Oʻzbekiston Respublikasi Prezidentining 2025-yil 26-dekabrdagi PQ-387-sonli qarori ijrosini taʼminlash, shuningdek, shaharning sanitar holatini yaxshilash va avtoturargohlardan tushadigan mablagʻlarning shaffofligini oshirish maqsadida, xalq deputatlari Xiva shahar Kengashining mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasining 2026-yil 14-fevraldagi DKQ 03-01/9-26-sonli qarorini koʻrib chiqib, xalq deputatlari shahar Kengashi qaror qiladi:

1. Oʻzbekiston Respublikasi Prezidentining 2025-yil 26-dekabrdagi “Mahalliy budjetlar va budjet tashkilotlarining moliyaviy barqarorligini oshirish, budjet intizomini kuchaytirishga doir qoʻshimcha chora-tadbirlar toʻgʻrisida”gi PQ-387-sonli qaroriga muvofiq Xiva shahar Obodonlashtirish boʻlimi tomonidan koʻrsatiladigan xizmatlar uchun tarif stavkalarini belgilash va budjet tushumlarini maqbullashtirish toʻgʻrisida shahar xokimining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari — shahar obodonlashtirish boshqarmasi boshligʻi A. Raxmanovning axboroti maʼlumot uchun qabul qilinsin, olib borayotgan ishlari qoniqarli deb baholansin.

2. Xiva shahar obodonlashtirish boʻlimiga berkitilgan avtoturargohlardan foydalanganlik uchun toʻlov miqdorlari 1-ilovaga muvofiq tasdiqlansin.

3. Shahar markaziy koʻchalarida faoliyat yuritayotgan tadbirkorlik subʼektlari uchun chiqindilarni olib chiqib ketish va atrof-hududni obodonlashtirish (koʻkalamzorlashtirish) boʻyicha xizmat koʻrsatish tartibi va majburiy toʻlovlar tariflari 2-ilovaga muvofiq belgilansin.

4. Xiva shahar xokimining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari - shahar obodonlashtirish boshqarmasi boshligʻi A. Raxmanov:

bir oy muddatda markaziy koʻchalardagi barcha tadbirkorlik subʼektlari bilan xizmat koʻrsatish boʻyicha shartnomalar tuzilishini taʼminlasin;

avtoturargohlarda naqd pulsiz toʻlov tizimini (QR-kod, terminal) toʻliq joriy etsin.

5. Xiva shahar hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari — shahar iqtisodiyot va moliya boʻlimi boshligʻi (M. Atajanov) va shahar soliq inspeksiyasi boshligʻi (N. Bobojonov) mazkur xizmatlardan tushadigan mablagʻlarning maqsadli ravishda shahar infratuzilmasini yaxshilashga yoʻnaltirilishini nazorat qilsin;

har chorak yakuni bilan ushbu qaror doirasida amalga oshirilgan ishlar yuzasidan xalq deputatlari shahar Kengashiga hisobot kiritib borsin.

6. Mazkur qaror ijrosini nazorat qilish xalq deputatlari shahar Kengashining mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (R. Erniyazov) zimmasiga yuklansin.