Uzun tumani “Suv yetkazib berish xizmati” davlat muassasasi tomonidan Uzun tumani boʻyicha 2026-yil vegetatsiya davrida sugʻorish ishlari uchun ajratilgan suv limitlarini tasdiqlash masalasi xalq deputatlari Uzun tumani Kengashining Agrar, suv xoʻjaligi va ekologiya masalalari boʻyicha doimiy komissiyasida koʻrib chiqildi.

Taʼkidlanganidek, Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son qarorining 7-bandiga muvofiq har yili 1-aprelga qadar vegetatsiya davri hamda 1-oktabrga qadar kuz-qish davri uchun yakuniy isteʼmolchilar kesimida ekinlarni sugʻorish uchun suv olish limitlari hududlar boʻyicha tasdiqlangan limitlar doirasida ishlab chiqilishi va tasdiqlash uchun xalq deputatlari tuman Kengashlariga kiritilishi belgilangan.

Mazkur qaror suv resurslarini oqilona boshqarish, ulardan samarali va tejamkor foydalanish, zamonaviy boshqaruv mexanizmlarini joriy etish hamda quyi boʻgʻinda suv resurslarini boshqarish tizimini takomillashtirishga qaratilgan muhim normativ-huquqiy hujjat hisoblanadi.

Qarorning 7-bandiga muvofiq suv resurslarini taqsimlashning shaffof mexanizmlarini joriy etish, suv isteʼmolchilarining masʼuliyatini oshirish, suv hisobini yuritish tizimini takomillashtirish hamda suvdan samarali foydalanishni taʼminlash boʻyicha tizimli ishlar amalga oshirilmoqda.

Jumladan:

suv resurslarini taqsimlashda adolat va shaffoflikni taʼminlash maqsadida suvdan foydalanuvchilar oʻrtasida yangi tartiblar joriy etilmoqda;

suv hisobini yuritish tizimi bosqichma-bosqich raqamlashtirilib, zamonaviy suv oʻlchash uskunalari oʻrnatilmoqda;

suv resurslaridan noqonuniy va samarasiz foydalanish holatlarining oldini olish boʻyicha nazorat kuchaytirilmoqda;

tomchilatib va yomgʻirlatib sugʻorish kabi suv tejovchi texnologiyalarni keng joriy etish ishlari olib borilmoqda;

suv xoʻjaligi sohasi mutaxassislarining malakasini oshirish va zamonaviy bilim hamda koʻnikmalarini shakllantirishga alohida eʼtibor qaratilmoqda.

Shu bilan birga, ayrim hududlarda suv hisoblagich qurilmalarining yetarli darajada oʻrnatilmagani, irrigatsiya infratuzilmasining eskirgani hamda suvdan oqilona foydalanish madaniyati yetarli darajada shakllanmagani kabi muammolar mavjud.

Mazkur muammolarni bartaraf etish maqsadida:

suv hisobini toʻliq raqamlashtirish;

suv tejovchi texnologiyalarni yanada keng joriy etish;

suv isteʼmolchilari oʻrtasida tushuntirish ishlarini kuchaytirish;

irrigatsiya infratuzilmasini modernizatsiya qilish;

davlat va xususiy sektor hamkorligini kengaytirish zarurligi qayd etildi.

Shuningdek, Oʻzbekiston Respublikasi Prezidentining 2026-yil 5-fevraldagi “Suv resurslaridan foydalanish samaradorligini oshirish boʻyicha qoʻshimcha chora-tadbirlar toʻgʻrisida”gi PQ-47-son qaroriga muvofiq tumanda mavjud suv resurslaridan oqilona va samarali foydalanish, suv tejovchi texnologiyalarni joriy etishni qoʻllab-quvvatlash va ragʻbatlantirish hamda ushbu texnologiyalarni keng tatbiq etish boʻyicha tegishli chora-tadbirlar amalga oshirilmoqda.

