Oʻzbekiston Respublikasi “Taʼlim toʻgʻrisida”gi Qonunining 27-moddasi, Oʻzbekiston Respublikasi Vazirlar Mahkamasining 2017-yil 15-martdagi 140-son qarori bilan tasdiqlangan “Umumiy oʻrta taʼlim toʻgʻrisida”gi nizomning 39 — 41-bandlari ijrosini taʼminlash maqsadida, Nurota tuman Maktabgacha va maktab taʼlimi boʻlimining 2026-yil 25-iyundagi 01-01/5-2064-son xati hamda unga ilova qilingan hujjatlar koʻrib chiqilib, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6, 21¹-moddalariga asosan, qaror qilaman:

1. Nurota tuman Maktabgacha va maktab taʼlimi boʻlimining 2026-yil 25-iyundagi “Maktab yoshidagi bolalarni majburiy taʼlimga jalb etish maqsadida tumandagi har bir davlat umumiy oʻrta taʼlim muassasasini hudud va mikrouchastkalarga biriktirish toʻgʻrisida”gi 01-01/5-2064-son xati hamda Xalq deputatlari Nurota tuman Kengashining 2026-yil 10-iyundagi “Tumandagi Nurobod mahalla fuqarolar yigʻini hududida yangi qurilgan 330 oʻrinli binoda 1-son umumiy oʻrta taʼlim maktabini tashkil etish toʻgʻrisida”gi VII-26-64-5-74-K/26-son qarori maʼlumot va ijro uchun inobatga olinsin.

2. Tuman Maktabgacha va maktab taʼlimi boʻlimi tasarrufidagi har bir davlat umumiy oʻrta taʼlim muassasasini hudud va mikrouchastkalarga biriktirish jadvali ilovaga muvofiq tasdiqlansin.

3. Tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari (Lavozimiga koʻra), tuman Maktabgacha va maktab taʼlimi boʻlimi boshligʻi (K. Shamiyeva) hamda tumandagi davlat umumiy oʻrta taʼlim muassasalari direktorlariga:

maktab yoshidagi bolalarni 7 yoshga toʻladigan yilda umumiy oʻrta taʼlim bilan toʻliq qamrab olish;

tumandagi 18-AFCHOʻSMUOʻTMda taʼlim rus tilida olib boriladigan sinflarni tashkil etishda 1 — 11-sinflarda rus tilida taʼlim berish huquqiga ega boʻlgan pedagog kadrlar bilan taʼminlanganlikni inobatga olish vazifalari yuklatilsin.

4. Belgilansinki, tumandagi davlat umumiy oʻrta taʼlim muassasalari rahbarlari oʻzlari rahbarlik qilayotgan muassasaga biriktirilgan hududdagi maktab yoshidagi bolalarni oʻz vaqtida davlat umumiy oʻrta taʼlim muassasasiga oʻqishga jalb etish uchun shaxsan masʼul hisoblanadi.

5. Oʻzbekiston Mahallalar uyushmasi tuman boʻlimi (A. Shokirov) hamda mahalla fuqarolar yigʻinlari raislariga maktab yoshidagi bolalarni davlat umumiy oʻrta taʼlim muassasalariga qamrab olish jarayonida tuman Maktabgacha va maktab taʼlimi boʻlimi hamda umumiy oʻrta taʼlim muassasalariga amaliy yordam koʻrsatish tavsiya etilsin.

6. Tuman hokimligi axborot xizmati rahbari (L. Mansurov) mazkur qaror matnini tuman hokimligining rasmiy Telegram kanalida yoritish hamda rasmiy veb-saytiga joylashtirish choralarini koʻrsin.

7. Mazkur qaror qabul qilinishi munosabati bilan tuman hokimining 2022-yil 15-dekabrdagi 184-5-74-Q/22-son qarori oʻz kuchini yoʻqotgan deb hisoblansin.

8. Ushbu qaror rasmiy eʼlon qilingan kundan eʼtiboran kuchga kiradi.

9. Ushbu qarorning ijrosini nazorat qilish tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari (Lavozimiga koʻra), hamda tuman Maktabgacha va maktab taʼlimi boʻlimi boshligʻi (K. Shamiyeva) zimmasiga yuklansin.