Oʻzbekiston Respublikasi Prezidentining 2025-yil 26-dekabrdagi “Mahalliy budjetlar va budjet tashkilotlarining moliyaviy barqarorligini oshirish, budjet intizomini kuchaytirishga doir qoʻshimcha chora-tadbirlar toʻgʻrisida” PQ-387-sonli qarorining 8-bandi (a)-qismida 2026-yil 1-yanvardan boshlab Obodonlashtirish boshqarmalari tomonidan tuman (shahar)lar markaziy koʻchalari boʻyidagi tadbirkorlik subektlari bilan tuzilgan shartnoma asosida chiqindilarni olib chiqish va hududlarni obodonlashtirish xizmatini koʻrsatishga ruxsat berilishi, bunda chiqindilarni olib chiqish va hududlarni obodonlashtirish xizmatini koʻrsatganlik boʻyicha tariflar tuman (shahar)lar hokimliklari tomonidan Xalq deputatlari tuman (shahar)lar kengashlariga koʻrib chiqish va tasdiqlash uchun kiritilishi, shuningdek tuman markaziy koʻchalaridagi qattiq maishiy chiqindilar bilan bogʻliq xizmatlar sifatidan toʻliq qoniqishini va tadbirkorlar uchun jozibadorligini taʼminlash, hosil boʻlayotgan chiqindilarni qayta ishlash darajasini oshirish, chiqindilar toʻplanishining oldini olish, ekologik hamda sanitariya holatini yanada yaxshilash maqsadida va tuman hokimligining 2026-yil 23-yanvardagi №68/x sonli Xalq deputatlari Gʻallaorol tuman Kengashi raisiga yoʼllagan xati yuzasidan, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6 va 24-moddasiga asosan xalq deputatlari tuman Kengashi qaror qiladi:

1. Gʻallaorol tuman obodonlashtirish boshqarmasi tomonidan tuman markaziy koʻchalari boʻyidagi tadbirkorlik subʼyektlari bilan tuzilgan shartnoma asosida chiqindilarni olib chiqish va hududlarni obodonlashtirish xizmatini koʻrsatish boʻyicha toʻlov tariflari yuzasidan tuman Obodonlashtirish boshqarmasi boshligʻi X.I.Mamaraximovning axboroti maʼlumot uchun qabul qilinsin.

2. Tuman Ekologiya, atrof-muhitni muhofaza qilish va iqlim oʻzgarishi boʻlimi (Sh.Janzoqov), tuman Sogʻliqni saqlash boʻlimi (X.Saidov), tuman Sanitariya epidemiologiya osoyishtaligi va jamoat salomatligi boʻlimi(F.Sayfiddinov), Oʻzbekiston mahallalar uyushmasi tuman boʻlimi (Z.Usmonov)lar fuqarolarning huquqiy va sanitariya-ekologik savodxonligini oshirishga qaratilgan tushuntirish ishlarini tashkil etsin.

3. Oʻzbekiston Respublikasi Sanitar qoidalari va meʼyorlariga asosan hududlar boʻyicha oʻrnatilgan meʼyorlardan isteʼmolchining faoliyat turidan, joylashuvidan va xizmatidan foydalanish usulidan kelib chiqib isteʼmolchi tomonidan QSMCH (qattiq suyuq maishiy chiqindilar) yillik toʻlash hajmi va QQS (qoʼshimcha qiymat soligʼi) xizmat haqqi soʻmmasi 1-ilovaga muvofiq belgilansin.

4. Tuman hokimining matbuot kotibi – axborot siyosati masalalari boʻyicha maslahatchisi (S.Ismailov) ommaviy axborot vositalarida keng yoritib borish tavsiya etilsin.

5. Mazkur qarorning ijrosini nazorat qilish tuman Kengashining Agrar, suv xoʻjaligi va ekologiya masalalari boʻyicha doimiy komissiya raisi (I.Mamatqulov)ga, ijrosi tuman hokimining birinchi oʻrinbosari (A.Abdujalilov) va tuman Soliq inspeksiyasi boshligʻi (B.Quvondiqov) hamda tuman Obodonlashtirish boshqarmasi boshligʻi (X.I.Mamaraximov)larning zimmasiga yuklatilsin.