Савдо соҳасида рақобат муҳитини яратиш, қишлоқ савдосида мулкчилик муносабатларини ва бошқарув тузилмасини такомиллаштириш мақсадида, шунингдек Ўзбекистон Республикаси Президентининг «Савдо соҳасида монополиядан чиқаришни чуқурлаштириш тўғрисида» 1997 йил 19 декабрдаги ПФ-1897-сон Фармонига мувофиқ Вазирлар Маҳкамаси қарор қилади:

1. Ўзбекистон матлубот кооперацияси акциядорлик ва матлубот жамиятлари Марказий уюшмаси (Ўзбекбирлашув Марказий уюшмаси), «Ўзулгуржимевасабзавот» акциядорлик компаниясининг ва уларнинг хўжалик юритувчи субъектларининг:

Ўзбекбирлашув Ўзбекистон матлубот кооперацияси акциядорлик ва матлубот жамиятлари Марказий уюшмасини «Ўзбекбирлашув» акциядорлик компаниясига айлантириш, унинг таркибига 1-иловага* мувофиқ корхона ва ташкилотларни киритиш;

«Ўзулгуржимевасабзавот» акциядорлик компаниясини ва унинг ҳудудий акциядорлик бирлашмаларини тугатиш;

Қорақалпоғистон Республикаси ва вилоятлар матлубот кооперациясининг мавжуд акциядорлик жамиятлари уюшмалари ҳамда «Улгуржимевасабзавот» акциядорлик бирлашмалари негизида «Матлуботсавдо» ҳудудий акциядорлик компаниялари ташкил этиш тўғрисидаги таклифлари қабул қилинсин.

Қорақалпоғистон Республикаси Вазирлар Кенгаши, вилоятлар ва туманлар ҳокимликлари Ўзбекистон Республикаси Давлат мулки қўмитаси билан биргаликда матлубот кооперацияси акциядорлик жамиятлари уюшмаларини ва «Улгуржимевасабзавот» ҳудудий акциядорлик бирлашмаларини қайта ташкил этиш ва бирлаштиришда «Матлуботсавдо» ҳудудий акциядорлик компанияларига ёрдам кўрсатсинлар.

«Ўзулгуржимевасабзавот» акциядорлик компанияси тугатилиши муносабати билан Шахсий ёрдамчи ва деҳқон хўжаликлари уюшмаси мустақил жамоат ташкилотига айлантирилиши маълумот учун қабул қилинсин.

2. Қуйидагилар «Ўзбекбирлашув» акциядорлик компаниясининг асосий вазифалари сифатида тавсия этилсин:

озиқ-овқат ва ноозиқ-овқат товарларини ишлаб чиқариш ва харид қилиш соҳасида маркетинг тадқиқотлари олиб бориш;

истеъмол товарлари билан савдо қилиш қоидаларини ишлаб чиқишда қатнашиш, қишлоқ савдо корхоналари ва ташкилотларига илмий-техника тараққиёти ютуқларини ҳамда қишлоқ савдосини такомиллаштириш ва хизмат кўрсатиш маданиятини ошириш бўйича жаҳон тажрибасини тармоққа жорий этишда услубий ёрдам кўрсатиш;

белгиланган тартибда ташқи иқтисодий фаолиятни амалга ошириш ва қишлоқ савдоси соҳасига хорижий инвестицияларни жалб этиш;

савдо-технология асбоб-ускуналари ишлаб чиқариш ва қишлоқ савдо корхоналарини улар билан шартнома шартларида таъминлаш;

мулкчилик шаклларидан ва идоравий бўйсунишидан қатъи назар, қишлоқ савдо ва тайёрлов корхоналари ҳамда ташкилотларига шартнома асосида ахборот хизматлари кўрсатиш,

3. Қуйидагилар «Матлуботсавдо» ҳудудий акциядорлик компаниялари фаолиятининг асосий йўналишлари ҳисобланиши маълумот учун қабул қилинсин:

қишлоқ аҳолисини халқ истеъмол товарлари билан таъминлаш, қишлоқ хўжалиги маҳсулотларини тайёрлаш, қайта ишлаш ва сотиш тизимини янада ривожлантириш;

