Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6-, 21¹-moddalari, Vazirlar Mahkamasining 2022-yil 14-fevraldagi “Qishloq xoʻjaligiga moʻljallanmagan yer uchastkalarini xususiylashtirish toʻgʻrisida”gi Oʻzbekiston Respublikasi Qonunini amalga oshirish chora-tadbirlari haqida” 71-son, 2025-yil 3-sentabrdagi “Yer uchastkalarini onlayn-auksion orqali realizatsiya qilish va kadastr sohasida davlat xizmatlari koʻrsatish tartib-taomillarini takomillashtirish yuzasidan qoʻshimcha chora-tadbirlar toʻgʻrisida” 559-son qarorlari ijrosini taʼminlash hamda Surxondaryo viloyati sanoat zonalarini boshqarish direksiyasining 2026-yil 15-yanvardagi 02/3-sonli xatini inobatga olib, qaror qilaman:

1. Surxondaryo viloyati sanoat zonalarini boshqarish direksiyasining 2026-yil 15-yanvardagi 02/3-sonli xati inobatga olinsin.

2. “Surxondaryo viloyati sanoat zonalarini boshqarish direksiyasi”ga tegishli 57,6 gektar (Angor tumanida 0,7 gektar, Bandixon tumanida 16 gektar, Boysun tumanida 6 gektar, Termiz tumanida 8 gektar, Oltinsoy tumanida 2,6 gektar, Shoʻrchi tumanida 1,2 gektar, Uzun tumanida 3,7 gektar, Qiziriq tumanida 1 gektar, Sariosiyo tumanida 1,6 gektar, Muzrabot tumanida 2,6 gektar) yer maydonlarini ijara huquqi asosida auksion savdolariga chiqarishda yer uchastkasining ijara huquqi qiymatini hisoblashda markazlashgan manbalar hisobidan barpo etilishi rejalashtirilgan muhandislik-kommunikatsiya tarmoqlariga ulanish nuqtalarini barpo etish qiymatiga muvofiqlashtiruvchi 0,5 koeffitsiyentga kamaytirilsin.

3. “Surxondaryo viloyati sanoat zonalarini boshqarish direksiyasi” (B.Ortiqov), Davlat aktivlarini boshqarish agentligi Surxondaryo viloyati hududiy boshqarmasi (S.Xudoyberdiyev), Kadastr agentligining Davlat kadastrlari palatasi Surxondaryo viloyati boshqarmasi (S.Shaymardonov), tuman hokimlari bilan birgalikda viloyatda tadbirkorlik va shaharsozlik faoliyatini amalga oshirish uchun sanoat zonalari hududida boʻsh turgan yer uchastkalarini elektron onlayn-auksion orqali ijaraga berish Vazirlar Mahkamasining 2022-yil 14-fevraldagi 71-son qarori bilan tasdiqlangan “Tadbirkorlik va shaharsozlik faoliyatini amalga oshirish uchun yer-uchastkalarini mulk huquqi va ijara huquqi asosida elektron onlayn-auksion orqali berish tartibi toʻgʻrisida”gi nizom talablariga asosan amalga oshirilishini taʼminlasin.

4. Mazkur qaror ijrosining nazorati viloyat hokimining oʻrinbosari- investitsiyalar, sanoat va savdo boshqarmasi boshligʻi Sh.Jurayev zimmasiga yuklatilsin.

5. Mazkur qaror rasmiy eʼlon qilingan kundan eʼtiboran kuchga kiradi.