Ўзбекистон Республикаси Олий Мажлиси Қонунчилик палатаси Инновацион ривожланиш ва ахборот технологиялари масалалари қўмитасининг (бундан буён матнда Қўмита деб юритилади) 2026 йил биринчи ярим йиллигидаги фаолияти тўғрисидаги ахборотини кўриб чиқиб, Ўзбекистон Республикаси Олий Мажлиси Қонунчилик палатасининг Кенгаши таъкидлайдики, Қўмита томонидан инновациялар ва ахборот-коммуникация технологиялари йўналишидаги ислоҳотларни янада жадаллаштириш, давлат органларининг иш жараёнларини рақамлаштириш, улар фаолиятининг очиқлиги ва ошкоралигини таъминлаш каби муҳим йўналишларнинг ҳуқуқий пойдеворини мустаҳкамлашга алоҳида эътибор қаратилган.

Хусусан, 2026 йил биринчи ярим йиллигида Қўмита 10 та қонун лойиҳасига масъул бўлган. Улардан 1 таси биринчи ўқишда кўриб чиқиш жараёнида, 2 таси иккинчи ўқишга тайёрланмоқда, 7 таси Ўзбекистон Республикаси Олий Мажлисининг Қонунчилик палатаси (бундан буён матнда Қонунчилик палатаси деб юритилади) томонидан қабул қилиниб, Ўзбекистон Республикаси Олий Мажлисининг Сенатига юборилган.

Ушбу қонунлар электрон тижорат ва хизмат кўрсатиш соҳасида шаффофликни таъминлашга, истеъмолчилар ҳуқуқларини ҳимоя қилишга, коррупцияга қарши курашишга, давлат хизматлари ва халқаро тўлов тизимларини ривожлантиришга, шахсга доир маълумотлар хавфсизлиги ҳамда кредит муносабатларида масъулиятни оширишга қаратилган.

Шунингдек уларда креатив индустрия, маданият, суғурта ва киберхавфсизлик соҳаларини такомиллаштиришга, ахборот технологиялари орқали содир этиладиган жиноятларнинг олдини олишга, рақамли иқтисодиётга инвестиция жалб этишга ҳамда мамлакатимизни рақамли технологиялар соҳасида минтақавий етакчи сифатида мустаҳкамлашга доир қоидалар белгиланган.

Ҳисобот даврида Қўмита томонидан 3 та назорат-таҳлил тадбири ўтказилган. Улардан 2 таси давлат органлари раҳбарларининг ўз фаолияти масалалари юзасидан ахборотини эшитишга, 1 таси қонунларнинг ижро этилиш ҳолатини ўрганишга тааллуқлидир.

Шу билан бирга Ўзбекистон Республикаси Рақамли технологиялар вазирлиги, Олий таълим, фан ва инновациялар вазирлиги ҳузуридаги Инновацион ривожлантириш агентлиги раҳбарларининг ва улар ўринбосарларининг ҳамда қатор бошқа ташкилотлар мутасаддиларининг ахбороти эшитилиб, Қўмита мажлисларида муҳокама қилинган.

Қўмита аъзолари сайловчиларнинг ҳуқуқлари ва қонуний манфаатларини таъминлаш билан боғлиқ масалалар юзасидан мансабдор шахсларга жами 7 та депутат сўрови юборган.

Қонун ижодкорлиги жараёнини ва парламент назоратини ҳуқуқий, ташкилий ва амалий жиҳатдан такомиллаштириш мақсадида Қўмита Венчур фондлар томонидан молиялаштирилаётган ёш стартапчилар билан очиқ мулоқот ўтказган ҳамда мазкур тадбир якунлари бўйича «Стартаплар тўғрисида»ги қонун лойиҳасини ишлаб чиқиб, тегишли ташкилотларга ўрганиб чиқиш учун юборган.

Жисмоний ва юридик шахсларнинг мурожаатларини ўз вақтида ўрганишга ҳамда уларни ҳал этишга Қўмита томонидан алоҳида эътибор қаратилган. 2026 йил ярим йиллиги давомида жисмоний ва юридик шахслардан Қўмита номига келиб тушган жами 210 та мурожаат белгиланган тартибда кўриб чиқилган.

Ўз фаолиятида очиқлик ва шаффофликни таъминлаш, соҳага оид қабул қилинаётган қонун ҳужжатларининг мазмун-моҳиятини жамоатчиликка етказиш мақсадида Қўмита оммавий ахборот воситалари билан самарали ҳамкорликни йўлга қўйган. Қўмитанинг ҳисобот давридаги фаолияти оммавий ахборот воситаларида жами 1 273 маротаба ёритилган.