қишлоқ савдоси акциядорлик жамиятлари, корхоналари ва ташкилотлари фаолиятини мувофиқлаштириш, мулкчилик шаклларидан қатъи назар, уларга шартнома шартларида маркетинг хизматлари кўрсатиш;

қишлоқ хўжалиги маҳсулотларини тайёрлашни, биринчи навбатда фермер ва деҳқон хўжаликларидан тайёрлашни ташкил этиш, уларни қайта ишлашни ва сотишни таъминлаш;

савдо, тайёрлов ва бошқа корхоналарга реклама, товарлар етказиб бериш ва сотиш юзасидан шартномалар тузиш масалаларида, товар ишлаб чиқарувчилар билан оқилона, узоқ муддатли хўжалик алоқалари ўрнатишда консалтинг хизматлари кўрсатиш;

қишлоқ савдо ва тайёрлов корхоналарига уларни техника билан қайта жиҳозлашда, замонавий савдо-технология, ишлаб чиқариш ва тайёрлов жараёнларини жорий этишда, хорижий инвестицияларни, шу жумладан қўшма корхоналар барпо этиш йўли билан жалб этишда кўмаклашиш;

тайёрлов ва қайта ишлаш корхоналари экспорт имкониятларини кенгайтириш, ташқи савдо алоқаларини ривожлантириш, чет мамлакатларда савдо уйлари ва ваколатхоналари очиш.

4. Қуйидагилар:

«Ўзбекбирлашув» акциядорлик компаниясининг, Қорақалпоғистон Республикаси ва вилоятлар «Матлуботсавдо» ҳудудий акциядорлик компанияларининг тузилмаси, шунингдек мустақил улгуржи базаларнинг ҳудудий жойлашиши 2 ва 3-иловаларга мувофиқ;

«Ўзбекбирлашув» акциядорлик компаниясини бошқариш марказий аппарати тузилмаси ходимларининг чекланган сони (ёрдамчи ва хизмат кўрсатувчи ходимлардан ташқари) 40 нафар этиб ҳамда «Матлуботсавдо» ҳудудий акциядорлик компаниялари бошқарув аппаратининг намунавий тузилмаси 4 ва 5-иловаларга мувофиқ маъқуллансин.

«Ўзбекбирлашув» акциядорлик компаниясининг, «Матлуботсавдо» ҳудудий акциядорлик компанияларининг фаолиятини маблағ билан таъминлаш, шу жумладан уларнинг ижро этувчи аппарати харажатлари ўз хўжалик фаолияти, хизматлар кўрсатиш, шунингдек амалдаги қонун ҳужжатларига зид бўлмаган бошқа даромадлар ҳисобига амалга оширилади.

5. Қуйидагилар маълумот учун қабул қилинсин:

«Ўзбекбирлашув» акциядорлик компаниясининг устав жамғармаси тугатилаётган Ўзбекбирлашув Марказий уюшмасининг, шу жумладан Савдо асбоб-ускуналари заводининг, «Ўзматлуботинформсервис» ижара корхонасининг мол-мулки ҳамда компания бошқа аъзоларининг таъсис бадаллари ҳисобига ташкил топади;

«Матлуботсавдо» ҳудудий акциядорлик компанияларининг устав жамғармаси қайта ташкил этилаётган Қорақалпоғистон Республикаси ва вилоятлар матлубот кооперацияси акциядорлик жамиятлари уюшмаларининг, тугатилаётган «Улгуржимевасабзавот» акциядорлик бирлашмаларининг мол-мулки, компания қатнашчиларининг таъсис бадаллари ҳисобига ташкил топади;

матлубот кооперацияси акциядорлик жамиятларининг илгари собиқ пайчилар номидан юқори ташкилотларга берилган акциялар пакетлари акциядорлик жамиятларининг ўзларига қайтарилади ва улар томонидан «Матлуботсавдо» ҳудудий акциядорлик компаниялари устав жамғармасига қўшиш учун, эркин сотиш учун ҳамда белгиланган тартибда хорижий инвесторларга сотиш учун фойдаланилади;

