Oʻzbekiston Respublikasi Raqamli texnologiyalar vazirligi va Serbiya Respublikasi Axborot va telekommunikatsiyalar vazirligi, keyingi oʻrinlarda “Ishtirokchilar” deb ataluvchilar,

axborot-kommunikatsiya texnologiyalari sohasida oʻzaro manfaatli hamkorlikni oʻrnatish, rivojlantirish va chuqurlashtirish istagidan kelib chiqib,

Oʻzbekiston Respublikasi va Serbiya Respublikasi oʻrtasidagi tarixiy va doʻstona munosabatlarni inobatga olib,

axborot-kommunikatsiya texnologiyalarini rivojlantirish uchun oʻzaro manfaatli va yangilangan hamkorlik zarurligini eʼtirof etib,

rivojlanishdagi taraqqiyotning muhimligini hamda axborot-kommunikatsiya texnologiyalari sohasida texnik salohiyat va imkoniyatlardan oqilona foydalanish zarurligini tan olib,

bunday hamkorlik umumiy manfaatlarga xizmat qilishi va har ikki mamlakatda tegishli sohalarning rivojlanishiga hissa qoʻshishiga ishonib,

hamkorlik borasida quyidagi anglashuvga erishdilar:

1. Mazkur Anglashuv Memorandumi tenglik, oʻzaro javobgarlik va oʻzaro manfaatdorlik tamoyillari asosida Ishtirokchilar oʻrtasida axborot-kommunikatsiya texnologiyalari sohasidagi hamkorlik uchun asos yaratishga qaratilgan.

2. Ishtirokchilar har ikki mamlakatdagi ilmiy-tadqiqot muassasalari oʻrtasidagi hamkorlikni ragʻbatlantirish va Ishtirokchilarning mamlakatlaridagi kommunikatsiya va axborot sohalarining rivojlanishiga hissa qoʻshish niyatini bildiradilar.

1. Ishtirokchilar hamkorlikni kengaytirishga koʻmaklashadilar, har ikki mamlakat axborot-kommunikatsiya texnologiyalari sohasida faoliyat yurituvchi kompaniyalar, ilmiy va taʼlim muassasalari, davlat idoralari hamda boshqa tashkilotlar oʻrtasida bilim, tajriba va ekspertlar almashinuvini ragʻbatlantiradilar. Ular mutaxassislar tayyorlashni yaxshilashga hissa qoʻshuvchi materiallar almashadilar, oʻz meʼyoriy hujjatlarini tahlil qiladilar va taqqoslaydilar hamda quyidagi tegishli yoʻnalishlarda tadqiqotlar olib boradilar:

a) telekommunikatsiyada, shu jumladan, 5G tarmoqlarida innovatsion yechimlarni ishlab chiqish;

b) qishloq hududlarida telekommunikatsiyani rivojlantirish;

c) raqamli koʻnikmalarni rivojlantirish;

d) kiberxavfsizlik;

e) elektron imzolar (e-imzo) va ishonch xizmatlari;

f) Ishtirokchilar tarafidan oʻzaro kelishilgan va AKT sohasida yuzaga keladigan ustuvorliklarga asoslangan boshqa hamkorlik yoʻnalishlari.

2. Ishtirokchilar zamonaviy texnologiyalarga asoslangan axborot-kommunikatsiya texnologiyalarini yoʻlga qoʻyish va ularni maqbul tarzda integratsiya qilishni ragʻbatlantirish niyatini bildiradilar.

3. Xalqaro loyihalar boʻyicha hamkorlik jalb etilgan subyektlar tarafidan imzolanadigan alohida yozma amalga oshirish bitimlari asosida amalga oshirilishi mumkin.

4. Ishtirokchilar oʻzlarining milliy manfaatlaridan kelib chiqib, Xalqaro elektr aloqasi ittifoqi, Butunjahon pochta ittifoqi hamda boshqa xalqaro va mintaqaviy tashkilotlar doirasida hamkorlik qiladilar.

1. Mazkur Anglashuv Memorandumida belgilangan hamkorlik oldindan kelishilgan turli shakllar orqali, shu jumladan, biroq ular bilan cheklanmagan holda, oʻqitish, tadqiqot, texnik maslahatlashuvlar hamda zarur sohalarda ekspertlar, materiallar va tajriba almashinuvi orqali amalga oshiriladi, xususan:

a) ikki mamlakat oʻrtasida ilgʻor tajribalar, amaliyotlar va ekspertlar almashinuvi;

b) oʻquv mashgʻulotlari, texnik maslahatlashuvlar tashkil etish va inson resurslarini rivojlantirish;

c) tashkilotlar, ilmiy-tadqiqot muassasalari va universitetlar oʻrtasidagi almashinuv va hamkorlikni ragʻbatlantirish;

d) AKT sohasida qoʻshma tadqiqotlar;

e) hamkorlikning har bir yilidagi aniq ehtiyojlardan kelib chiqib, Ishtirokchilar tomonidan belgilanadigan boshqa hamkorlik shakllari.

