Ўзбекистон Республикаси Президентининг «Иқтисодий ислоҳотларни янада чуқурлаштириш, хусусий мулк манфаатларини ҳимоя қилиш ва тадбиркорликни ривожлантириш чора-тадбирлари тўғрисида» 1994 йил 21 январдаги Фармонига мувофиқ Вазирлар Маҳкамаси қарор қилади:

1. Давлат қимматбаҳо металлар қўмитаси тугатилсин.

2. Бирлашмалар, корхоналар, ташкилотларнинг:

1-иловага мувофиқ бирлашмалар, корхоналар ва ташкилотлар томонидан Ўзбекистон олтин қазиб олиш ва олмосга ишлов бериш корхоналари («Ўзолмосолтин») уюшмасини таъсис этиш тўғрисидаги;

«Ўзолмосолтин» уюшмаси томонидан Давлат қимматбаҳо металлар қўмитаси қабул қилган мажбуриятлар, тузган шартномалар, битимлар ва унга тегишли мол-мулклар бўйича ҳуқуқий ворислик функцияларининг амалга оширилиши тўғрисидаги таклифлари қабул қилинсин.

3. «Ўзолмосолтин» уюшмаси ижро этувчи аппаратининг 2-иловага мувофиқ тузилмасида ходимлари сони (хизмат кўрсатувчи ходимлардан ташқари) 53 нафар, шу жумладан, Вазирлар Маҳкамаси томонидан тасдиқланадиган уюшма раиси ҳамда унинг 2 нафар ўринбосари бўлишига розилик берилсин.

Маълумот учун қабул қилинсинки, ижро этувчи аппаратни маблағ билан таъминлаш уюшма қатнашчилари — бирлашмалар, корхоналар ва ташкилотларнинг ажратмалари ҳисобидан амалга оширилади.

4. Белгилаб қўйилсинки, «Ўзолмосолтин» уюшмасининг асосий вазифалари қуйидагилар ҳисобланади:

уюшма таъсисчиларини ҳуқуқий ҳимоя қилиш ҳамда давлат ва маҳаллий ҳокимият ва бошқарув органларида уларнинг қонуний манфаатларини ифодалаш;

бозор конъюнктураси ва маҳсулот маркетингидан келиб чиққан ҳолда ишлаб чиқаришни ривожлантириш стратегиясини белгилаш, уюшма аъзоларининг — мулкчиликнинг барча шаклларидаги бирлашмалар, корхоналар ва ташкилотларнинг фаолиятини ўзаро мувофиқлаштириш, уларнинг молиявий-иқтисодий аҳволини мустаҳкамлаш;

уюшма доирасида рақобатбардошли маҳсулотларни яратиш ва ишлаб чиқаришни таъминлайдиган ягона илмий-техника ва инвестиция сиёсатини ўтказиш, мавжуд асосий фондлардан самарали фойдаланиш.

5. «Ўзолмосолтин» уюшмаси Давлат мулки қўмитаси билан биргаликда бир ой муддатда Вазирлар Маҳкамасига 1994-1995 йилларда давлат корхоналарининг мулкчилик шаклларини қонун билан белгиланган тартибда ўзгартириш бўйича таклифлар киритсин.

Ўзбекистон Республикаси Давлат мулки қўмитаси «Ўзолмосолтин» уюшмасига уюшма аъзолари — давлат бирлашмалари, корхоналари, ташкилотларини, давлат тасарруфидан чиқарилгандан кейин эса — давлат корхоналари негизида ташкил этилган, уюшма таркибига кирувчи акционерлик жамиятларини, ширкатларни давлатга тегишли акциялар (улушлар, пайлар)га мувофиқ бошқариш ҳуқуқини берсин, шунингдек, давлатга тегишли акциялар бўйича дивидендларнинг бир қисмини шартномавий асосда уюшмага ўтказсин.

6. «Ўзолмосолтин» уюшмаси икки ҳафта муддатда Устав ишлаб чиқсин ва Вазирлар Маҳкамаси билан келишган ҳолда уни қабул қилсин.

7. «Ўзистиқболстат» давлат қўмитаси «Ўзолмосолтин» уюшмаси корхоналарининг барча маҳсулотлари давлат эҳтиёжларига етказиб берилишини ҳисобга олиб, қимматбаҳо металлар ишлаб чиқариш тамойилидан келиб чиқадиган вазифаларни сўзсиз бажариш, 1994 йилдан бошлаб ҳар йили белгиланган тартибда «Ўзолмосолтин» уюшмасига ишлаб чиқаришни моддий-техника ресурслари билан таъминлаш мақсадида савдо ва айирбошлаш операцияларини амалга ошириш учун тозаланган мис, рух, қўрғошин ажратишни назарда тутсин.