янги ташкил этилаётган «Ўзбекбирлашув» акциядорлик компаниясининг ҳамда «Матлуботсавдо» ҳудудий акциядорлик компанияларининг акциялари пакетларини тақсимлаш, шунингдек ушбу компаниялар таркибига кирувчи мавжуд акциядорлик жамиятларининг акциялари пакетларини қайта тақсимлаш, шу жумладан уларнинг мол-мулкини баҳолаш ва қайта баҳолаш, Ўзбекистон Республикаси Давлат мулки қўмитаси ҳамда унинг ҳудудий бўлинмалари мутахассисларини, маҳаллий ҳокимият органлари, шунингдек бошқа манфаатдор томонлар вакилларини жалб этган ҳолда, Ўзбекистон Республикаси Президентининг 1997 йил 31 мартдаги ПФ-1740-сон Фармони қоидаларига мувофиқ икки ой муддатда амалга оширилади;

акциядорлик жамиятлари айланма маблағларини тўлдириш, қўшимча, шу жумладан; хорижий инвестицияларни жалб этиш мақсадида акцияларнинг ва иккиламчи эмиссия акцияларининг барча сотилмаган қисми учинчи шахсларга, шу жумладан хорижий инвесторларга сотилади.

6. Белгилаб қўйилсинки:

«Ўзбекбирлашув» акциядорлик компанияси билан мустақил улгуржи базалар ҳамда «Матлуботсавдо» акциядорлик компаниялари, шунингдек, мулкчилик шаклларидан қатъи назар, инфратузилманинг бошқа савдо ташкилотлари ва корхоналари ўртасидаги ўзаро ҳамкорлик шартнома асосида амалга оширилади;

«Ўзбекбирлашув» акциядорлик компанияси қайта ташкил этилаётган Ўзбекбирлашув Ўзбекистон матлубот кооперацияси акциядорлик ва матлубот жамиятлари Марказий уюшмаси томонидан тузилган шартномалар ва мажбуриятлар бўйича ҳуқуқий ворис ҳисобланади;

«Матлуботсавдо» ҳудудий акциядорлик компаниялари тугатилаётган матлубот кооперацияси акциядорлик жамиятлари ҳудудий уюшмаларининг, «Ўзулгуржимевасабзавот» акциядорлик компаниясининг ва «Ўлгуржимевасабзавот» ҳудудий акциядорлик бирлашмаларининг шартномалар ва мажбуриятлар бўйича ҳуқуқий вориси ҳисобланадилар.

7. «Ўзбекбирлашув» акциядорлик компанияси раиси ва унинг ўринбосарлари муассисларнинг умумий йиғилишида сайланадилар ва Ўзбекистон Республикаси Вазирлар Маҳкамаси томонидан лавозимга тасдиқланадилар ҳамда мақоми, маиший таъминоти, тиббий ва транспорт хизмати кўрсатиш шароитларига кўра «Ўзбекбирлашув» акциядорлик компанияси раиси — Ўзбекистон Республикаси вазирига, раиснинг биринчи ўринбосари — вазирнинг биринчи ўринбосарига, раис ўринбосари — вазир ўринбосарига тенглаштирилади.

«Матлуботсавдо» ҳудудий акциядорлик компаниялари раҳбарлари маҳаллий ҳокимият органлари тавсиясига кўра белгиланган тартибда сайланадилар ҳамда қишлоқ аҳолисини истеъмол товарлари билан узлуксиз таъминлаш учун маҳаллий бошқарув органлари раҳбарлари билан баравар шахсан жавоб берадилар.

8. Тугатилаётган Ўзбекбирлашув Ўзбекистон матлубот кооперацияси акциядорлик ва матлубот жамиятлари Марказий уюшмаси, Ўзбекистон Республикаси Олий ва ўрта махсус таълим вазирлиги, шунингдек Самарқанд кооператив институтининг уни Олий ва ўрта махсус таълим вазирлиги тасарруфига бериш тўғрисидаги таклифларига розилик берилсин.