Шу билан бирга Қўмитанинг ўтган даврдаги фаолияти таҳлили келгусидаги ишларни ташкил этишда бир қатор жиҳатларга алоҳида эътибор қаратиш лозимлигини кўрсатмоқда.

Жумладан, қонунларнинг жойларда ижро этилиш ҳолатини ўрганиш якунлари бўйича қонунчиликни такомиллаштириш юзасидан таклифлар ишлаб чиқиш борасида Қўмитанинг ташаббускорлигини янада кучайтириш зарурати мавжуд.

Шунингдек қонун лойиҳаларини ишлаб чиқиш ва назорат-таҳлил тадбирларини ўтказиш чоғида Қўмита ҳузуридаги Жамоатчилик кенгаши аъзолари имкониятларидан самарали фойдаланиш муҳим аҳамият касб этади.

Юқоридагилардан келиб чиқиб, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси Инновацион ривожланиш ва ахборот технологиялари масалалари қўмитасининг 2026 йил биринчи ярим йиллигидаги фаолияти тўғрисидаги ахбороти маълумот учун қабул қилинсин.

2. Ўзбекистон Республикаси Олий Мажлиси Қонунчилик палатасининг Инновацион ривожланиш ва ахборот технологиялари масалалари қўмитаси:

«Ўзбекистон — 2030» стратегиясини «Маҳаллани ривожлантириш ва жамиятни юксалтириш» йилида амалга оширишга оид давлат дастурининг ҳамда инновациялар ва ахборот-коммуникация технологиялари йўналишидаги ислоҳотларни янада жадаллаштиришга доир бошқа вазифаларнинг ўз вақтида ва сифатли бажарилиши устидан таъсирчан парламент назоратини олиб боришга;

ўзи масъул бўлган қонун лойиҳаларини Қўмита ҳузуридаги Жамоатчилик кенгаши йиғилишларида мунтазам равишда муҳокама қилиб боришга, қонун ижодкорлиги фаолиятида кенг жамоатчиликнинг таклифлари ва фикр-мулоҳазаларини инобатга олишга ҳамда назорат-таҳлил тадбирларига соҳа мутахассисларини ва экспертларни кенгроқ жалб этишга;

парламент назорати тадбирлари якунлари бўйича қабул қилинган қарорларнинг ижросини тизимли равишда мониторинг қилишга;

жисмоний ва юридик шахсларнинг мурожаатларини белгиланган муддатларда кўриб чиқишга ва фуқаролардан қонунчиликни такомиллаштириш юзасидан келиб тушган таклифларни улар иштирокида Қўмита мажлисларида муҳокама қилиб боришга;

ўз фаолиятига доир қонун ҳужжатларига киритилаётган ўзгартиришларнинг оммавий ахборот воситалари орқали кенг ёритилишини таъминлаб боришга ҳамда уларнинг мазмун-моҳиятини аҳолига етказиш ишларини янада жадаллаштиришга алоҳида эътибор қаратсин.

3. Қўмита 2026 йил биринчи ярим йиллигидаги фаолиятини оммавий ахборот воситаларида кенг ёритиш чораларини кўрсин. Бунда Қўмита томонидан қуйидагиларга эътибор қаратилсин:

Қўмита масъуллигида қабул қилинган қонунларнинг мазмун-моҳиятини батафсил тушунтириб беришга (подкастлар тўплами);

Ёшлар парламенти аъзолари билан қонунларни муҳокама қилишга, берилган таклиф ва эътирозлар юзасидан фикр алмашишга («Қонунлар Ёшлар парламенти нигоҳида» номли очиқ мулоқот тадбирини ташкил этиш);

қонунлар лойиҳаларини ҳамкорлар билан муҳокама қилишга, яъни қонун ижодкорлиги жараёнларини мақбуллаштириш мақсадида қонун лойиҳаларини ишлаб чиқишда масъул бўлган вазирликлар ва идораларнинг вакиллари иштирокида суҳбатлар ташкил этишга;

Қўмита томонидан амалга оширилган ишлар тўғрисидаги ҳисоботнинг ҳамда мазкур ҳисобот юзасидан Қўмита аъзоларининг фикрлари баён этилган материалларнинг «Халқ сўзи» ва «Народное слово» газеталарида нашр этилишини ташкил этишга.

4. Қонунчилик палатасининг Девони Қўмитага Қонунларнинг мазмун-моҳиятини батафсил тушунтириб бериш бойича подкастлар тўпламини яратишда ҳамда белгиланган вазифаларнинг ижросини таъминлашда ташкилий жиҳатдан кўмаклашсин.

5. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари Р. Хакимов зиммасига юклатилсин.

6. Ушбу Қарор қабул қилинган кундан эътиборан кучга киради.