Oʻzbekiston Respublikasi “Taʼlim toʻgʻrisida”gi Qonunining 27-moddasi, Oʻzbekiston Respublikasi Vazirlar Mahkamasining 2017-yil 15-martdagi 140-son qarori bilan tasdiqlangan “Umumiy oʻrta taʼlim toʻgʻrisida”gi nizomning 5-bob, 39-bandi, Oʻzbekiston Respublikasi Vazirlar Mahkamasining 2022-yil 1-iyundagi 295-sonli qarori ijrosi yuzasidan tumanda maktab yoshidagi bolalarni umumiy oʻrta taʼlimga qamrab olish jarayonida umumtaʼlim muassasalariga biriktirilgan hududlar (mikrohudud)ni aniq belgilab olish maqsadida, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6-moddasiga asosan, qaror qilaman:

1. Qiziltepa tuman Maktabgacha va maktab taʼlimi boʻlimining 2026-yil 30-martdagi 958-sonli xati maʼlumot uchun inobatga olinsin.

2. Qiziltepa tumanida maktab yoshidagi bolalarni umumiy oʻrta taʼlimga toʻliq qamrab olish boʻyicha umumtaʼlim muassasalariga biriktirilgan hududlar (mikrohudud) roʻyxati ilovaga asosan tasdiqlansin.

3. Tuman hokimi oʻrinbosari (Oʻ. Istamov), tuman Maktabgacha va maktab taʼlimi boʻlimi (N. Temirov) va barcha umumtaʼlim maktablari rahbarlariga:

maktab yoshidagi bolalarni umumiy oʻrta taʼlimga toʻliq qamrab olish, oʻquvchilarning darslarga qatnashish holati yuzasidan monitoring olib borish, shuningdek, 2026-2027-oʻquv yilidan boshlab qabul jarayonlarini elektron davlat xizmati shaklida joriy etishda fuqarolar tomonidan ariza berilishida aniqlangan muammolarni bartaraf etish boʻyicha zarur choralar koʻrish vazifasi topshirilsin.

4. Belgilansinki, tumandagi umumtaʼlim muassasalar rahbarlari oʻzlari rahbarlik qilayotgan muassasaga biriktirilgan hududdagi maktab yoshidagi bolalarni oʻz vaqtida umumtaʼlim muassasasiga oʻqishga jalb qilish uchun masʼul hisoblanadi.

5. Davlat kadastrlari palatasi Qiziltepa tuman filiali rahbari U. Xoʻjamovga tumandagi barcha maktablarga biriktirilgan mikrohududlardagi manzillar, fuqarolar yashab turgan xonadonlarning kadasrt hujjatlari manzillari bir-biriga mutanosib kelishi bilan bogʻliq ishlarni tashkil qilish, kadastr hujjatlari yoʻq xonadonlarni hujjatlashtirish kabi vazifalar topshirilsin.

6. Oʻzbekiston mahallalari uyushmasi Qiziltepa tuman boʻlimi (M. Roʻziyev) mahalla fuqarolari yigʻini maktab yoshidagi bolalarni qamrab olishda umumtaʼlim muassasalariga amaliy yordam berish tavsiya etilsin.

7. Tuman hokimligi axborot xizmati (A. Umedov) mazkur qarorning mazmun-mohiyatini ommaviy axborot vositalarida eʼlon qilish va tuman hokimligining rasmiy veb-saytiga joylashtirish tavsiya qilinsin.

8. Mazkur qaror kuchga kirishi bilan Qiziltepa tumani hokimining 2025-yil 25-iyundagi 156-5-72-Q/25-sonli qarori oʻz kuchini yoʻqotgan hisoblansin.

9. Mazkur qarorning ijrosini nazorat qilish tuman hokimining oʻrinbosari Oʻ.Istamov zimmasiga yuklansin.