Tumanning suv taʼminoti ogʻir boʻlgan hududlarini barqaror suv bilan taʼminlash maqsadida xoʻjaliklararo kanallar atrofida joylashgan, suv taʼminoti nisbatan barqaror boʻlgan fermer xoʻjaliklarida qishloq xoʻjaligi ekinlarini yetishtirishda suv tejovchi texnologiyalarni joriy etish ishlari tashkil etilmoqda.

Yuqoridagilardan kelib chiqib, Uzun tumani “Suv yetkazib berish xizmati” davlat muassasasi tomonidan ekin turlari, suv manbalari, hududlar va yakuniy suv isteʼmolchilari kesimida 2026-yil vegetatsiya davri uchun suv olish limitlari ishlab chiqildi.

Oʻzbekiston Respublikasi Prezidentining 2024-yil 5-yanvardagi PQ-5-son qarori 7-bandining ijrosi yuzasidan Uzun tumani “Suv yetkazib berish xizmati” davlat muassasasi rahbari B. Roʻziyevning hisoboti tinglanib, deputatlar tomonidan bildirilgan taklif va mulohazalar inobatga olingan holda xalq deputatlari Uzun tumani Kengashi qaror qiladi:

1. Uzun tumani Suv yetkazib berish xizmati davlat muassasasi rahbari B. Roʻziyevning hisoboti hamda 2026-yil 26-martdagi 01/02-128-sonli xati maʼlumot uchun qabul qilinsin hamda soxada amalga oshirilgan ishlar qoniqarli deb baholansin.

2. Uzun tumani Suv yetkazib berish xizmati davlat muassasasi rahbari B. Roʻziyev va Uzun tumani hokimi oʻrinbosari Sh. Allaberdiyev tomonidan tasdiqlangan Uzun tumani hududidagi suv isteʼmolchilariga 2026-yil sugʻorish mavsumida ajratiladigan cheklangan suv miqdori jadvali ilovalarga muvofiq tasdiqlansin.

3. Uzun tumani Suv yetkazib berish xizmati davlat muassasasi rahbari B. Roʻziyev zimmasiga Uzun tumani hududidagi suv isteʼmolchilari uchun 2026-yil sugʻorish mavsumida ajratiladigan cheklangan suv miqdori amaldagi qonunchilik talablariga muvofiq ishlab chiqilganligi hamda tuman Kengashiga taqdim etilgan hujjatlarning haqqoniyligi uchun shaxsan javobgarlik yuklatilsin.

Shuningdek, suv isteʼmolchilariga suv olish navbati va vaqti boʻyicha tushuntirish ishlari olib borish hamda brifinglar tashkil etish;

mahallalar kesimida aholining suvga boʻlgan ehtiyojini oʻrganish va kelgusidagi suv limitlarini belgilashda ushbu ehtiyojlarni inobatga olish;

suvchilar maktablarini tashkil etish hamda suvchilarni oʻqitish tizimini joriy etish;

har bir suv isteʼmolchisi uchun gidropostlar oʻrnatilishini tashkil etish;

suvdan oqilona va tejamkor foydalanish madaniyatini shakllantirish, “Suv tekin emas” tamoyilini keng targʻib qilish;

tomchilatib sugʻorish texnologiyalarini joriy etish ishlarini jadallashtirish hamda ularning bosqichma-bosqich amalga oshirilishini nazorat qilishni taʼminlasin.

4. Tuman hokimligi Axborot xizmati (Oʻ. Mingboyeva)ga Uzun tumani hududidagi suv isteʼmolchilari uchun 2026-yil sugʻorish mavsumida ajratilgan cheklangan suv miqdori toʻgʻrisidagi maʼlumotlarni ommaviy axborot vositalari hamda internet tarmoqlarida keng yoritib borish tavsiya etilsin.

5. Mazkur qarorning ijrosini nazorat qilish xalq deputatlari Uzun tumani Kengashining Agrar, suv xoʻjaligi va ekologiya masalalari boʻyicha doimiy komissiyasi (B. Toshboyev) zimmasiga yuklatilsin.

6. Ushbu qaror qabul qilingan kundan eʼtiboran kuchga kiradi.