Oʻzbekiston Respublikasining 2004-yil 3-dekabrdagi “Muhofaza etiladigan tabiiy hududlar toʻgʻrisida”gi 710-II-sonli qonunining VI bob, 27-moddasida tabiiy obyektlar maxsus vakolatli davlat organining taqdimnomasi, shuningdek yuridik yoki jismoniy shaxslarning iltimosnomasi boʻyicha Qoraqalpogʻiston Respublikasi Joʻqorgʻi Kengesining, xalq deputatlari viloyatlar va Toshkent shahar Kengashlarining qarorlari bilan “Davlat tabiat yodgorliklari” deb eʼlon qilinishi belgilangan.

Shuningdek, Oʻzbekiston Respublikasi Prezidentining 2026-yil 4-maydagi “Ugom daryosining tabiiy gidrologik rejimi va biologik xilma-xilligini yanada yaxshilash chora-tadbirlari toʻgʻrisida”gi 164-sonli qarorida Oʻzbekiston Respublikasi Ekologiya va iqlim oʻzgarishi milliy qoʻmitasi va Toshkent viloyati hokimligining Ugom daryosini “Davlat gidrologik tabiat yodgorligi” deb eʼlon qilish toʻgʻrisidagi taklifiga rozilik berilgan.

Toshkent viloyati hokimining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari Sh. Mahmudovning 2026-yil 8-iyundagi 6-3-2901-sonli xati Xalq deputatlari viloyat Kengashining Agrar, qurilish, kommunal sohalar, ekologiya, sanoat, transport va suv xoʻjaligi masalalari boʻyicha doimiy komissiyasining 2026-yil 12-iyundagi yigʻilishida muhokama qilinib, qaror loyihasi oʻrnatilgan tartibda regulation.gov.uz portaliga joylashtirilgan.

Doimiy komissiyaning yigʻilish bayoni va xulosasi hamda Oʻzbekiston Respublikasi “Mahalliy davlat hokimiyati toʻgʻrisida”gi qonunining 6- va 24-moddalariga asosan, Xalq deputatlari viloyat Kengashi qaror qiladi:

1. Oʻzbekiston Respublikasining 2004-yil 3-dekabrdagi “Muhofaza etiladigan tabiiy hududlar toʻgʻrisida”gi 710-II-sonli qonunining VI-bob, 27-moddasi hamda Oʻzbekiston Respublikasi Prezidentining 2026-yil 4-maydagi “Ugom daryosining tabiiy gidrologik rejimi va biologik xilma-xilligini yanada yaxshilash chora-tadbirlari toʻgʻrisida”gi 164-sonli qarori maʼlumot va asos uchun qabul qilinsin.

2. Oʻzbekiston Respublikasi Prezidentining 2026-yil 4-maydagi “Ugom daryosining tabiiy gidrologik rejimi va biologik xilma-xilligini yanada yaxshilash chora-tadbirlari toʻgʻrisida”gi 164-sonli qarorida belgilangan Ugom daryosining Toshkent viloyati hududidan oqib oʻtuvchi 13,3 km qismi 1-ilovaga muvofiq, “Davlat gidrologik tabiat yodgorligi” deb eʼlon qilinsin.

3. Viloyat hokimining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari Sh. Mahmudov Ekologiya qoʻmitasi bilan birgalikda:

2026-yil 1-oktabrga qadar daryoning tabiiy gidrologik va ekologik holatini kompleks oʻrganish, suv resurslari va bioxilma-xillikni muhofaza qilish, gidrotexnik inshootlar faoliyatining ekologik xavfini kamaytirish hamda sohil boʻyi hududlarida ekologik muhitni barqaror rivojlantirishni nazarda tutuvchi Ugom daryosi ekotizimini yaxshilash boʻyicha master rejasini tasdiqlasin;

Oʻrmon va yashil hududlarni koʻpaytirish, choʻllanishga qarshi kurashish agentligi bilan birgalikda “Yashil makon” umummilliy loyihasi doirasida daryoning sohil boʻyi va muhofaza zonalaridagi erlar degradatsiyasining oldini olish maqsadida daraxt va butalar ekish tadbirlarini olib borsin;

qaror ijrosi yuzasidan amalga oshirilgan ishlar toʻgʻrisida Xalq deputatlari viloyat Kengashiga maʼlumotlar kiritib borsin.

4. Viloyat ekologiya va iqlim oʻzgarishi bosh boshqarmasi (J. Abdusalomov) hamda Burchmulla davlat oʻrmon xoʻjaligi (A. Turabbayev):

Ugom daryosini 13,3 km qismi “Davlat gidrologik tabiat yodgorligi” deb eʼlon qilinganligi munosabati bilan tegishli amaliy choralarni koʻrsin hamda belgilangan muhofaza rejimiga rioya etilishi yuzasidan qatʼiy nazorat oʻrnatsin.

5. Viloyat hokimining matbuot kotibi — axborot siyosati masalalari boʻyicha maslahatchisi Gʻ. Sheraliyev, Oʻzbekiston milliy teleradiokompaniyasi “Toshkent viloyati teleradiokanali” davlat muassasasi direktori O. Begaliyev:

Ugom daryosini “Davlat gidrologik tabiat yodgorligi” deb eʼlon qilishni ommaviy axborot vositalarida hamda viloyat hokimligining rasmiy veb-saytiga yoritilishini taʼminlasin.

6. Qarorning ijrosini taʼminlashga masʼul etib, viloyat hokimining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari Sh. Mahmudov belgilansin.

7. Mazkur qaror ijrosini nazorat qilish Xalq deputatlari viloyat Kengashi Agrar, qurilish, kommunal sohalar, ekologiya, sanoat, transport va suv xoʻjaligi masalalari boʻyicha doimiy komissiya raisi A. Xudayberganov zimmasiga yuklansin.

8. Ushbu qaror rasmiy eʼlon qilingan kundan eʼtiboran kuchga kiradi.