8. «Ўзолмосолтин» уюшмаси бир ой муддатда Чодак олтин қазиб олиш конининг молиявий аҳволини соғломлаштириш ва Олтинкон ишчилар шаҳарчасининг ижтимоий-маиший шароитларини яхшилаш мақсадида Чодак олтин қазиб олиш конининг балансида бўлган ижтимоий инфраструктура муассасаларини уй-жой фонди билан биргаликда белгиланган тартибда Наманган вилояти ҳокимлигига берсин.

Наманган вилояти ҳокимлиги қайд этилган объектларни қабул қилиб олсин. Ўзбекистон Республикаси Молия вазирлиги Наманган вилояти ҳокимияти билан биргаликда берилаётган объектларни сақлаш учун 1994 йилдан бошлаб зарур маблағлар ажратиш масаласини кўриб чиқсин ва ҳал қилсин.

9. Ўзбекистон Республикаси Алоқа вазирлиги тугатилаётган Давлат қимматбаҳо металлар қўмитасидаги ўрнатилган барча телефонларни ва алоқа турларини «Ўзолмосолтин» уюшмасида сақлаб қолсин.

10. «Ўзолмосолтин» уюшмаси Тошкент шаҳар, Тўрақўрғон тор кўчаси, 26-уйда жойлашган.

11. Вазирлар Маҳкамасининг «Ўзбекистон Республикаси Давлат қимматбаҳо металлар қўмитаси масалалари тўғрисида» 1991 йил 19 сентябрдаги 238-9-сон ва «Вазирлар Маҳкамасининг 1991 йил 19 сентябрдаги 238-9-сон қарорига ўзгартириш ва қўшимчалар киритиш тўғрисида» 1993 йил 7 июндаги 273-18-сон қарорлари ўз кучини йўқотган деб ҳисоблансин.

12. Мазкур қарорнинг бажарилишини назорат қилиш Бош вазир ўринбосари А.Н. Возненко зиммасига юклансин.

1. Ангрен олтин қазиб олиш кони.

2. «Зарница» олтин қидирувчилар артели, Ангрен шаҳри.

3. Чодак олтин қазиб олиш кони, Наманган вилояти.

4. Каулди олтин қазиб олиш кони, Тошкент вилояти.

5. Маржонбулоқ» олтин қазиб олиш кони, Жиззах вилояти.

6. Зармитан олтин қазиб олиш кони, Самарқанд вилояти,

7. «Олмос» заводи, Тошкент вилояти.

8. Янгиобод хўжалик ҳисобидаги «Чилтен» корхонаси, Тошкент вилояти.

9. «Қизилқум» олтин қидирувчилар артели, Тошкент шаҳри.

10. «Ўзметаллургшахтаковлаш» трести, Тошкент шаҳри.

11. Ижарачилар ташкилоти «Ўзранглиметаллэнергия» махсус трести, Тошкент шаҳри.

12. Ўзбекистон ихтисослашган монтаж-созлаш бошқармаси, Олмалиқ шаҳри.

13. Ўзбекистон ихтисослашган тузатиш-қурилиш бошқармаси, Олмалиқ шаҳри.

14. «Ўзранглиметалл» илмий-тадқиқот ва лойиҳалаш институти, Тошкент шаҳри.

15. Хўжалик ҳисобидаги «Ўзбеколтинтаъминот» фирмаси, Тошкент шаҳри.

16. «Ўзбеколтинишчитаъминот» савдо-ишлаб чиқариш бирлашмаси, Тошкент шаҳри.

Изоҳ: Таъсисчилари уюшма аъзолари — бирлашмалар ва корхоналар бўлган илмий-ишлаб чиқариш ва ишлаб чиқариш бирлашмаларига, қўшма (шу жумладан, хорижий сармоя иштирокидаги) корхоналарга кирувчи корхоналар ҳам уюшма аъзолари ҳисобланадилар.

Раҳбарият

Ишлаб чиқаришни ривожлантириш ва маҳсулот маркетинги бошқармаси

Иқтисодий таҳлил, давлат тасарруфидан чиқариш ва хусусийлаштириш бошқармаси

Хавфсизлик техникаси ва экология бўлими

Ташқи иқтисодий алоқалар бўлими

Молия, ҳисоб ва ҳисобот бўлими

Инвестициялар бўлими

Ишлар бошқармаси

Биринчи бўлим