Oʻzbekiston Respublikasining “Geografik obyektlarning nomlari toʻgʻrisida”gi Qonuni, Oʻzbekiston Respublikasi Vazirlar Mahkamasining 2012-yil 16-oktabrdagi “Geografik obyektlarning nomlari toʻgʻrisida”gi Oʻzbekiston Respublikasi Qonuniga muvofiq “Geografik obyektlarning nomlari sohasidagi ishlarni tartibga solish chora-tadbirlari haqida”gi 295-sonli qaroriga muvofiq, Geografik obyektlarga nom berish va ularni qayta nomlash toʻgʻrisidagi takliflarni davlat ekspertizasidan oʻtkazish boʻyicha Oʻzbekiston Respublikasi Urbanizatsiya va uy-joy bozori qoʻmitasi huzuridagi Kadastr agentligi ekspert komissiyasining bayoni hamda 2026-yil 26-martdagi 05-19-5432-sonli ekspert xulosalariga asosan, Sariosiyo tumanida 58 ta nomsiz va nomi qonun talablariga javob bermaydigan geografik obyektlarning nomlari oʻrganilib chiqilib ijobiy xulosa berilgan.

Yuqoridagilarni inobatga olib, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 24-moddasiga asosan Xalq deputatlari tuman Kengashi qaror qiladi:

1. Geografik obyektlarga nom berish va ularni qayta nomlash toʻgʻrisidagi takliflarni davlat ekspertizasidan oʻtkazish boʻyicha Oʻzbekiston Respublikasi Urbanizatsiya va uy-joy bozori qoʻmitasi huzuridagi Kadastr agentligi ekspert komissiyasining bayoni hamda 2026-yil 26-martdagi 05-19-5432-sonli ekspert xulosasi maʼlumot uchun qabul qilinsin.

2. Quyidagilar: Sariosiyo tumanidagi 58 ta koʻchalarning nomlari ilovaga muvofiq tasdiqlansin.

3. Tuman hokimining oʻrinbosarlari (Gʻ. Davlatov, M. Ochildiyev, A. Shukurov), Mahallalar uyushmasi tuman boʻlimi (S. Sheraliyev) yangi nomlanayotgan koʻchalarni nomlari aks ettirilgan peshlavhalarni 1 (bir) oy muddatda belgilangan tartibda oʻrnatish vazifasi topshirilsin.

4. Belgilab qoʻyilsinki nomlangan koʻchalarga peshlavhalar tayyorlash, oʻrnatish uchun sarflanadigan mablagʻlar qonunda taqiqlanmagan manbalar hisobidan qoplanadi.

5. Tuman statistika boʻlimi (O. Qosimov), davlat kadastrlari palatasi Sariosiyo tuman filiali (I. Qurbonov) nomlangan koʻchalarning nomlarini belgilangan tartibda roʻyxatga olish vazifasi yuklatilsin.

6. Tuman Ichki ishlar boʻlimi (Gʻ. Xoʻjamqulov) fuqarolarni doimiy yashash joyiga roʻyxatga qoʻyishda yangi nomlangan koʻchalarni inobatga olish tavsiya etilsin.

7. Mazkur qaror ijrosini taʼminlash uchun tuman hokimining oʻrinbosarlari (Gʻ. Davlatov, M. Ochildiyev, A. Shukurov), tuman hokimligi axborot xizmati rahbari-davlat tili boʻyicha maslahatchi (J. Ergashov) hamda Mahallalar uyushmasi tuman boʻlimi (S. Sheraliyev)lar masʼul etib belgilansin.

8. Mazkur qaror “Sariosiyo” gazetasida rasman eʼlon qilinsin va tuman hokimligining rasmiy veb-saytiga joylashtirilsin.

9. Ushbu qarorning ijrosini nazorat qilish xalq deputatlari tuman Kengashining Ijtimoiy soha, yoshlar siyosati, madaniyat va sport masalalar boʻyich doimiy komissiyasi (N. Chorshanbiyeva) zimmasiga yuklatilsin.

10. Ushbu qaror qabul qilingan kundan boshlab kuchga kiradi.