmolchilari bilan ularga ajratilgan limitlar doirasida suvdan foydalanish (suv isteʼmoli) boʻyicha shartnomalar tuzilishini hamda ularni belgilangan tartibda roʻyxatdan oʻtkazilishini taʼminlash vazifalari yuklatilsin.

4. Hazorasp tumani suv yetkazib berish xizmati davlat muassasasi direktori S. Matqurbonovga suvdan maqsadli va samarali foydalanish boʻyicha oʻquv seminarlarini tashkil etish hamda tushuntirish ishlarini olib borish vazifasi yuklatilsin.

5. Ushbu qaror rasmiy eʼlon qilingan kundan boshlab kuchga kiradi.

6. Mazkur qaror ijrosini nazorat qilish xalq deputatlari tuman Kengashining sanoat, transport, agrar, qurilish, kommunal xoʻjaligi, aholiga xizmat koʻrsatish va ekologiya masalalari boʻyicha doimiy komissiya raisi Sh. Qoʻchqorov zimmasiga yuklatilsin.