Oʻzbekiston Respublikasi Prezidentining 2025-yil 26-dekabrdagi “Mahalliy budjetlar va budjet tashkilotlarining moliyaviy barqarorligini oshirish, budjet intizomini kuchaytirishga doir qoʻshimcha chora-tadbirlar toʻgʻrisida”gi PQ-387-son qarorining 8-bandiga muvofiq hamda Boʻston tumani Obodonlashtirish boshqarmasi tomonidan taqdim etilgan chiqindilarni olib chiqish va hududlarni obodonlashtirish xizmatlari boʻyicha iqtisodiy asoslangan tarif hisob-kitoblarini koʻrib chiqib, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6 va 24-moddalariga asosan, xalq deputatlari Boʻston tumani Kengashi qaror qiladi:

1. Boʻston tumani Obodonlashtirish boshqarmasi tomonidan tuman markaziy koʻchalari boʻyida joylashgan tadbirkorlik subyektlariga shartnoma asosida koʻrsatiladigan chiqindilarni olib chiqish hamda hududlarni obodonlashtirish xizmatlari uchun tariflar ilovaga muvofiq tasdiqlansin.

2. Belgilansinki:

tariflar Obodonlashtirish boshqarmasi va tadbirkorlik subyektlari oʻrtasida tuziladigan shartnomalar asosida qoʻllaniladi;

xizmatlar hajmi amalda bajarilgan ishlar boʻyicha aniqlanadi;

hisob-kitoblar amaldagi soliq qonunchiligiga muvofiq amalga oshiriladi.

3. Boʻston tumani hokimining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari — Obodonlashtirish boshqarmasi boshligʻi X. Norboyevga:

tuman markaziy koʻchalari boʻyida joylashgan tadbirkorlik subyektlari bilan chiqindilarni olib chiqish hamda hududlarni obodonlashtirish xizmatlarini koʻrsatish boʻyicha shartnomalar tuzilishini tashkil etish;

xizmatlarni tasdiqlangan tariflar asosida koʻrsatish, chiqindilarni belgilangan grafik asosida olib chiqish va hududlarni obodonlashtirish ishlarini sifatli amalga oshirishni taʼminlash;

koʻrsatilgan xizmatlar hajmi, hisob-kitoblar va tushumlarning shaffof yuritilishini taʼminlash;

xizmatlar koʻrsatish jarayonida sanitariya-ekologik talablar hamda amaldagi qonunchilik talablariga rioya etilishini taʼminlash;

mazkur qaror ijrosini muvofiqlashtirish, tariflarning qoʻllanilishi va xizmatlar sifati yuzasidan monitoring olib borish;

zarurat tugʻilganda xizmatlar uchun belgilangan tariflarni qayta koʻrib chiqish boʻyicha asoslantirilgan takliflarni xalq deputatlari Boʻston tumani Kengashiga kiritish vazifalari yuklatilsin.

4. Mazkur qarorning ijrosini taʼminlash Boʻston tumani hokimining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari-Obodonlashtirish boshqarmasi boshligʻi X. Norboyevga, nazorat qilish xalq deputatlari Boʻston tumani Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (Sh. Mamarizayev) hamda Kengash kotibiyati zimmasiga yuklansin.

5. Mazkur qaror rasmiy eʼlon qilingan kundan eʼtiboran uch oydan keyin kuchga kiradi.