2. Har bir Ishtirokchi mazkur Anglashuv Memorandumi doirasidagi faoliyat bilan bogʻliq oʻz xarajatlarini mustaqil ravishda qoplaydi.

3. Har bir Ishtirokchi mazkur Anglashuv Memorandumi shartlariga muvofiq faoliyatni muvofiqlashtirish va tegishli tartib-taomillarni osonlashtirish uchun bir yoki bir nechta vakil tayinlaydi.

4. Mazkur Anglashuv Memorandumi hech bir Ishtirokchi uchun huquqiy jihatdan majburiy emas va milliy yoki xalqaro huquqqa muvofiq huquqiy majburiyatlar yuzaga keltirishni koʻzda tutmaydi.

1. Har qaysi Ishtirokchi tarafidan mazkur Anglashuv Memorandumi va unga muvofiq tuzilgan har qanday yozma bitimlar doirasida amalga oshiriladigan barcha faoliyat, shu jumladan, qoʻshimcha ijro bitimlarini tuzish, Ishtirokchilarning tegishli qonun va meʼyoriy hujjatlariga hamda tegishli moliyalashtirish mavjudligi va byudjet imkoniyatlariga bogʻliq boʻladi.

2. Hamkorlik yoʻnalishlaridagi barcha faoliyat Ishtirokchilarda moliyalashtirish va boshqa resurslar mavjudligiga qarab amalga oshiriladi.

3. Qoʻshimcha moliyalashtirish zarurati yuzaga kelgan taqdirda, Ishtirokchilar xalqaro tashkilotlar yoki davlat-xususiy sheriklik kabi tashqi manbalarni jalb qilishlari mumkin.

1. Mazkur Anglashuv Memorandumi doirasidagi hamkorlik natijasida yuzaga keladigan har qanday maxfiy axborot Ishtirokchilarning mamlakatlarida amaldagi huquqiy va meʼyoriy talablarga muvofiq almashiladi.

2. Hech bir Ishtirokchi boshqa Ishtirokchining oldindan yozma roziligisiz mazkur Anglashuv Memorandumi doirasidagi faoliyatni amalga oshirish jarayonida uzatilgan maxfiy axborotni, uni tugatgandan keyin, axborot xavfsizligi qoidalari va maʼlumotlar aylanishi usullariga rioya etishga alohida eʼtibor qaratgan holda, oshkor qilmaydi yoki tarqatmaydi.

1. Mazkur Anglashuv Memorandumini amalga oshirish jarayonida yoki natijasida yaratilgan har qanday intellektual mulk huquqlarini taqsimlashga oid masalalar mazkur Anglashuv Memorandumi doirasidagi har bir aniq hamkorlik yoʻnalishi uchun tuziladigan alohida shartnomalar bilan tartibga solinadi.

2. Har bir Ishtirokchi qoʻshma faoliyat boshlanishidan oldin yoki mazkur Anglashuv Memorandumidan mustaqil ravishda oʻzi yaratgan har qanday intellektual mulk huquqlariga egalik huquqini saqlab qoladi.

1. Mazkur Anglashuv Memorandumiga Ishtirokchilarning oʻzaro roziligi bilan, qoʻshimcha bayonnomalarda rasmiy ravishda kelishilgan oʻzgartirishlar orqali oʻzgartirishlar kiritilishi mumkin.

2. Bunday oʻzgartirishlar mazkur Anglashuv Memorandumining ajralmas qismiga aylanadi va Ishtirokchilar tarafidan kelishilgan shartlarga muvofiq amal qila boshlaydi.

Mazkur Anglashuv Memorandumi imzolangan sanadan boshlab amal qila boshlaydi va uch (3) yil davomida amalda boʻladi, soʻngra, basharti Ishtirokchilardan biri joriy muddat tugashiga kamida olti (6) oy qolganda boshqa Ishtirokchini mazkur Anglashuv Memorandumidagi ishtirokini toʻxtatish niyati toʻgʻrisida yozma ravishda xabardor qilmasa, u oʻz-oʻzidan navbatdagi teng muddatlarga uzaytiriladi.

Mazkur Anglashuv Memorandumi qoidalarini amalga oshirish yoki talqin qilishdan kelib chiqadigan har qanday nizolar milliy yoki xalqaro sudga yoxud uchinchi tomonga murojaat qilmasdan, Ishtirokchilar oʻrtasida diplomatik kanallar orqali maslahatlashuvlar va muzokaralar yoʻli bilan doʻstona tarzda hal etiladi.

Belgrad shahrida, 2026-yil 8-sentabr kuni, ikki asl nusxada, oʻzbek, serb va ingliz tillarida imzolandi, bunda barcha matnlar autentikdir. Talqin qilishda kelishmovchiliklar yuzaga kelgan taqdirda, ingliz tilidagi matndan foydalaniladi.