Ўзбекистон Республикаси Олий Мажлиси Қонунчилик палатасидаги сиёсий партиялар фракцияларининг таклифларини кўриб чиқиб, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. 2026 йил 8 июль куни Ўзбекистон Республикаси Олий Мажлиси Қонунчилик палатасида ўтказиладиган «ҳукумат соати»да «Мамлакатимизда олий таълим муассасалари битирувчилари бандлигини таъминлаш, таълим жараёнларини меҳнат бозори эҳтиёжлари билан уйғунлаштириш ҳамда рақобатбардош кадрлар тайёрлаш борасида амалга оширилаётган чора-тадбирлар тўғрисида»ги ҳамда «Ер қаъридан фойдаланишда атроф-муҳитнинг, ер ва сув ресурсларининг муҳофаза қилиниши ҳамда тоғ-кон ишларида хавфсизлик талабларига риоя этилиши бўйича амалга оширилаётган ишлар тўғрисида»ги масалалар юзасидан Ўзбекистон Республикаси Олий Мажлиси Қонунчилик палатаси депутатларининг саволларига жавобларни эшитиш ҳақидаги таклиф маъқуллансин.

2. Ўзбекистон Республикаси Олий Мажлиси Қонунчилик палатасининг Фан, таълим, маданият, спорт ва ёшлар масалалари қўмитаси ҳамда Экология ва атроф-муҳитни муҳофаза қилиш масалалари қўмитаси «ҳукумат соати»га тайёргарлик кўрилишини ҳамда унинг ўтказилишини ташкил этсин.

3. Ушбу Қарор қабул қилинган кундан эътиборан кучга киради.