Вазирлар Маҳкамасининг «Академик лицейлар ва касб-ҳунар коллежларини ташкил этиш ва уларнинг фаолиятини бошқариш тўғрисида» 1998 йил 24 февралдаги 77-сон қарорининг 6-бандига мувофиқ тугатилаётган Ўзбекбирлашув Ўзбекистон матлубот кооперацияси акциядорлик ва матлубот жамиятлари Марказий уюшмаси тасарруфидаги кооператив техникумлар ва коллежларни икки томонлама бўйсундирувга Ўзбекистон Республикаси Олий ва ўрта махсус таълим вазирлиги ҳамда 6-иловага* мувофиқ тегишли «Матлуботсавдо» ҳудудий акциядорлик компанияларига бериш мақсадга мувофиқ деб ҳисоблансин.

9. Ўзбекистон Республикаси Молия вазирлиги, Давлат солиқ қўмитаси, тегишли тижорат банклари ва ташкилотлар «Ўзбекбирлашув» ва Матлуботсавдо» акциядорлик компаниялари билан биргаликда икки ой муддатда хўжалик юритувчи субъектларнинг бюджетга тўловлар, кредитлар ва бошқа молиявий мажбуриятларга, шунингдек улар бўйича пенялар ва фоизларга оид қарзларини белгиланган тартибда қайта расмийлаштирсинлар.

10. Белгилансинки, Ўзбекбирлашув Марказий уюшмасини қайта ташкил этиш ва «Ўзулгуржимевасабзавот» акциядорлик компаниясини тугатиш даврида уларга раҳбарлик қилиш функцияси тегишли равишда Марказий уюшма раиси ва унинг ўринбосарлари, «Ўзулгуржимевасабзавот» акциядорлик компанияси бош директори зиммасида сақланиб қолади. Уларга тугатиш комиссияларини тузиш ҳамда тугатилаётган органларни, уюшмалар ва бирлашмаларни қонунчиликда белгиланган тартибда икки ой муддатда тугатиш топширилсин.

11. Вазирлар Маҳкамасининг Истеъмол бозори комплекси (М. Усмонов) Давлат мулки қўмитаси, Қорақалпоғистон Республикаси Вазирлар Кенгаши, вилоятлар ҳокимликлари, бошқа манфаатдор идоралар иштирокида бир ой муддатда таъсис мажлисларини ўтказсин ҳамда «Ўзбекбирлашув» акциядорлик компаниясининг ва «Матлуботсавдо» ҳудудий акциядорлик компаниялари устав жамғармаларининг шакллантирилишини таъминласин.

12. «Ўзбекбирлашув» акциядорлик компанияси, «Матлуботсавдо» ҳудудий акциядорлик компаниялари, Қорақалпоғистон Республикаси Вазирлар Кенгаши, вилоятлар ва туманлар ҳокимликлари Ўзбекистон Республикаси Вазирлар Маҳкамасининг «Қишлоқ аҳолисига савдо хизмати кўрсатиш масалаларида Ўзбекбирлашув фаолиятини яхшилаш чора-тадбирлари тўғрисида» 1997 йил 23 апрелдаги 208-сон қарорида белгиланган вазифалар ва талабларнинг сўзсиз бажарилишини таъминласинлар.

13. Ушбу қарорни бажариш билан боғлиқ ишларни мувофиқлаштириб бориш учун 7-иловага* мувофиқ таркибда комиссия тузилсин,

14. Ўзбекистон Республикаси Вазирлар Маҳкамасининг «Ўзбекистон Республикасида мевасабзавот маҳсулотларини улгуржи харид қилиш ва сотиш тизимини ривожлантириш тўғрисида» 1997 йил 21 февралдаги 98-сон қарори (9, 10, 11, 12, 13, 15-бандларидан ташқари) ўз кучини йўқотган деб ҳисоблансин.

15. Мазкур қарорнинг бажарилишини назорат қилиш Бош вазир ўринбосари М.3. Усмонов зиммасига юклансин.

(Ходимлар сони — 40 киши)

Ҳудудлар бўйича ходимларнинг тахминий сони:

Қорақалпоғистон Республикаси, Самарқанд, Фарғона, Тошкент вилоятлари — 30 кишидан;

Қашқадарё, Наманган, Сурхондарё вилоятлари — 25 кишидан;

Андижон, Бухоро, Жиззах, Навоий, Сирдарё, Хоразм вилоятлари — 20 кишидан.