Oʻzbekiston Respublikasining “Taʼlim toʻgʻrisida”gi Qonunining 27, 47-moddalari, Vazirlar Mahkamasining 2017-yil 15-martdagi 140-son qarori bilan tasdiqlangan “Umumiy oʻrta taʼlim toʻgʻrisida”gi nizomning 39, 41-bandlari, Vazirlar Mahkamasining 2022-yil 1-iyundagi 295-son qarori bilan tasdiqlangan “Bolalarni davlat umumiy oʻrta taʼlim muassasalariga qabul qilish boʻyicha davlat xizmatlari koʻrsatishning maʼmuriy reglamenti”ning 3, 4, 8-bandlariga muvofiq, “Mahalliy davlat hokimiyati toʻgʻrisida”gi Qonunining 6, 25-moddalariga asosan, qaror qilaman:

1. Termiz shahar Maktabgacha va maktab taʼlimi boʻlimining 2025-yil 16-dekabrdagi “Maktab yoshidagi bolalarni majburiy taʼlimga jalb etish maqsadida shahardagi har bir umumiy oʻrta taʼlim muassasalarini hudud va mikrohududlarga biriktirish toʻgʻrisida” 01-/4576-sonli xati maʼlumot uchun qabul qilinsin.

2. Termiz shahridagi umumiy oʻrta taʼlim maktablarini mahalla fuqaro yigʻinlaridagi hudud va mikrohududlarga biriktirish roʻyxati 1-ilovaga muvofiq; Termiz shahridagi umumtaʼlim maktablarida taʼlim ikki (oʻzbek va rus) tilida olib borilishini inobatga olgan holda, maktablarga hududlarni oʻqitish tili boʻyicha biriktirish 2-ilovaga muvofiq tasdiqlansin.

3. Termiz shahar hokimining oʻrinbosari K.Ashurov, shahar Maktabgacha va maktab taʼlimi boʻlimi (Lavozimiga koʻra) hamda shahardagi umumiy oʻrta taʼlim muassasalari rahbarlarining zimmasiga:

maktab yoshidagi bolalarni umumiy oʻrta taʼlimga 7 yoshga toʻladigan yilda toʻliq qamrab olish;

oʻquvchilarning darslarga qatnashish holati yuzasidan doimiy monitoring olib borish va monitoring natijasida aniqlangan muammolarni bartaraf etish boʻyicha zarur choralar koʻrish vazifasi topshirilsin.

4. Belgilansinki, shahardagi umumiy oʻrta taʼlim muassasalar rahbarlari oʻzlari rahbarlik qilayotgan muassasaga biriktirilgan hududdagi maktab yoshidagi bolalarni oʻz vaqtida umumiy oʻrta taʼlim muassasasiga oʻqishga jalb qilish uchun masʼul hisoblanadi.

5. Oʻzbekiston mahallalari uyshmasining Termiz shahar boʻlimi (F.Abdumannotov), mahalla fuqarolar yigʻini raislari bilan birgalikda (Lavozimiga koʻra): maktab yoshidagi bolalarni umumiy oʻrta taʼlim muassasalariga qamrab olish jarayonida shahar Maktabgacha va maktab taʼlimi boʻlimi hamda umumiy oʻrta taʼlim muassasalariga amaliy yordam berish tavsiya etilsin.

6. Termiz shahar hokimligi axborot xizmati (A.Qosimova) mazkur qarorni hokimlikning tegishli ijtimoiy tarmoqlariga hamda rasmiy veb-saytiga joylashtirilishini taʼminlasin.

7. Termiz shahar hokimining 2022-yil 1-iyuldagi “Termiz shahrida maktab yoshidagi bolalarni umumiy oʻrta taʼlimga toʻliq qamrab olish yuzasidan shahardagi umumtaʼlim muassasalarining mikrohududlarini belgilash toʻgʻrisida” 237-8-121-Q/22-sonli qarori oʻz kuchini yoʻqotgan deb hisoblansin.

8. Ushbu qarorning bajarilishini nazorat qilish shahar hokimining oʻrinbosari K.Ashurov hamda shahar Maktabgacha va maktab taʼlimi boʻlimi (Lavozimiga koʻra) zimmasiga yuklansin.