Oʻzbekiston Respublikasining “Oʻzbekiston Respublikasining Davlat budjeti toʻgʻrisida”gi Qonunining 12-moddasi, “Mahalliy davlat hokimiyati toʻgʻrisida”gi Qonunining 6-, 24-moddalariga muvofiq Surxondaryo viloyatida 2026-yilda jismoniy shaxslarning mol-mulkini ijaraga berishdan olinadigan daromad soligʻi stavkalarini tasdiqlash yuzasidan deputatlar tomonidan bildirilgan takliflar hamda fikr-mulohazalarni inobatga olib, xalq deputatlari Surxondaryo viloyati Kengashi qaror qiladi:

1. Viloyat Soliq boshqarmasining 2025-yil 16-dekabrdagi 20-107308-sonli xati maʼlumot uchun qabul qilinsin.

2. Viloyat Iqtisodiyot va moliya bosh boshqarmasi (Sh.Abdullayev), viloyat Soliq boshqarmasi (E.Narmanov)ga:

jismoniy shaxslar mol-mulkini ijaraga berishdan olinadigan daromad soligʻi stavkalari turar joylar uchun 5,9-14,5 ming soʻmgacha 2 koeffitsiyentgacha, noturar joylar uchun 11,8-28,4 ming soʻmgacha, 2 koeffitsiyentgacha indeksatsiya qilinishini qoʻllagan holda ijara stavkalarini belgilashi mumkinligi yuzasidan televideniye bilan hamkorlikda press klublar va chiqishlarni amalga oshirish hamda televideniye orqali ommaga taqdim etish;

shahar va tumanlar xalq deputatlari Kengashlari tomonidan jismoniy shaxslarning mol-mulkini ijaraga berishdan olinadigan daromad soligʻi keyingi soliq davriga tasdiqlangan soliq stavkalarini 5 (besh) kun ichida soliq toʻlovchilarga maʼlumot uchun yetkazilishini taʼminlash;

har chorak yakunida jismoniy shaxslarning mol-mulkini ijaraga berishdan olinadigan daromad soligʻi va undirilgan soliqlar toʻgʻrisida xalq deputatlari viloyat Kengashiga axborot berib borish vazifalari yuklansin.

3. Oʻzbekiston Respublikasi Soliq kodeksi bilan belgilanadigan soliq stavkalari asosida jismoniy shaxslarning mol-mulkini ijaraga berishdan olinadigan daromad soligʻi uchun shahar va tumanlar kesimida, ularning iqtisodiy rivojlanishiga qarab, kamaytiruvchi va oshiruvchi koeffitsiyentlar ilovaga muvofiq tasdiqlansin.

4. Viloyat teleradiokompaniyasi (B.Mingboyev), “Surxon tongi” va “Зара Сурхана” gazetalari tahririyati (S.Norqobilov)ga mazkur loyihani amalga oshirishdan maqsad va uning viloyat, shahar va tumanlar iqtisodiyotini yuksaltirishdagi afzalliklari toʻgʻrisida televideniye, radio, rasmiy sahifalar orqali ommaviy axborot vositalari va internet tarmoqlarida keng yoritib borish tavsiya etilsin.

5. Ushbu qarorning ijrosini nazorat qilish xalq deputatlari Surxondaryo viloyati Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (I.Yoqubov) zimmasiga yuklatilsin.

6. Mazkur qaror rasmiy eʼlon qilingan kundan kuchga kiradi.