Oʻzbekiston Respublikasi “Oʻsimliklar karantini toʻgʻrisida”gi qonunining 9 va 14-moddalari, “Veterinariya toʻgʻrisida”gi qonunining 6-moddasi hamda Oʻzbekiston Respublikasi Vazirlar Mahkamasining 2022-yil 7-iyundagi “Oʻzbekiston Respublikasi Oʻsimliklar karantini va himoyasi agentligi faoliyatini tartibga soluvchi normativ-huquqiy hujjatlarni tasdiqlash toʻgʻrisida”gi 311-sonli qarori ijrosi yuzasidan viloyatda oziq-ovqat xavfsizligini hamda epidemik vaziyat barqarorligini taʼminlash uchun veterinariya nazoratini kuchaytirish maqsadida “Mahalliy davlat hokimiyati toʻgʻrisida”gi Oʻzbekiston Respublikasi qonunining 10 va 21¹-moddalariga asosan qaror qilaman:

1. Viloyatda epidemiologik vaziyat barqarorligini taʼminlash, yuqumli kasalliklarning kirib kelishi va hududlar boʻylab tarqalishining oldini olish, veterinariya-sanitariya va fitosanitariya talablariga rioya etilishi ustidan nazoratni kuchaytirish, shuningdek, ichki fitosanitariya sertifikatlari mavjudligini nazorat qilish hamda bu haqida elektron axborot tizimiga maʼlumot kiritish maqsadida Gurlan tumanidagi “Momokoʻpir” YPX, Urganch tumanidagi “Cholish” YPX, Tuproqqalʼa tumanidagi “Toshsoqa” YPX maskanlarida viloyat oʻsimliklar karantini va himoyasi boshqarmasi hamda viloyat veterinariya va chorvachilikni rivojlantirish boshqarmasi xodimlaridan iborat tun-u kun faoliyat yurituvchi “Karantin nazorati” maskanlari tashkil etilsin.

2. Viloyat ichki ishlar boshqarmasi (A. Shermuxamedov), viloyat veterinariya va chorvachilikni rivojlantirish boshqarmasi (Sh. Abidov), viloyat oʻsimliklar karantini va himoyasi boshqarmasi (A. Urazbayev):

hamkor tashkilotlar oʻrtasida chora-tadbirlar ishlab chiqish;

“Karantin nazorati” maskani faoliyati uchun zarur shart-sharoitlar yaratib berish;

qoʻshni viloyatlardan yuqumli kasalliklari boʻlgan uy hayvonlari, jumladan chorva mollari va parrandalarning olib kirilishi va olib chiqilishining oldini olish;

veterinariya-sanitariya talablariga javob bermaydigan goʻsht va goʻsht mahsulotlari, sut va sut mahsulotlari, tuxum, teri mahsulotlari kirib kelishini oldini olish;

viloyat hududiga chet mamlakatlardan va boshqa viloyatlardan kirib keladigan hamda karantin ostidagi tashqi bozorga chiqadigan eksportga moʻljallangan qishloq xoʻjaligi mahsulotlarini doimiy nazorat qilish choralarini koʻrsin.

Belgilansinki, YPX xodimlari “Karantin nazorati” maskani xodimlariga avtotransport vositalarini ularni koʻzdan kechirish uchun tegishli tartibda toʻxtatishda koʻmaklashib boradi.

3. Viloyat oʻsimliklar karantini va himoyasi boshqarmasi (A. Urazbayev), viloyat veterinariya va chorvachilikni rivojlantirish boshqarmasi (Sh. Abidov) amalga oshirilayotgan ishlar boʻyicha umumlashgan maʼlumotlarni viloyat hokimligiga har haftada taqdim etib borsin.

4. Ushbu qaror “Xorazm haqiqati” gazetasida rasmiy eʼlon qilinganidan keyin kuchga kiradi.

5. Mazkur qarorning bajarilishini nazorat qilish viloyat hokimining oʻrinbosari U. Masharipov zimmasiga yuklansin.