Ангрен каолинлари негизида республиканинг экспорт имкониятларини кенгайтириш ва юқори сифатли халқ истеъмол товарлари ҳамда бинокорлик материаллари ишлаб чиқаришни кўпайтириш мақсадида Вазирлар Маҳкамаси қарор қилади:

1. Кўмир қазиб олиш ва сотиш акционерлик бирлашмаси («Кўмир» акционерлик бирлашмаси)нинг йилига 0,4 млн тонна бойитилган каолин ишлаб чиқариш қувватига эга бўлган каолин бойитиш фабрикаси қуриш, уни 1996 йилда, шу жумладан унинг биринчи навбатини 1995 йил охиригача ишга тушириш тўғрисидаги таклифи қабул қилинсин.

2. «Кўмир» акционерлик бирлашмаси:

бир ой муддатда инвестиция лойиҳасини ишлаб чиқсин ва уни Ўзбекистон Республикаси Ташқи иқтисодий алоқалар вазирлиги ва Ташқи иқтисодий фаолият миллий банкига экспертиза учун тақдим этсин;

инвестиция лойиҳаси экспертизаси олингандан кейин икки ҳафта муддатда фабриканинг бойитиш бўлинмаси учун асбоб-ускуналар ва технология етказиб бериш тўғрисида Швейцариянинг «Мабетекс» фирмаси билан контракт тузсин.

3. «Кўмир» акционерлик бирлашмасининг бирлашма:

каолин бойитиш фабрикаси қурилишини маблағ билан таъминлашни 10 фоиз миқдорида ўз маблағлари ҳисобидан ва 90 фоизини кредитлар ҳисобига амалга ошириши;

«Мабетекс» фирмаси кредитини ва фоизлар тўлашни каолинни хорижий шерикларга экспорт қилишдан олинган тушум ҳисобидан таъминлаши тўғрисидаги таклифига розилик берилсин.

4. Пул-кредит сиёсати бўйича комиссия фабрика қурилиши, Майдалаш-элаш бўлинмаси учун асбоб-ускуналар ва материаллар сотиб олиш учун кредит ажратилишини назарда тутсин.

5. «Кўмир» акционерлик бирлашмасига кредитлар ва улар бўйича фоизлар тўлангунга қадар бойитилган каолинни 100 фоизгача экспортга сотиш ҳуқуқи берилсин.

6. «Ўзистиқболстат» давлат қўмитаси каолин бойитиш фабрикаси қурилишини 1995 йилдан бошлаб Ўзбекистон Республикаси Инвестиция Дастурига киритсин.

7. «Ўзулгуржибиржасавдо» уюшмаси, «Ўзқурилишматериаллари» концерни, «Ўзметкомбинат» акционерлик ишлаб чиқариш бирлашмаси фабрика қурилиши учун «Кўмир» акционерлик бирлашмасига моддий-техника ресурслари ҳамда МДҲ мамлакатларидан асбоб-ускуналар ва махсус материаллар етказиб беришни шартнома асосида амалга оширсинлар.

8. Ўзбекистон Республикаси Молия вазирлиги «Мабетекс» фирмасига фирма томонидан каолин бойитиш фабрикаси қурилиши учун ажратиладиган кредит ҳажмида Ўзбекистон Республикаси Ҳукуматининг кафолатини берсин.

9. Бош лойиҳалаштирувчи функцияси – «Ўзқурилишматериаллари» давлат концернининг «Қурилиш-лойиҳалаштириш илмий-тaдқиқот институти;

бош пудратчи функцияси – «Кўмир» акционерлик бирлашмасининг «Ангренкўмирқурилиш» бошқармаси;

ихтисослаштирилган монтаж ишлари бўйича пудратчи функцияси «Ўзмонтажмахсусқурилиш» уюшмаси зиммасига юклансин.

10. «Ўзбекистон ҳаво йўллари» миллий авиакомпанияси «Ўзбекистон темир йўллари» давлат-акционерлик компанияси «Kўмир» акционерлик бирлашмаси буюртманомалари бўйича юклар мутахассислар ташилишини мунтазам таъминласинлар.

11. Ўзбекистон Республикаси Ички ишлар вазирлиги ва Ташқи ишлар вазирлиги:

«Кўмир» акционерлик бирлашмаси ва хорижий фирмаларнинг бойитиш фабрикаси қурилишида банд бўлган мутахассислари учун ҳужжатлари тезкорлик билан расмийлаштирилишини таъминласинлар;

хорижий мутахассислар ва фирмалар вакилларининг меҳмонхона ва «Кўмир» акционерлик бирлашмасининг ётоқхоналарда жойлаштирилишига рухсат берсинлар.

12. Ўзбекистон Республикаси Соғлиқни сақлаш вазирлиги, Алоқа вазирлиги, «Ўзбексавдо» уюшмаси, Тошкент вилояти, Тошкент ва Ангрен шаҳарлари ҳокимликлари фабрика қурилиши қатнашчиларини шартнома асосида тиббий хизмат кўрсатиш, қўшимча телефон ва телекс алоқаси, озиқ-овқат ва саноат товарлари билан таъминлаш масалаларини ҳал этсинлар.

13. Мазкур қарорнинг бажарилишини назорат қилиш Бош вазирнинг ўринбосарлари Қ.Ж.Ҳаққулов, Б.О.Ҳамидов, Ў.Т.Султонов зиммасига юклансин.