Ózbekstan Respublikası Prezidentiniń 2025-jıl 26-dekabrdegi “Jergilikli byudjetler hám byudjet shólkemleriniń finanslıq turaqlılıǵın asırıw, byudjet tártibin kúsheytiwge tiyisli qosımsha ilajlar haqqında”ǵı PQ-387-sanlı qararınıń 8-bántine muwapıq, 2026-jıl 1-yanvardan baslap abadanlastırıw basqarmaları tárepinen rayon (qala) oraylıq kósheleri boyındaǵı isbilermenlik subyektlerine shıǵındılardı alıp shıǵıw hám aymaqlardı abadanlastırıw xızmetlerin shártnama tiykarında kórsetiwge ruxsat berilgenligi, usı xızmetler ushın tarifler xalıq deputatları rayon (qala) Keńesleri tárepinen tastıyıqlanıw belgilengen. Usıǵan tiykar, rayon hákimniń qurılıs, tosıqlarsız ortalıq jaratıw, kommunikaciyalar, kommunallıq xojalıq, ekologiya hám kókelemzarlastırıw máseleleri boyınsha orınbasarı — Abadanlastırıw basqarması baslıǵı Q. Batırbaevtıń 2026-jıl 13-iyuldegi 06/1484-sanlı xatın inabatqa alıp, Ózbekstan Respublikasınıń “Jergilikli mámleket hákimiyatı haqqında”ǵı Nızamınıń 24-statyasına tiykarlanıp, Xalıq deputatları Moynaq rayonlıq Keńesi sheshim etedi:

1. Ózbekstan Respublikası Prezidentiniń 2025-jıl 26-dekabrdegi “Jergilikli byudjetler hám byudjet shólkemleriniń finanslıq turaqlılıǵın asırıw, byudjet tártibin kúsheytiwge tiyisli qosımsha ilajlar haqqında”ǵı PQ-387-sanlı qararı maǵlıwmat hám orınlaw ushın qabıl etilsin.

2. Rayon hákimliginiń 2026-jıl 13-iyuldegi 06/1484-sanlı xatı inabatqa alınsın.

3. Moynaq rayonı abadanlastırıw basqarmasınıń oraylıq kósheler boyında jaylasqan isbilermenlik subyektleri menen dúzilgen shártnamalar tiykarında shıǵındılardı alıp shıǵıw tarifleri 1-qosımshaǵa hám aymaqlardı abadanlastırıw xızmetleri ushın tarifler 2-3-4-5-6-qosımshalarǵa muwapıq maqullansın.

4. Rayon hákimniń birinshi orınbasarı (S.Iniyatov)na tastıyıqlanǵan tariflerdi ámeliyatqa tolıq hám waqtında engiziliwin támiyinlew, Moynaq rayonı Abadanlastırıw basqarması, Ekonomika hám qarjı bólimi hám de basqa da mápdar shólkemler iskerligin muwapıqlastırıw, sonıń menen birge, barlıq isbilermenlik subyektlerine xızmet kórsetiwde birden-bir jantasıw hám tártip-intizamdı támiyinlew usınıs etilsin.

5. Moynaq rayonı abadanlastırıw basqarması baslıǵınıń birinshi orınbasarı (R. Mambetkadirov)na oraylıq kóshelerde jaylasqan isbilermenlik subyektleri menen dúzilgen shártnamalar tiykarında shıǵındılardı waqtında hám sapalı alıp shıǵıw, aymaqlardı sanitariya hám ekologiyalıq talaplarǵa muwapıq abadanlastırıw, belgilengen tarifler tiykarında xızmetlerdi úzliksiz shólkemlestiriw, shártnama minnetlemelerin qatań orınlaw usınıs etilsin.

6. Rayonlıq ekonomika hám qarjı bólimi (S. Iniyatov)ne usı xızmetler ushın belgilengen tariflerdiń ekonomikalıq tiykarlanǵanlıǵın turaqlı túrde analiz etip barıw, xızmetler ózine túser bahası hám finanslıq nátiyjeliligin úyreniw, byudjet tártibine qatań ámel jetiliwin támiyinlew hám de bul tarawda artıqsha qárejetlerdiń aldın alıw boyınsha anıq sharalar kórip barıw usınıs etilsin.

7. Rayonlıq mámleket salıq inspekciyası (T. Adenbayev)na xızmetler boyınsha qáliplesetuǵın barlıq túsimlerdiń tolıq hám ashıq esapqa alınıwın támiyinlew, isbilermenlik subyektleri menen esap-kitaplardıń tuwrı júrgiziliwin baqlaw hám salıq bazasın keńeytiw tuwralı qatań qadaǵalaw ilajların ámelge asırıw usınıs etilsin.

8. Usı sheshimniń orınlanıwın qadaǵalaw xalıq deputatları rayonlıq Keńesiniń jergilikli byudjet, isbilermenlikti rawajlandırıw hám ekonomikalıq reformalar máseleleri boyınsha turaqlı komissiyasına júklensin.

9. Usı sheshim qabıl etilgen kunnen baslap 3 (úsh) aydan soń kushke kiredi.