Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish sarmaradorligini oshirish chora-tadbirlari toʻgʻrisida”gi PQ-5-sonli qarori hamda 2025-yil sugʻorish mavsumi uchun suv olish limitlarini qayta tasdiqlash haqida belgilangan vazifalar ijrosini taʼminlash maqsadida tumandagi bir qator fermer xoʻjaliklari tomonidan sugʻorish mavsumida limitga nisbatan ortiqcha suv hajmlaridan foydalanilgan.

Tuman “Suv yetkazib berish xizmati” davlat muassasasi tomonidan 2151 ta isteʼmolchilarning 30,4 ming gektar sugʻoriladigan yer maydonlariga jami 156,8 mln m³ suv yetkazib berilgan boʻlib, shundan 127 ta suvdan foydalanuvchilarga sugʻorish mavsumida 34,6 mln m³ limit belgilangan boʻlsada, amalda 59,0 mln m³ suv foydalanilishi natijasida belgilangan limitdan jami 24,5 mln m³ suv oshiqcha sarflangan.

Tuman “Suv yetkazib berish xizmati” davlat muassasasi tomonidan 2025-yil vegetatsiya davrida sugʻorish ishlari uchun jami 171,8 mln m³ suv limiti ajratilgan boʻlib, shundan Janubiy Mirzachoʻl Magistral kanali va markaziy chap tarmogʻidan 87,86 mln m³, LR-12 kanalidan 49,38 mln m³, PR-12-4-kanalidan 31,55 mln m³, zovur suvlaridan 3,0 mln m³ suv limitlarini ajratilib, sugʻorish uchun suv olish limitlarini hududlar boʻyicha tasdiqlangan limit doirasida ishlab chiqilgan.

Oʻzbekiston Respublikasi “Mahalliy davlat hokimiyati toʻgʻrisida”gi qonunining 6 va 24-moddalariga muvofiq xalq deputatlari tuman Kengashi qaror qiladi:

1. Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-sonli qarori ijro uchun qabul qilinsin.

2. 2025-yilda tumandagi bir qator fermer xoʻjaliklari tomonidan sugʻorish mavsumida limitga nisbatan ortiqcha suv hajmlaridan foydalanilganligi sababli xalq deputatlari tuman Kengashining 2025-yil 1-maydagi “Arnasoy tumani boʻyicha 2025-yil vegetatsiya davrida sugʻorish ishlari uchun ajratilgan suv limitini tasdiqlash toʻgʻrisida”gi VII-7-85-3-43-K/25-sonli qarorining ilovasiga oʻzgartirish kiritish boʻyicha “Suv yetkazib berish xizmati” davlat muassasasi rahbari X. Eshonqulovning taklifi maʼqullansin va ilovaga muvofiq tasdiqlansin.

3. “Suv yetkazib berish xizmati” davlat muassasasi (X. Eshonqulov)ga:

Oʻzbekiston Respublikasi Prezidentining 2024-yil 5-yanvardagi PQ-5-sonli qarori asosida ishlarni tashkil etish;

belgilangan limitlar asosida isteʼmolchilarga suv yetkazib berish;

oʻziga biriktirilgan hududda suvning hisobi va hisobotini yuritish;

sugʻorish tarmoqlari va ulardagi gidrotexnik inshootlarni soz holatda saqlash, taʼmirlash-tiklash tadbirlarini amalga oshirish;

suv olish joylarini suvni boshqarish va hisobga olish vositalari bilan jihozlash, suv monitoringi, hisobi va hisoboti yuritilishini raqamlashtirish;

isteʼmolchilar kesimida isteʼmol qilingan suv hajmi toʻgʻrisidagi maʼlumotlarni soliq organlariga taqdim etib borish;

suv isteʼmolchilarining buyurtmanomasi asosida boshqa suv xoʻjaligi xizmatlarini koʻrsatish;

amalga oshirilgan ishlar yuzasidan xalq deputatlari tuman Kengashiga hisobotlarni oʻz vaqtida berib borish vazifalari yuklatilsin.

4. Qaror rasmiy nashrlarda eʼlon qilingan kundan boshlab kuchga kiradi.

5. Mazkur qaror “Аrnasoy tongi” gazetasida rasman eʼlon qilinsin hamda tuman hokimligining rasmiy veb-saytiga joylashtirilsin.

6. Ushbu qarorning ijrosini nazorat qilish tuman Kengashining agrar, suv xoʻjaligi, ekologiya hamda sanoat, qurilish, kommunal soha va aholiga xizmat koʻrsatish masalalari boʻyicha doimiy komissiyasi va tuman hokimining qishloq va suv xoʻjaligi masalalari boʻyicha oʻrinbosari X. Suyarov zimmasiga yuklansin.